მთავარი,სიახლეები

ბათუმის ყოფილი მერი გიორგი ერმაკოვი პატიმრობაში დატოვეს

16.10.2019 • 1560
ბათუმის ყოფილი მერი გიორგი ერმაკოვი პატიმრობაში დატოვეს

მოსამართლე დავით მამისეიშვილმა ბათუმის ყოფილი მერი გიორგი ერმაკოვი, ასევე მერიის ყოფილი მაღალჩინოსნები: არჩილ ვანაძე და ეგარსლან ლომაძე, წინასწარ პატიმრობაში დატოვა. გადაწყვეტილება რამდენიმე წუთის წინ გამოაცხადა მოსამართლემ.

მოსამართლის განმარტებით, ბათუმის მოქმედ მერს არ შეეძლო დამოუკიდებლად ბრალდებულებთან შეთანხმება. გარდა ამისა, გამამტყუნებელი განაჩენის შემთხვევაში, ბრალდებულები საცხოვრებელი სახლების გარეშე დარჩებოდნენ.

აღკვეთი ღონისძიების შეცვლის საკითხი მას შემდეგ გააქტიურდა, როცა პატიმრობაში მყოფი ბრალდებულები ბათუმის მერს ლაშა კომახიძეს შეუთანხმდნენ და მოსამართლეს 11 ოქტომბერს გამართულ სასამართლო სხდომაზე უთხრეს, რომ 384 ათასი ლარის უძრავ ქონებაზე შეუძლიათ ყადაღის დადება, თუკი მათ სასამართლო გირაოს საფუძველზე გაათავისუფლებს. მერიასთან გაფორმებული შეთანხმების მიხედვით, გამამატყუნებელი განაჩენის შემთხვევაში, სწორედ ამ ქონებიდან მოხდება ზიანის ნაწილის ანაზღაურება. გარდა ამისა, თითოეულმა ბრალდებულმა 100-100-ათასლარიანი გირაოს საფუძველზე ითხოვა წინასწარი პატიმრობიდან გათავისუფლება.

მერიის ყოფილ მაღალჩინოსნებს ჯამში 1 მილიონ 376 ათასი ლარის გაფლანგვას ედავება პროკურატურა.

სასამართლომ გუშინ, 15 ოქტომბერს, იმსჯელა აღკვეთი ღონისძიების შეცვლის საკითხზე. პროკურორ რამაზ შავაძის თქმით, მერია გასცდა თავისი კომპეტენციის ფარგლებს და მან შეღავათი დაუწესა ბრალდებულებს. გარდა ამისა, ზიანი ბევრად მეტია, ვიდრე იმ ქონების ფასი, რასაც შესაძლოა ყადაღა დაედოს. ბრალდებულების ადვოკატების თქმით კი, ლაშა კომახიძემ ამ შეთანხმებით გარანტიები შექმნა ბიუჯეტის სასარგებლოდ.

მოსამართლემ გუშინდელ სხდომაზე თქვა, რომ მას გარკვეული სამართლებრივი ანალიზისთვის დრო სჭირდებოდა.

ამ საქმეზე სულ 7 ბრალდებულია, თუმცა 24 სექტემბრის სხდომაზე სასამართლომ გირაოს საფუძველზე გაათავისუფლა: ბაგრატ მანველიძე, ბაგრატ ხალვაში, თენგიზ პეტრიძე და ვლადიმერ ხინთიბიძე.

გადაბეჭდვის წესი


ასევე: