გლეხს თამბაქოს დაფასოება აღარ დასჭირდება – ახალ წესს სამინისტრო ამუშავებს

დღეიდან, 21 ნოემბრიდან, დაუფასოებელი და მარკირების გარეშე თამბაქოს რეალიზაცია აკრძალულია. იმ ფერმერებისთვის კი, რომლებსაც თამბაქო სახლში მოჰყავთ, შემოსავლების სამსახურის ინფორმაციით, მუშავდება ახალი, განსხვავებული წესი. ეს წესი განსაზღვრავს, თუ რა ფორმით მოახდენს ფერმერი მის მიერ მოყვანილი თამბაქოს რეალიზაციას.

როგორც „ბათუმელებს“ შემოსავლების სამსახურში განუმარტეს, ფერმერს ექნება უფლება, მის მიერ მოყვანილი თამბაქო [ნედლეული] მიაწოდოს მწარმოებელს ყოველგვარი დაფასოებისა და მარკირების გარეშე, ისე, რომ ფერმერი არ გადაიხდის აქციზის გადასახადს. თუმცა, მწარმოებლების ნუსხა, ვისაც ფერმერმა თამბაქო უნდა მიაწოდოს, ჯერ განსაზღვრული არ არის.

ჩვეულებრივი მოვაჭრე, რომელიც დღეს გლეხისგან ყიდულობს თამბაქოს და შემდეგ ყიდის, მეწარმედ არ ჩაითვლება. შესაბამისად, მეთამბაქოე თავის მოყვანილ თამბაქოს ასეთ მოვაჭრეს ვერ ჩააბარებს [ვერ მიჰყიდის] და ის იმ მეწარმეების ნუსხას უნდა დაელოდოს, რომელსაც ფინანსთა მინისტრი განსაზღვრავს.

„თამბაქოს [როგორც სოფლის მეურნეობის პროდუქციის] მოყვანა და მხოლოდ დაფასოება არ ითვლება თამბაქოს წარმოებად. წარმოება სხვა პროცედურებს ითვალისწინებს… განისაზღვრება მწარმოებელთა სია, რომელსაც გამოაქვეყნებს შემოსავლების სამსახური. ეს საჯარო იქნება და ყველას, მათ შორის ფერმერს, ეცოდინება, რომ მან საკუთარ მეურნეობაში მოყვანილი თამბაქო ვის უნდა მიაწოდოს. ანუ, უნდა მიაწოდოს იმ პირს, რომელიც მწარმოებლად იწოდება და ამ ფერმერზე არ გავრცელდება დაფასოების, მარკირების ვალდებულება; ის არ გადაიხდის აქციზის გადასახადს. მხოლოდ მწარმოებელმა უნდა მიიღოს ადგილობრივი თამბაქო ფერმერისგან [გლეხისგან], ეს მწარმოებელი კი უზრუნველყოფს შემდგომში დამუშავებას, დაფასოებას, მარკირებას. აქციზის გადასახადსაც მწარმოებელი [რეალიზატორი] გადაიხდის და არა ფერმერი“, – გვითხრეს შემოსავლების სამსახურში.

შემოსავლების სამსახურში „ბათუმელებს“ ასევე უთხრეს, რომ საქართველოს ფინანსთა მინისტრს აქვს უფლება განსაზღვროს განსაკუთრებული შემთხვევები: „ასეთი შემთხვევა კი იქნება ის, რომ თამბაქო, დამზადების მიზნით, ფერმერისგან მიეწოდება მეწარმეს და ეს მიწოდება მოხდება დაუფასოებელი სახით, აქციზისა და მარკირების ვალდებულების გარეშე. მინისტრის ბრძანებით, პროექტი განხილვის ეტაპზეა და უახლოეს დღეებში გამოქვეყნდება. სწორედ ამ ბრძანებით დამტკიცდება რეალიზაციის განსხვავებული წესი იმათთვის, ვისაც საკუთარ მეურნეობაში მოჰყავს თამბაქო.“

რატომ არ განსაზღვრეს მწარმოებელთა, ასევე ფერმერის მიერ მოყვანილი თამბაქოს რეალიზაციის წესი ამ დრომდე? – ამ კითხვაზე პასუხი „ბათუმელებმა“ ფინანსთა სამინისტროსა და შემოსავლების სამსახურისგან ვერ მიიღო.

უნდა აღინიშნოს, რომ უშუალოდ ფერმერების გათავისუფლება აქციზის გადასახადისგან თუ დაფასოება-მარკირების ვალდებულებისგან, თამბაქოს ფასზე მაინც ნეგატიურად აისახება – თამბაქო გაძვირდება.

ამასთან, ახალი წესით, რომელიც მინისტრმა უნდა დაამტკიცოს, ჩვეულებრივი მეთამბაქოე ან მოვაჭრე, თამბაქოს ბაზარში ვეღარ გაყიდის. ფაქტობრივად, ასეთი აკრძალვა დღეიდან, 21 ნოემბრიდან, უკვე ძალაშია და დაუფასოებელი და მარკირების გარეშე თამბაქოს გაყიდვა დაჯარიმებას გამოიწვევს.

– – –

2019 წლის 21 ნოემბრიდან, აიკრძალა დაუფასოებელი სახით ნებისმიერი თამბაქოს ნაწარმის, მათ შორის თამბაქოს ნედლეულის, ჩიბუხის თამბაქოს, შესახვევი თამბაქოს, ასევე ჩილიმისათვის განკუთვნილი თამბაქოს რეალიზაცია და მიწოდება.

აღნიშნული ნაწარმის რეალიზაცია დასაშვებია მხოლოდ იმ შემთხვევაში, თუ იგი დაფასოებულია ნეტო-მასით 50 ან 100-გრამიან პირველად საფუთავებში. აღნიშნული წესით დაფასოებული თამბაქო კი უნდა იყოს დადგენილი წესით აქციზური მარკით ნიშანდებული.

თამბაქოს ნაწარმის თითოეულ კოლოფსა/ბლოკსა და თითოეულ შეფუთვაზე, განთავსებული უნდა იყოს სამედიცინო გაფრთხილება და დაცული უნდა იყოს „თამბაქოს კონტროლის შესახებ“ საქართველოს კანონით გათვალისწინებული სხვა მოთხოვნები.

[yellow_box]ამ თემაზე: 21 ნოემბრიდან იკრძალება დაუფასოებელი სახით ნებისმიერი თამბაქოს მიწოდება და რეალიზაცია[/yellow_box]

საქართველოს საგადასახადო კოდექსში შეტანილი ცვლილებით კი 1 კილოგრამ თამბაქოზე აქციზის გადასახადი 60 ლარია.

წყარო: საგადასახადო კოდექსი

თამბაქოს დაუფასოებელი სახით გაყიდვის აკრძალვას და აქციზის გადასახადის შემოღებას შუახევის, ხულოსა და ქედის მეთამბაქოეების საპროტესტო აქციები მოყვა. გლეხების თქმით, თუკი ეს რეგულაცია არ შეიცვლება თამბაქოს აღარავინ მოიყვანს, ეს კი მათ სოციალურ-ეკონომიკურ მდგომარეობას კიდევ უფრო დაამძიმებს.

ამ თემაზე:

მწეველები ფილტრიანი სიგარეტიდან გასახვევ თუთუნზე გადადიან – რატომ არის თუთუნი იაფი