აბუსერიძის ქუჩა რესპუბლიკურთან მინიმუმ ერთი თვე გადაკეტილი იქნება


აბუსერიძის ქუჩა „რესპუბლიკურ საავადმყოფოსთან“ მთლიანად გადაიკეტა. ბოლო ხუთი თვის განმავლობაში ამ მონაკვეთში ცალმხრივი მოძრაობა იყო. გადაკეტილია ჯავახიშვილისა და აბუსერიძის ქუჩების კვეთაც. ამ ტერიტორიაზე საკანალიზაციო მილი და ჯავახიშვილის ქუჩის სანიაღვრე არხი კეთდება. ბათუმის მერიის ინფორმაციით, აბუსერიძის ქუჩა მინიმუმ ერთი თვის განმავლობაში იქნება ჩაკეტილი. „დამოკიდებული ვართ ამინდზე,“ – გვითხრეს მერიაში.

აღნიშნული სამუშაოების გამო თითქმის პარალიზებულია ავტომობილების, შესაბამისად, მუნიციპალური და სამარშრუტო მიკროავტობუსების მოძრაობა. გადატვირთულია მოძრაობა გრიბოედოვის, გორგასლის, პუშკინის ქუჩებზე.

საკანალიზაციო ქსელის სამუშაოები აბუსერიძის ქუჩაზე ივნისში უნდა დასრულებულიყო, თუმცა სამუშაოები დღესაც გრძელდება.

აბუსერიძის ქუჩიდან მომავალი ტრანსპორტი, ვინაიდან „რესპუბლიკურთან“ ვერ გაივლის, ჭავჭავაძის ქუჩაზე ორი მარშრუტით გადის. პირველი: ლორია-პუშკინი-გრიბოედოვი-ჭავჭავაძე, და მეორე: ჟიული შარტავა-ფიროსმანი-ჯავახიშვილი-გორგასალი-გრიბოედოვი-ჭავჭავაძე. იმავე მარშრუტით, ოღონდ პირიქით მოძრაობს ტრანსპორტი, რომელიც ჭაჭავაძისა თუ გორგილაძის ქუჩებიდან „რესპუბლიკურის“ გავლით „კარფურთან“ გადიოდნენ.

„ბათუმელების“ ინფორმაციით, ჯავახიშვილისა და აბუსერიძის ქუჩების კვეთაში სამუშაოების დასრულების და გზის გახსნის შემდეგ ჩაიკეტება პუშკინისა და ჯავახიშვილის კვეთა [აქ ჯავახიშვილის ქუჩის სანიაღვრე არხის იქეთ-აქეთ აშენებული ნაწილები დაერთდება ერთმანეთზე], ამის შემდეგ ჩაიკეტება ჯავახიშვილის ქუჩა გორგასალსა და ფიროსმანის ქუჩებს შორის, შემდეგ კი  – შერიფ ხიმშიაშვილის ქუჩა [აქ სანიაღვრე არხი დაერთდება არდაგანის ტბასთან მშენებარე სატუმბ სადგურზე] – ამით ჯავახიშვილის არხის მშენებლობა დასრულდება.

აბუსერიძის ქუჩა [გრიბოედოვიდან „კარფურამდე“] მთლიანად გადაიკეტა / 9.09.2019

აბუსერიძისა და ჯავახიშვილის ქუჩების კვეთა / 9.09.2019

აბუსერიძის ქუჩა „რესპუბლიკურის“ პირდაპირ / 9.09.2019

ჯავახიშვილის ქუჩა [გორგასლისა და აბუსერიძის ქუჩებს შორის] / 9.09.2019

გრიბოედოვისა და გორგასლის ქუჩების კვეთაში თითქმის მუდმივად საცობია / 9.09.2019

 

ამ თემაზე:

რა მონაკვეთში გადაიკეტა და როდის აღდგება მოძრაობა სრულად ჯავახიშვილის ქუჩაზე

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com