ნეტგაზეთი • RU

რამდენი საჩივარი და შენიშვნა დაწერა საიამ ბათუმში

ახალგაზრდა იურისტთა ასოციაციამ ბათუმში, საარჩევნო უბნების გახსნიდან 12:00 საათამდე ცხრა საჩივარი  და სამი შენიშვნა დაწერა.

საჩივრები ძირითადად შეეხება პროცედურულ დარღვევებს. „დილით ეს შეეხებოდა წილისყრის პროცედურების დარღვევას და ასევე იმას, რომ გადასატან საარჩევნო ყუთს არ მიყვებოდნენ ის კომისიის წევრები, რომლებსაც შეხვდათ ფუნქცია, რომ გაყოლოდნენ ყუთს“ – გვეუბნება საია აჭარის ფილიალის ხელმძღვანელი ანნა მდინარაძე.

მისივე ინფორმაციით, ბათუმში დაფიქსირდა შემთხვევა, როცა უბანზე არ მუშაობდა მარკირების შესამოწმებელი ფანარი, #14 უბანზე კი ამომრჩეველს მარკირების შემოწმების გარეშე მიეცა ხმის მიცემის უფლება.

საიას ინფორმაციით, #41-ე საარჩევნო უბანზე არაუფლებამოსილი პირები იმყოფებოდნენ, ხოლო #6-ე უბანზე ამომრჩეველმა კონვერტი ძირითადი საარჩევნო ყუთის ნაცვლად გადასატან ყუთში ჩააგდო.

რაც შეეხება შენიშვნებს, ანნა მდინარაძის თქმით, ერთი შენიშვნა დაიწერა ქობულეთში, წყავროკას საარჩევნო უბანზე ბიულეტენებში იყო ბეჭდური წუნი და საიამ მოითხოვა, რომ ეს ხარვეზი აღმოეფხვრათ.

„მეორე შენიშვნა დაიწერა იმაზე, რომ სამაგიდო სიები არ იყო დალუქული მესამე შენიშვნა, საჩივრის შემდეგ, გაუმართავ ფანართან დაკავშირებით გავაკეთეთ“.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com