ერთიანი ნაციონალური მოძრაობის წევრის, რეზო ხარაზის განცხადებით, ქობულეთის მუნიციპალიტეტის მერიამ ჩაქვში მეშვიდე მიკრორაიონში მდებარე შენობის რეაბილიტაციისთვის 72 ათასი ლარი გამოყო, ჩატარდა გარკვეული სამუშაოები, თუმცა შენობა საცხოვრებლად მაინც გამოუსადეგარია.
შენობაში სოციალურად დაუცველ ოჯახებს უნდა ეცხოვრათ.
ენმ-ს განცხადებით, ამ სახლის რეაბილიტაციაზე ბიუჯეტიდან 72 ათასი ლარი დაიხარჯა.
„საცხოვრებელ სახლში ძალიან დაბალი დონის სამუშაოები ჩატარდა, თუმცა დღეს პრაქტიკულად განადგურებულია. ეს არის სისხლის სამართლის დანაშაული, რადგან არაეფექტურად დაიხარჯა ბიუჯეტის თანხები. სავარაუდოდ, ხელი მოითბეს ამ ყველაფერზე“ – ამბობს რეზო ხარაზი.
მისი თქმით, სახეზეა ასევე თანამდებობრივი გულგრილობაც, რადგან არ მოხდა სამუშაოების კონტროლი: „დღემდე არავინ მისულა და არ მოუკითხავს ამ სახლის ამბავი“.
შენობის ინტერიერი, ტენდერით გათვალისწინებული სამუშაოების ჩატარების შემდეგ / ფოტო ენმ
ქობულეთის მერიის ინფრასტრუქტურის სამსახურის უფროსი ზაზა კაიკაციშვილი „ბათუმელებთან“ საუბარში აცხადებს, რომ აღნიშნული სახლის ნაწილობრივ რეაბილიტაციისთვის 2015 წელს 70 ათას ლარამდე მართლაც გამოიყო თანხა:
„ამით გადაიხურა შენობა, გაკეთდა ტიხრები, ჩაისვა კარ-ფანჯრები და ნაწილობრივ შებათქაშდა“, თუმცა, როგორც აღმოჩნდა სახლი საცხოვრებლად მაინც გამოუსადეგარი იყო, რადგან შენობას არ ჰქონდა საკანალიზაციო სისტემა.
ზაზა კაიკაციშვილის თქმით, 2017 წელს, ჩაქვში იყო ძლიერი ქარი, რის გამოც დაზიანდა სახურავი, შენობაში კი წყალი ჩადიოდა: „ამან გამოწვია კედლების დაზიანებაც“ – ამბობს ის.
ზაზა კაიკაციშვილის განცხადებით, ჩასატარებელი სამუშაოები შესწავლილია და დათვლილია ბიუჯეტიც: „დაახლოებით 80 ათასი ლარი დასჭირდება იმას, რომ სახლი გადაიხუროს, კარები გამოიცვალოს და საკანალიზაციო სისტემა მოეწყოს. შენობის რეაბილიტაცია 2019 წლისთვის არის დაგეგმილი“.
