Batumelebi | დოკუმენტური ფილმები, რომლებსაც წელს ბათუმის კინოფესტივალზე ნახავთ დოკუმენტური ფილმები, რომლებსაც წელს ბათუმის კინოფესტივალზე ნახავთ – Batumelebi

დოკუმენტური ფილმები, რომლებსაც წელს ბათუმის კინოფესტივალზე ნახავთ

საავტორო კინოს ბათუმის მე-13 საერთაშორისო ფესტივალზე დოკუმენტური ფილმების საკონკურსო სექციაში წელს 8 ფილმს აჩვენებენ. ფესტივალი 16-23 სექტემბერს გაიმართება ბათუმში. კინოჩვენებებზე დასწრება უფასოა.

ეს კი ის დოკუმენტური ფილმებია, რომელთა ნახვაც წელს ბათუმის კინოფესტივალზე შეგიძლიათ:

სიცოცხლის კიდევ ერთი დღე“

დამიან ნენოვისა და რაულ დე ლა ფუენტეს დოკუმენტური სურათი პოლონელი ომის რეპორტიორის, რიშარდ კაპუცკინსკის მოგზაურობაზეა ანგოლაში და 70-იანი წლების ომზე, რომელიც ამ ქვეყანაში მძვინვარებდა. ფილმი ანიმაციისა და დოკუმენტური კინოს სინთეზია.

დროის ხიდები“

„დროის ხიდები“ ლატვიელი რეჟისორების, ოდრიუს სტონისა და ქრისტინა ბრიდეს 2017 წელს გადაღებული ფილმია ბალტიისპირა ქვეყნების დოკუმენტური კინოს ისტორიის შესახებ. ფილმი წელს კარლოვი-ვარის კინოფესტივალზე აჩვენეს.


შორეული თანავარსკვლავედი“

აშშ-ში დაბადებული, წარმოშობით თურქი რეჟისორის, შევაუნ მიზრაჰის დოკუმენტური ფილმი არამხოლოდ სტამბულის მოხუცთა თავშესაფარში მცხოვრებ ადამიანებზეა, არამედ დროზეც, რომელიც ამ შენობაში თითქოს არ იძვრის. გასულ წელს ფილმმა ლოკარნოს კინოფესტივალის სპეციალური ჯილდო მიიღო.

მშიერი აჩრდილების კუნძული“

გერმანელი რეჟისორის, გაბრიელ ბრადის დოკუმენტური ფილმი ავსტრალიაში, შობის კუნძულზეა გადაღებული. წელს ფილმმა რამდენიმე კინოფესტივალზე მოიპოვა ჯილდო, მათ შორის ედინბურგის საერთაშორისო კინოფესტივალის ჟიურიმ რეჟისორს სპეციალური პრიზი გადასცა „ახალი, რადიკალური ხედვისთვის დევნილების კრიზისზე“.

მამების და შვილების შესახებ“

დამასკოში დაბადებული, ამჟამად გერმანიაში მცხოვრები ტელე და კინორეჟისორის, ტალალ დერკის 2017 წელს გადაღებული დოკუმენტური ფილმი რადიკალი ისლამისტების ოჯახის ცხოვრებაზე გვიამბობს. ფილმმა 2018 წელს სხვადასხვა კინოფესტივალის 6 ჯილდო მოიპოვა.

ზღვარს მიღმა“

პოლონელი რეჟისორის, მარტა პრუსის ფილმი 20 წლის რიტაზეა, რომელიც ოლიმპიური თამაშებისთვის ემზადება. მისგან მწვრთნელები სულ უფრო და უფრო მეტს მოელიან.

შამანური გაკვეთილები დამწყებთათვის“

რუსი რეჟისორის, სვეტლანა სტაცენკოს 2017 წელს გადაღებული ფილმი.

ორსონ უელსის თვალები“

ირლანდიელი რეჟისორის მარკ კუსინსის ფილმმა წელს კანის კინოფესტივალის პრიზი – „ოქროს თვალი“ მიიღო.

წელს კინოფესტივალზე, სხვადასხვა სექციაში, წარმოდგენილი იქნება 40-მდე სრულმეტრაჟიანი მხატვრული და დოკუმენტური ფილმი და 40 მოკლემეტრაჟიანი ფილმი 30 ქვეყნიდან.

ფესტივალის კინოჩვენებები კინოთეატრ „აპოლოში“, სასტუმრო Wyndham-ის საკონფერენციო დარბაზსა და ღია ცის ქვეშ, ევროპის მოედანზე გაიმართება.

ბათუმის საერთაშორისო კინოფესტივალი 2006 წელს დაარსდა და მისი ორგანიზატორია ბათუმის ხელოვანთა სახლი „არგანი“, ოფიციალური პარტნიორი კი – ბათუმის მერია.

__________

მთავარი ფოტო: კადრი ფილმიდან „სიცოცხლის კიდევ ერთი დღე“. ფოტო: imdb.com

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com