დღეს, 16 მაისს, ბათუმში სახვითი ხელოვნების საერთაშორისო ფესტივალი „წელიწადის ოთხი დრო – მეგობრობის პალიტრა ბათუმი 2018“ იწყება.
ფესტივალი ათ დღეს გაგრძელდება, მასში ექვსი ქართველი და ოთხი უცხოელი მხატვარი მიიღებს მონაწილეობას და 26 მაისს, საქართველოს დამოუკიდებლობის დღეს, გამოფენით დასრულდება.
როგორც ფესტივალის ერთ-ერთი ორგანიზატორი, გიორგი გუგუშვილი, „ბათუმელებთან“ ამბობს, მხატვრები 40-მდე ფერწერულ ნამუშევარს სამხატვრო სახელოსნოში დახატავენ. აქედან ათი ნამუშევარი ზეთში, ტილოზე იქნება შესრულებული, დანარჩენი კი – მუყაოზე, აკრილით.
დასრულებული ნამუშევრები ბათუმის ხელოვნების მუზეუმის გალერეაში გამოიფინება. გიორგი გუგუშვილის თქმით, ნამუშევრები აჭარის განათლებისა და კულტურის სამინისტროს გადაეცემა.
ორგანიზატორთა ინფორმაციით, ვერნისაჟზე პროექტორით დემონსტრირებული იქნება ფესტივალის ოთხივე პლენერის ამსახველი ფოტოკოლაჟი. გამოფენა კი მუსიკალურად ვივალდის „წელიწადის ოთხი დროს“ აუდიოჩანაწერით გაფორმდება.
ფესტივალის ბიუჯეტი 11 ათასი ლარია.
