“აქტიურად მიმდინარეობს ურთიერთობა ცენტრალურ შტაბთან თბილისში. შეგროვდა სურსათი, ჰიგიენის საშუალებები და საყოფაცხოვრებო ნივთები, რომლითაც 300-მდე დაზარალებულ ოჯახს უზრუნველვყოფთ პირველადი საჭიროების ნივთებითა და საკვებით. დიდი მადლობა მინდა გადავუხადო აჭარის მცხოვრებთ, რომლებმაც დახმარება გაუწიეს დაზარალებულებს,“ – განაცხადა არჩილ ხაბაძემ.
ჰუმანიტარული ნივთები ქალაქ ბათუმის ადმინისტრაციულ ერთეულებში სპეციალურად შექმნილ შტაბებში იყრიდა თავს. აღნიშნულ ობიექტებზე მოსახლეობას ამ დრომდე მიაქვს დახმარება. ასევე 45 000 ლარის სურსათი შეიძინა ინვესტორთა ასოციაციამ, რომელიც დღეს თბილისში გაიგზავნება. დახმარების სურვილი გამოთქვეს აჭარაში მოქმედმა ქართველმა და უცხოელმა ბიზნესმენებმა, რომლებმაც თანხა გადარიცხეს შესაბამის ანგარიშზე.
„მადლობა მინდა გადავუხადო ყველას, არ წყდება მოხალისეთა ნაკადი, რომლებიც რეგისტრირდებიან და საჭიროების შემთხვევაში თბილისში ფიზიკურ დახმარებას გაწევენ. ასევე მოაქვთ საჭირო ნივთები და პროდუქტები, რომლებსაც ვახარისხებთ და პერიოდულად ვაგზავნით თბილისში“ – აღნიშნა გიორგი ერმაკოვმა. აჭარის მთავრობაში შემავალი სტრუქტურების და თვითმმართველობების თანამშრომლებმა საკუთარი ხელფასიდან 60 000 ლარი უკვე შეაგროვეს, რასაც კვირის ბოლომდე კიდევ დაემატება ფინანსური შემოწირულობა და 100 000-მდე გაიზრდება. ინფორმაცია თანამშრომლების მიერ სრული ხელფასის გაღებაზე არაზუსტია.
