გერმანიის ელჩი პეტერ ფიშერი ბათუმში თავდასხმის დეტალებს იხსენებს „tv პირველთან“.
„ბათუმში ჩვენ თევზის ბაზრის სიახლოვეს გადავადგილდებოდით. მოულოდნელად ვიღაც ბიჭი გამოჩნდა და ყვირილი დამიწყო. ჩვენ ქართველებთან ერთად ვიყავით, მათ უთხრეს, რომ გაჩუმებულიყო და წასულიყო.
ქართველების გვერდით დგომამ ძალიან გამახარა, მას არავინ შეუერთდა და ექვსმა-შვიდმა ადამიანმა უთხრა, რომ ადგილი დაეტოვებინა და ისიც წავიდა.
მე მადლიერი ვარ სოლიდარობის მესიჯებისთვის, ასეთი ინციდენტები გავლენას ვერ მოახდენს საქართველოსა და გერმანიის ურთიერთობაზე.
უნდა ითქვას, რომ ჩვენი მეგობრობა ახლა პრობლემურია, მაგრამ ჩვენი მეგობრობის შემოთავაზება ძალაშია.
მინდა ვთქვა, რომ პარტნიორობას ორი მხარე სჭირდება. ჩვენ პოზიცია არ შეგვიცვლია, ჩვენ გთავაზობთ ევროკავშირის წევრობას. 20 წელია კარგი პარტნიორობა გვაკავშირებს და ჩვენ ამის გაგრძელება გვინდა“ – განაცხადა პეტერ ფიშერმა. / tv-პირველის თარგმანი.
გერმანიის ელჩი ბათუმში რამდენიმე დღით იმყოფებოდა. ის საქალაქო სასამართლოში „ბათუმელების“ დამფუძნებლის, ჟურნალისტისა და მედიამენეჯერის, მზია ამაღლობელის სასამართლო პროცესს ესწრებოდა და ასევე, ბათუმში შეხვდა მედიისა და არასამთავრობო სექტორის წარმომადგენლებს.
პროპაგანდისტულმა არხმა POSTV- მ გაავრცელა ვალერი ქოჩიაშვილის ვიდეო, სადაც ის ამაყად ამბობს, რომ 18 მაისს, ბათუმში გერმანიის ელჩს, პეტერ ფიშერს შეხვდა და აგინა.
ინციდენტს საქართველოს მეხუთე პრეზიდენტი სალომე ზურაბიშვილიც გამოეხმაურა. მისი შეფასებით, მოქალაქე ვალერი ქოჩიაშვილმა ამ ინციდენტით არა მარტო ელჩს, არამედ საქართველოსაც მიაყენა შეურაცხყოფა.
„ეს არის ის ქვეყანა, რომელმაც მხარი დაგვიჭირა და რომლის როლი იყო გადამწყვეტი იმ დროს, როცა მივიღეთ კანდიდატის სტატუსი ევროკავშირში შესასვლელად. გერმანიის გარეშე არ არსებობს ინტეგრაციის პროცესი“ – განაცხადა სალომე ზურაბიშვილმა.
ამავე თემაზე:
