უკრაინული გამოცემა „უკრაინსკა პრავდა“ წყაროზე დაყრდნობით წერს, რომ რუსეთის მიერ ოკუპირებულ სევასტოპოლში ლიკვიდირებული იქნა რუსეთის შავი ზღვის ფლოტის სარაკეტო გემების შტაბის უფროსი ვალერი ტრანკოვსკი.
წყაროს ცნობით, რუსეთის შავი ზღვის ფლოტის სარაკეტო გემებისა და კატარღების 41-ე ბრიგადის შტაბის უფროსის, ტრანკოვსკის მანქანის აფეთქება უკრაინის უსაფრთხოების სამსახურის წარმატებული სპეცოპერაცია იყო.
„ტრანკოვსკი არის ომის დამნაშავე, რომელმაც ბრძანება გასცა შავი ზღვიდან ფრთოსანი რაკეტების გაშვებაზე უკრაინის სამოქალაქო სამიზნეებზე, კერძოდ, 2022 წლის ივლისში მან ესროლა ვინიცას და სხვა მშვიდობიან ქალაქებს, რის გამოც მრავალი მშვიდობიანი მოქალაქე დაიღუპა. ის იყო აბსოლუტურად ლეგიტიმური სამიზნე ომის კანონების თვალსაზრისით“ – ციტირებს „უკრაინსკა პრავდა“ წყაროს.
რუსული მედიის ცნობით, აფეთქება სევასტოპოლში დღეს, 13 ნოემბერს მოხდა, ხელნაკეთი ასაფეთქებელი მოწყობილობა სავარაუდოდ დისტანციურად აფეთქდა, რის შედეგადაც ერთი სამხედრო მოსამსახურე დაიღუპა. რუსული მედია არ აკონკრეტებს დაღუპულის ვინაობას.
_________
ფოტოზე: ოკუპირებულ სევასტოპოლში აფეთქებული მანქანა. წყარო: X
