გასულ წელს საგზაო მოძრაობის წესების დარღვევისათვის ბათუმის ბიუჯეტში 8 მილიონ 856 ათას 100 ლარი შევიდა. ეს თანხა არ ასახავს საპატრულო პოლიციის [ასევე სათვალთვალო ვიდეოკამერების] მიერ ბათუმში გამოწერილი ჯარიმების სრულ მონაცემებს, რადგან კანონის შესაბამისად ჯარიმებიდან შემოსული თანხის მხოლოდ 60 პროცენტი შედის ბათუმის ბიუჯეტში, 40 პროცენტი კი – ცენტრალურ ბიუჯეტში.
ეს იმას ნიშნავს, რომ გასულ წელს ბათუმში გამოწერილი საპატრულო ჯარიმების ოდენობამ 13 მილიონს გადააჭარბა.
ბათუმში არანაკლებ მწვავე პრობლემაა პარკინგი, თუმცა „ავტომობილის გაჩერების წესების გათვალისწინებული მოთხოვნების დაუცველობისათვის“ გამოწერილი ჯარიმებიდან ბიუჯეტში გასულ წელს 50 000 ლარი შესულა.
ქალაქში, სადაც ავტომანქანას წესების დარღვევით უფრო ხშირად აჩერებენ, ვიდრე წესების დაცვით, როგორც ჩანს, მუნიციპალური ინსპექციის შესაბამისი სამსახური სათანადოდ ვერ რეაგირებს, ან „ერიდება“, რადგან ბათუმში ავტომანქანის გასაჩერებელი ადგილი აღარ არის. ეს მუნიციპალურ ინსპექციაში კარგად იციან და თავადაც არღვევენ წესებს იმ მოტივით, რომ „მეტი ადგილი არ იყო.“
2025 წლის ბიუჯეტის პირველი კვარტლის შესრულების მიმოხილვის მიხედვით კი ბათუმის მერიამ 3 თვეში სანქციების, ჯარიმებისა და საურავების სახით 2 მილიონ 946 100 ლარი ამოიღო. ჯარიმები პირველი კვარტლის მიმოხილვის ანგარიშში დიფერენცირებული არ არის.
გასული წლის ანგარიშის მიხედვით შეგვიძლია ვივარაუდოთ, რომ წელსაც, საჯარიმო თანხებს შორის ყველაზე დიდი წილი სწორედ კანონდამრღვევი მძღოლების მიერ გადახდილი თანხით შეგროვდება.
ამავე თემაზე:
