„ჩინური კალაძე ხარ ჩვეულებრივი“ – უთხრა აჭარის უმაღლესი საბჭოს სხდომაზე დღეს, 15 ივნისს ენმ-ს დეპუტატმა, ელგუჯა ბაგრატიონმა თორნიკე რიჟვაძეს. აჭარის მთავრობის თავმჯდომარემ დღეს უმაღლეს საბჭოს ანგარიში ჩააბარა.
თორნიკე რიჟვაძემ ოპოზიციას უსაყვედურა იმ ტრანსპარანტებისთვის, რაც ოპოზიციის მხარდამჭერებმა გამოფინეს უმაღლეს საბჭოსთან სხდომის მიმდინარეობის დროს: „კადიროვის მასპინძელო“, „ჩმორნიკე“. ამ აქციაზე თორნიკე რიჟვაძეს „ნუგზარ ფუტკარაძის საქმის“ დროულად გამოძიება მოსთხოვეს.
„მასე თუ აპირებ ხელისუფლების შენარჩუნებას, ხალხი ამას აღარ გაპატიებს, ასე რომ, ცოტა მოზომილი იყავი. ადამიანის სიცოცხლე შეიწირეთ წაგებული არჩევნების უკან დასაბრუნებლად, უმრავლესობა ოპოზიციამ მოიგო, ძალიან კარგად იცი, გინდოდა, რომ შენი მეჯვარე გაგეხადა მერი და საკრებულო დაგებრუნებინა, ყველაფერზე წახვედით და ამბობთ, რომ ამას გააგრძელებთ… კონსტრუქციულ თანამშრომლობას ითხოვთ. ისე ნუ გააკეთებთ, რომ ქალაქში ვერ გაიაროთ საერთოდ,“ – მიმართა თორნიკე რიჟვაძეს ელგუჯა ბაგრატიონმა.
„რა ლაპარაკია ახლა ეს?“ – რეპლიკით ჩაერთო დიალოგში ტიტე აროშიძე, დეპუტატი „ქართული ოცნებიდან“.
„ჩვენ აქამდე გაგვივლია, აწიც გავივლით,“ – უთხრა ოპოზიციონერს თორნიკე რიჟვაძემ.
„სად გაგივლია, ისიც ვიცი ძალიან კარგად, ახლაც ვხედავ, როგორ დადიხარ. სულ ასე ვერ გეყოლება პოლიცია, მამა ვერ გეყოლება სულ პოლიციის მაღალჩინოსანი, გარშემორტყმული პოლიციით და დაცვით ვერ ივლი. აგრესიას და სიძულვილის ენას იყენებ ყოველი ფეხის ნაბიჯზე და ითხოვ კონსტრუქციულ საუბარს. ჩინური კალაძე ხარ ჩვეულებრივი“ – აღნიშნა ელგუჯა ბაგრატიონმა.
„მაგრამ სამაგიეროდ მე დასკვნა გამოვიტანე, თქვენ ვის ბაძავთ,“ – უპასუხა მას თორნიკე რიჟვაძემ.
