უკრაინის პრეზიდენტის მრჩეველი, მიხაილო პოდოლიაკი, რუსეთის საგარეო საქმეთა მინისტრის მოადგილის, ანდრეი რუდენკოს განცხადებას გამოეხმაურა. ანდრეი რუდენკომ რუსულ საინფორმაციო სააგენტოებთან განაცხადა, რომ რუსეთი მზადაა სურსათით დატვირთულ გემებს უსაფრთხო დერეფანი შესთავაზოს უკრაინის დასატოვებლად. სამაგიეროდ, მოითხოვა რუსეთის წინააღმდეგ ექსპორტსა და ფინანსურ ტრანზაქციებზე დაწესებული გარკვეული სანქციები მოხსნა.
მიხაილო პოდოლიაკი „ტვიტერზე“ გამოქვეყნებულ პოსტში იხსენებს დასავლეთის მიერ დაწესებულ სანქციებზე რუსეთის განცხადებებს, რომ ეს სანქციები „დიდი ბედნიერება და საჩუქარია ეკონომიკისთვის“.
„კრემლი აცხადებდა, რომ სანქციები დიდი ბედნიერება და საჩუქარია ეკონომიკისთვის. ახლა რუსეთის საგარეო საქმეთა სამინისტრო პორტების განსაბლოკად სანქციების მოხსნას ითხოვს. თუ სანქციები გაძლიერებთ, რატომ უნდა მოიხსნას? ბატონო რუდენკო, ყველაფერი გეგმის მიხედვით მიდის, არა?!“ – წერს უკრაინის პრეზიდენტის მრჩეველი.
The Kremlin has been saying that sanctions — great happiness and a gift to the economy. Now, @MFA_Russia demands to lift sanctions to unblock ports. If sanctions make you stronger, why to lift them? Everything is going according to the plan, Mr. Rudenko, isn’t it?
— Михайло Подоляк (@Podolyak_M) May 25, 2022
უკრაინა ხორბლის, სიმინდისა და მზესუმზირას ზეთის ერთ-ერთი მთავარი ექსპორტიორია. რუსეთის თავდასხმის შემდეგ შეჩერებულია უკრაინიდან ტვირთის ზღვით გატანა. ამ ვითარებას საერთაშორისო ექსპერტები და პოლიტიკოსები გლობალური სასურსათო კრიზისის საფრთხედ აფასებენ. დასავლური ქვეყნები სურსათის უკრაინიდან გასატანად „უსაფრთხო დერეფნის“ შექმნის საჭიროებაზე საუბრობენ, თუმცა ყველა აღიარებს, რომ ეს რუსეთის თანხმობის გარეშე ვერ მოხერხდება.
როგორც რუსული მედია ციტირებს რუდენკოს, იგი ასევე მოითხოვს „უკრაინამ განაღმოს ყველა პორტი, სადაც გემები დგას“.
ოფიციალური კიევი რუსეთს პორტების დანაღმვასა და ხორბლის ქურდობაში სდებს ბრალს. უკრაინის ოფიციალურმა წარმომადგენლებმა განაცხადეს, რომ სურსათის გლობალურ კრიზისზე პასუხისმგებლობა რუსეთს ეკისრება. სურსათის ფასი გლობალურად იზრდება, ხოლო უკრაინაში, როგორც დასავლელი ლიდერები აცხადებენ, ტონობით ხორბალია, რომელიც ექსპორტზე ვერ გადის.
__________
ამავე თემაზე:
ყირიმის პორტში რუსული გემები უკრაინიდან მოპარული ხორბლით დაიტვირთა – CNN
