ბათუმის 2019 წლის ბიუჯეტში ცვლილებები შედის. პროექტის თანახმად , რომელსაც საკრებულო დღევანდელ სხდომაზე განიხილავს, ხარჯვით ნაწილში ბიუჯეტი 7 მილიონ 675 ათას 200 ლარით გაიზრდება. ძირითადი თანხა გადანაწილდა მრავალწლიანი გარდამავალი ღონისძიებების ზრდასა და ახალ მუნიციპალურ პროექტებზე, მათ შორის:
- მრავალსართულიან/მრავალბინიან სახლებში არსებული ამორტიზებული ლიფტების დემონტაჟი და ახალი ლიფტების მონტაჟი
- ახალი ლითონის ჭიშკრების შეძენა/მონტაჟი
- მრავალსართულიანი/მრავალბინიანი სახლების სადარბაზოებში სადარბაზოს კარებისა და ელექტროსაკეტების მოწყობა
- ბათუმის ტერიტორიაზე არსებული ავარიული სახლების ექსპერტიზა
- პარკების, მოედნების, სკვერების, ეზოებისა და სპორტული მოედნების მოწყობის სამუშაოების საპროექტო-სახარჯთაღრიცხვო დოკუმენტაციის შედგენა [იზრდება დაფინანსება]
- სტიქიის შედეგად დაზიანებული ინფრასტრუქტურის აღდგენის სამუშაოების საპროექტო-სახარჯთაღრიცხვო დოკუმენტაციის შედგენა [იზრდება დაფინანსება]
- ბათუმის ბოტანიკურ ბაღში არსებული სკვერის – ნეკერჩხლის პარტერის სარეაბილიტაციო სამუშაოები და გარე გამოყენების ქსელური კამერების შესყიდვა-მონტაჟი
- ბათუმის ღია ტურნირი თავისუფალ ჭიდაობაში-შავი ზღვის თასი [დაემატა ახალი ღონისძიება]
- თავდადებულის ქ. #35-ში მდებარე შენობის [კულტურული მემკვიდრეობის ძეგლის] რეაბილიტაცია. პროექტი განხორციელდება 2019-2020 წწ-ში. ბიუჯეტი – 965,595 ლარი
- ღვიძლის ტრანსპლანტაციის საჭიროების მქონე პირთა დახმარება [დაფინასება იზრდება]
- 18 წლის ასაკის ჩათვლით შშმ მოვლის საჭიროების მქონე პირთა მატერიალური დახმარება – ითვალიწინებს 50 ბენეფიციარისთვის მატერიალური დახმარების გაწევას
გარდა ამისა, დღეს უნდა დაამტკიცონ „2019 წლისათვის ინფრასტრუქტურული ღონისძიებების განხორციელების შესახებ“ ბათუმის მუნიციპალიტეტის საკრებულოს განკარგულება, რომელიც ითვალისწინებს ინფრასტრუქტურული ღონისძიებების დაფინანსებისათვის საჭირო თანხის გამოყოფას აჭარის რესპუბლიკური ბიუჯეტიდან, მუნიციპალიტეტებში განსახორციელებელი პროექტების ფონდიდან.
ამ ფონდიდან ინფრასტრუქტურული სამუშაოების ფარგლებში განხორციელდება: ანბანის კოშკის მიმდებარე ტერიტორიის რეაბილიტაცია – ბიუჯეტი 1 მილიონ 999 ათას 987 ლარი და ლერმონტოვის ქუჩის #96-ის მიმდებარედ ახალი საბავშვო ბაღის მშენებლობა.
__________
მთავარ ფოტოზე: სხდომა ბათუმის საკრებულოში. ცაგო კახაბერიძის ფოტო
