ენმ: მდივნების არჩევის რეპეტიცია საუბნო კომისიებმა უკვე გაიარეს

საპრეზიდენტო არჩევნებისთვის საუბნო კომისიებმა თავმჯდომარე, მოადგილე და მდივანი უახლოეს დღეებში უნდა აირჩიონ. არჩევნებამდე ერთი თვით ადრე, 28 სექტემბერს, საუბნო კომისიები მუშაობას იწყებენ. „ერთიან ნაციონალურ მოძრაობაში“ აცხადებენ, რომ მდივანი, თავმჯდომარე და მისი მოადგილეც წინასწარ შერჩეულია.

„ჩვენ მოვიპოვეთ „ქართული ოცნების“ შტაბების მიერ მუნიციპალიტეტების მერებთან შეთანხმებით შედგენილი „ქართული ოცნების“ აქტივისტების სია, რომლის მიხედვითაც დანიშნავენ საუბნო საარჩევნო კომისიების თავმჯდომარეს, მოადგილეს და მდივანს. საუბნო კომისიებმა მდივნის არჩევის რეპეტიცია უკვე გაიარეს. როგორც ჩანს, ეს ადამიანები მოახდენენ არჩევნების გაყალბების ორგანიზებას და გაფორმებას,“ – თქვა დღეს, 25 სექტემბერს, გამართულ ბრიფინგზე ირმა ხოროიშვილმა, „ერთიანი ნაციონალური მოძრაობის“ წევრმა.

ირმა ხოროიშვილის თქმით, მას სიები „ოცნების“ აქტივისტებმა მიაწოდეს და მის ნამდვილობას საუბნო კომისიების დაკომპლექტების პროცესი დაადასტურებს. „ზუსტად ეს ადამიანები იქნებიან თავმჯდომარეები, მოადგილეები და მდივნები. ეს წინასწარ ცნობილია,“ – დასძენს ირმა ხოროიშვილი.

თითოეულ საუბნო კომისიაში 12 წევრია. 6 წევრი ოლქის მიერ არის არჩეული პროფესიონალიზმის ნიშნით, დანარჩენი ექვსი კი პოლიტიკურ პარტიებს წარმოადგენენ.

„ჩვენი ინფორმაციით, მდივნები ძირითადად ოლქის მიერ არჩეული ე.წ. ნეიტრალური პირები იქნებიან, რომლებიც რეალურად „ოცნების“ აქტივისტები არიან,“ – ამბობს ირმა ხოროიშვილი.

„ერთიანი ნაციონალური მოძრაობა“ ადგილობრივ და საერთაშორისო ორგანიზაციებს საარჩევნო კომისიებში თანამდებობის პირების დანიშვნის პროცესის მონიტორინგისკენ მოუწოდებს.

______________________