აგროღონისძიებების შესახებ ინფორმაციას ფერმერები SMS-ით მიიღებენ

აჭარის სოფლის მეურნეობის სამინისტრო 2018 წელს აგრომეტეოროლოგიური სადგურების მოწყობას გეგმავს. სადგურებმა მზის რადიაცია, ნალექის რაოდენობა, ჰაერის ტემპერატურა, ნიადაგის ტემპერატურა, სინოტივე და ა.შ. უნდა განსაზღვროს, დამუშავებული ინფორმაცია კი, მოსახლეობას მოკლე ტექსტური შეტყობინების სახით უნდა მიეწოდოს.  ინფორმაცია იმის შესახებ, თუ რა სახის დაავადების გავრცელების ალბათობა არსებობს და რა წამლობითი ღონისძიებების გატარება არის რეკომენდებული.

სამინისტრო მეტეოსადგურის მოწყობას პირველ ეტაპზე ქედის მუნიციპალიტეტში აპირებს.

„მეტეოსადგურების მოწყობასთან დაკავშირებით, კონკრეტულ საკითხებზე ვმუშაობთ. სატესტოდ, პირველი მეტეოსადგური გვინდა ქედის მუნიციპალიტეტში მოვაწყოთ, წინასწარი გათვლებით, ამას 100 ათასი დოლარი დასჭირდება. დავითვლით რამდენი მეტეოსადგურის მოწყობა დასჭირდება მუნიციპალიტეტის დაფარვას, მეტეოსადგურის დაფარვის ორკილომეტრიანი ზონა არ ნიშნავს იმას, რომ ყოველ ორ კილომეტრში უნდა დაიდგას სადგური. გამოთვლა, კლიმატური ზონებისა და რელიეფის სპეციფიკურობის გათვალისწინებით ხდება. მცირე მეტეოსადგური გასულ წელს აგროსერვისცენტრში, გვარა-ხუცუბნის ტერიტორიაზე დავდგით. მუშაობის გამოცდილება ამ კუთხით გვაქვს. გვინდა, აჭარის რეგიონი მთლიანად მოვიცვათ, სადაც მოსახლეობა სასოფლო-სამეურნეო სამუშაოებს ეწევა,“ – ამბობს ლაშა კომახიძე, აჭარის სოფლის მეურნეობის მინისტრი.

აგრომეტეოსადგურების მუშაობას კოორდინირებას აგროსერვისცენტრები გაუწევენ.

„სოფლის მეურნეობაში მოსავლიანობის ზრდა, ხარისხი და კონკურენტუნარიანობა დამოკიდებულია იმაზე, თუ რამდენად სწორად და ეფექტურად ახორციელებს ფერმერები აგროღონისძიებებს. არასწორად გატარებული წამლობითი ღონისძიებები არათუ ანახევრებს მოსავალს, აზიანებს კიდეც. პროექტის დანიშნულებაა  მივცეთ საშუალება ფერმერებს წამლობითი ღონისძიებები ეფექტურად განახორციელონ. რაც შეეხება სადგურების მუშაობას, კოორდინირებას აგროსერვისცენტრი გაუწევს და დამატებით დანახარჯს არ მოითხოვს,“ – აცხადებს მინისტრი.

ამავე თემაზე:

რას უნდა მიაქციოთ ყურადღება შხამქიმიკატების შეძენისას

რა პრობლემების მოგვარება სთხოვა ქედის მოსახლეობამ დავით გაბაიძეს

აზიური ფაროსანა ნებისმიერ სასოფლო-სამეურნეო კულტურას ანადგურებს – მწერთან ბრძოლა დატესტვის რეჟიმში

რა იწვევს ფუტკრის ოჯახების განადგურებას

ნეტგაზეთის მასალების სხვა გამოცემებში გადაბეჭდვის წესი
ავტორი