მანანა ქველიაშვილის ფოტო

რა მოხდა ბათუმში – 11-12 მარტის ქრონიკა

აქცია ბათუმში 11 მარტს, დაახლოებით ოთხ საათზე, ჭავჭავაძის ქუჩაზე, „ბათუმი – პლაზასთან“ დაიწყო.

აქციის მიზეზად მონაწილეები ასახელებდნენ ინცინდენტს საპატრულო პოლიციასა და მოქალაქეს შორის. პატრულმა მოქალაქე ჯერ არასწორი პარკრებისთვის დააჯარიმა, შემდეგ კი სიტყვიერი შეურაცხყოფისთვის დააკავა. დააკავეს მოქალაქის თანმხლები პირიც.

თვითმხილველები ამბობდნენ, რომ პოლიციამ მოქალაქეს ფიზიკური შეურაცხყოფა მიაყენა და ამან გამოიწვია სპონტანური აქცია ადგილზე, რომელიც მოკლე ხანში ხალხმრავალი გახდა.

აქციის მონაწილეები მოითხოვდნენ დაკავებული მოქალაქის და მისი თანმხლები პირის გათავისუფლებას და ასევე, აჭარის საპატრულო პოლიციის უფროსის გადაყენებას, რომელიც, მათი თქმით, საპატრულო პოლიციის თანამშრომლებს აიძულებდა ჯარიმების გამოწერას.

აქციაზე გაისმოდა შეძახლები: „გორელი“ [საპატრულოს უფროსის მისამართით, რომელიც ადრე გორში მუშაობდა], „თათრებს გვეძახიან“, „აჭარა აჭარლებს“, „ბათუმი“ და ა.შ.

აქციის მონაწილეებმა „ბათუმი – პლაზასთან “ გადაკეტეს გზა. მოგვიანებით პოლიციამ დერეფანი გააკეთა, დაიწყო პოლიციის პიკაპების მობილიზება მიმდებარე ტერიტორიაზე.

საღამოს 7 საათზე „ბათუმი-პლაზასთან“ აქციის პარალელურად დაიწყო მეორე აქცია აჭარის პოლიციის დეპარტამენტის შენობასთან, სადაც აქციის მონაწილეთა რაოდენობა გაიზარდა. ამ აქციას შეუერთდა „პლაზასთან“ გამართული აქციის მონაწილეთა ნაწილი, თუმცა პოლიციის შენობასთან აქციაზე ჭარბობდნენ სხვა ჯგუფები. აქციის მონაწილეთა შორის იყვნენ ახალგაზრდები და ხანდაზმულებიც, ძირითადად მამაკაცები.

ორივე აქციაზე 6 ადამიანი დააკავეს.

აქციის მონაწილეები დაკავებულების გათავისუფლებას და საპატრულო პოლიციის უფროსის გათავისუფლებას ითხოვდნენ.

აქციაზე მივიდნენ სამთავრობო და ოპოზიციური პარტიის წევრები, ოპოზიცია, „ერთიანი ნაციონალური მოძრაობა“ სოლიდარობას უცხადებდა აქციის მონაწილეებს, თუმცა მოუწოდებდა კონსტრუქციული ქცევისკენ, ხოლო „ოცნების“ წევრები აქციის მონაწილეებს პირდებოდნენ საკითხის გარკვევას, თუმცა აქციის მონაწილეებმა მათ არ მოუსმინეს.

აქცია პოლიციის შენობასთან მალევე გახდა აგრესიული, მონაწილეებმა დაიწყეს ქვების სროლა პოლიციელების მიმართულებით, დაამტვრიეს და დააზიანეს ქალაქის ინფრასტრუქტურა, ცეცხლი წაუკიდეს პოლიციის და სამოქალაქო პირების მანქანებს, დაამტვრიეს შუქნიშნები. ისმობდა შეურაცხმყოფელი შეძახილები საპატრულო პოლიციის უფროსის მისამართით, სკანდირებდნენ: „აჭარა“, „ბათუმი“, „გორელს რა“ და ა.შ.

აქციაზე დაშავდა 20-ზე მეტი ადამიანი, პოლიციელები და აქციის მონაწილეები.  დაშავდა აჭარის უმაღლესი საბჭოს წევრი, რომელსაც ქვა მოარტყეს.

პოლიცია აქციის მონაწილეებს პერიოდულად ცრემლსადენი გაზითა და რეზინის ტყვიებით პასუხობდა. რამდენჯერმე პოლიციის შენობიდან გამოვიდა პოლიციელთა ჯგუფი, თუმცა აქციის წევრებმა მათ ქვები ესროლეს და პოლიციამ უკან დაიხია.

დაახლოებით ღამის სამ საათზე შს სამინისტრომ აქციაზე დაკავებული ექვსი პირი გაათავისუფლა, თუმცა აქცია არ შეწყვეტილა. აქციის მონაწილეები ისევ მოითხოვდნენ საპატრულო პოლიციის უფროსის გადაყენებას და გაჩნდა ახალი მოთხოვნებიც – „გადადგეს მთავრობა“, „არ მოხდეს ჩვენი [აქციის მონაწილეების] დაკავება“ და სხვა. ჩანდა, რომ აქციის მონაწილეები არ იყვნენ ჩამოყალიბებული კონკრეტულად რა მოთხოვნები ჰქონდათ.

დილის 5 საათზე პოლიციის შენობასთან სპეცრაზმი გამოჩნდა. ამ დროისათვის აქციაზე მონაწილეთა რაოდენობა უკვე შემცირებული იყო.

სპეცრაზმის გამოჩენის შემდეგ აქცია დაიშალა ისე, რომ ძალოვანებს არ დასჭირვებიათ ძალის გამოყენება აქციის დასაშლელად. სპეცრაზმის მხრიდან ისმოდა მითითებები, არ გამოეყენებინათ ძალა, თუმცა შეესწავლათ მიმდებარე ტერიტორია, ქუჩები, სუპერმარკეტები და დაეკავებინათ ყველა საეჭვო პირი.

დილის შვიდ საათზე აქცია უკვე სრულად იყო დაშლილი და მიმდებარე ტერიტორიის დასუფთავება დაიწყო ბათუმის მერიამ.

12 მარტს, დილით, ცნობილი გახდა, რომ პოლიციამ 40-მდე ადამიანი დააკავა. გამოძიება სისხლის სამართლის კოდექსის ორი მუხლით მიმდინარეობს – 225-ე და 353-ე პრიმა, რაც ნიშნავს მასობრივი არეულობის ორგანიზებას ან ხელმძღვანელობას, რასაც თან ახლავს ძალადობა, რბევა, ცეცხლის წაკიდება, იარაღის ან ასაფეთქებელი მოწყობილობის გამოყენება, ანდა ხელისუფლების წარმომადგენლებისათვის შეიარაღებული წინააღმდეგობა. ისჯება 6-დან 9 წლამდე პატიმრობით.

დღეს, 12 მარტს, ბათუმში სიმშვიდეა. ქალაქში არ შეინიშნება არეულობა.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.