სარეაბილიტაციო გზა ხულოდან გოდერძიმდე [რუკა]

ხულო-ზარზმის მიმართულებით ახალი ავტომაგისტრალის მშენებლობის გამო ხულოს მუნიციპალიტეტის სოფლებში განსახლების პროცესი თებერვლის ბოლოს ან მარტის თვეში დაიწყება. საქართველოს საავტომობილო გზების დეპარტამენტის ინფორმაციით, განსახლების პროცესი ამინდზეც არის დამოკიდებული, მაგისტრალის მშენებლობა კი, ჯამში შეეხება 354 ოჯახის კუთვნილ 561 მიწის ნაკვეთს.

საქართველოს გზების დეპარტამენტის ინფორმაციით, სარეაბილიტაციო გზა გადის შემდეგი სოფლების ტერიტორიებზე: დეკანაშვილები, ოქრუაშვილები, დიაკონიძეები, იაკობაძეები, დიოკნისი, ტაბახმელა, ბოძაური, დიდაჭარა, შუასოფელი, დანისპარაული და ბეშუმი. დეპარტამენტის ინფორმაციით, ფაქტობრივად, არსებული გზის რეაბილიტაცია ხდება.

განსახლების სამოქმედო გეგმა, რომელიც 2013 წლის ივნისში იყო მომზადებული, ჩვენი ინფორმაციით, 2017 წლის დასაწყისში შეიცვალა, თუმცა საქართველოს საავტომობილო გზების დეპარტამენტს განახლებული გეგმა გასაჯაროებული ჯერ არ აქვს.


მიწის შესყიდვისა და განსახლების სამოქმედო გეგმის სამუშაო ვერსიის მიხედვით [რომელიც 2013 წლის ივნისშია მომზადებული], ხულო-ზარზმის გზის საპროექტო სიგანე შეადგენს მაქსიმუმ 9 მეტრს, ხოლო ხულოს ფარგლებში 6 მეტრამდეც მცირდება.

ამავე სამუშაო გეგმის მიხედვით:

  • პროექტის ზემოქმედების ქვეშ ექცეოდა 461 კერძო მიწის ნაკვეთი [188 836 კვ/მ – აქედან 211 [92 858კვ.მ] რეგისტრირებული და 250 [95 978კვ.მ] დასაკანონებელი. კერძო ნაკვეთები, როგორც დაკანონებული, ასევე დასაკანონებელი ანაზღაურდება;
  • 79 [28 183 კვ/მ] სახელმწიფო მიწა კერძო სარგებლობაშია. ეს მიწა არ ექვემდებარება კომპენსაციას. თუმცა კომპენსაცია აუცილებლად გაიცემა ამ მიწებზე განლაგებული და ზემოქმედების ქვეშ მოქცეული ნაგებობებისთვის, ნათესებისა და ხეხილის ხეებისათვის;
  • ხეხილის ხეები ზემოქმედების ქვეშ ხვდებოდა 283 მიწის ნაკვეთზე, რომლებსაც ფლობს 244 ოჯახი. სულ ზემოქმედების ქვეშ მოქცეული ხეების რაოდენობა იყო 2947;
zemoqmedeba

პროექტის ზემოქმედება ერთწლიან კულტურებზე, 122 ოჯახის საკუთრებაში არსებული ნაკვეთების მიხედვით[2013 წელს შედგენილი სამოქმედო გეგმის სამუშაო ვერსია]

  • გეგმის სამუშაო ვერსიით, სულ ზემოქმედების ქვეშ ექცეოდა 430 ოჯახი, აქედან 242 მწვავე ზემოქმედებას განიცდიდა, კარგავდა რა სასოფლო-სამეურნეო მიწის 10%-ზე მეტს;
  • პროექტის ზემოქმედების ქვეშ ხვდებოდა რამდენიმე კაპიტალური შენობა და დამხმარე ნაგებობა [სასაწყობე შენობა-ნაგებობა, ბოსელი, ფარდული და ა.შ.] და დიდი რაოდენობით – ტერიტორიის შემომფარგვლელი კედლები და ღობეები;
  • თავდაპირველი გეგმით, კაპიტალური შენობებიდან დანგრევას ექვემდებარებოდა 5 საცხოვრებელი სახლი, 4 მაღაზიის შენობა და 2 ავტოგასამართი სადგური;

დანგრევას ექვემდებარებოდა, ასევე, არაკაპიტალური შენობა-ნაგებობები:

  • 1 მცირე წისქვილი (ხის, 4 კვ.მ),
  • 1 მცირე ავტოგასამართი სადგური (ხის, 4 კვ,მ; მოქმედი),
  • 17 დამხმარე ნაგებობა (სასაწყობე, ფარდული, ბოსელი და ა.შ.),
  • 26 ქვის (ბეეტონის) კედელი (საერთო მოცულობა 1240.5 მ3),
  • 141 მეტალის ბადის ღობე ხის ბოძებზე (საერთო სიგრძე 44 857მ),
  • 128 ხის ღობე (საერთო მოცულობით 70.2კუბ.მ),
  • ერთი გათხრილი ფუნდამენტი შენობისათვის;

იმ შენობა-ნაგებობების გარდა, რომლებიც ექვემდებარებოდა ნგრევას, იყო რამდენიმე ობიექტი, რომელთა რელოკაცია მოხდებოდა ახალ ადგილზე:

  • 1 ოჯახური მცირე სასაფლაო (შიდა ეზოში მოწყობილი);
  • სამეურნეო ობიექტები – 1 კონტეინერი და 5 ცისტერნა.
ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com