ბათუმის ტურისტული ობიექტების მართვის სააგენტო 6 მაისის პარკში არსებული ტბის აერაციის სისტემის შეძენასა და დამონტაჟებაში 292 400 ლარს გადაიხდის. სააგენტოში თვლიან, რომ ხელოვნური აერაცია ტბისთვის აუცილებელია.
აერაციის სისტემა იქნება ჰიბრიდული ტიპის, როგორც ზედაპირული, ასევე ფსკერის, დიფუზიური. ის წარმოადგენს მოტივტივე პლათფორმას, რომელიც აღჭურვილი უნდა იყოს მაღალი წნევის და დეკორატიული ილუმინაციის სისტემით. ფსკერის დიფუზიური აერაციის სისტემა უნდა მოიცავდეს ფსკერის კვანძებს, მილგაყვანილობას და დაბალი წნევის ჰაერის კომპესორებს. სააგენტო, აერაციის სისტემას, ელექტრონული ტენდერით შეისყიდის.
სააგენტოს ინფორმაციით, „ნურიგელის ტბა წარმოადგენს მინერალური და ორგანული ნივთიერებების დაგროვება-აკუმულაციის კერას. ტბის ეკოსისტემაში ჟანგბადს გადამწყვეტი მნიშვნელობა აქვს. ჟანგბადის ნაკლებობა იწვევს ტბის ცოცხალი ორგანიზმების დაღუპვას, წყალმცენარეების გამრავლებას და ლპობის პროცესს, წყალში ნახშიროჟანგის დაგროვებით. ამ პროცესების დაბალანსება უნდა მოხდეს წყალში ჟანგბადის გაჯერებით და ხელოვნური ცირკულაციით, აერაციით“.
ნურიგელის ტბა / 27.07.2016
ბათუმის ტბებში ეკოსისტემა დარღვეულია, თუმცა ლაბორატორიული კვლევის შედეგად კონკრეტული მიზეზი ფაქტობრივად დადგენილი დღემდე არ არის. ბათუმის მერიამ მიმდინარე თვის დასაწყისში გამოთქვა მზადყოფნა მოეხდინათ ტბის ხელოვნური აერაცია. სააგენტო აცხადებს, რომ ტბაზე თევზაობა სასტიკად აკრძალულია, თუმცა თევზაობას მეთევზეები მაინც არ წყვეტენ. ნურიგელის ტბაზე აიკრძალა ნავებით სეირნობაც.
ნურიგელის ტბის სიგრძე 360 მ-ია, სიგანე – 160 მ, მაქსიმალური სიღრმე – 6,3 მ, ზედაპირის ფართობია 57 600 კვ/მ ხოლო წყლის სავარაუდო მოცულობაა 230 000 კუბ/მ.
