დღეს, 15 აპრილს, ქობულეთში პარტია „ბედნიერი საქართველოსთვის“ ლიდერმა ლეონიდ ჩერნოვეცკიმ პარტიის პირველი ოფისი გახსნა.
ლეონიდ ჩერნოვეცკი და გიორგი ქვრივიშვილი პარტიის ქობულეთის ოფისში
დღესვე ლეონიდ ჩერნოვეცკიმ პარტიული სიის პირველ ათეულთან და ასევე სიის სხვა კანდიდატების შერჩევის წესთან დაკავშირებით განცხადება გაავრცელა, რომლის მიხედვით საქართველოს პარლამენტის წევრობის კანდიდატების სიის პირველი ათეული უკვე შერჩეულია და მათ, უახლოეს მომავალში თავის ვებგვერდზე საზოგადოებას განსახილველად წარუდგენს.
„ამავე დროს, გადავწყვიტე თქვენი დახმარებით შევარჩიო პარტიული სიის წევრობის მსურველი ღირსეული და პროფესიონალი ადამიანები… ახლა გამოვაცხადეთ ღია კონკურსი ყველა ქართველისთვის და ვაგროვებთ ხალხს საქართველოს ყველა რეგიონიდან, როგორც რეგიონულ დონეზე, ისე პარლამენტის წევრობისთვის. გვინდა, რომ ჩვენს შორის იყოს აუცილებლად ძალიან აქტიური ადამიანები, რომლებიც დაგეგმავენ ახალ კანონპროექტებს, რომლებიც შეეხება იმ ადამიანების პრობლემებს, რომელთაც ისინი წარმოადგენენ. მაგალითად, შშმ პირების წარმომადგენელი, ლტოლვილთა წარმომადგენელი, მრავალშვილიანი მარტოხელა დედა და ა.შ. ბევრი ამბობს, რომ ისინი აუცილებლად პროფესიონალები უნდა იყვნენ, პროფესიონალი მე ვარ, მე უკრაინის დამსახურებული იურისტი ვარ, იურიდიული მეცნიერებების კანდიდატი ვარ… მე მხოლოდ ის მინდა, რომ მათ დაასახელონ პრობლემა. შემდეგ ჩვენ უკვე დავიქირავებთ იურისტების ჯგუფს, რომლებიც შეიმუშავებენ იმ კანონპროექტებს, რომლებიც გაუმარტივებს ცხოვრებას იმ ადამიანებს, ვისაც ისინი წარმოადგენენ,“ – განაცხადა ჩერნოვეცკიმ.
როგორც მან მოგვიანებით აღნიშნა, პარლამენტის წევრობის კანდიდატების სიის პირველი ორი წევრი თავად ლეონიდ ჩერნოვეცკი და მისი პირველი მოადგილე გიორგი ქვრივიშვილი იქნებიან. ჩერნოვეცკიმ არ გამორიცხა, რომ შესაძლოა ქობულეთის მაჟორიტარ კანდიდატად იყაროს კენჭი.
ჩერნოვეცკიმ პრესკონფერენციაზე საარჩევნო პროგნოზებზეც ისაუბრა – „მე მაქვს რეალური ციფრები, ჩვენ ვატარებდით სოციოლოგიურ გამოკითხვას და 1000 ადამიანი გამოვკთხეთ ქობულეთის მუნიციპალიტეტში. ეს უფრო ზუსტი პროგნოზია, ვიდრე NDI-ს კვლევა. ცდომილება აქ შეიძლება იყოს 0-1%, რადგან ძალიან პატარა რეგიონში ძალიან ბევრი ადამიანი გამოვკითხეთ. როგორც მახსოვს, ამ გამოკვლევიდან დაახლოებით 11% უჭერს მხარს „ერთიან ნაციონალურ მოძრაობას“, 17% – „ქართულ ოცნებას”, 6% – ჩვენს პარტიას და 2-2 % დაახლოებით “პატრიორტთა ალიანსს”, “ლეიბორისტებს” და სხვებს. იმის გათვალისწინებით, რომ ჩვენ ჩვენი მოძრაობის გახსნის შესახებ სულ რაღაც თვენახევრის წინ გამოვაცხადეთ, ეს ძალიან დიდი შედეგია. ვფიქრობ, რომ დაახლოებით ასეთივე მაჩვენებელი იქნება საქართველოს დანარჩენ ნაწილშიც… მე ძირითადად ფეისბუქში ვმუშაობ, იმიტომ, რომ დიდ ტელეარხებს ჩემთან რატომღაც კითხვები არ აქვთ, მიუხედავად იმისა, რომ დიდი სიამოვნებით ვპასუხობ ნებისმიერ კითხვას.”.
ლეონიდ ჩერნოვეცკიმ ასევე განმარტა, რომ იგი ვიცე-სპიკერ მურმან დუმბაძესთან ერთად არ აპირებს საარჩევნო კამპანიაში ჩართვას – „არაფერი ასეთი არ ყოფილა, გარდა დუმბაძის გაცნობისა. ის ჩემთან იყო სახლში. ჩემზე კარგი შთაბეჭდილება დატოვა, მგონი საქართველოს პატრიოტია და ბევრი კარგი საქმის გაკეთება უნდა“.
„ეს პირველი ოფისია, კიდევ ბევრს გავხსნით, ბევრი მუშაობა გველის წინ. გვეყოლება ბევრი ადამიანი, ვისთანაც მე მომიწევს ურთიერთობა, საქართველოსთვის მნიშვნელოვან სხვადასხვა საკითხზე. ჩვენ გვაქვს სამოქმედო გეგმა და გვაქვს დიდი სურვილი, გავაბედნიეროთ საქართველო,” – განაცხადა ჩერნოვეცკიმ.
ქობულეთის ოფისის გახსნაზე / 15.04.2016
