„სამედიცინო ჩანაწერების ელექტრონულ ფორმატში გადატანაზე ვმუშაობთ უკვე მეოთხე წელია. პაციენტს მალე ექნება ელექტრონული ბარათი, სადაც მისი სამედიცინო ისტორია სრულად იქნება ასახული. ნებისმიერ კლინიკაში შეეძლებათ პაციენტზე გაწეული სამედიცინო მომსახურების შესახებ ამ ბარათით გაიგონ. ეს ასევე იქნება უმძლავრესი მექანიზმი სამედიცინო ხარისხის კონტროლის,“ – განაცხადა შრომის, ჯანმრთელობისა და სოციალური დაცვის მინისტრმა დავით სერგეენკომ 2 აპრილს ბათუმის სახელმწიფო უნივერსიტეტში, სადაც ის ექიმებს შეხვდა.
„რა ფუნქცია უნდა დაეკისროს ბათუმის რესპუბლიკურ საავადმყოფოს, რომელიც ახლა შენდება, როგორია თქვენი ხედვა?“ – ეს შეკითხვა მინისტრს ამ კლინიკის ექიმმა, აკაკი ბერიძემ დაუსვა. „რესპუბლიკური საავადმყოფოს რა ისტორიული მისიაც ჰქონდა, ის უნდა შეასრულოს ისევ. ვფიქრობ, რომ ისევ მრავალპროფილური უნდა იყოს და თანაბარ პირობებში იყოს სხვა კლინიკებთან. ჯანსაღი კონკურენცია არის მთავარი პირობა, დანარჩენი თავად თქვენ, ამ კლინიკაში მომუშავე ადამიანებმა უნდა განსაზღვროთ,“ – განაცხადა მინისტრმა.
ბათუმის საკრებულოს წევრმა, რამაზ სურმანიძემ მინისტრს შეკითხვა კომუნალურ ჰიგიენაზე დაუსვა: „სანიტარული ზედამხედველობის დარგში სუსტი ვართ. ხედავთ თუ არა ამ კუთხით გაძლიერების საჭიროებას?“ ამას გარდა, რამაზ სურმანიძე დაინტერესდა, რა უნდა ისწავლონ ბავშვებმა ჯანმრთელობის დაცვის კუთხით, რადგან ამაზე დღეს არავინ საუბრობს. მინისტრი მიიჩნევს, რომ „ამ მხრივ დიდი ნაბიჯებია გადადგმული“ და „საზოგადოებრივი ჯანდაცვის ცენტრების კიდევ უფრო გაძლიერებით მივიღებთ უკეთეს შედეგს.“
ექიმებმა კითხვები დასვეს სერტიფიცირებაზე, ასევე ექიმთა კვალიფიკაციის ამაღლებაზე. დავით სერგეენკომ აღნიშნა, რომ იმპერატიულ ცვლილებებს არ გეგმავს, თუმცა „რეფორმა საჭიროებს მეტ განათლებას.“ მას არ უთქვამს კონკრეტულად როგორ და რა ფორმით, მაგრამ მინისტრმა ასევე თქვა: „ექიმების კვალიფიკაციის ამაღლების კურსები არ უნდა ჩავაბაროთ ისტორიას, ეს კარგი ტრადიცია იყო“.
შეხვედრის დასრულების შემდეგ „ბათუმელებმა“ დავით სერგეენკოს შეკითხვა დაუსვა ბათუმის დედათა და ბავშვთა რესპუბლიკური ცენტრზე, სადაც 4 თვის ბავშვი გარდაიცვალა და ამ კლინიკის პირველადი, გადაუდებელი სამედიცინო დახმარების განყოფილების, ე.წ. „ემერჯენსის“ ექიმი ბათუმის საქალაქო სასამართლომ უკანონო სამედიცინო საქმიანობისთვის დააჯარიმა [დაჯარიმებული ექიმის ინფორმაციით, „ემერჯენსში“ 12 ექიმი მუშაობს და არც ერთ მათგანს არ აქვს შესაბამისი მიმართულების სერტიფიკატი. თავად კლინიკის ხელმძღვანელობამ ასევე ჯანდაცვის რეგულირების სააგენტომ ამ ამბის გაშუქების დროს კითხვებს არ უპასუხეს].
„ჯანდაცვის სამინისტრო ვალდებულია შეისწავლოს ყველა ასეთი შემთხვევა და ამას ჩვენ დადგენილი წესით ვაკეთებთ. ამ კონკრეტულ კლინიკაში უნებართვო სამედიცინო საქმიანობაზე მე ინფორმაცია არ მაქვს, თუ ეს დადასტურდა, იქნება შესაბამისი ზომები გატარებული. გადაუდებელი მედიცინა შედარებით ახალია, ბოლო ორი-სამი წელია მიმდინარეობს ამის დახვეწა“ – გვიპასუხა დავით სერგეენკომ.
მინისტრს ასევე ვკითხეთ, რატომ ვერ მუშაობს მის მიერ 2014 წლის 11 სექტემბერს მიღებული ბრძანება, რომელიც სამედიცინო დაწესებულებებს ათავისუფლებს სამართალდამცველებისთვის ინფორმაციის მიწოდების ვალდებულებისგან, თუკი პაციენტი ნარკოტიკული ნივთიერების მოხმარების ზედოზირების ქვეშაა.
„პაციენტის ინფორმაცია არის კონფიდენციალური. სამედიცინო დაწესებულება აღარ არის ვალდებული შეატყობინოს ინფორმაცია იმ პაციენტებზე,რომლებიც შემოდიან ნარკოტიკული მოხმარების ზედოზირების გამო, თუმცა თუკი სამართალდამცავი უწყებები მოითხოვენ ამას, მიაწვდიან,“ – გვითხრა დავით სერგეენკომ.
„თუკი პოლიციელები მაინც იგებენ ინფორმაციას ამ შემთხვევებზე და შესაბამისად, სტატისტიკურად არც ნარკოტიკების მომხმარებელთა მიმართვიანობა არ გაზრდილა ბოლო პერიოდში, მაშინ რა ინტერესს ემსახურებოდა თქვენი ბრძანება?“ – „ბათუმელების“ ამ შეკითხვას მინისტრმა აღარ უპასუხა: „ამ ბრძანებით რისკები შემცირდა. ინტერვიუ დამთავრებულია.“
