ევროკავშირის ელჩმა სარფში სასაზღვრო ზოლი დაათვალიერა

ევროკავშირის ელჩი საქართველოში კარლ ჰარცელი სარფის საბაჟოს სასაზღვრო სექტორს ეწვია.

შსს ინფორმაციით, ელჩმა საქართველოს სახელმწიფო საზღვრის ზოლი და ელექტრონული დაკვირვების თანამედროვე სისტემები მოინახულა.

„კარლ ჰარცელი, ასევე, დეტალურად გაეცნო საზღვრის დაცვის შესაძლებლობებს. შინაგან საქმეთა სამინისტროს სასაზღვრო პოლიციას და ევროკავშირს შორის წარმატებული თანამშრომლობის შედეგად, საქართველოს სასაზღვრო პოლიციაში არაერთი მნიშვნელოვანი პროექტი განხორციელდა, განახლდა სასაზღვრო ინფრასტრუქტურა, სასაზღვრო სექტორები კი ელექტრონული დაკვირვებისა და კომუნიკაციის თანამედროვე საშუალებებით აღიჭურვა“.

კარლ ჰარცელმა სასაზღვრო პუნქტის დათვალიერებისას განაცხადა, რომ ევროკავშირი აპირებს გააგრძელოს საქართველოს დახმარება ამ სფეროში. „ახლა ვაპირებთ ძალისხმევის გაძლიერებას უსაფრთხოების სფეროში საქართველოს მხარდასაჭერად“.

 

ნეტგაზეთის მასალების სხვა გამოცემებში გადაბეჭდვის წესი


ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com