„ეს რა ჯანდაბაა?”- ბენქსი მოსკოვში მისი ნამუშევრების გამოფენის შესახებ

მოსკოვში 2 ივლისიდან 2 სექტემბრამდე ბენქსის გრაფიტის გამოფენა იმართება. გამოფენის ორგანიზატორები თვეების განმავლობაში ავრცელებდნენ ინფორმაციას, რომ  ეს წლის ერთ-ერთი ყველაზე მნიშვნელოვანი კულტურული ღონისძიება იქნებოდა მოსკოვისთვის.

გრაფიტის ინგლისელი მხატვარი, ბენქსი, ანონიმური პერსონაა და არასდროს აწყობს გამოფენებს. არსებობს ვერსია, რომ ბენქსის სახელის უკან ჯგუფ Massive Attack – ის ერთ-ერთი წევრი, რობერტ დელ ნაია დგას, ზოგიერთი კი მიიჩნევს, რომ ბენქსის სახელით მთელ მსოფლიოში არტისტების დიდი ჯგუფი მოქმედებს.

ბენქსის ნამუშევრები მსოფლიოს სხვადასხვა ქალაქშია განთავსებული, მისი გრაფიტი თანამედროვე პოლიტიკისა და კულტურის სატირაა.

მხატვარმა თავად მხოლოდ გუშინ გაიგო საკუთარი გამოფენის შესახებ სოციალური ქსელების მეშვეობით და მოსკოვის საგამოფენო დარბაზის აფიშის ფოტოზე შესაბამისი რეაქციაც ჰქონდა: „ეს რა ჯანდაბაა? არანაირი კავშირი არ მაქვს ამ გამოფენასთან”.

მხატვართან შეუთანხმებელი გამოფენის სპონსორები იყვნენ ისეთი მსხვილი რუსული კომპანიები, როგორებიცაა: მობილური ოპერატორების ქსელი МТС-ი და ანტივირუსული კომპანია „კასპერსკი“, საინფორმაციო სააგენტოებიც აქტიურად ავრცელებდნენ ინფორმაციას გამოფენის შესახებ.

ბენქსი, სოციალურად არააქტიური პერსონაა და საკუთარი გამოფენის შესახებ, რომელიც არ შეუთანხმეს, მხოლოდ გუშინ შეიტყო. რუსული ტელეარხი ,,კულტურა” კი გამოფენის გახსნის წინ იუწყებოდა, თითქოს ბენქსიმ იცოდა მოსკოვში დაგეგმილი გამოფენის შესახებ.

ბენქსისთან შეუთანხმებელი გამოფენის ორგანიზატორი კომპანია IQ Art Management-ის დირექტორად დარეგისტრირებული ალექსანდრე ნაჭყებიაა. ტელეარხ „Дождь”- სთვის მიცემულ ინტერვიუში ის აცხადებს, რომ ბენქსის გამოფენის ექსპონატები კერძო მფლობელებს ეკუთვნით და მათ სრული უფლება ჰქონდათ მოეწყოთ გამოფენა მხატვართან შეთანხმების გარეშე.

__________________

წყარო: BBC

ნეტგაზეთის მასალების სხვა გამოცემებში გადაბეჭდვის წესი


ავტორი
თამუნა ნერგაძე არის "ბათუმელების" რეპორტიორი 2017 წლის ოქტომბრიდან