215 სათვალთვალო კამერა ბათუმში და 438 ათასი ლარი ბიუჯეტიდან მათი პატრონობისთვის

ბათუმის მერიის ინფორმაციით, ქალაქის ტერიტორიაზე 215 ვიდეო-სამეთვალყურეო კამერაა ჩართული. ქალაქის ბიუჯეტში კამერების [სისტემების] მოვლა-პატრონობისთვის 438 233 ლარია გათვალისწინებული. შესაბამის მომსახურებას ბათუმის მერია ტენდერით შეისყიდის.

„ყველა კამერა არის მუშა მდგომარეობაში, თუმცა იყო მუშაობასთან დაკავშირებით მცირე შეფერხებები. ამიტომ, ტენდერის პირობაში ჩადებულია 195 ვიდეო-სათვალთვალო კამერის უწყვეტი კვებით მომარაგება,“ – გვითხრეს ქალაქის მერიაში.

ტენდერში გამარჯვებულს ბათუმის ტერიტორიაზე განთავსებული 215 ერთეული IP კამერის (Pelco IXE31), 195 ერთეული ჩართვის წერტილის უწყვეტი კვებით მომარაგების სისტემისა და სასერვეროს, როგორც ერთიანი ვიდეო-სამეთვალყურეო სისტემის მოვლა-პატრონობა ევალება.

ამასთან, მანვე უნდა უზრუნველყოს მერიის შენობაში [ლ. ასათიანის ქ. N25, ბათუმი] მონიტორინგის ოთახის აღჭურვა – შიდა კომპიუტერული ქსელის შექმნა და ქალაქში განთავსებული ვიდეო-სამეთვალყურეო კამერების ერთიან ქსელზე დაერთება.

მომსახურება ხელშეკრულების გაფორმებიდან 2019 წლის 25 დეკემბრამდე გაგრძელდება.

მერია მას, ვინც ტენდერში გაიმარჯვებს, 2018 წელს არაუმეტეს 184 500 ლარს გადაუხდის, თუმცა იტოვებს უფლებას, რომ მიმდინარე წელს აღნიშნულ თანხაზე მეტიც გადაიხადოს.

 

ნეტგაზეთის მასალების სხვა გამოცემებში გადაბეჭდვის წესი


ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com