ქალის საქმე კასრში აღმოჩენილ ასაფეთქებლებზე – სასამართლო

დიდი ოდენობით საბრძოლო მასალის შენახვა-ტარების საქმეზე ბათუმის საქალაქო სასამართლოში დღეს, 27 თებერვალს, მორიგი პროცესი გაიმართა. სასამართლომ იმ პოლიციელების ჩვენება მოისმინა, რომლებმაც ჩხრეკა ჩაატარეს.

საუბარია ქობულეთში, სამალავში აღმოჩენილი საბრძოლო მასალის საქმეზე – ბრალდებული ქალი, ფემბე ოზლემ ოლუნია. იგი თურქეთის მოქალაქეა და ბრალს არ აღიარებს. პროკურატურის ვერსიით, ფემბე ოზლემ ოლუნი ხელყუმბარას, კალაშნიკოვის ავტომატს და 115 ვაზნას სხვადასხვა ადგილზე ინახავდა.

მოწმის სახით დაბარებულმა პოლიციელებმა თქვეს, რომ ოპერატიული ინფორმაციის საფუძველზე განახორციელეს ჩხრეკა. ადვოკატმა მათ ჰკითხა, რატომ არ დაესწრო საცხოვრებელი ბინის ჩხრეკას თავად ბრალდებული, რომელიც იმ დროისთვის უკვე დაკავებული იყო. პოლიციელებმა აღნიშნეს, რომ ისინი არ იყვნენ საგამოძიებო ჯგუფის ხელმძღვანელები და ამაზე გადაწყვეტილებას მათ არ იღებდნენ.

მორიგ პროცესზე მთავარ მოწმეებს დაკითხავენ – ორ ადამიანს, რომლებიც პოლიციას დაუკავშირდნენ და უთხრეს, რომ ქობულეთში, მდინარე კინტრიშის სანაპიროზე, კასრით საბრძოლო იარაღი იყო დამარხული.

ამ ჩვენებების მოსმენის შემდეგ სასამართლო მხარეების დასკვნით სიტყვებს მოისმენს. ბრალდებულ ფემბე ოლუნს მოწმე არ ჰყავს.

ამ თემაზე:

კასრში აღმოჩენილი ასაფეთქებლების საქმე ექსპერტიზის გარეშე – დაკავებული ბრალს არ აღიარებს

ნეტგაზეთის მასალების სხვა გამოცემებში გადაბეჭდვის წესი


ავტორი