ხულოს მერია ახალ აიპ-ს აფუძნებს

ხულოს მერია ახალ აიპს – „ხულოს მუნიციპალურ სერვისს“ აფუძნებს. აიპის დაფუძნებას, რომელმაც ხულოს მუნიციპალიტეტის დაბების დასუფთავება-გამწვანება, საპირფარეშოების მოვლა და  სოფლებიდან საყოფაცხოვრებო ნარჩენების გამოტანა უნდა უზრუნველყოს, ხულოს საკრებულომ მხარი უკვე დაუჭირა.

ხულოს მერის მოადგილე, ლაშა ბოლქვაძე განმარტავს, რომ აიპის მთლიანი ბიუჯეტი 150 000 ლარს შეადგენს. თანამშრომელთა საშტატო ნუსხა კი ჯერ არ დაუმტკიცებიათ. ლაშა ბოლქვაძის ინფორმაციით, აიპის თანამშრომლეთა საშტატო ნუსხა მას შემდეგ დაამტკიცებენ, როცა აიპის სამეწარმეო რეესტრში დაარეგისტრირებენ.

„ტერიტორიების დასუფთავება – გამწვანებასა და სოფლებიდან საყოფაცხოვრებო ნარჩენების მართვასთან ერთად, აიპი პასუხისმგებელი იქნება მუნიციპალიტეტში არსებული საპირფარეშოების მოვლა – პატრონობაზე, ზამთარში დაბის თოვლის საფარისგან გაწმენდაზე, ის საყოფაცხორებო ნარჩენებს სოფლებიდან ცენტრალურ მაგისტრალამდე გამოიტანს, მაგისტრალიდან ბათუმის ნაგავსაყრელამდე მიტანას კი ტენდერით გამოვლენილი კომპანია უზრუნველყოფს,“ – ამბობს ლაშა ბოლქვაძე.

„მომსახურებას, რომელიც აიპმა უნდა განახორციელოს, მანამდე ტენდერით ვყიდულობდით, სახელმწიფო შესყიდვაში გამარჯვებულ კომპანიას კი, სამუშაოების შესასრულებლად ერთი და იგივე პიროვნება აჰყავდა, შესაბამისად ჩვენც იმ ადამიანებს გავუფორმებთ ხელშეკრულებას, რომლებიც მანამდე მუშაობდნენ. რაც შეეხება აიპის ადმინისტრაციას, იქნება როგორც აიპის ხელმძღვანელის შტატი, ასევე ბუღალტერისა და ტექნიკური მიმართულუბით ორი ხელმძღვანელის პოზიცია. ვფიქრობთ, აიპს მთლიანობაში 35-მდე თანამშრომლი ეყოლება. 150 000-ლარიან ბიუჯეტში კი რვა ავტომობილი საწვავის, მოვლა-პატრონობის, მომუშავეთა ფორმის, საჭირო ინვენტარის ხარჯი და ხელფასებია გათვალისწინებული,“ – ამბობს მერის მოადგილე.

მისივე თქმით „მთავარი აქცენტი ხარისხზე გადავიტანეთ, მუნიციპალიტეტის ტურისტული პოტენციალი ყოველწლიურად იზრდება, პოტენციალის ზრდა კი, მომსახურების ხარისხის გაუმჯობესებას მოითხოვს. შესაბამისად ვფიქრობთ, რომ აიპი, რომელიც ტერიტორიების დასუფთავება-მოვლა-პატრონობაზეა ორიენტირებული, უფრო კარგ შედეგს მოგვიტანს, ვიდრე მსგავსი მომსახურება ტენდერით შევისყიდოთ.“

ნეტგაზეთის მასალების სხვა გამოცემებში გადაბეჭდვის წესი


ავტორი