„ალდაგი“ დათმობაზე მიდის



ოჯახებს, რომლებიც ბათუმსა და ხელვაჩაურში სახელმწიფო დაზღვევით სარგებლობენ, ისევ შეეძლებათ მოზარდებს სავალდებულო აცრები მათთვის სასურველ კლინიკაში ჩაუტარონ.  სადაზღვევო კომპანია „ალდაგი“, რომელმაც სახლწიფოს მიერ დაფინასებულ პირველადი ჯანდაცვის პროგრამის განხორციელებაზე აიღო პასუხისმდგებლობა, კიდევ რამდენიმე დათმობაზე წავიდა.  

 



„კომპანიამ გადაწყვიტა, რომ 18 წლამდე ასაკის პაციენტთა პირველადი ჯანდაცვის მომსახურება გაწიონ ბათუმში არსებულმა კლინიკებმა.  ამაში შედის ნულიდან  ექვს წლამდე სავალდებულო აცრები ბავშვებისთვის და სხვა სახის სახელმწიფო პროგრამით გათვალისწინებული მომსახურება 18 წლამდე ასაკის პაციენტებისთვის. თვრამეტ წელს გადაცილებულებმა კი ისევ „ალდაგის“ მფლობელობაში არსებულ კომპანიებს უნდა მიმართონ. ეს არის შედეგი იმ მოლაპარაკებისა, რომელსაც ჯანდაცვის სამინისტრომ სადაზღვევო კომპანიასთან მიაღწია.

 

 

ამჯერად პრობლემად რჩება სოციალურად დაუცველებისა და პენსიონერების საკითხი, რომლებსაც არა მხოლოდ რიგში დგომის, მომსახურების დროულად მიღების არამედ ხშირ შემთხვევაში  გადაადგილების პრობლემაც აქვთ და ურჩევნიათ დახმარება   იმ კლინიკაში მიიღონ, რომელიც მათთვის ტერიტორიულად უფრო ახლოსაა.“ – განმარტა აჭარის ჯანდაცვის მინისტრის მოადგილემ ლევან გორგილაძემ „ბათუმელებთან“ სატელეფონო  საუბარში.

 

 

სახელმწიფო დაზღვევით გათვალისწინებული მომსახურების მიღებასთან დაკავშირებით ბათუმში არსებულ კლინიკებს ხელშეკრულებები სადაზღვევო კომპანია „ალდაგმა“  ცოტა ხნის წინ შეუწყვიტა და პაციენტების საკუთარ კლინიკაში გადამისამართება სცადა:

 

„ურთიერთობები გართულდა სადაზღვევო კომპანიასა და კლინიკებს შორის. ისინი გარკვეულ საკითხებში ვერ ჩამოყალიბდნენ, კომპანიას ჰქონდა დავალიანებები კლინიკებთან.  სიებთან დაკავშირებითაც იყო პრობლემა, ანუ ვერ გადაინაწილეს, ვის რამდენი უბანი  შეხვდა და  იმ ეტაპზე სადაზღვევო კომპანიამ არჩია უფრო ხისტი პოლიტიკა.

 

 ალდაგში ჩთვალეს, რომ ამას განახორციელებდნენ თავიანთი ძალებით, თავის მფლობელობაში მყოფ ორ სამედიცინო დაწესებულებაში. უფრო სწორად სამედიცინო დაწესებულება ერთია, მაგრამ განლაგებულია ორ სხვადასხვა ადგილზე.  ეს არის ქალაქ ბათუმის რეფერალური საავადმყოფო და მისი ნაწილი, რომელიც ერას ქუჩაზეა, ეს არის ამბოლატორიულ- პოლიკლინიკური ტიპის სამედიცინო დაწესებულება.“

 

 

კლინიკების მფლობელების განაწყენების გარდა სადაზღვევო კომპანიის გადაწყვეტილებამ გარკვეულწილად პაციენტებიც დააზარალა, „ალდაგის“ კლინიკაში გაჩნდა რიგები, ხშირ შემთხვევაში  მოქალაქეებმა ვერ მიიღეს დროული დახმარება,  რამაც მათი გაღიზიანება გამოიწვია.

 

 

„სწორედ იმის გამო რომ მოქალაქეებს მიეღოთ ზუტად ის, რასაც მათ სთავაზობს სახელმწიფო პირველადი ჯანდაცვის პროგრამით, ჩვენ დავიწყეთ მოლაპარაკება კომპანიასთან. ჩვენი ინიციატივა არ იყო მაინცადამაინც ის, რომ პოლიკლინიკებს დაბრუნებოდათ ეს მომსახურება. კომპანიას შეეძლო გაეზარდა თავისი ქსელი. თუმცა ჩვენ ვთავაზობდით, რომ ვიდრე ქსელს გაზრდიდნენ, გამოეყენებინათ არსებული პოლიკლინიკები.  ეს მათი გადასაწყვეტია. ჯანდაცვის სამინისტრო დაინტერესებულია მომსახურების ხარისხით და არა იმით ვინ  განახორციელებს მომსახურებას. “ – ამბობს ლევან გორგილაძე.

 

 

კითხვაზე, ამ შემთხვევაში ხომ არ მოხდება ისე, რომ ერთი კომპანია ბაზარზე მონოპოლიას მიიღებს? – აჭარის ჯანდაცვის მინისტრმა უპასუხა, რომ ეს  ეს უფრო გლობალური საკითხია და  ამ ეტაპზე  ჯანდაცვის სამინისტროს არ აქვს ბერკეტები, რომ ეს საკითხი გადაწყვიტოს.

 

 

მინისტრის მოადგილემ დღეს ინფორმაცია  ხელვაჩაურში მცხოვრები პაციენტების სახელმწიფო პროგრამით სარგებლობის პირობების შეცვლასთან დაკავშირებითაც გაავრცელა:

 

 

„აღმოჩნდა რომ  ქალაქის იქითა უბნების მოსახლეობასაც, რომელიც არის მახინჯაური და მიმდებარე სოფლები მომსახურება უნდა მიეღოთ ხელვაჩაურის მუნიციპალიტეტის ცენტრში მდებარე სამედიცინო ცენტრში, რაც გარკვეულ სირთულეებს ქმნიდა, დღეიდან მათ შეეძლებათ  ტერიტორიულად ახლო მდებარე კლინიკას მიმართონ.“

 

 

სამინისტრო კომპანიასთან მოლაპარაკებებს აგრძელებს, ამჯერად მიზანი საოციალურად დაუცველებისა და პენსიონერების საკითხის გადაწყვეტაა.

 

ნეტგაზეთის მასალების სხვა გამოცემებში გადაბეჭდვის წესი
ცაგო კახაბერიძე