ნიკა დიასამიძე: სამი წელია ბათუმის „დინამოში“ შემტევი ნახევარმცველი, გარემარბი ვარ.
– როგორც ვიცი, თბილისის „დინამო“ დაინტერესდა შენით. სავარაუდოდ, მეორე წრიდან გადახვალ კიდეც…
– არ მინდა მოვლენებს გავუსწრო. მართალია, „დინამოდან“ დაინტერესება არის, მაგრამ მარტო თბილისელები არ არიან ჩემი გადაბირების მსურველები. ეროვნულ ჩემპიონატში მოასპარეზე რამდენიმე გუნდმა გამოიჩინა ინტერესი, არის სხვა ვარიანტებიც. ვნახოთ, ჯერ კონკრეტულად არაფერია გადაწყვეტილი.
– სხვა ვარიანტებში რას გულისხმობ?
– უცხოურ კლუბებს.
– იქნებ დააკონკრეტო…
– ჯერ არ მაქვს მაგის თქმის უფლება, მხოლოდ ის შემიძლია გითხრათ, რომ უკრაინის ჩემპიონატის უმაღლესი ლიგის გუნდი დაინტერესდა ჩემით, მოლაპარაკება მიმდინარეობს.
– აგენტი გყავს?
– ოფიციალური აგენტი არა, მაგრამ არის ხალხი, ვინც დაინტერესებულია ჩემი ტრანსფერით.
– როდისთვის გადაწყდება?
– პირველი იანვრიდან სატრანსფერო ფანჯარა იხსნება, სავარაუდოდ, იანვრამდე ახალ კლუბთან მოვაწერ კონტრაქტზე ხელს, მაგრამ ჯერ არ ვიცი, ეს ქართული გუნდი იქნება თუ უკრაინული.
– შენ სად გირჩევნია?
– უკრაინა კარგი ვარიანტია, მაგრამ სათამაშო პრაქტიკისთვის ჯერ საქართველოში თამაშს ვამჯობინებ.
– ბათუმის „დინამოზე“ რას იტყვი?
– ახალგაზრდები ვართ, ჯერ კიდევ გამოუცდელები, შეთამაშება გვაკლია, მაგრამ დარწმუნებული ვარ, მეორე წრიდან ამ პრობლემასაც მოევლება. წელს „დინამოს“ მიზანი უმაღლეს ლიგაში დარჩენაა. ვფიქრობ, ამ ამოცანას წარმატებით გაართმევს თავს.
