ბიუჯეტის გაფლანგვა, პრიორიტეტების არასწორი განაწილება, განუხორციელებელი და შეჩერებული ინფრასტრუქტურული პროექტები, საარჩევნო კოდექსის დარღვევა, ხელოვნურად გაზრდილი შტატები, ბიუროკრატია მერიაში, ქალაქის იმიჯის შელახვა და ა.შ. ეს მოკლე ჩამონათვალია იმ ბრალდებებისა, რომელსაც გიორგი ერმაკოვს უყენებენ საკრებულოს წევრები “ნაციონალური მოძრაობიდან” და მის გადაყენებას მოითხოვენ.
“მისი მერის თანამდებობაზე დარჩენა ქალაქში ახალი პრობლემების შექმნისა და ადამიანებისთვის გართულებული ცხოვრების კიდევ უფრო დამძიმების რეალურ საფრთხელს ქმნის” – ვკითხულობთ განცხადებაში. ფრაქციის თავმჯდომარე გიორგი კირთაძე განმარტავს, იმისთვის რომ საკითხი საკრებულოს სხდომაზე განიხილონ ცხრა დეპუტატის ხელმოწერაა საჭირო, ჯერ–ჯერობით კი მხოლოდ სამი დეპუტატი – ჯუმბერ კახიძე, გიორგი კირთაძე და ნოდარ დუმბაძე – აწერს ხელს მიმართვას.
გიორგი კირთაძის ვარაუდით, რადგან საკრებულოს ოპოზიციონერი წევრების რაოდენობა სჭარბობს მმართველი პარტიის წარმომადგენლების რაოდენობას, მათი წინადადება მხარდაჭერას მოიპოვებს: “დიდი იმედი მაქვს რომ ჩემი კოლეგები, რომლებიც ჩვენსავით აკრიტიკებენ მთავრობას და მათ ეძახიან უუნაროს, არაფრისმკეთებელს და მათ შორის, ხშირად, კორუმპირებულსაც, შემოუერთდებიან ამ ხელწერილს.”
კითხვაზე, რატომ უნდა დაუჭირონ მხარი ფრაქცია “ნაციონალური მოძრაობის” წინადადებას სხვა პარტიის წარმომადგენლებმა ან საკრებულოს დამოუკიდებელმა წევრებმა, გიორგი კირთაძე გვპასუხობს: “მე მგონია მხარდაჭერა უნდა მივიღოთ სხვა დეპუტატებისგანაც, სხვა შემთხვევაში გამოვა, რომ ყველანი ვთამაშობთ ერმაკოვის თამაშებს. ვისაც არ მოსწონს რაც ხდება ამ ქალაქში და ამ ყველაფერს აბრალებს ბათუმის მერს, მე მგონია რომ უნდა მოაწეროს ხელი ამ მიმართვას და გადავაყენოთ ქალაქის მერი თანამდებობიდან.”
საქართველოს თვითმართველობის შესახებ კოდექსის მიხედვით, “გამგებლისთვის/მერისთვის უნდობლობის გამოცხადების პროცედურის ინიციირების საფუძველია მუნიციპალიტეტის საკრებულოს სიითი შემადგენლობის ნახევარზე მეტის ან მუნიციპალიტეტის ტერიტორიაზე რეგისტრირებულ ამომრჩეველთა საერთო რაოდენობის არანაკლებ 20 პროცენტის წერილობითი ინიციატივა გამგებლისთვის/მერისთვის უნდობლობის გამოცხადების შესახებ.”
