დღეს, 6 მარტს, მოსამართლე სალიხ შაინიძემ პარტია „ახალის“ ერთ-ერთი ლიდერი, გიორგი კირთაძე 2 ათასი ლარით დააჯარიმა. მოსამართლემ გიორგი კირთაძეს ასევე ჩამოართვა იარაღის ტარების უფლება 3 წლით.
გიორგი კირთაძე 12 იანვარს საპროტესტო აქციაზე დააკავეს მაშინ, როცა იქ პარტია „დროას“ ლიდერს, ელენე ხოშტარიას აკავებდნენ.
შსს-ს წარმომადგენლის, მარიამ კერესელიძის მტკიცებით, გიორგი კირთაძემ ფიზიკური წინააღმდეგობა გაუწია პოლიციელებს ელენე ხოშტარიას დაკავების დროს.
„ერთი ვიდეომტკიცებულება მაინც შეგიძლიათ მაჩვენოთ, სადაც ჩანს ჩემი მხრიდან ხელშეშლა?“- შსს-ს წარმომადგენელს მიმართა გიორგი კირთაძემ და ხაზი გაუსვა იმას, რომ ამ აქციას პირდაპირ ეთერშიც კი გადასცემდნენ, გარდა ამისა, პოლიციელებს სამხრე კამერები ჩართული ჰქონდათ.
ეს ვერც შსს-ს წარმომადგენელმა უარყო, თუმცა მან შესვენების დროს „ბათუმელებს“ უთხრა, რომ მოსამართლემ მტკიცებულებების ერთობლიობით უნდა მიიღოს გადაწყვეტილება, მათ შორის, იმ მოქალაქის შეფასებაზე დაყრდნობით, რომელსაც გიორგი კირთაძის დაკავების დროს უკითხავს: „იმიტომ აკავებთ, რომ წინ გადაგიდგათ?“
შსს-მ ამ საქმეზე მხოლოდ ერთი მოწმე პოლიციელი წარმოადგინა.
შსს-მ წარმოადგინა ვიდეომტკიცებულებებიც, სადაც ჩანს, რომ გიორგი კირთაძე საპროტესტო აქციას ესწრება. სამართალდარღვევის ამსახველი ვიდეო შსს-ს არ წარმოუდგენია.
ამ საქმეზე მკაფიოდ გამოჩნდა, რამდენად ერთიერთში ასრულებს პროკურატურის და შსს-ს მოთხოვნას სასამართლო – მაგალითად, კანონის მიხედვით, თუ სასამართლო კონკრეტულ ქმედებაში სამართალდარღვევას დაინახავს, სახდელის ფორმა და ზომა თავად სასამართლომ უნდა განსაზღვროს.
გიორგი კირთაძის საქმეში კი, გარდა იმისა, რომ მტკიცებულება შსს-ს არ წარმოუდგენია, შსს-ს წარმომადგენელმა, მარიამ კერესელიძემ მოსამართლეს უთხრა, რომ ის გიორგი კირთაძის დაჯარიმებას და იარაღის უფლების ჩამორთმევას ითხოვს.
„დაჯარიმდეს და ჩამოერთვას იარაღის ტარების უფლება,“- გაიმეორა მოსამართლე სალიხ შაინიძემაც.
დამაჯერებლობისთვის მოსამართლემ დასძინა – „შინაგანი რწმენის საფუძველზე“ მივიღე გადაწყვეტილებაო.
დარბაზში ჩაიცინეს.
მოსამართლეს ეს აღარ შეუმჩნევია.
იხილეთ ვიდეო:
