ავტომანქანა, რომელიც წუხელ ბათუმში, საპროტესტო მსვლელობის მონაწილეებს განზრახ დაეჯახა, 2024 წელს 26-ჯერ არის დაჯარიმებული. ჯარიმების რაოდენობა 3560 ლარია. „ბათუმელების“ ინფორმაციით, ავტომანქანის მფლობელს არც ერთი ჯარიმა გადახდილი არ აქვს.
წუხელ აქციის მინაწილეთაგან მინივენის შეჯახების შედეგად არავინ დაშავებულა.
გუშინ, 8 დეკემბერს, პროევროპული საპროტესტო აქციის მონაწილეები ბათუმის საფეხბურთო სტადიონთან შეიკრიბნენ. აქციის მონაწილეებმა საპროტესტო მსვლელობა მოაწყვეს და ავტომანქანების მოძრაობა აბუსერიძის ქუჩაზე მდებარე წრიულთან 40 წუთით სრულად შეაჩერეს.
მაშინ, როცა გზაჯვარედინზე მოძრაობა ყველა მიმართულებით შეჩერდა, ერთ-ერთი ავტომანქანა – მინივენი ნომრით RI-100-FA – საპროტესტო მსვლელობის რამდენიმე მონაწილეს დაეჯახა. მალევე ავტომანქანამ უკან დაიხია, რადგან მას წინ შეძახილებით აქციის მონაწილეები დაუდგნენ. ავტომანქანა აქციის მონაწილეებისგან მოშორებით გაჩერდა. ამ პროცესს თვლას ადევნებდა პატრულ-ინსპექტორიც.
„კინაღამ გადაგვიარა მანქანამ, ის განარიდა პოლიციამ და მაშინვე უკან დაიხია, მაგრამ ეს არის დანაშაული… მესმის, რომ ყველას სახლში ეჩქარება, მაგრამ მეც საოპერაციოდან გამოვდივარ და აქ ვდგები,“ – გვითხრა საპროტესტო აქციის მონაწილემ, ექიმმა შაკო კუტალაძემ.
ავტომანქანა, რომელიც აქციის რამდენიმე მონაწილეს დაეჯახა, ავტოსაგზაო მოძრაობის წესების დარღვევის გამო 2024 წელს 26-ჯერ არის დაჯარიმებული. მინივენი ნომრით RI-100-FA ბათუმში მცხოვრებ ქალს ეკუთვნის. თუმცა ინციდენტის დროს ავტომანქანას კაცი მართავდა.
რა რეაგირება ჰქონდა ამჯერად პოლიციას, როცა ავტომანქანა საპროტესტო აქციის მონაწილეებს განზრახ დაეჯახა? – ვკითხეთ შსს-ს პრესცენტრს. პასუხი ჯერ არ მიგვიღია.
___
- რა ხდება?
საქართველოში მასშტაბური პროტესტი, რომელმაც არა მარტო თბილისი, არამედ მთელი საქართველო მოიცვა, მას შემდეგ გამწვავდა, რაც 28 ნოემბერს ირაკლი კობახიძემ „ქართული ოცნების“ გადაწყვეტილების შესახებ განაცხადა, რომ პროცესი ევროკავშირში გაწევრიანების შესახებ „ქართული ოცნების“ ხელისუფლების მიერ 2028 წლის ბოლომდე ჩერდება.
28 ნოემბრიდან დღემდე ათასობით ადამიანი გამოდის საპროტესტო აქციებზე თბილისში, ბათუმსა და საქართველოს სხვა ქალაქებში. დაკავებულია და სასტიკად ნაცემი ასობით ადამიანი, მათ შორის, მედიის წარმომადგენლები, სახელოვნებო სივრცის წარმომადგენლები. არაიდენტიფიცირებადი პირები ჯგუფურად თავს ესხმიან ქუჩებში მოქალაქეებსა და მედიის წარმომადგენლებს.
