მთავარი,სიახლეები

რუსეთში ალა პუგაჩოვას უცხოურ აგენტად ცნობის პროცედურა დაიწყო

27.03.2024 • 3323
რუსეთში ალა პუგაჩოვას უცხოურ აგენტად ცნობის პროცედურა დაიწყო

რუსეთის ფედერალური უსაფრთხოებისა და ანტიკორუფციული პროექტის ხელმძღვანელი, ვიტალი ბოროდინი დღეს, 27 მარტს ტელეგრამზე წერს, რომ დაწყებულია მომღერალ ალა პუგაჩოვას უცხოურ აგენტად ცნობის პროცედურა.

ბოროდინის თქმით, მან მიიღო პასუხი გენერალური პროკურატურიდან მის მიმართვაზე.

„ალა პუგაჩოვას უცხოურ აგენტად ცნობის პროცედურა დაწყებულია, პროკურატურა სთხოვს რუსეთის ფედერაციის იუსტიციის სამინისტროს, აღიაროს პუგაჩოვა უცხოურ აგენტად.

იმედი მაქვს, მარეგულირებელი ორგანოები ამ საკითხს ბოლომდე მიიყვანენ“, – წერს ბოროდინი.

რუსული მედიის ცნობით, ალა პუგაჩოვას უცხოურ აგენტად აღიარებას ითხოვენ ქმრის, მაქსიმ გალკინის ანტისაომარი პოზიციისა და თავად ალა პუგაჩოვას სიტყვების შემდეგ, რომ „ნორმალური ხალხი რუსეთში დაბრუნებას არ აპირებს“.

პუგაჩოვამ და გალკინმა შვილებთან ერთად დატოვეს ქვეყანა 2022 წელს, როცა რუსეთი თავს დაესხა უკრაინას და ისრაელში გადავიდნენ საცხოვრებლად. ამის შემდეგ პუგაჩოვა მარტო, შვილებთან ერთად დაბრუნდა რუსეთში, თუმცა განაცხადა, რომ მხარს უჭერს თავის ქმარს.

თუ რუსეთის პროკურატურა პუგაჩოვას უცხოურ აგენტად ცნობს, კანონი მისი ქონების კონფისკაციასაც ითვალისწინებს.

75 წლის ალა პუგაჩოვა რუსეთის სახალხო არტისტია. იგი ათწლეულების განმავლობაში რუსეთსა და პოსტსაბჭოთა სივრცეში დიდი პოპულარობით სარგებლობდა.

გადაბეჭდვის წესი


ასევე: