„მაღალი ხარისხის თხილის რეალიზაცია დღეს შესაძლებელია 6.50 – 7 ლარად, ფერმერებს აქვთ მოლოდინი, რომ კიდევ უფრო გაიზრდება, ხოლო დაბალი ხარისხის თხილის ფასი 3 – 4.50 ლარს შორის მერყეობს,“ – ამბობს „ბათუმელებთან“ საქართველოს თხილის მწარმოებელთა ასოციაციის აღმასრულებელი საბჭოს თავმჯდომარე მერაბ ჭითანავა.
თხილის მწარმოებელთა ასოციაციის მიერ მოწოდებული ინფორმაციის თანახმად, წელს შარშანდელთან შედარებით თხილის უკეთესი მოსავალია.
„მოსავლის 60% აღებულია, ნაწილი შრობის პროცესშია. თხილი ტენიანია და ქარხნულ მდგომარეობამდე არაა გამშრალი.
შარშანდელთან შედარებით დაახლოებით 15%-ით მეტია რაოდენობრივად მოსავალი. მთლიანობაში დაბინავებული არაა მოსავალი და ვერ ვიტყვი დაზუსტებით, მაგრამ ვფიქრობ, რომ შედარებით უკეთესია, ვიდრე შარშან იყო. ხარისხს რაც შეეხება ძალიან განსხვავდება რეგიონების მიხედვით,“ – ამბობს მერაბ ჭითანავა.
თხილის პლანტაციები ძირითადად საქართველოს ორ რეგიონშია, გურიასა და სამეგრელოში. როგორც თხილის მწარმოებელთა ასოციაციაში ამბობენ, ასოციაციას ორივე რეგიონში აქვს საშრობი, სადაც ფერმერებს თხილის მიტანა შეუძლიათ.
„ამ მომენტისათვის გურიის თხილის ხარისხითაც კმაყოფილი ვართ, თუმცა საბოლოო სურათს მაინც დავინახავთ, როცა მოსავალი სრულად დაბინავდება. ვინც ჩაატარა ყველა სასოფლო სამეურნეო სამუშაო ან უმეტესი ნაწილი, დაზუსტებით მინდა გითხრათ, რომ მაღალი ხარისხის პროდუქცია მიიღეს, მოსავლის რაოდენობითაც და ხარისხითაც. უკეთესი მოსავალია, ვიდრე შარშან ჰქონდათ.
ჩაბარებას რაც შეეხება, სახლში აკითხავენ ფერმერებს ჩამბარებლები თუ ქარხნის წარმომადგენლები, თუ მათ ხარისხიანი თხილი აქვთ. ამიტომ პრობლემა თხილის რეალიზაცია არ არის. მოუვლელი თხილის ჩაბარება კი მოთხოვნა-მიწოდების საკითხია,“ – განმარტავს მერაბ ჭითანავა.
როგორ ხდება თხილის ხარისხის დადგენა? – ვკითხეთ მერაბ ჭითანავას.
„სამწუხაროდ, ჩამოყალიბდა საკმაოდ არასწორი კულტურა – თხილის კაკლით და ერთეულით შეფასება, რაც არ არის ობიექტური შეფასების კრიტერიუმი, თუმცა საკმაოდ გავრცელებულია ქართულ ბაზარზე. შესაბამისად, ფასის იდენტიფიცირებაც ასე ხდება.
ახლანდელი მდგომარეობით, 15 ლარი არის თხილის გულის [1 კგ.] საბაზრო ღირებულება. 15 ლარით შეფასებული 55%-იანი გამოსავლის მქონე თხილი სადღაც 6.70 ლარი იქნება კილოგრამი. ეს არის თხილის კარგი ფორმულა. ანუ 6.70 ლარი – ესაა მინიმალური ფასი პრემიუმ ხარისხის თხილზე.
თუმცა ბაზარზე ძირითადად ფიგურირებს 30-35 %-ის გამოსავლიანობის მქონე ძალიან მაღალი სიდამპლის მქონე პროდუქცია, რომელიც იმ ფერმერებს ეკუთვნის, რომლებმაც არ მოუარეს ან ნაკლებად მოუარეს ბაღს. შესაბამისად, ფასი შედარებით ნაკლები გამოდის 4 – 4.50 ლარი,“ – განმარტავს საქართველოს თხილის მწარმოებელთა ასოციაციის აღმასრულებელი საბჭოს თავმჯდომარე.
