ქედის მუნიციპალიტეტის გამგებელმა დავით დუმბაძემ ქედის საფეხბურთო კლუბ „ბეთლემთან“ დაკავშირებით ბრიფინგი გამართა და გამგეობის პოზიცია ოფიციალურად დააფიქსირა.
„როგორც იცით 10 მაისს, ხობის „კოლხეთსა“ და ქედის „ბეთლემს“ შორის გამართულ მატჩში ქედის „ბეთლემი“ ფედერაციის სადისციპლინო კომიტეტმა შედეგის წინასწარ დაგეგმვაში ამხილა, რის გამოც გუნდი ეროვნული ჩემპიონატის პირველი ლიგიდან იქნა დაქვეითებული, დაეკისრა ჯარიმა 50 000 ლარის ოდენობით, ხოლო 4 ფეხბურთელსა და მწვრთნელ-ასისტენტს სამუდამოდ აეკრძალათ საფეხბურთო სფეროში მოღვაწეობა.
ქედის მუნიციპალიტეტის გამგეობა და მე, როგორც მუნიციპალიტეტის გამგებელი, ვარ საშინლად იმედგაცრუებული მომხდარის გამო, მიუხედავად არა ერთი მცდელობისა გამგეობის მხრიდან, გუნდი შენარჩუნებულიყო და ღირსეულად ეასპარეზა პირველ ლიგაში, გავატარეთ ბოლო პერიოდში რეორგანიზაცია და ქმედითი ნაბიჯები, თუმცა შედეგი ამბიციური პირების გამო დღეს სავალალოა.
ვინაიდან მუნიციპალიტეტის თვითმმართველობის სახელი და რეპუტაცია უმთავრესი ღირებულებაა დღევანდელი მმართველი გუნდისთვის, არავის ეპატიება მსგავსი საქციელის ჩადენა. ამ ეტაპზე ყოველგვარი შეფასებისაგან თავს შევიკავებთ, რადგან დღეიდან გამგეობამაც დაიწყო შიდა მოკვლევა. როგორც ცნობილია საქმეს იძიებს შს სამინისტროს შესაბამისი სტრუქტურები და გპირდებით, რომ გვექნება კონსტრუქციული თანამშრომლობა მათთან.
მოკვლევის შემდეგ, ცალსახად შემიძლია განვაცხადო, რომ არავის მიმართ ვიქნებით ლოიალურები და დამნაშავეები აუცილებლად აგებენ პასუხს კანონისა და ყველა იმ ქედელი გულშემატკივრის წინაშე, რომლებიც წლების განმავლობაში ერთგულად ქომაგობდნენ ქედის „ბეთლემს“ – განაცხადა დავით დუმბაძემ.
