Batumelebi

როცა სახელმწიფოს ასე სჭირდება

ხშირად, როცა სტატიაზე ვმუშაობ, ტექსტზე მუშაობის დაწყებამდე ჩემდაუნებურად ვალაგებ ფიქრებში წინადადებებს. ამ დროს ზუსტად ვიცი, საიდან დავიწყებ ამბის მოყოლას, რითი დავასრულებ და რას დავარქმევ… ზოგჯერ ვიცი, როგორ იწყება ამბავი, ვინ არის მხარე და არ ვიცი, ვინ არის მეორე, მოპასუხე მხარე. ამ შემთხვევაში კოლეგებისა და რედაქტორის რეკომენდაციებს ვითვალისწინებ…

ორი დღის წინ, ეკატერინა ნინიძე-კორუბკინასა და მისი დის, ლუბა კორუბკინას სახლში განვითარებულ მოვლენებს ვაკვირდებოდი. იქედან დაბრუნებულს კი პირველად არ მომინდა ამბის ფურცელზე გადატანა, არ ვიცოდი, რა დამეწერა, რა ან ვინ იყო ამ ამბავში უფრო მთავარი, ვისით დამეწყო – ადამიანებით, რომლებსაც საკუთრება კანონის სახელით წაართვეს; ადამიანებით, რომლებმაც კანონი აღასრულეს თუ იმ მუშებით, რომლებსაც ბათუმის მერია ფულს უხდიდა სახლის დაცლაში და ადგილზე ამბის გარკვევის შემდეგ უარი თქვეს ამ დაკვეთაზე, მიატოვეს იქაურობა და წავიდნენ.

ამ ამბავში პირველად დამავიწყდა, რასაც ჩემი რედაქტორები ყოველდღე მახსენებენ (ისე მგონია, რომ ამის შეხსენება სულაც არ მჭირდება), რომ ნებისმიერ ამბავში მხოლოდ ჟურნალისტი ვარ და არ უნდა ვიქცე მხარედ, რომ ჩემი აზრი და ემოცია მეორეხარისხოვანი, უფრო სწორად „არცერთხარისხოვანია“. ეკატერინა კორუბკინა-ნინიძისა და მისი დისთვის სახლის ჩამორთმევაზე ადრეც ვწერდი, მათ მამაპაპისეული სახლი და მიწის ნაკვეთი ექსპროპრიაციის კანონით, ანუ სახელმწიფოსთვის აუცილებელი საჭიროებიდან გამომდინარე, ბულვარის გაგრძელებისა და ახალი გზის მშენებლობისთვის, ჩამოართვეს.

„მამა დამეხმარე, მამა, დედა დამეხმარე, დამეხმარე მამა, მამააა დამეხმარე, ეს არის თავისუფალი საქართველო? მოვიდეს ვარშალომიძე, მოვიდეს… დაურეკეთ ვარშალომიძეს, მომკალით, აჰა მესროლეთ, მე აქ მინდა სიკვდილი“, – მოთქვამდა სახლის კიბეზე გადმომდგარი 70 წელს გადაცილებული ალა კორუბკინა, იქვე იყო პოლიცია, ეზოში ისხდნენ ზედამხედველობის სამსახურის თანამშრომლები, იქვე იყო მათი უფროსი დავით დავითაძე, იყვენენ ჟურნალისტები და არასამთავრობო ორგანიზაციის თანამშრომლები, სახალხო დამცველის წარმომადგენელი, მეზობლები…

ყველა ერთად ვუყურებდით ამ ამბავს, ვუყურებდით, როგორ გამოჰქონდათ სახლიდან საყოფაცხოვრებო ნივთები, როგორ ისროლა ერთ-ერთმა მუშამ მოხუცის წნევის აპარატი სახლის მეორე სართულის ფანჯრიდან… ვუყურებდით, ვიღებდით კამერებით, ვიწერდით დიქტოფონებით… მეტი არაფერი შეგვეძლო… გასულ კვირას ნაციონალური არხები აგვისტოს ომის კადრებს ატრიალებდნენ, ხელისუფლებისგან ყველაზე უფრო ხშირად სიტყვა – ოკუპაცია და დაღუპულთა ოჯახების მიმართ თანაგრძნობის გამომხატველი სიტყვები ისმოდა. ტელეეკრანებიდან მათ საერთაშორისო ორგანიზაციებს დევნილთა უფლებებიც შეახსენეს…

ერთ-ერთი ფოტოგრაფი, რომელმაც ობიექტივზე ომის საზარელი ფაქტების აღბეჭდვა შეძლო, ყვებოდა, რომ ქალი, რომელიც ცეცხლში იწვოდა, მას დახმარებას სთხოვდა, ის კი ვერაფრით დაეხმარა, რადგან არ შეეძლო.

„ამ დროს ჭკუა გეკეტება და არაფერზე ფიქრობ გარდა ერთისა – ფირზე აღბეჭდო ეს ყველაფერი“ – კორუბკინების ეზოში, ასე მგონია, მეც, არაადეკვატური გავხდი, დაჟინებით ვაკვირდებოდი იქვე მსხდომ მერიის თანამშრომლებს, რომლებიც ხან დაწინაურების კურსებზე და ხან სხვა ყოფით თემებზე მშვიდად საუბრობდნენ. მინდოდა, მათი სახეები დამემახსოვრებინა, თითოეული მათგანის ფოტოზე აღბეჭდვა დავიწყე და მქონდა მოლოდინი, რომ ამის უფლებას არ მომცემდნენ, მაგრამ არა – ერთ-ერთმა გამაფრთხილა, როცა გადაღებას დააპირებ, გვითხარი და მოვემზადებითო, სხვებს კი გაეღიმათ.

„რა ქნან? ესენი მხოლოდ დავალებას ასრულებენ, სახელმწიფოა ყველაფრის თავი და თავი, კანონსაც ისე ირგებენ, როგორც უნდათ“, – მითხრა ერთ-ერთი არასამთავრობო ორგანიზაციის წარმომადგენელმა. საკუთარ თავთან კითხვა გამიჩნდა, შევასრულებ ჩემი უფროსის ნებისმიერ დავალებას ნებისმიერ შემთხვევაში? – არა, არ შევასრულებ.

იმ საღამოს სახლი დაანგრიეს, მოხუცი ალა ნათესავებს არსად გაჰყვა და ღამე ეზოში გაათია. კიდევ ერთი ფაქტი მახსენდება – როცა სახლიდან ნივთები გამოჰქონდათ, მას არაფრისკენ გაუხედავს, ერთადერთი, რასაც თვალი გააყოლა და რისი დაბრუნებაც შემდეგ ითხოვა, ეს საკუთარი საბანი, ბალიში და თეთრეული იყო, სხვა დანარჩენი მუშებმა სატვირთო მანქანაზე აიტანეს, ზედამხედველობის სამსახურის თანამშრომლებმა „შესანახად“ წაიღეს.

მოგვიანებით კორუბკინების მხარდასაჭერად მათივე უბნის მაჟორიტარი ნუკრი დოლიძე მოვიდა. ჩვენ გვითხრა, რომ „ოჯახის გვერდითაა, რომ ქვეყანა ვითარდება და ზოგჯერ ეს მსხვერპლსაც ითხოვს“.

2010 წელი. კორუბკინების სახლის განგრევისას. სტატია „ბათუმელების” არქივიდან

ბათუმის შოთა რუსთაველის უნივერსიტეტმა წიგნები შეიძინა

ქეთი ლაბაძე

ბათუმის შოთა რუსთაველის სახელმწიფო უნივერსიტეტმა 26 630 ლარის ღირებულების წიგნები შეიძინა. „წიგნები შეძენილია ყველა მიმართულებით, სულ 100 დასახელების, 986 ეგზემპლარი, თანაბარი რაოდენობით არ არის შემოტანილი, მაგალითად ისტორიის სახელმძღვანელო ყველაზე მეტი შემოვიდა.”- გვითხრა საფინანსო-ეკონომიკური დეპარტამენტის მთავარმა სპეციალისტმა ირინა ბერიძემ.

უნივერსტეტის მიერ გამოცხადებული ტენდერი, შპს „ბესტ სელერმა” მოიგო, შპს-მ ხელშეკრულება უნივერსიტეტთან 7 სექტემბერს გააფორმა, ოთხ ოქტომბერს კი წიგნები შემოიტანა.

მერაბ ხალვაში, ბსუ-ს ხარისხის უზრუნველყოფის სამსახურის უფროსი ამბობს, რომ საჭირო ლიტერატურის სია საფინანსოს გადასცეს დეკანატებმა: „იქ შედგა ერთიანი სია. შემოსულია თითქმის ყველა მიმართულებით საჭირო ლიტერატურა. ძირითადად აქცენტი გაკეთდა სილაბუსების მიხედვით.

ტენდერი ისევ უნდა გამოცხადდეს და შემოვა უნივერსიტეტში სხვა წიგნებიც, სრულად მოთხოვნა ვერ დაკმაყოფილდება, მაგრამ დიდი შეღავათი ნამდვილად იქნება, ახალი გამოცემული ლიტერეტურაა, ქსეროქსებითაც თუ შევავსებთ, იმედია, მოგვარდება სიტუაცია.” – ამბობს მერაბ ხალვაში.

ბათუმის უნივერსიტეტში სახელმძღვანელოების დეფიციტსა და მოძველებულ ლიტერატურაზე სტუდენტები ბოლო თვეების მანძილზე აქტურად საუბრობენ.

არჩევნები ბათუმში – ამომრჩეველი საკუთარი კალმებით, ყალბი პასპორტები და უბნის გარეთ დარჩენილი დამკვირვებლები

1 ოქტომბერი. დილის შვიდი საათი. ცესკოსგან აკრედიტირების დამადასტურებელი ბიჯით, ფოტოაპარატითა და დიქტოფონით შეიარაღებული სარჩევნო პროცესის დაკვირვებას #29 საარჩევნო უბნიდან ვიწყებ, რომელიც ბათუმის არქეოლიგიური მუზეუმის შენობაშია განთავსებული. ამ უბანზე საარჩევნო პროცესის დასაწყისშივე კოალიცია „ქართული ოცნების“ დამკვირვებლებს პრობლემები იმის გამო შეექმნათ, რომ ცესკოსგან „ბიჯები“ არჩევნების დღემდე ვერ მიიღეს. მათ უბანზე შესვლა ვერ შეძლეს.

#29 საარჩევნო უბანზე დღის 11 საათამდე ამომრჩეველთა ნაკადი არ წყდება. გარეთ დარჩენილი დამკვირვებლები კი ცდილობენ უსაქმოდ არ დარჩნენ. ორნი _ ნათია და გიორგი უბანზე შესვლამდე ამომრჩეველს შესასვლელთან გამოკრულ სიაში საკუთარი სახელისა და გვარის მოძებნაში ეხმარებიან. 11 საათის შემდეგ ამომრჩეველთა რაოდენობა მატულობს და საარჩევნო უბნის შესასვლელთან ხალხმრავლობაა, ამომრჩევლის უმეტესობას უბანზე შესვლისას ხელში კალამი უჭირავს. ამ დრომდე საკუთარი პოზიციის დაფიქსირება უბანზე მოსულმა ხუთამდე ამომრჩეველმა ვერ შეძლო იმ მიზეზით, რომ სიაში არ აღმოჩნდა. უბანზე მოსულ ამომრჩეველთაგან უმეტესობა კი სიამოვნებით თანხმდება „ამომრველთა ლიგის“ წარმომადგენელს ეგზითპოლით დააფიქსიროს თავისი არჩევანი.

გარეთ დარჩენილ დამკვირვებელთა შორისაა 21 წლის თორნიკეც. მან დაკვირვების „ახალი მეთოდი გამოიგონა“ – საარჩევნო უბანზე შესასვლელ კართან, კუთხეში დგას და იქედან ფეხს არ იცვლის, ხელში თეთრი ფურცელი უჭირავს და მასზე იმდენ მინიშნებას აკეთებს, რამდენი ამომრჩეველიც საარჩევნო ყუთში კონვერტის მოთავსებას შეძლებს. თორნიკე ამბობს, რომ მისი სტატისტიკა უზუსტესია და ის სამაგიდო სიებში ხელმოწერათა რაოდენობას აუცილებლად უნდა დაემთხვეს.

#30 უბანზე გადავინაცვლე, ეს უბანი საბავშვო ბაღის შენობაში, მეორე სართულზეა განთავსებული. პირველი სართულის ფოიედან გრძელი კიბის ჩათვლით იმ ოთხის შესასვლელამდე, სადაც საარჩევნო უბანია განთავსებული მჭიდრო რიგი დგას. ამომრჩეველი რიგში დიდი ხნით დგომის გამო უკმაყოფილოა. მათ შორისაა `ქართული ოცნების~ მაჟორიტარობის კანდიდატი კაკო ძნელაძეც, ის ამომრჩეველს ესაუბრება. შორიახლოს ვჩერდები, ვცდილობ მოვისმინო რაზე საუბრობს მაჟორიტარობის კანდიდატი, რის შემდეგაც ვრწმუნდები, რომ კაკო ძნელაძე აგიტაციას არ ატრებს, ისიც ამ უბანზე აძლევს ხმას და რიგში როგორც ამომრჩეველი დგას. ამ უბანზე იმ დრომდე ვჩერდები, ვიდრე ის უბანს არ დატოვებს.

ქართული ოცნების რამდენიმე დამკვირვებელი #30 უბანზეც გაერეთ დარჩა, მიზეზი ამ შემთხვეაშიც ცესკოს მიერ ბიჯების დაგვიანებაა. უბნის მიმდებარე ტერიტორია დავათვალიერე, მოპირდაპირე მხარეს ორი ავტომანქანაა გაჩერებული, რომელშიც შევნიშნე ქალები სიებით ხელში, ამომრჩევლთა ნაწილი საარჩევნო უბანზე შესვლამდე სწორედ ამ მანქანებთან მიდის და ორწუთიანი გასაუბრების შემდეგ საარჩევნო უბანზე ინაცვლებს. ქალები კი, რომლებსაც ცხრილში მოთავსებული ჩამონათვალი კალთებში უდევთ, პერიოდულად მობილურ ტელეფონზე საუბრობენ. მანქანებს ვუახლოვდები და ფოტოების გადაღებას ვიწყებ, ქალები სახეს იფარავენ. ორი მამაკაცი კი მანქანიდან გადმოდის. ისინი ერთდროულად ერთსა და იმავე კითხვებს მიმეორებენ _ვინ ხარ? რატომ გვიღებ? მათ კონტრკითხვებით ვპასუხობ. ვეკითხები რა კონსულტაციებს გადიან მათთან ამომრჩევლები უბანზე შესვლამდე?- ერთი გიორგი გოგმაჩაძედ გამეცნო, რომელმაც მითხრა, რომ ე.წ. კონსულტაციებთან კავშირი არ აქვს და ნათევსავს ელოდება, რომელიც უბანზე ხმის მისაცემადაა შესული. მეორემ _ ირაკლი ბოლქვაძემ კი მითხრა, რომ კოორდინატორია და თავის საქმეს აკეთებს, თან დააკონკრეტა, რომ „ქართულ ოცნებასაც“ ჰყავს თავისი კოორდინატორები და „ ეს დარღვევა არ არის.“

დაახლებით ერთი საათი ამ მანქანების შორი-ახლოს ვტრილებ. ამ დროს მანქანებთან არც ერთი ამომრჩეველი არ მოდის, შიგ მსხდომი ქალბატონები კი გაბმულდ საუბრობდნენ მობილურ ტელეფონებზე, სიების დამალვა არც უცდიათ. ჩემთან მათ მხოლოდ ერთი მოთხოვნა ჰქონდათ – ფოტოაპარატით არ უნდა დამეფიქსირებინა.

ფოეში გამოკრული სიის მიხედვით #30 უბანზე 1450 ამომრჩეველია რეგისტრირებული, დამკვირვებლების ინფორმაციით კი, უბანზე მოსული ბიულეტენების რიცხვი 1031-ია, ანუ სრული აქტივობის შემთხვევეში 419 ამომრჩეველი ბიულეტენის გარეშე რჩება. ბიულეტენების ნაკლებობის ფაქტი ბათუმში თითქმის ყველა უბანზე დაფიქსირდა.

#52 უბანზე ოთახის შუაგულში კამერაა დაყენებული, რომელიც არჩევნების მსვლელობას აფიქსირებს. კამერა უბანზე თავმჯდომარის წინააღმდეგობის მიუხედავად ორგანიზაცია „პატიმრების უფლებების დაცვის ცენტრის“ დამკვირვებელმა ბესო ჭელიძემ დაამონტაჟა. უბანზე შესვლისთანავე ვიგებ, რომ საის დამკვირვებელი საჩივარს წერს, მოქალაქე სერგო ტუსკიას მის ნაცვლად ხმა მიცემული დახვდა. მას კი პოზიციის დაფიქსირების საშუალება არ მიეცა. საიას დამკვირვებელმა თავმჯდომარის პასუხისმგებლობის საკითხი დააყენა.

დღის სამი საათისთვის რედაქციიდან მეხმიანებიან. „აღმაშენებლის ქუჩაზე „ქართული ოცნების“ წარმომადგენელი დაუკავებიათ.“ ინფორმაცის გადასამოწმებლად მივდივარ. აღმაშენებლის ქუჩაზე #20 უბანზე შევდივარ. მშვიდი სიტუაციაა, პრობლემები არ არის. მზად ვარ შეტყობინების სისწორეში ეჭვი შევიტანო, თუმცა იქევე ერთ-ერთი დაკვირვებელის – მერაბ სარჯველაძეს დახმარებით ვიგებ, რომ უბნიდან ცოტა ხნის წინ ოლქის წარმომადგელი „ქართული ოცნებიდან“ ოთარ გურგენაძე პოლიციამ წაიყანა: „ჯერ დოკუმენტები ჩამოართვეს, შემდეგ მანქანაში ჩასვეს და წაიყვენეს. თუმცა მალევე გაათავისუფლეს. #21 უბნიდან კი მძღოლი წაიყვანეს, რომელსაც უბანზე „ქართული ოცნების“ მხარდამჭერები მოჰყავდა.“

#103 უბნის მიმდებარე ტერიტორიაზე ინციდენტის შესახებ sms -ით შემატყობინეს, ადგილზე გასულს ნარინჯისფერ მაისურიანმა ეზოს დამკვირვებელმა მითხრა, რომ ადგილი ჰქონდა კარუსელის დატრიალების მცდელობას: „შევეწინააღმდეგეთ, რის შემდეგაც იმ „მარშუტკაში“ მსხდომმა ორმა მამაკაცმა, რომელიც ხალხის გადაყვანას უზრუნველყოფდა, გინება დაგვიწყო. მანამდე კი ისიც შევნიშნეთ, რომ „მარშუტკაში“ ფულს არიგებდნენ. ეს ყველაფერი გადავიღეთ, რასაც შეხლა-შემოხლა მოჰყვა, პატრულის გამოძახების შემდეგ კი „მარშუტკა“ წავიდა და ის ხალხიც მას გაჰყვა.“

ჩანაწერთა წიგნის მიხედვით კი ვარკვევ, რომ ამ უბანზე „გამჭვირვალობა საქართველოს“ დამკვირვებელმა მაია ინაშვილმა ხმაური და არაორგანიზებულობა გააპროტესტა, მას საიას დაკვირვებელიც დაეთანხმა.“ უბნის მიმდებარე ტერიტორიაზე მომხდარ ინციდენტთან დაკავშირებით დამკვირვებლებს საჩივარი არ დაუწერიათ – მათ უბანი არ დატოვეს. მათგან ზოგიერთს კი ინციდენტის შესახებ არც არაფერი გაუგია.

#29 უბანზე მის ნაცვლად ხმა მიცემული დახვდა გოჩა მგელაძესაც. #23 უბანზე კი იგივე მიზეზით ხმის მიცემა ლაშა ბოლქვაძემ, ალექსანდრე ტარიელეძემ, კახა თურმანიძემ და ზაზა მუკბანიანმა ვერ შეძლეს. #17-ე უბანზე დაფიქსირებული საჩივრებით კი ირკვევა, რომ ხმის მიცემის უფლება სხვადასხვა დროს მისულ 10 ამომრჩეველს არ მიეცა. მოქალაქეებმა: თეიმურაზ ტუღუშმა, აკაკი მიქაძემ, რობერტ ესოიანმა, ბესო ხომერიკმა, ირაკლი კეჭაყმაძემ, ზვიად მალაყმაძემ, არტურ მარკოსიანმა, გარსევან ჯორბენაძემ, ზაზა სარიშვილმა, მამუკა თურმანიძემ `ბათუმელებთან~ განაცხადეს, რომ მათი ხმა გააყალბეს – საარჩევნო უბანში მისულებს მათი სახელის და გვარის გასწვრივ ხელმოწერები დახვდათ.

სხვის ნაცვლად ხმის მიცემის ფაქტები ბათუმში თითქმის ყველა უბანზე დაფიქსირა. გარდა ამისა, თითოეულ საარჩევნო უბანზე საკუთარი პოზიციის დაფიქსირება ოცზე მეტმა ადამიანმა ვერ შეძლო, რომლებიც სიებში არ აღმოჩნდნენ, მათ შორის ბევრმა სიაში საკუთარი სახელის და გვარის ძებნისას გარდაცვლილი ნათესავი აღმოაჩინა.

19:49 საათისთვის ბათუმის #29-ე უბანზე ვბრუნდები. ამ დროისთვის 6 საჩივარია დაწერილი. ექვსივე სხვის ნაცვლად ხმის მიცემის ფაქტს ეხება. ამ უბანზე დამკვირვებლებმა გადასატანი ყუთის დაგვიანებით გატანა, საარჩევნო ბიულეტენების ყუის ჩამოხევისა და რეგისტრატორის ხელმოწერის გარეშე გაცემის ფაქტებიც გაასაჩივრეს.

ხემის დათვლის პროცეს #29 საარჩევნო უბანზე ვესწრები. ზუსტად რვა საათსა და 2 წუთზე უბნის თავმჯდომარე მოადგილეს კარის ჩაკეტვის განკარგულებას აძლევს, კარის გამჭვირვალე მინის უკან რჩებიან თორნიკე და სხვა დამკვირვებლებიც. საარჩევნო კანონმდებლობის შესაბამისად მთვლელების კენჭისყრით გამოვლენამდე თავმჯდომარემ ადმინისტრატორებს გაცემული ბიულეტენების რაოდენობის ხელმოწერებთან შედარება თხოვა. თითოეულმა რამდენჯერმე დათვალა, თუმცა ბალანსი არ შედგა. მეხუთედ დათვლის შემდეგაც აღმოჩნდა, რომ გაცემული ბიულეტების რაოდენობა ორით მეტი იყო ხელმომწერთა რაოდენობზე, კოალიციის დამკვირვებელმა საჩივარი დაწერა. თავმჯდომარემ გამოსავალი მოძებნა `ორმა რეგისტრატორმა დაწეროს ახსნა-განმარტება, რომ ამომრჩეველს ორი ზედმეტი ბიულეტენი გადააყოლა“.

ხმების დათვლის პროცესი ღამის ოთხის ნახევრამდე გრძელდება, კარის გამჭვირვალე მინის უკან თორნიკე დგას. ის თავის ადგილს საარჩევნო პროცესის დაწყებიდან ხმის დათვლის პროცედურის დასრულებამდე არ ტოვებს. კოალიციის უბანზე მყოფი დამკვირვებელი პერიოდულად მისთვის ფურცელზე მოკლე ტექსტურ შეტყობინებას წერს და დაკეტილი კარის მინიდან აჩვენებს. თორნიკე ინფორმაციის მიღებით კმაყოფილია, რასაც მარჯვენა ხელის ცერა თითით ანიშნებს.

საქართველოს ახალგაზრდა იურისტთა ასოციაციის აჭარის ორგანიზაციის თანამშრომელი ნინო ტავლალაშვილი, რომელიც არჩევნებს აკვირდებოდა „ბათუმელებთან“ საუბარში აცხადებს, რომ „გარდა იმისა, რომ ისეთი მნიშვნელოვანი დარღვევები არ დაფიქსირებულა, რომელიც არჩევნების შედეგზე მოახდენდა გავლენას, ეს არჩევნები 2010 წლის არჩევნებისგან კიდევ იმით განსხვავდებოდა, რომ მათ დაკვირვებლებზე ზეწოლა არ მომხდარა. ეს ყველაფერი ერთად კი ამომჩევლის გააქტიურებამ გამოიწვია. ადამიანები მიხვდნენ იმას, რომ მათ ნაცვლად არჩევანს არავინ გააკეთებს.“

სტატია მომზადებულია გაეროს დემოკრატიის ფონდის მხარდაჭერით. სტატიის შინაარსზე პასუხისმგებელია სამოქალაქო განვითარების ინსტიტუტი და მასში გამოთქმული მოსაზრებები, შესაძლოა, არ ასახავდეს გაერთიანებული ერების ორგანიზაციისა და გაერთიანებული ერების დემოკრატიის ფონდის შეხედულებებს.

მონოპოლისტები და ახალი მთავრობა

მსხვილი ბიზნესმენები, რომლებსაც ბაზარზე მონოპოლიური პოზიცია აქვთ, წლების განმავლობაში „ერთიანი ნაციონალური მოძრაობის“ შემომწირველები იყვნენ. კანონით დაშვებული შემოწირულობის მაქსიმალური ოდენობით – 60 000 ლარით, „ნაციონალურ მოძრაობას“ 2012 წელს ფარმაცევტული კომპანია „ავერსის“ მფლობელი პაატა კურტანიძე დაეხმარა. პარტიას 35 ათასი ლარი შესწირა მისმა მეუღლემ მაია კურტანიძემ, 60 ათასი ლარი – ძმამ მალხაზ კურტანიძემ.

ბიძინა ივანიშვილის განცხადებას ფარმაცევტულ ბაზარზე კარტელური გარიგებების და მონოპოლიების არსებობის შესახებ „ავერსის“ დამფუძნებელი არ ეთანხმება: „ამ დროისთვის 456 იმპორტიორი და 2500 აფთიაქია. როცა საუბრობენ ფარმაცევტული სფეროს მონოპოლიაზე, „ავერსს“ მოიაზრებენ, მინდა გითხრათ, რომ ჩვენი ბაზრის წილი არის 20 პროცენტი, ეს არ არის იმის საფუძველი, რომ „ავერსი“ არის ბაზრის მონოპოლისტი. ჩემი რენტაბელურობა არის 5 პროცენტი“.

პაატა კურტანიძე იმედოვნებს, რომ ანტიმონოპოლიური სამსახურის შექმნის შემდეგ, ბაზარზე სიტუაცია დარეგულირდება და ახალი მთავრობა კანონის ფარგლებში იმოქმედებს: „მე ამ რვა წელიწადში რამდენჯერმე მაქვს თანხა გადახდილი, ისე როგორც ბევრს, ყოველგვარი საჭიროების გარეშე. ამის თაობაზე ჩვენ სარჩელს სასამართლოში შევიტანთ“.

„ნაციონალური მოძრაობის“ შემომწირველები არიან ნავთობპროდუქტების იმპორტიორი და დისტრიბიუტორი კომპანია „ვისოლის“ აქციონერები, ძმები ლევან და სოსო ფხაკაძეები. მათ პარტიას, კანონით განსაზღვრული შემოწირულობის ზედა ზღვარი, 60-60 ათასი ლარი ჩაურიცხეს.

„ვისოლის“ აქციონერი ლევან ფხაკაძე ამბობს, რომ „არსებულ მონოპოლიებს და კარტელურ გარიგებებს გამოკვლევა სჭირდება. ასე ერთი ხელის მოსმით, ვერ ვიტყვით სად იყო მონოპოლია და სად არა. ის, რომ სიმახინჯეები არსებობდა, ყველამ ვიცით. ბუნებრივია ნებისმიერ სწორ ბიზნესს სჭირდება ნორმალური კონკურენტული გარემო. „ვისოლი“ ბაზარზე კარგახანია არსებობს და ჩვენ არ შევუქმნივართ წინა ხელისუფლებას, იქამდეც ვიყავით ბაზარზე და მყარი და ძლიერი პოზიცია გვქონდა“.

ლევან ფხაკაძე ამბობს, რომ პარტიისთვის ფულის შეწირვის მიუხედავად, მის კომპანიას ხელისუფლებასთან მჭიდრო ურთიერთობა არ ჰქონდა: „ვერ გეტყვით, რომ ჩვენ მჭიდროდ ვურთიერთობდით. ამას მათი მხრიდან უფრო ერქვა ურთიერთობა. როგორ და რანაირად იყო, ამის თქმა ბუნებრივია, არ მინდა“.

„ერთიან ნაციონალურ მოძრაობას“ სამოცი ათასი ლარი „სილქროუდ ჯგუფის“ მფლობელმა გიორგი რამიშვილმაც შესწირა, რომელიც სახელისუფლებო წრეებში „ზარალას“ სახელით არის ცნობილი.

„სილქროუდ ჯგუფი“ საქართველოში წილს ფლობს „ბი თი ეი ბანკში“, “სილქროუდ ბანკში” ფლობს საკონტროლო პაკეტს, ასევე კომუნიკაციების კომპანია „სილქნეტში“. ამ ბიზნესჯგუფის გახმაურებული პროექტია „ტრამპ თაუერის“ მშენებლობა ბათუმში. ტრამპის ორგანიზაციასა და „სილქროუდ ჯგუფს“ შორის თანამშრომლობის ხელშეკრულება აშშ-ში გასულ წელს საქართველოს პრეზიდენტ მიხეილ სააკაშვილის ვიზიტის ფარგლებში მარტში გაფორმდა. ქართულ მხარესა და დონალდ ტრამპს შორის ხელი მოეწერა ხელშეკრულებას, რომლის თანახმად „ტრამპ თაუერი“ საქართველოშიც აშენდება.

„სილქროუდ ჯგუფის“ ხელმძღვანელი გიორგი რამიშვილი ამბობს, რომ ბაზარზე არსებული მონოპოლიების საკითხი კომპლექსურია: „მე პირადად ბარიერები არ მქონია. მე ვერ ვხედავ იმას, რომ ჩემს ბიზნესს ემუქრება რაიმე. შეზღუდვებზე საუბარი ძალიან რთულია, რადგან ეს მოიცავს უამრავ ასპექტს. „სილქროუდ ჯგუფი“ არ ერევა პოლიტიკაში, ეს არის წმინდა ბიზნესჯგუფი. ჩვენ ვახერხებთ, გამოვნახოთ საერთო ენა არა მარტო ჩვენს სამშობლოში, არამედ შუა აზიის ქვეყნებთანაც“.

ხელისუფლებასთან დაახლოებულ ბიზნესმენს მთავრობის მხარდაჭერის გარეშე ბიზნესპროექტების განხორციელებაზე საუბარი უჭირს: „იქნება მხარდაჭერა – განვახორციელებ. სახელმწიფოს მხარდაჭერის გარეშე ბიზნესის განხორციელება რთული იქნება. მე მგონი „ტრამპთაუერი“ იქნება, ბიძინა ივანიშვილმა თქვა, რომ ის მხარს დაუჭერს ბიზნესს“.

კომპანია „ბაგრატიონი 1882“-ის აქციონერი ლევან ვასაძე ამბობს, რომ საქართველოს ბაზარზე კარტელური გარიგებებისა და მონოპოლიების დრო უნდა დასრულდეს: „მთავრობამ უნდა გამოიჩინოს ძალისხმევა და ანტიმონოპოლიური სამსახური ქმედითუნარიანი გახადოს. სხვა შემთხვევაში ბაზარზე არაფერი შეიცვლება“.

იმის შესახებ, რომ ჰქონდა თუ არა მის კომპანიას ადგილობრივ ბაზარზე შეზღუდვები, ლევან ვასაძეს საუბარი არ სურს: „მქონდა თუ არა ბარიერები, ამაზე საუბარი არ მსურს. ნაცმოძრაობის შემომწირველი არასოდეს ვყოფილვარ“.

ეკონომიკის მეცნიერებათა დოქტორის ქეთი ლაფაჩის ინფორმაციით, გლობალური კონკურენტუნარიანობის 2012 წლის ინდექსში საქართველო 142 ქვეყანას შორის ადგილობრივი ბაზრის კონკურენტული გარემოს კუთხით 128-ე ადგილზეა, ხოლო ანტიმონოპოლიური პოლიტიკის ეფექტურობის კუთხით – 135-ზე.

მთავრობამ ანტიმონოპოლიური სამსახური, ბაზრის ლიბერალიზაციის პრინციპებიდან გამომდინარე, 2004 წელს გააუქმა. 2010 წლის გაზაფხულზე, მთავრობის ინიციატივით, საჯარო სამართლის იურიდიული პირი თავისუფალი ვაჭრობისა და კონკურენციის სააგენტო ჩამოყალიბდა. ეს უწყება საქართველოს პრემიერ-მინისტრის წინაშე იყო ანგარიშვალდებული. 2011 წელს მთავრობამ „თავისუფალი ვაჭრობისა და კონკურენციის შესახებ“ სტრატეგია შეიმუშავა და კანონპროექტი მოამზადა. კანონი კონკურენციისა და სახელმწიფო შესყიდვების სააგენტომ უნდა აღასრულოს, რომელიც 2012 წლის იანვარში ორი სააგენტოს (თავისუფალი ვაჭრობისა და კონკურენციის სააგენტოს და სახელმწიფო შესყიდვების სააგენტოს) შერწყმის საფუძველზე ჩამოყალიბდა.

მურმან დუმბაძე: ხელისუფლება პროვოკაციებს გვიწყობს

მურმან დუმბაძის განცხადებით მოქალაქეებმა უკანონოდ დაიკავეს საცხოვრებელი ფართები აჭარის ტერიტორიაზე. კერძოდ, ხელვეჩაურის რაიონში მდებარე სამხედრო ნაწილში, ბათუმში, მეტაქსას ქუჩაზე, ბაზრის ტერიტორიაზე, გოროდოკის და თამარის დასახლებაში. „სრული პასუხისმგებლობით ვაცხადებთ, რომ შესახლებული მოქალაქეები არანაირ კავშირში არ არიან „ქართულ ოცნებასთან“ და რომც იყვნენ დაკავშირებული, უკანონოდ ქონების დაკავების უფლება არავის აქვს.“ – განაცხადა მურმან დუმბაძემ.

კოალიცია მოუწოდებს სამრთლდამცავებს იმოქმედონ კანონის ფარგლებში და აღკვეთონ უკნონობა.

სამართალდამცავების მხრიდან ამ ფაქტზე რეაგირების არქონას მურმან დუმბაძე ხელისუფლებას უკავშირებს და ამბობს რომ „ეს მათი (ხელისუფლების) ეს პროვოცირებული და წახალისებულია.“

„ტაქსით, ღორჯომის ხეობიდან, მოქალაქე თავისით არ ჩამოვიდოდა და იქ არ შევიდოდა“ – აცხადებს დუმბაძე. მისი ინფორმაციით მეეზოვეებსაც კი მისცეს რეკომენდაციები, რომ არ დაასუფთაონ ქალაქის ქუჩები.

მურმან დუმბაძე განუმარტავს მოქალაქეებს, რომ მიუხედავად იმისა, რომ ხელისუფლების ცვლილება მოხდა, ჯერჯერობით მთავრობის გადაბარების პროცესი მიმდინარეობს და ამიტომ ყოველგვარ უკანონობაზე პასუხისმგებლობა ჯერ კიდევ მოქმედმა ხელისუფლებამ უნდა აიღოს.

ხმის დაკარგული უფლება და საჩივრები ოლქში

გიორგის ნაცვლად საკუთარი ხმის უფლება წაართვეს თეიმურაზ ტუღუშს, აკაკი მიქაძეს, რობერტ ესოიანს, ბესო ხომერიკს, ირაკლი კეჭაყმაძეს, ზვიად მალაყმაძეს, არტურ მარკოსიანს, გარსევან ჯორბენაძეს, ზაზა სარიშვილსა და მამუკა თურმანიძეს. მათ ბათუმის მე-17 უბანზე უნდა მიეცათ ხმა. თუმცა, ისევე როგორც გიორგი გიორგაძის შემთხვევაში, უბანზე მისულებს მათი სახელისა და გვარის გასწვრივ ხელი უკვე მოწერილი დახვდათ.

ხმის მიცემის უფლება შეეზღუდა მიხეილ გაბაიძესაც. ის 58-ე უბანზე აძლევდა ხმას. თუმცა მის ნაცვლად ხმა სხვა პირმა მისცა. მსგავს ვითარებაში აღმოჩნდა 23-ე უბანზე მისული სამი მოქალაქე. როცა უბანზე მივიდნენ, მათ სახელზე ბიულეტენი უკვე გაცემული.

არჩევნების დღეს, პირველ ოქტომბერს ხმების გაყალბების ფაქტზე ბრიფინგი გამართა კოალიცია „ქართულმა ოცნებამაც“. მათი განცხადებით, ბათუმის მე-16 უბანზე დაფიქსირდა ყალბი პასპორტით ხმის მიცემა. ამომრჩეველმა გიორგი კალანდაძემ, სხვის ნაცვლად მისცა ხმა. როგორც „ქართული ოცნების“ ოფისში განაცხადეს, მათ მოიპოვეს გიორგი კალანდაძის ფოტო და ასევე უბანზე მყოფი პირის ფოტო, რომელიც გიორგი კალანაძედ ასაღებდა თავს. „ქართული ოცნების“ მაჟორიტარის განცხადებით გიორგი კალანდაძე უშიშროების თანამშრომელია. მათივე ინფორმაციით, მე-12 უბანზე ხმის გაყალბებას ცდილობდა ვინმე ირაკლი თავბერიძე, მაგრამ გამოვლენის შემდეგ ის უბნიდან გაიქცა. 22-ე უბანზე ხმა გაუყალბეს ედნარ მიქელაძეს და ალექსანდრე ტარიელაძეს.

მეცხრე საარჩევნო უბანზე კი „დემოკრატიის და ბიზნესის განვითარების ცენტრის“ დამკვირვებლის მარიამ ხუხუნაიშვილის ინფორმაციით, ფრიდონ სურმანიძის და დავით სვინტრაძის მხრიდან ადგილი ჰქონდა ხმის ორჯერ მიცემის ფაქტს. ზურაბ ართმელაძის მხრიდან კი ხმის მეორედ მიცემის მცდელობას, რისი უფლებაც დამკვირვებლებმა არ მისცეს.

პირველი ოქმი და საჩივრები ოლქში

ბათუმის 79-ე საოლქო კომისიაში პირველი ოქმი, ღამის 12 საათის შემდეგ შევიდა. როგორც ახალგაზრდა იურისტთა ასოციაციის წარმომადგენელი, სულხან სალაძე აცხადებს, პირველად ოქმები პატარა საარჩევნო უბნებიდან შემოვიდა. „მესამედ შემოვიდა სპეცუბნის ხმები, სადაც სამხედროები აძლევენ ხმას. ფაქტობრივად ეს ერთადერთი უბანი იყო სადაც „ნაციონალურმა მოძრაობამ“ უპირატესობა მოიპოვა. დანარჩენი უბნის ოქმების მიხედვით, სერიოზული უპირატესობით იგებდა „ქართული ოცნება“.

როგორც სულხან სალაძე ამბობს, საოლქოზე აშკარა ზეწოლის ფაქტები არ იკვეთებოდა: „შემოდიოდა ოქმები, ოლქის იურისტი საჯაროდ აცხადებდა, თუ რამდენი ხმა ჰქონდა მიღებული მაჟორიატრობის კანდიდატს, შემდეგ ეს მონაცემები ცხრილში შეყავდა და ეკრანზე იყო გამოტანილი. ასე რომ ყველა დამკვირვებელს შეეძლო თვალის გადევნება ოქმის მონაცემებზე, ასევე ფორმულაც იყო გამოყვანილი და ავტომატურად ჯამდებოდა, ყოველი უბნის დამატების შემდეგ რომელ პარტიას ან მაჟორიტარს რამდენი ხმა ჰქონდა“.

სულხან სალაძის ინფორმაციით, ოლქში არ ყოფილა ზეწოლა მედიაზე და ყველას ჰქონდა შესაძლებლობა პროცესი გაეშუქებინათ: „არ შეიძლება და ნუ ესწრებით – ასეთი განცხადებები არ ყოფილა, უბრალოდ, რადგან ოთხი ბიულეტენი იყო აჭარის შემთხვევაში, იყო 1500-ანი და მეტი უბნები რომლებიც ერთდროულად დაჯამდა, რის გამოც შეიქმნა რიგები, რადგან ბათუმში უბნები გაზრდილი ამ არჩევნებზე“.

ცესკო არჩევნებამდე აცხადებდა რომ ოქმები ონლაინ რეჟიმში ავტომატურად უნდა ატვირთულიყო, თუმცა ასე არ მოხდა. „მეც მახსოვს ასეთი განცხადება, როცა ცესკომ განაცხადა რომ სანამ ოლქში მივიდოდა უბნიდან ოქმი, მანამდე უნდა მომხდარიყო მისი ვებზე ატვირთა. იმ ოთახიდან სადაც ჩვენ დამკვირვებლები ვისხედით და ექსელის ფაილში ხდებოდა მონაცემების შეყვანა, ოქმი არ იტვირთებოდა, მე გვიან ღამით და მეორე დღესაც შევიხედე ცესკოს საიტზე და ოქმების გრაფა ცარიელი იყო. მხოლოდ აჭარის უმაღლესი საბჭოს არჩევნების ოქმები იდო ნაწილობრივ“ – აცხადებს სულხან სალაძე.

როგორც დამკვირვებლები აცხადებენ, არცერთი მხარე, არც მმართველი გუნდი და არც ოპოზიცია აღარ საუბრობს იმაზე რომ არჩევნები გაყალბდა.

„საია აკვირდებოდა ფოთსაც და იქ მე-18 უბანზე დავწერეთ საჩივარი, უბნის ბათილობას მოვითხოვთ, რადგან ოთხი საათის განმავლობაში მარკირების გარეშე ხდებოდა ხმის მიცემა. ამიტომ შეუძლებელია იქ განსაზღვრო კარუსელი მუშაობდა თუ არა. თუმცა საჩივარი არ იქნა დაკმაყოფილებული.“ სულხან სალაძის განცხადებით, ფოთის მე-18 უბანზე დაწერილი საჩივარი სასამართლოში წავა.

საიას მიერ საჩივარი დაიწერა ხელვაჩაურში, ქობულეთსა და ხულოშიც. როგორც სულხან სალაძე ამბობს, ხელვაჩაურში იყო შემთხვევა, როცა არ ფიქსირდებოდა ამომრჩევლის ხელმოწერა, მაგრამ საჩივარი დაკმაყოფილდა.

ბათუმში ძირითადად იყო ისეთი საჩივრები, რომელიც კომისიის წევრების დისციპლინარულ პასუხისმგებლობას შეეხოდა და ეს იყო კენჭისყრის პროცესში დაწერილი საჩივრები. „ნაწილის განხილვა მოხდება დღეს ოლქში. ხულოშიც მიმდინარეობს საიას საჩივრის განხილვა. რამდენიმე უბნის ბათილობაზეა საუბარი, რადგან მარკირების აპარატი არ იყო. ჯერ მოიტანეს განსხვავებული მარკირების აპარატი, შემდეგ ჩაანაცვლეს ისეთი აპარატით, რომელიც იყო ჩვეულებრივ სხვა უბნებზეც“.

უბნებზე აღმოჩენილ დარღვევებზე ოლქში ასამდე საჩივარი შევიდა. საოლქო საარჩევნო კომისიის იურისტი მალხაზ ბოლქვაძე ზუსტ ციფრს ვერ ასახელებს: „ოლქში დაიწერა დაახლოებით ექვსი საჩივარი, უბნებში კი როგორც ვიცი ასამდე საჩივარია დაწერილი. დღეს ნაშუადღევს შევიკრიბებით და დავიწყებთ განხილვას. ალბათ ორ დღეში დასრულდება განხილვა“.

არასამთავრობო ორგანიზაცია „სამართლიანი არჩევნები“ აჭარაში მიმდინარე საარჩევნო პროცესის შეფასებას „ბათუმელებთან“ არ აკეთებს. „

ჯერ საჩივრების განხილვის პროცესში ვართ“- აცხადებენ ორგანიზაციაში. ორგანიზაციის ვებგვერდზე განთავსებული ინფორმაციის მიხედვით, არჩევნების დღეს ორგანიზაციის დამკვირვებლებმა ქვეყნის მასშტაბით უბნებზე 66 საჩივარი დაწერეს, საოლქო კომისიებში კი 58 საჩივარია დაწერილი. ორგანიზაციის ვებპორტალის მიხედვით კი, რომელიც სპეციალურად არჩევნებისთვის შეიქმნა, 2 ოქტომბრის 11:00 საათის მონაცემებით 316 ინცინდენტია ატვირთული. პირველი ოქტომბრის 18:30 საათიანი ბრიფინგის მონაცემებით, „სამართლიანი არჩევნების“ მიერ აჭარაში საარჩევნო უბნებზე შემდეგი ტიპის დარღვევები დაფიქსირდა: პირველი, დაკვირვების ხელისშეშლის ორი ფაქტი ბათუმის 49-ე უბანზე, არასათანადო დოკუმენტაციით ხმის მიცემის ორი შემთხვევა ქობულეთის პირველ უბანზე, დაფიქსირდა სიებთან დაკავშირებული პრობლემების სამი ფაქტი, ერთ-ერთი შემთხვევა ბათუმის 21-ე უბანზე იყო. საარჩევნო დოკუმენტაციის არასათანადო წარმოება დაფიქსირდა ქედაში.

საოლქო საარჩევნო კომისია შედეგებს აქვეყნებს

კომისიის მონაცემებით, საპარლამენტო არჩევნებში 80 ათას 328 ამომრჩეველი, ანუ საერთო მონაწილეთა 59, 73 პროცენტი მონაწილეობდა. 108 უბნის ხმების დათვლის შედეგად კოალიცია „ქართული ოცნების“ უპირატესობა გამოიკვეთა.

პროპორციული სისტემით, „ქართულმა ოცნებამ“ 51 148 ხმა მიიღო. (ხმების 65%);

„ნაციონალურმა მოძრაობამ“ კი 23 409 ხმა (ხმების 30%).

მაჟორიტარულ არჩევნებში „ქართული ოცნების“ კანდიდატმა მურმან დუმბაძემ 48 474 ხმა მიიღო, „ნაციონალური მოძრაობის“ კანდიდატმა გიორგი ბარამიძემ კი, 24 182 ხმა.

საოლქოს მონაცემებით პროპორციულიდან 2 103 ბიულეტენი არის ბათილი, მაჟორიტარულში კი 2 797 ბიულეტინი.

ცვლილება „ნაცმოძრაობის“ გამსვლელ სიაში

აჭარის უმაღლეს საბჭოში ოპოზიციური პარტიის – „ნაციონალური მოძრაობის“ გამსვლელ სიაში ცვლილება მოხდა. ირალი კვერღელიძე, რომელიც სულ ახლახან კომპანია „ორბი-ჯგუფის“ დირექტორის თანამდებობიდან აღმოჩნდა ყოფილი მმართველი გუნდის სიაში, აღმასრულებელ ხელისუფლებაში გადავიდა. ის დღეს აჭარის ფინანსთა და ეკონომიკის მინისტრის მოადგილედ დანიშნეს.

ირაკლი კვერღელიძის ნაცვლად აჭარის უმაღლეს საბჭოში მურმან ბერიძე შევა. მურმან ბერიძე დეპუტატი იყო წინა მოწვევის უმაღლესი საბჭოში, მაგრამ ამ არჩევნების შემდეგ გამსვლელი სიის მიღმა აღმოჩნდა.

ირაკლი კვერღელიძის გადაწყვეტილების გადამოწმება „ბათუმელებმა“ ვერ მოახერხა. ის სატელეფონო ზარებს არ პასუხობს.

ფინანსთა სამინისტროში მინისტრის მოვალეობას სულხან ჯორთმენაძე ასრულებს. ყოფილი მინისტრი ვაჟა ბოლქვაძე ასევე უმაღლესი საბჭოს დეპუტატობისთვის იბრძოდა, მაგრამ გამსვლელ დეპუტატებს შორის ვერც ის მოხვდა. ირაკლი კვერღელიძის მოადგილედ დანიშვნას „ბათუმელებთან“ სწორედ სულხან ჯორთმენაძე ადასტურებს.

დღესვე კიდევ ერთი ცვლილება განხორციელდა აჭარის ჯანდაცვის სამინისტროში – მურმან ბერიძის მეუღლე დალილა ცივაძე ამავე სამინისტროში თანაშემწის თანამდებობაზე გადაიყვანეს.

ბათუმის სასამართლო პარალიზებულია

ბათუმის საქალაქო სასამართლო, ფაქტობრივად, პარალიზებულია. ამ სასამართლოს საინფორმაციო დაფაზე 16:00 საათისთვის არ არის განთავსებული არც ერთი განსახილველი საქმის შესახებ ინფორმაცია. სასამართლოს თანამშრომლებმა თქვეს, რომ „გუშინ და დღეს სასამართლო პროცესი არ ჩატარებულა“.

ამ ინფორმაციას უარყოფს სასამართლოს მენეჯერი – საკადრო და საორგანიზაციო საკითხთა განყოფილების უფროსი ივერი აბაშიძე. ის ამბობს, რომ თვის დასაწყისში სტატისტიკურად ყოველთვის ნაკლები საქმეები შედის განსახილველად. ოთხი საათისთვის საინფორმაციო დაფაზე განცხადებების არ არსებობას კი იმით ხსნის, რომ დამთავრდა სამუშაო დღე და ჩამოხსნეს ფურცლები. თუმცა მას უჭირს გაიხსენოს რამდენი პროცესი გაიმართა 2 და 3 ოქტომბერს ბათუმის სასამართლოში. „დღეს მგონი 3 სამართალდარღვევა განვიხილეთ. გუშინ არ მახსოვს, მოგვმართეთ წერილობით და მოგაწვდით“, – ამბობს ივერი აბაშიძე.

ივერი აბაშიძის თქმით, მიმდინარე თუ ჩატარებული საქმეების შესახებ ინფორმაცია განთავსებულია ბათუმის სასამართლოს ვებ გვერდზეც, რაც სიმართლეს არ შეესაბამება. https://batumi.court.gov.ge გვერდზე 2-3 ოქტომბერს არც ერთი საქმის შესახებ არ არის ინფორმაცია განთავსებული.

დეპარტამენტის თასი ქობულეთმა მოიგო

ირაკლი დარცმელიძე

ბათუმში დასრულდა აჭარის სპორტისა და ახალგაზრდობის დეპარტამენტის თასის გათამაშება მინიფეხბურთში, რომელშიც ბათუმის, ქობულეთის, მახინჯაურის, ქედის, შუახევისა და ხულოს გუნდები მონაწილეობდნენ. ფინალი, რომელშიც ერთმანეთს ბათუმისა და ქობულეთის გუნდები დაუპირისპირდნენ, ქობულეთელების გამარჯვებით – 5:3 დასრულდა.

ოქრო-ვერცხლი „ვახტანგაძეზე“

ორდღიანი ტურნირის შემდეგ ბათუმელთა მონაგარში ორი ოქროს, ორი ვერცხლისა და ხუთი ბრინჯაოს მედალია.

ბათუმელთაგან ტურნირის ჩემპიონები გახდნენ გიზო მელაძე (50 კგ.) და ვახტანგ ხალვაში (84 კგ.). ვერცხლის მედალი მოიპოვეს ლაშა გობაძემ (96 კგ.), რომელიც ფინალში თანამემამულე ქურცაძე ბექასთან დამარცხდა და თემურ შავაძემ (55 კგ.), რომელმაც გადამწყვეტი შეხვედრა აზერბაიჯანელ კამირ ჯაფაროვთან დათმო. მესამე საპრიზო ადგილზე გავიდნენ: ირაკლი შავაძე (50 კგ.), ბიძინა ფუტკარაძე (60 კგ.), ფირუზ წულუკიძე (66 კგ.), გელა ბოლქვაძე (66 კგ.) და ნუკრი შავაძე (74 კგ.).

ახალი სტადიონი ქობულეთში

მოედანზე ესპანური მწვანე ხელოვნური საფარი სპეციალური ლაზერული მანქანით დააგეს. დამონტაჟდა ახალი სკამები, მოეწყო საშხაპეები და გასახდელები, განახლდა ადმინისტრაციული შენობა. სტადიონი 3 400 მაყურებელზეა გათვლილი. „ჩელე-არენად“ წოდებული სტადიონის რეაბილიტაცია-რეკონსტრუქციისათვის აჭარის მთავრობამ 960 000 ლარი გამოყო, ხოლო მოედნის საფარის დაგება უზრუნველყო საქართველოს ფეხბურთის ეროვნულმა ფედერაციამ, რომლისთვისაც 900 000-მდე ლარი დაიხარჯა. ფეხბურთის სტადიონი სიმბოლურად ბათუმის „დინამოსა“ და ქობულეთის „შუქურას“ ვეტერან ფეხბურთელების ამხანაგური მატჩით გაიხსნა, რომელიც ამხანაგურად, ფრედ დასრულდა.

„დიორიდან“ „დინამოში“

ირაკლი დარცმელიძე

ლაშა თოთაძე მცველია. გასული სეზონის მეორე ნახევარი ის გორის „დილაში“ თამაშობდა, შემდეგ კვლავ უნგრულ „დიორს“ დაუბრუნდა, თუმცა მათთან ორმხრივი შეთანხმების საფუძველზე კონტრაქტი მალევე გაწყვიტა და თავისუფალი აგენტის სტატუსით ბათუმში ჩამოვიდა. თოთაძე საქართველოს 21-წლამდელთა ნაკრებში თამაშობდა და ორი გოლიც აქვს გატანილი.

„ჩელემ“ ნავსი გატეხა – ჯორბენაძე ბომბარდირია

მიხეილ ჯორბენაძე: ბათუმის „დინამოს“ აღზრდილი ვარ. თავდაპირველად ჯუმბერ მენაბდესთან ვვარჯიშობდი, შემდეგ „არდაგანზე“, რეზო დარახველიძესთან. 2009 წლის თებერვალში „დინამოსთან“ ოფიციალურ კონტრაქტს მოვაწერე ხელი და მას შემდეგ კლუბის წევრი ვარ, თუმცა, შემიძლია ვთქვა, რომ არსადაც არ წავსულვარ.

– ოთხწლიანი შესვენების შემდეგ „დინამო“ წელს დაბრუნდა უმაღლეს ლიგაში, თუმცა სტარტი საკმაოდ სუსტი გქონდათ, რვა ოფიციალურ შეხვედრაში (ჩემპიონატის და თასის თამაშები) მხოლოდ ორ გამარჯვებას და ორ ფრეს მიაღწიეთ. როგორ ფიქრობ, რამ განაპირობა ასეთი ცუდი დასაწყისი?

– ახალგაზრდა გუნდი ვართ, შეთამაშება გვაკლია, თან ნუ დაგავიწყდებათ, რომ პირველი ოთხი შეხვედრა ჩემპიონატის ფავორიტ გუნდებთან გავმართეთ და ისიც სტუმრად. ყველაფერმა ამან უარყოფითად იმოქმედა ჩვენზე და შედეგიც სახეზეა, მაგრამ თასზე მოპოვებულმა პირველმა გამარჯვებამ საკუთარი თავის რწმენა დაგვიბრუნა და აგერ უკვე მეორე მატჩიც მოვიგეთ. აქვე გეტყვით, რომ შინაური გარემო და გულშემატკივარი ძალიან დაგვეხმარა, რისთვისაც მადლობა მინდა გადავუხადო. თორემ ძნელია ისეთ დროს თამაში, როდესაც მატჩს საშინაო ჰქვია და ხან ფოთში ვმასპინძლობდით მეტოქეს და ხანაც – ზესტაფონში. ახლა კი, ქობულეთის სტადიონზე ვითამაშებთ, ეს კი დამატებითი სტიმული იქნება გუნდისთვის.

– გუშინდელი მატჩის პერიპეტიებზე გკითხავთ (ინტერვიუ ჩაწერილია „დინამო“–„მერანის“ მატჩის მეორე დღეს), მიუხედავად იმისა, რომ „მერანი“ არ არის რთული მეტოქე, სამი გოლი გაუტანე, რაც უდავოდ აღნიშვნის ღირსია…

– პირველ რიგში მინდა აღვნიშნო თანაგუნდელების გარჯა. მართალია, სამი გოლი გავიტანე, მაგრამ თამაშს გუნდი იგებს და არა ცალკეული ფეხბურთელი.

– ერთი გოლი მანამდეც გქონდა გატანილი, სამი ახლა მიუმატე და ოთხი გოლით ეროვნული ჩემპიონატის ბომბარდირთა დავაში პირველ ადგილზე ხარ, შენ მერე არიან ჯაბა დვალი და ჩისკო (ორივე „დინამო“ თბილისი). როგორ ფიქრობ, შეძლებ მათთვის კონკურენციის გაწევას?

– ჯაბაც და ჩისკოც ძალიან გამოცდილი ფეხბურთელები არიან და დარწმუნებული ვარ, არაერთ გოლს გაიტანენ. თავდამსხმელი ვარ და გოლების გატანა მევალება, მაგრამ გულწრფელად გეტყვით, ბომბარდირობისთვის ჯერ მზად არ ვარ. ძალიან ძნელია ეს, ისინი და სხვებიც ჩემზე გამოცდილები არიან. ასე რომ, ვნახოთ.

– სანამ ბათუმს მისი სტადიონი ექნება, ქობულეთში, „ჩელე–არენაზე“ გამართავთ შეხვედრებს, იქ მოედანი ხელოვნურსაფარიანია, არ გაგიჭირდათ თამაში?

– როგორ არა, ძალიან ძნელი იყო, მაგრამ ჩვენ მეტოქესთან შედარებით ის მცირედი უპირატესობა გვქონდა, რომ რამდენიმე ვარჯიშის გამართვა მაინც მოვასწარით და ასე თუ ისე, შევეგუეთ.

– თანაგუნდელებს აქებ, ვის უგებ მოედანზე ყველაზე მეტად?

– როგორც თავდამსხმელი, ალექსანდრე ბაციკაძეს, ისიც ფორვარდია და კარგად შევეწყვეთ ერთმანეთს. ნახევარმცველებს რაც შეეხება, რა თქმა უნდა ამირან მუჯირს. მისი კლასი და გამოცდილება ძალიან გვეხმარება ყველას.

– უკრაინელი ტიმჩიშინიც შენი ამპლუას ფეხბურთელია. მას როგორ დაახასიათებ?

– სწრაფი ფეხბურთელია, სტაბილურად თამაშობს, მაგრამ გოლი ჯერ არა აქვს გატანილი. იმედია არ მიწყენს თუ ვიტყვი, რომ საშუალო დონის ფორვარდია, თუმცა „დინამოსთვის“ სარგებლის მოტანა შეუძლია. გაძლიერება ყველა რგოლში გვჭირდება, თუ მაღალი მიზნებისთვის გვინდა ბრძოლა.

– ჩემპიონატის დაწყებისას მწვრთნელმა რა დაგისახა მიზნად?

– პირველ რიგში მინდა აღვნიშნო, რომ გია გურული ძალიან კარგი მწვრთნელია, მომთხოვნი და სამართლიანი. ყოველთვის საბრძოლოდ განგვაწყობს ბიჭებს. წელს ჩვენი მიზანი უმაღლეს ლიგაში ადგილის შენარჩუნებაა, მომდევნო სეზონში შეიძლება ექვსეულზეც ვიფიქროთ. 2-3 წელიწადში კი დარწმუნებული ვარ, ჩემპიონობისთვის თუ არა, საპრიზო ადგილებისა და ევროსაგზურისთვის შევძლებთ ბრძოლას.

მიხეილ ჯორბენაძე კვლავაც ინარჩუნებს ბომბარდირობას. მორიგი გოლი მან ფოთის „კოლხეთს“ გაუტანა. მატჩი „დინამომ“ 3:1 მოიგო.

არჩევნები 2012 – ბათუმი [განახლებადი]

19:49 ბათუმის N29-ე უბანზე ამ დროისათვის 6 საჩივარია დაწერილი. ექვსივე მათგანი სხვის ნაცვლად ხმის მიცემით ფაქტს შეეხება. ამ უბანზე ასევე ადგილი ჰქონდა გადასატანი ყუთის დაგვიანებით გატანასდა საარჩევნო ბიულეტენების გაცემის ფაქტებს ყუის ჩამოხევისა და რეგისტრატორის ხელმოწერის გარეშე.

18:40 ბათუმში, N17-ე უბანზე სხვადასხვა დროს მისულ 10 ამომრჩევლებს ხმის მიცემის უფლება არ მიეცათ. მოქალაქეები: თეიმურაზ ტუღუში, აკაკი მიქაძე, რობერტ ესოიანი, ბესო ხომერიკი , ირაკლი კეჭაყმაძე , ზვიად მალაყმაძე, არტურ მარკოსიანი, გარსევან ჯორბენაძე, ზაზა სარიშვილი, მამუკა თურმანიძე აცხადებენ, რომ მათი ხმა გააყალბეს. რომ საარჩევნო უბანში მისულებს მათი სახელის და გვარის გასწვრივ ხელმოწერები დახვდათ.

17:16 ბათუმის N58 – ე უბანზე მისულ ამომრჩეველს, მიხეილ გაბაიძეს ხმის მიცემის უფლება შეეზღუდა. სააარჩევნო უბანში ამავე სახელი და გვარით 12 საათამდე იყო გამოცხადებული პირი და მიცემული ჰქონდა ხმა. ფაქტზე ახალგაზრდა იურისტთა ასოციაციის დამკვირვებელმა საჩივარი დაწერა. აღნიშნულ უბანში 3 საათისთვის 560 ამომრჩეველმა მისცა ხმა. უბანში 1324 ამომრჩეველია რეგისტრირებული.

ბათუმის 31 – ე უბანზე მისულ ამომრჩეველს, გიორგი გიორგაძეს ბიულეტენი არ მისცეს. მისი სახელით და გვარით უკვე ხმა ჰქონდათ მიცემული. ამომრჩევლის დედა აცხადებს, რომ მისი შვილი სტუდენტია, თბილისში სწავლობს და როგორც ჩანს, ვიღაცამ გადაწყვიტა რომ არ ჩამოვიდოდა და გაყალბებული პასპორტით ისარგებლა.

ამ უბანში სიით 1463 ამომრჩეველია რეგისტრირებული. უბანში 1350 ბიულეტენი აქვთ მიღებული. 12 საათზე – 339 ამომრჩეველს, ხოლო 5 საათისთვის 709 ამომრჩეველს ჰქონდა ხმა მიცემული.

16:52 ბათუმის N94-ე და N87-ე უბნებზე „ქართული ოცნების“ კოორდინატორმა დააფიქსირა ფაქტი, როცა ერთი და იგივე ამომრჩეველი ერთმანეთის ახლოს მყოფ უბნებზე აძლევდა ხმას. პირადობის მოთხოვნის შემდეგ ამომრჩეველმა დატოვა უბანი.

16: 49 ბათუმის N63-ე უბანზე, სადაც 1514 ამომრჩეველმა უნდა მისცეს ხმა, უბნის კომისიის თავმჯდომარემ 14:45 წუთზე მოითხოვა კენჭისყრის შეჩერება იმ მიზეზით, რომ ხმები უნდა დაეთვალა და ოლქისთვის გადაეცა ინფორმაცია. მედია მონიტორების მიერ გაცემული იქნა შენიშვნა, რის საფუძველზეც გაგრძელდა ხმის მიცემის პროცესი. აღნიშნულ უბანზე ერთ-ერთ რეგისტრატორს გაუთავდა მელანი, რამაც დროებით შეაჩერა მუშაობა. 12 საათისთვის N63-ე უბანზე 310 ამომრჩეველს ჰქონდა ხმა მიცემული. აქ 164-ით ნაკლები ბიულეტენი მივიდა.

16:45 ბათუმის 105-ე უბანში სიით 1229 ამომრჩეველია რეგისტრირებული. ამ უბანში ძალოვანი სტრუქტურის წარმომადგენლები აძლევენ ხმას. განსხვავებით სხვა უბნებიდან, აქ არ არის ბიულეტენის ნაკლებობა. პირიქით, უბანზე 21 ბიულეტენით მეტია შეტანილი. 12 საათისთვის ამ უბანზე 397 ამომრცეველს ჰქონდა უკვე ხმა მიცემული.

15:41 ქედაში, სოფელ ორცვაში ნაციონალური მოძრაობის და ქართული ოცნების დამკვირვებლებს შორის ხმაურიანი დაპირისპირება დაფიქსირდა. ნაციონალური მოძრაობის დამკვირვებელი არჩევნებზე მოსული მოქალაქეების აღრიცხვას აწარმოებდა რაც გააპროტესტა ქართული ოცნების დამკვირვებელმა. კამათი კენჭისყრის ოთახში საათობით გრძელდებოდა. აღნიშნულ უბანში 301 ამომრჩეველია სიაში. ამ დროისთვის ხმა მიცემული აქვს 205 მოქალაქეს.

14:45 ხმაურია ბათუმის N94 უბანზე. „ქართული ოცნების” კოორდინატორი ამტკიცებს, რომ უბანზე ხმა მისცეს პირებმა, რომლებიც სიაში არ არიან. თავმჯდომარე ამას კატეგორიულად უარყოფს. უბნის წევრები საკითხს ხმამაღლა განიხილავენ.

14:41 ბათუმის 23-ე უბანზე ყალბი პასპორტებით ხმის მიცემა დაფიქსირდა. სამი მოქალაქე ხმის მისაცემად როცა მოვიდა უბანზე ამომრჩეველთა სიაში მათ გასწვრივ ხელი უკვე მოწერილი იყო და ბიულეტენი გაცემული. აღნიშნულ ფაქტთან დაკავშირებით ახალგაზრდა იურისტთა ასოციაციის მიერ 1 გაფრთხილება გაიცა და 2 საჩივარი დაიწერა. ამ უბანზე 2 საათისთვის 460 ამომრჩეველმა მისცა ხმა.

ამ უბანში 1231 ამომრჩეველია სიაში.

13:43 ბათუმის N29 უბანზე გადასატან ყუთთან დაკავშირებით შეიქმნა ინციდენტი. კერძოდ, ერთ-ერთმა მოქალაქემ, რომელმაც გადასატანი ყუთის საშუალებით მისცა ხმა, ხმის მიცემისას შემოხაზა სასურველი კანდიდატი, სხვა დანარჩენი კი გადახაზა. მისი ოჯახის წევრების თქმით, კომისიის წევრმა, რომელიც ახლდა გადასატან ყუთს, მას უთხრა, რომ მისი ხმა არ ჩაითვლებოდა, რადგან ყველა არასწორად შეავსო ბიულეტენი. N29 უბანზე ამ წუთებში ამომრჩევლის ოჯახის წევრები იმყოფებიან და განცხადების დაწერას აპირებენ.

13:35 ხულოს N9 -ე უბანზე მარკირების შემოწმებისათვის განკუთვნილი დეტექტორის ნაცვლად გამოიყენებოდა სხვა სახის ფარანი. ახალგაზრდა იურისტთა ასოციაციის დამკვირვებელმა აღნიშნული პროცესის აღმოფხვრამდე მოითხოვა ხმის მიცემის პროცესის შეჩერება. საჩივარი დაიწერა აღნიშნულ ფაქტზე, მოთხოვნა არ გაიზიარა კომისიის თავმჯდომარემ, გრძელდება ხმის მიცემა.

13:29 ბათუმის N107-ე უბანზე ხმას აძლევენ სახელმწიფო, სასაზღვრო და სანაპირო დაცვის თანამშრომლები. სიაში 622 ამომრჩეველია. უბანზე 28 ბიულეტენით მეტი მიიღეს. ამომრჩეველი ხმის მისაცემად ჯგუფურად მოდის. 12 საათისთვის 50%-ზე მეტს, 357ამომრჩეველს ხმა უკვე მიცემული ჰქონდა.

12:39 ბათუმის და ახლადშემოერთებული ტერიტორიების საარჩევნო უბნებთან შეიმჩნევა კოორდინატორების გააქტიურება. N30 უბანთან დგას თეთრი ფერის ჯიპი, სადაც კოორდინატორი, რომელიც „ბათუმელების” რეპორტიორს ირაკლი ბოლქვაძედ გაეცნო, არ ასახელებს, კონკრეტულად რომელ პოლიტიკურ პარტიას წარმოადგენს.

ასევე, „შკოდას” მარკის ავტომანქანა მივიდა შარაბიძეების სკოლაში მდებარე საარჩევნო უბანთან, კომისიის თავმჯდომარე უბნიდან გაიყვანეს და ესაუბრებიან.

12:36 ბათუმის N63-ე უბანზე უმაღლესი საბჭოს მაჟორიტარების ბიულეტენებზე 5 ნომრის გასწვრივ მკაფიოდ შეინიშნებოდა ხაზი.

„ახალგაზრდა იურისტთა ასოციაცია“ აცხადებს, რომ შესაძლოა ეს იყოს ბეჭდვის წუნი, მაგრამ ეს ფაქტი არის უკვე დავის საგანი და იწერება საჩივარი.

ასევე ბათუმის მე-5 უბანზე ამომრჩეველს შეეზღუდა ხმის მიცემის უფლება. უბანზე მისულ ამომრჩევლის სახელისა და გვარის გასწვრივ დაფიქსირებული იყო ამომრჩევლის ხელმოწერა და გაცემული იყო ბიულეტენი. მომხდარ ფაქტზე დაიწერა აქტი.

11:53 ბათუმის N52 უბანზე 115 ბიულეტენით ნაკლები მიიღეს.

11:41 როგორც „ბათუმელების” კორესპოდენტი გვატყობინებს, N29-ე უბანთან სიებით ხელში დგანან ადამიანები, რომლებიც ამბობენ, რომ კოორდინატორები არიან, თუმცა არ აზუსტებენ, რომელ პარტიას წარმოადგენენ. ისინი ეზოს არ ტოვებენ და ხშირად ესაუბრებიან კომისიის წევრს ნაციონალური მოძრაობიდან, მურმან ბოლქვაძეს.

11:33 ბათუმის 23 უბანი: უბანი 15 წუთით ადრე გაიხსნა. მიეცა შენიშვნა.

ბათუმის მე-17 უბანი: ერთი ამომრჩეველი პოლიციის ფორმით და იარაღით შევიდა უბანში ხმის მისაცემად. მიეცა შენიშვნა. იარაღი ამომრჩეველმა „ნაციონალური მოძრაობის“ დამკვირვებელს გადასცა, რომელმაც უბნიდან გარეთ გამოიტანა იარაღი.

11:32 ფოთის მე-19 უბანში ამომრჩეველის კაბინაში დაფაზე 5- იანი შემოხაზული.

10:57 ამ დროისათვის სოფელ შარაბიძეების ერთ საარჩევნო უბანში ხმა მისცა 216 ამომრჩეველმა.

10:43 ახალგაზრდა იურისტთა ასოციაციის განცხადებით 8 საათისთვის აჭარაში ყველა უბანი გახსნილი იყო. ამ დროისათვის კი ბათუმის საარჩევნო უბნებში უკვე ამომრჩეველთა რიგებია. „ბათუმელების” კორესპოდენტი გვატყობინებს, რომ N30-ე უბანზე 5 წუთში 4 ადამიანი აძლევს ხმას.

10:39 ბათუმის ნომერ 29-ე უბანზე 100-ით ნაკლები ბიულეტენია.

10:00 ბათუმში, #30-ე უბანზე საჭიროზე 476 ბიულეტენით ნაკლებია. ამ უბანზე 1469 ამომრჩეველი აძლევს ხმას.

ამ უბანზე გადასატანი ყუთს, რომლითან 20 ამომრჩეველმა უნდა მისცეს ხმა, 22 ბიულეტენი გაატანეს, იმ მოსაზრებით, რომ ორი ბიულეტენი შესაძლოა დაზიანდეს. „ახალგაზრდა იურსტთა ასოციაციამ” საჩივარი დაწერა იმის თაობაზეც, რომ სპეციალურ სიაში მითითებული არ არის გადასატანი ყუთით მოსარგებლე ამომრჩევლების ტელეფონის ნომრები.

ბიულეტენების ნაკლები რაოდენობაა ბათუმის #17 უბანზე. ამ უბანზე დაახლოებით 140-ით ნაკლები ბიულეტენი მივიდა. აქ ბიულეტენის ჩასადები კონვერტები არ დაუთვლიათ და აცხადებენ, რომ მიღების ფურცელზე დაფიქსირებულია 1343, მაშინ როცა უნდა მისულიყო 1442.

დაახლოებით 97 ბიულეტენით ნაკლები მივიდა ბათუმის 58 უბანზე.

ხულოს მეათე უბანზე, სადაც 682 ამომრჩეველია, მივიდა 650 ბიულეტენი.

ასევე, ბიულეტენების ნაკლებობა დააფიქსირეს ფოთის 22,18,23,19 უბნებში „ახალგაზრდა იურისტთა ასოციაციის“ დამკვირვებლებმა.

9:35 #87 უბანზე, სადაც 1378 ამომრჩეველია რეგისტრირებული, ბულეტენების რაოდენობა 78 -ით ნაკლებია. ამის შესახებ „ბათუმელების” კორესპოდენტს ადგილზე მყოფმა „საერთაშორისო გამჭვირვალობის“ დამკვირვებელმა განუცხადა, რომელიც საჩვარს წერს.

9:20 დილიდან მაღალია ამომრჩევლის აქტივობა ბათუმში. #29, #39, #87, #52 უბნებზე რიგებია და ამომრჩეველს ნახევარი საათით უწევს ლოდინი ხმის მისაცემად.

#29-ე უბანზე „ქართული ოცნების“ დამკვირვებლები უბანზე ვერ შევიდნენ. მათ აკრედიტაცია გაიარეს, მაგრამ ცესკომ აკრედიტაციის გამოგზავნა დააყოვნა. ამ წუთებშიც ცესკო მათ პასუხობს, რომ აკრედიტაცია გამოგზავნილია და მალე მიიღებენ.

batumelebi.ge მთელი დღის მანძილზე მოგაწვდით ინფორმაციას აჭარაში და ბათუმში არჩევნების მიმდინარეობის შესახებ.

ბრიფინგი „ქართულ ოცნებაში”

ცაგო კახაბერიძე

შუახევის საავადმყოფოს, შპს „უნიმედის“ თანამშრომელი ნერვოპათოლოგი ოთარ სურმანიძე „ქართულ ოცნებას“ შეუერთდა. ამის შესახებ მან განცხადება რამდენიმე წუთის წინ, „ქართული ოცნების“ შტაბში სპეციალურ ბრიფინგზე გააკეთა. ფრიდონ სურმანიძის თქმით მსგავსი გადაწყვეტილების მიღებაზე მსჯელობდნენ მისი თანამშრომლებიც, თუმცა ამ გადაწყვეტილებას ისინი ამ დრომდე არ ახმაურებენ.

ბრიფინგზე კოალიცია „ქართული ოცნების“ შტაბის ხელმძღვანელმა ავთანდილ ბერიძემ კიდევ ერთი ინფორმაცია გაახმაურა. მისი თქმით „ქართულ ოცნებას“ შეუერთდა ბათუმელი ხელოვანიც, რომელიც დღეს ღირსების ორდენით უნდა დაეჯილდოვებინათ, მაგრამ მან ჯილდოზე უარი თქვა და კოალიციის რიგებში დარეგისტრირდა. „ქართულ ოცნებაში“ ამ ადამიანის სახელს არ ასახელებენ, რის მიზეზადაც თავად ხელოვანის მოთხოვნა დასახელდა: „მას არ უნდა ამის შესახებ ხმამაღლა საუბარი, რომ პოპულიზმში არ ჩაუთვალონ“ – განაცხადა ავთანდილ ბერიძემ ბრიფინგზე.

მურმან დუმბაძე: „გაყალბებისთვის ემზადებიან“

მურმან დუმბაძის განცხადებით, ასობით მათი მხარდამჭერი სიაში საკუთარ თავს ვერ პოულობს. დუმბაძე ვარაუდობს, რომ ისინი ამომრჩეველთა ერთიანი სიიდან ამოღებულები არ არინ, მაგრამ ამომრჩეველთა დაბნევის მიზნით, სხვა უბანზე არიან მიწერილი.

კოალიცია „ქართული ოცნების“ ბათუმის ოფისში ასევე აცხადებენ, რომ ბათუმში რამდენიმე ათასი ადამიანია მიწერილი ახალ მისამართებზე, მაგალითად: „ვინმე არსენიძე ხათუნა მიწერილია ბათუმში ფიროსმანის ქუჩა # 6 და რეალურად აქ მცხოვრები ოჯახი, მას საერთოდ არ იცნობს.“

კონკრეტულ მისამართზე ჩაწერა დოკუმენტაციის და ბინის მფლობელის გარეშე არ ხდება.

კოალიციაში აცხადებენ, რომ მუშაობენ კონკრეტულ მისამართებზე მიწერილი პირების ვინაობის და რაოდენობის დადგენაზე.

ნაციონალების აქტივისტები ავარიაში მოხვდნენ

დღეს ნაციონალური მოძრაობის შეხვედრაზე მიმავალი მიკროავტობუსი ხელვაჩაურში, სოფელ კახაბერთან ორ მსუბუქ ავტომობილს შეეჯახა. შეჯახების შედეგად სხეულის მსუბუქი დაზიანება მიიღო 9 მგზავრმა. როგორც ბათუმის რესპუბლიკურ საავადმყოფოში „ბათუმელებს“განუცხადეს, საავადმყოფოში სასწრაფოს მიერ პირველადი დახმარების გასაწევად 6 მგზავრი მიიყვანეს. მოგვიანებით კიდევ სამი მგზავრი თვითონ მივიდა.

„სტაციონარში არცერთი მგზავრი არ მოგვითავსებია. გაკეთდა გამოკვლევა, კონსულტაციები. მგზავრებს აღენიშნებოდათ სხეულის სხვადასხვა ადგილის დაზიანებები. დაჟეჟილობები, მძიმედ არცერთი არ ყოფილა,“ – უთხრა „ბათუმელებს“, რესპუბლიკური საავადმყოფოს მორიგე ტრავმატოლოგმა შოთა ბერიძემ.

ავარიის გამომწვევი მიზეზი ამ დროისთვის უცნობია.

საპროტესტო აქცია „ნაცმოძრაობის“ ოფისთან

სტუდენტები: უნივერსიტეტი პრობლემებს არ იმჩნევს

მინისტრის შეხვედრა ტრადიციულად, ყოველ წელს იმართება და მას ძირითადად პირველკურსელები ესწრებიან, თუმცა დღეს მინისტრთან კითხვები სხვა სტუდენტებსაც ჰქონდათ. გია აბულაძესთან შესახვედრად წამების წინააღმდეგ გამართული აქციების ორგანიზატორებიც მოვიდნენ, მათ მინისტრთან კონკრეტული შეკითხვები ჰქონდათ:

„რას ფიქრობთ, ჩვენი ეროვნული გმირი მემედ აბაშიძე „უნდა იყოს იქ სადაც არის, მოყუჩებულში?“ – ამ შეკითხვის ავტორებს მხედველობაში ტექნოლოგიური უნივერსიტეტის გახსნისას პრეზიდენტის განცხადება ჰქონდათ, როდესაც მიხეილ სააკაშვილმა განახცადა, რომ „მემედი უნდა იყოს იქ, სადაც არის, მოყუჩებულში”.

გია აბულაძემ განმარტა, რომ ის ყოველთვის პატივისცემას გამოხატავდა ეროვნული გმირების მიმართ და შეკითხვების ავტორ სტუდენტებს უთხრა, რომ თავად ისინი ფიქრობენ ასე და „სპექტაკლს მართავენ“ ყველას დასანახად. სტუდენტებმა მინისტრს შეახსენეს, რომ ასე სტუდენტები კი არა, პრეზიდენტი ფიქრობს: „სპექტაკლებსაც თქვენ მართავთ, რადგან ქვეყნის ასეთ დაძაბულ დროს გრანტებზე და გაცვლით პროგრამებზე საუბრის დრო არ არის!” – მიმართეს განათლების მინისტრს ლევან დუაძემ და გოჩა სურგულაძემ.

შეხვედრის დასრულების შემდეგ „ბათუმელები” სტუდენტებს გაესაუბრა:

ილია ურუშაძე: შეხვედრა პირველ კურსელებს ეხებოდა ძირითადად, რომლებიც სიტუაციაში გარკვეულნი არ არიან და რეალური პრობლემები არ იციან, ამიტომ გადავწყვიტეთ მათ მაგივრად ჩვენ დაგვესვა შეკითხვები, თუმცა შეკითხვებზე ვერანაირი პასუხი ვერ მივიღეთ, პრობლემებს უბრალოდ არ იმჩნევენ.

გოჩა სურგულაძე: მესამე კურსელი ვარ და მესამე წელია ვისმენ განათლების მინისტრისგან ერთი და იგივეს, რომ არსებობს გაცვლითი პროგრამები, რომ თვითმართველობას უნდა მივმართოთ პროექტებით… ჯერ ერთი მინდა ვთქვა, რომ ისეთ განათლებას ვღებულობთ აქ, რომ სტუდენტებმა პროექტის წერაც კი არ იციან, გაცვლით პროგრამებზე მერე დაიწყონ საუბარი, როცა განათლების სისტემას მოაგვარებენ. მინისტრ გია აბულაძეს ჩვენ მივმართეთ, რომ ჩვენს გვერდით დამდგარიყო ამ ვითარებაში, მან გვითხრა, რომ პოლიტიკა მას არ ეხება და ამაზე საუბარს არ აპირებს. განათლების პოლიტიკა პოლიტიკა არ არის?! თუ განათლების მინისტრია, იქ უნდა იყოს, სადაც მისი სტუდენტები და მოსწავლეები არიან.

ბექა ესაძე: მე ბოლომდე ვესწრებოდი შეხვედრას, გამოვეხმაურები რექტორს გრანტებთან და გაცვლით პროგრამებთან დაკავშირებით. მე ვფიქრობ, რომ ჩვენს უნივერსიტეტში არ არის ის ბაზა, რომ საზღვარგარეთ წავიდეთ და იქ არსებული სასწავლო კურსი დავძლიოთ. უნივერსიტეტში არსებულ კამერებსა და მოსასმენ აპარატებს რაც შეეხება, რექტორის თქმით ეს კამერები სტუდენტებზე სათვალთვალოთ კი არა ლექტორების გასაკონტროლებლად დააყენეს. გამოდის, რომ უნივერსიტეტს ჰყავს არაპროფესიონალი ლექტორ-მასწავლებლები?!

რამინ პაპიძე მედიას დისკრედიტაციაში ადანაშაულებს

„თავისუფალი საქართველოს“ მაჟორიტარობის კანდიდატმა, განცხადება დღეს, „დემოკრატიული ჩართულობის ცენტრში“ არასამთავრობო ორგანიზაციების წარმომადგენლებთან და იურისტებთან გააკეთა. მისი განცხადებით, „ტელეარხი 25„ -ის და აჭარის ტელევიზიის გადაწყვეტილება არასამართლიანია და მას შეფასება უნდა მიეცეს.

„25-არხის პროდიუსერმა განმიცხადა, რომ კანონი მას მხოლოდ კვალიფიციური საარჩევნო სუბიექტებისთვის დროის დათმობას ავალდებულებს. კანონში წერია, რომ კვალიფიციურ სუბიექტებს თანაბარი დრო უნდა დაუთმონ და არსად წერია რომ არაკვალიფიციური სუბიექტები არ უნდა მიიწვიონ დებატებში. აჭარის ტელევიზიამ განაცხადა, რომ დებატებში მხოლოდ უმაღლესი საბჭოს დეპუტატობის კანდიდატებს იწვევდა, მაგრამ ეთერი დაუთმო „ქართული ოცნების“ და „ნაციონალური მოძრაობის„ მაჟორიტარობის კანდიდატებს და ეს მაღალი საზოგადოებრივი ინტერესით ახსნა. მაგრამ როცა მან დაუშვა პრეცენდენტი, ახლა ვალდებულება ეკისრება, რომ სხვა სუბიექტებსაც დაუთმოს დრო.“

არაკვალიფიციურია საარჩევნო სუბიექტი, რომელიც პირველად იღებს მონაწილეობას არჩევნებში.

რამინ პაპიძე კონსტიტუციურ უფლებაზეც საუბრობს: „საარჩევნო კანონში რომც არ ეწეროს, კონსტიტუციით და ადამიანის უფლებათა ევროპული კონვენციით ყველა ადამიანი თანასწორია კანონის წინაშე. ამიტომ საარჩევნო კოდექსის 51 მუხლის პირველი და მესამე პუნქტები, სადაც საუბარია მხოლოდ კვალიფიციურ სუბიექტებზე, ანტიკონსტიტუციურია და მედიას უფლება აქვს ისარგებლოს ადამიანის უფლებების საყოველთაო დეკლარაციით“.

იურიტ ირაკლი შავაძის განცხადებით, ტელევიზიის პოზიცია, რომ მათ არა აქვთ ვალდებულება რამინ პაპიძე მიიწვიო დებატებში, არასწორია: „საარჩევნო კანონმდებლობა, რომელიც არეგულირებს ამ საკითხებს, მიღებული იქნა სხვადასხვა პოლიტიკური პარტიების მიერ პოლიტიკური კონსესუსის შედეგად, ამიტომ, სამართლებრივად რამდენად სწორია ეს ნორმა, ამაზე არ ვისაუბრებთ, მაგრამ ის, რომ მედიას არ ევალება არაკვალიფიციური სუბიექტების მიწვევა დებატებში, არსად წერია და მედიამ არ უნდა დაუშვას დისკრიმინაცია“.

„არაკვალიფიციური სუბიექტი არის სამი, მათ შორის რამინ პაპიძე. იმის გამო, რომ დანარჩენი ორი სუბიექტი საერთოდ არ ჩანს და არ აწარმოებს საარჩევნო კამპანიას, ამიტომ დებატებში ვეღარ დავსვით, მაგრამ ამის საკომპენსაციოდ რამინ პაპიძე სამჯერ იყო ეთერში. იმის გამო, რომ მაინც აქვს პრეტენზია, კი ბატონო მოვიდეს და თუ სხვა სუბიექტებიც ვიპოვეთ, დავსვამთ დებატებში“ – აცხადებს გადაცემა „დიალოგის“ პროდიუსერი ირმა ზოიძე.

აჭარის ტელევიზიის საინფორმაციო სამსახურის უფროსი ცირა აბულაძე კი აცხადებს: „ამ პარტიის სიის პირველ ნომერს ჩვენ დავუთმეთ ეთერი და შეეძლო მას ნაცვლად რამინ პაპიძე მოსულიყო. რაც შეეხება გია ბარამიძის და მურმან დუმბაძის მოწვევას, იმ დღეებში გავრცელდა პატიმართა წამების კადრები და ბარამიძეს, როგორც ხელისუფლების წარმომადგენელს უნდა გაეცა კითხვებზე პასუხი, მურმან დუმბაძე კი მოპაექრე მხარე იყო“.

ლევან ვარშალომიძე: ცუდი ფაქტი მოხდა, ნამდვილად

ბატონო ლევან, როგორი იყო თქვენი რეაქცია ამ ვიდეოკადრების ნახვის შემდეგ?

ცუდი ფაქტი მოხდა.

მხოლოდ ეს არის თქვენი შეფასება?

ცუდი ფაქტი მოხდა ნამდვილად. ეს არ უნდა მომხდარიყო, მაგრამ რადგანაც არის ეს, სახელმწიფო იღებს შესაბამის ზომებს და კანონის ფარგლებში ყველა უნდა დაისაჯოს.

ხელისუფლების გადადგმული ნაბიჯები ამ დროისთვის არის ადეკვატური? პირადად თქვენ როგორ მიგაჩნიათ?

ხელისუფლება იღებს გადაწყვეტილებას და ის მიიღებს შესაბამის ზომებს.

აქამდეც ხომ არსებობდა ინფორმაცია პატიმართა წამების და არასათანადო მოპყრობის შესახებ, რატომ არ აქცევდა ხელისუფლება ამ ფაქტებს ყურადღებას?

ხელისუფლებამ აღნიშნა, რომ მართლაც იყო სისტემური პრობლემა. თუ ეს ფაქტები ადრე გახდებოდა ცნობილი, შესაბამისად ადრე იქნებოდა რეაგირება.

ბატონო ლევან, ყოფილი პატიმრები, გარდაცვლილი პატიმრის ოჯახის წევრები და სასჯელაღსრულების სისტემის უკვე ყოფილი მაღალჩინოსანი წამების შემკვეთად და მონაწილედ ბაჩო ახალაიას ასახელებენ. თქვენ როგორც იურისტი, როგორ ფიქრობთ, საკმარისია პოლიტიკური პასუხისმგებლობა, თუ ლეგიტიმურია მოთხოვნა მისი სამართლებრივი პასუხისმგებლობის საკითხის დაყენების შესახებ?

ამის შესახებ ჰკითხეთ პროკურატურას. მიდის გამოძიება.

გაითიშება თუ არა ტელევიზიები არჩევნების შემდეგ

პრესკაფე, ბათუმი. საინფორმაციო გამოშვების დროს.

ბათუმში მცხოვრები თემურ ხალვაში მოითხოვს, რომ არ შეწყდეს ზემოთ აღნიშნული ტელეკომპანიების ჩართვა, განსაკუთრებით კი „მეცხრე არხის” ტრანსლირების გაგრძელებას ითხოვს. „ღმერთმა დაიფაროს, ეს არხი გათიშოს! აბა სხვას რაღას უნდა ვუყუროთ? ერთადერთი ინფორმაციის წყარო ეს არხებია. სრულიად ვენდობი მათ მიერ მოწოდებულ ინფორმაციას“, – ამბობს თემურ ხალვაში.

ასეთივე აზრის არიან „ბათუმელების“ მიერ გამოკითხული სხვა რესპონდენტებიც. გამოკითხული ათი რესპონდენტიდან ათივემ აღნიშნა, რომ, მიუხედავად იმისა, უყურებენ თუ არა ამ ტელეარხებს, ისინი მაინც უნდა დარჩნენ საკაბელოების პაკეტებში ინფორმაციული მრავალფეროვნებისთვის. „ჯერ მეცხრე არხს და მაესტროს ვუყურებ და შემდეგ ვამოწმებ ინფორმაციას იმედსა და რუსთავი 2-ზე, ყველა არხს უნდა ვუყუროთ, რომ დასკვნები გამოვიტანოთ“, – ამბობს ბათუმელი ჯეინ-მარი ბოლქვაძე.

საქართველოს პარლამენტმა ივლისში საარჩევნო კოდექსში შეიტანა ცვლილება და საკაბელო ოპერატორებსა და მაუწყებლებს წინასაარჩევნოდ, 1-ელი ოქტომბრის ჩათვლით, „მასთ ქერისა“ და „მასთ ოფერის“ პრინციპების გატარება დაავალდებულა.

2012 წლის ივნისში არასამთავრობო ორგანიზაციებმა შეიმუშავეს საერთაშორისო მოდელის „მასთ ქერის“ ქართული ვარიანტი, რომელიც ითვალისწინებდა „მეცხრე არხისა“ და „მაესტროს“ პრობლემების გამოსწორებას – საკაბელო ოპერატორები უარს აცხადებდნენ მათ ტრანსლირებაზე, „მასთ ქერი“ კი მათ ავალდებულებდა ტელეკომპანიების სიგნალის შეფერხების გარეშე გადაცემას.

გაგრძელდება თუ არა „მასთ ქერი“ არჩევნების დღის შემდეგ? ამ კითხვაზე საქართველოს კომუნიკაციების მარეგულირებელ კომისიაში პასუხობენ, რომ ეს საკაბელო ოპერატორებსა და ტელეკომპანიებს შორის მოლაპარაკების საგანი უნდა გახდეს. კომისია კი თავის მხრივ, ვერ ჩაერევა კერძო სუბიექტების საქმიანობაში.

„ჩვენ გვევალება აღვასრულოთ საკანონმდებლო ცვლილებები. ამ დროისათვის კი პარლამენტი არ განიხილავს „მასთ ქერის“ ვადებში რაიმე ცვლილების შეტანას“, – აღნიშნა „ბათუმელებთან“ მარეგულირებელი კომისიის პრესმდივანმა ხატია ყურაშვილმა.

აჭარაში საკაბელო ოპერატორების 17.181 აბონენტს 6 კომპანია ემსახურება, აქედან უმრავლესობა – 16.797 აბონენტი მხოლოდ ბათუმზე მოდის, 188 – ქობულეთზე, 97 – შუახევზე.

ბათუმში მოქმედ საკაბელო ოპერატორ „ერაში“ ამბობენ, რომ ისინი გააგრძელებენ ყველა ტელეკომპანიის ტრანსლირებას, ამის მიზეზად კი აბონენტების ინტერესს ასახელებენ. „ჩვენ არ გვაქვს იმის ფინანსური სახსრები, რომ საზოგადოებრივი აზრის კვლევა ჩავატაროთ, თუმცა ზოგადი სიტუაცია ვიცით, რომ აბონენტებს აქვთ ე.წ. ოპოზიციური არხების ყურების სურვილი და მათ გათიშვას არ ვაპირებთ“, – ამბობს „ერას“ პრესმდივანი ნანა ჩხარტიშვილი.

შილკ თV-ში, რომელსაც 65 000 აბონენტი ჰყავს, „მასთ ქერის“ შესახებ ამბობენ, რომ 1-ელი ოქტომბრის შემდეგ თითოეულ ტელეკომპანიასთან ინდივიდუალური მოლაპარაკება დაიწყება. „მასთ ქერის“ შემოღების შემდეგ მათ პაკეტებში შეიტანეს „მეცხრე არხი“, „თრიალეთი“, „25-ე არხი“ და „მაესტრო“. თუმცა საკანონმდებლო ვალდებულების მიუხედავად, მისი აბონენტების თითქმის ნახევარს ტელეკომპანია „მაესტრო“ არ მიეწოდება. „სილკ ტივი” სატელევიზიო სიგნალს აბონენტებს ორი გზით – სპილენძისა და ინტერნეტის კაბელებით აწვდის. „მაესტროს“ სიგნალი კი ტექნიკური ხარვეზის გამო ფერხდება.

ციფრული ტელევიზია Gლობალ თV-ი აპირებს ყველა ტელეკომპანიის ჩართვის გაგრძელებას, თუმცა ამბობენ, რომ მათ არც არასდროს გაუთიშავთ რომელიმე არხი მათი სურვილით. „ჩვენ მასთ ქერის პრობლემა არასოდეს გვქონია. ისედაც ჩართული გვქონდა ყველა არხი. ჩვენ გვაქვს მასთ ოფერის პრობლემა. რუსთავი 2 და იმედი საკანონმდებლო ვალდებულების გამო არიან ფაქტიურად ჩვენს პაკეტებში, თორემ როგორც კი ვადა გავა, სავარაუდოდ, უარს იტყვიან მათი სიგნალის გავრცელებაზე. დაახლოებით 12 000 აბონენტი გვყვავს და არ მჯერა, რომ მათ არ აქვთ ინტერესი, მათი გადაცემები ამხელა აუდიტორიას მიეწოდოს“, – ამბობენ „გლობალ თვ”-ში.

საქართველოს კომუნიკაციების მარეგულირებელ კომისიაში აცხადებენ, რომ ამ დროისათვის ქვეყანაში რეგისტრირებულია 114 საკაბელო ოპერატორი, თუმცა რეალურად მათგან მხოლოდ 97 მუშაობს. მათი აბონენტების საერთო რაოდენობა 199 000-მდეა.

განსხვავებული მონაცემები აქვს „საერთაშორისო გამჭვირვალობა-საქართველოს“ მედიაანალიტიკოს მამუკა ანდღულაძეს, რომელმაც „ლევან მიქელაძის ფონდის“ იურისტ ლევან დოლიძესთან და ალექსანდრე დავითაშვილთან ერთად, საქართველოს მასშტაბით, „მასთ ქერის“ მედიამონიტორინგი აწარმოა. მისი თქმით, საკაბელო ოპერატორებს „მასთ ქერის“ პრინციპების შემოღებამდე 190 000 აბონენტი ჰყავდათ, თუმცა მოქალაქეების მხრიდან ინტერესის ზრდის გამო აბონენტთა რაოდენობა 215 000-მდე გაიზარდა. მამუკა ანდღულაძის ინფორმაციით, ამ დროისათვის ყველა საკაბელო ოპერატორს მაუწყებლობის ლიცენზიის მქონე ყველა ტელეარხი აქვს ჩართული.

„საკაბელოებსაც და ტელევიზიებსაც უნდა ჰქონდეთ ინტერესი, რომ, ერთი მხრივ, საკაბელოებმა მიიღონ მეტი შემოსავალი მეტი არხის ჩართვით და მეორე მხრივ, ტელევიზიებმა გაავრცელონ სიგნალი დიდ აუდიტორიაზე და შესაბამისად მიიღონ ბევრი რეკლამა“ – ამბობს მამუკა ანდღულაძე.

რამდენიმე დღის წინ არასამთავრობო ორგანიზაციებმა: “ეს შენ გეხება”, “აღმოსავლეთ პარტნიორობის საქართველოს ეროვნული პლატფორმა” და „მედიის ადვოკატირების კოალიცია” გაავრცელეს ერთობლივი განცხადება, სადაც „მასთ ქერის“ პრინციპების გაგრძელებას მოითხოვენ.

ტელეკომპანია „მეცხრე არხი“ ამზადებს პეტიციას, „მასთ ქერის“ ვადის გაგრძელების მოთხოვნით და აგროვებს 15 000 ხელმოწერას. პეტიციას – „Must Carry Must Stay“ (მასთ ქერი უნდა დარჩეს) – ამ დროისათვის უკვე 10 000 ხელმომწერი ჰყავს.

მედიის სამართლებრივი დაცვის ცენტრის ხელმძღვანელი ნათია კაპანაძე ამბობს, რომ ამგვარი სამოქალაქო აქტივობა მნიშვნელოვანია და შესაძლოა დადებითი შედეგის მომტანი აღმოჩნდეს.„კომუნიკაციების მარეგულირებელ კომისიას აქვს ვალდებულება, დაიცვას და გაითვალისწინოს მომხმარებელთა უფლებები და ინტერესები. თუ კი შეგროვდება 15 000 ხელმოწერა, ეს შეიძლება გახდეს „მასთ ქერის“ გაგრძელების საფუძველი“, – ამბობს ნათია კაპანაძე.

მომხმარებელთა მხრიდან მაღალ ინტერესს ადასტურებს NDI-ის მიერ 2012 წლის აგვისტოში ჩატარებული კვლევაც. კითხვაზე „არსებობს შემოთავაზება, რომ „მასთ ქერის“ ვალდებულება გავრცელდეს არჩევნების დღეს და შემდგომ პერიოდში. ეთანხმებით თუ არ ეთანხმებით ამ შემოთავაზებას?“ გამოკითხულთა 47% ეთანხმება, 6% არ ეთანხმება, 4% არ პასუხობს შეკითხვას და 44%-ის პასუხია „არ ვიცი“. ამასთან, გამოკითხულთა 88%-სთვის ტელევიზია პოლიტიკასა და მიმდინარე მოვლენებზე ინფორმაციის პირველი წყაროა და 44% ინფორმაციას მხოლოდ ერთი წყაროდან იღებს.

ბათუმში საარჩევნო პლაკატები დააზიანეს

ლელა დუმბაძე

ახალ ბულვართან ბოლოს, აეროპორტის გაზატკეცილთან, ბათუმში „ქართული ოცნების“ მაჟორიტარობის კანდიდატის მურმან დუმბაძის საარჩევნო ბანერები დააზიანეს. „სამი ბანერი იდგა და სამივე დაზიანებულია“-აცხადებს მურმან დუმბაძე. პლაკატების დაზიანების ფაქტს ადასტურებს, პარტიის ახალგაზრდული ფრთის ხელმძღვანელი, მერაბ ნაგერვაძეც: „დახეული და დაგელიჯილია მთლიანად პლაკატები“.

ზედამხედველოს სამსახურის, ადმინისტრაციული განყოფილების უფროსის, ვასილ ჯინჭველეიშვილის განცხადებით, პოლიტიკური პარტიების საარჩევნო პლაკატების ზედამხედველობა, მათი სამსახურის ვალდებულებას არ წარმოადგენს: „პოლიტიკური პარტიების პლაკატები ვინმემ რომ არ ჩამოხიოს, ამის კონტროლის ვალდებულება ჩვენ დებულებაში არ გვიწერია.შესაბამისად, არც ის პირები გამოგვივლენია, ვინც ამ პლაკატებს აზიანებს. ჩვენ შეგვიძლია გითხრათ, რომელი პარტიები დავაჯარიმეთ“.

ვასილ ჯინჭველეიშვილის თქმით, ჯარიმების რეკორდსმენია „ნაციონალური მოძრაობა“, რომელიც შვიდჯერ დაჯარიმდა. დაჯარიმებული არიან „ქრისტიან დემოკრატები“ და „ქართული ოცნებაც“. პირველი დაჯარიმების შემთხვევაში პოლიტიკური სუბიექტი 50 ლარიანით ჯარიმდება.

როგორც ახალგაზრდა იურისტთა ასოციაციის აჭარის ფილიალის ხელმძღვანელი პარმენ ჯალაღონია ამბობს, პლაკატების დაზიანების ფაქტებზე სანქცია საოლქო საარჩევნო კომისიამ უნდა გამოწეროს, „თუმცა მანამდე, ვიღაცამ უნდა დააფიქსიროს თუ ვინ დააზიანა პალაკატი. ამის კონტროლი კი ქალაქის ზედამხედველობის სამსახურის ფუნქციოებში შედის“.

ბათუმელი ჩოგბურთელი „როლან-გაროსის“ მოგებაზე ოცნებობს

მარი ბოლქვაძე: ვარჯიში ექვსი წლის წინ ბათუმში გიორგი დიქტოპულოსთან დავიწყე. შემდეგ კი სამი წლით თბილისში გადავედი, სადაც ვიქტორ ბაქშისთან ვემზადებოდი. მოგვიანებით ისევ ბათუმში დავბრუნდი და ვარჯიშიც აქ გავაგრძელე. ზამთარში კი ორი-სამი თვით ინგლისში მივემგზავრები, სადაც ოთო ბუჩჰოლდიტთან გავდივარ წვრთნებს.

– როგორც ვიცი, საქართველოს ჩემპიონი ხარ…

– დიახ, საქართველოს ორგზის ჩემპიონი ვარ 14 წლამდე ასაკის ჩოგბურთელთა შორის. პირველად შარშან გავიმარჯვე, წელს კი – მეორედ.

– „ბათუმი ლეიდის ოუფენ“ შენი პირველი საერთაშორისო ტურნირია?

– ჩემ ასაკობრივ კატეგორიაში ევროტურნირებზე ხშირად ვმონაწილეობ და 14 წლის ასაკის ჩოგბურთელთა შორის რეიტინგში 54-ე ადგილზე ვარ, დიდებში კი წელს პირველად ვცადე ბედი.

– მიუხედავად იმისა, რომ პირველივე წრეში დამარცხდი, საქართველოს ჩოგბურთის ფედერაციის პრეზიდენტს ლეილა მესხს და აჭარის ნაკრების მთავარ მწვრთნელს ვლადიმერ ასათიანს შენთვის საქებარი სიტყვები არ დაუშურიათ…

– მადლობას ვეტყვი ორივეს. რაც შეეხება ჩემ მარცხს, პაშკოვა 23 წლისაა, ასაკითაც და ფიზიკურადაც ჩემზე დიდია. მართალია, გამარჯვების შანსი მქონდა, მაგრამ აქ უკვე გამოცდილებამ ითამაშა დიდი როლი და შეხვედრა 4:6 / 5:7 დავთმე. თუმცა გული ნამდვილად არ მწყდება. კარგი გამოცდილება მივიღე. რაც შეეხება წყვილთა თანრიგს, მე და ბარბარე ერისთავმა პირველი წრე გავიარეთ, მაგრამ მეორეში უკრაინელ წყვილთან დავმარცხდით.

– მარი, როგორც სპორტსმენს, საკუთარი თავის დადებით და უარყოფით მხარეებად რა მიგაჩნია?

– დადებითი? – ალბათ სტაბილურობა და ტექნიკა. უარყოფითზე კი… ფსიქოლოგიურად ძალიან განვიცდი თითოეულ წაგებულ ბურთს, რაც უარყოფითად მოქმედებს ჩემზე, მაგრამ ამაზეც ვმუშაობ და იმედია, მალე ამ ნაკლს აღმოვფხვრი.

– ამჟამად რომელი ტურნირისთვის ემზადები?

– თელავში მივემგზავრები, სადაც 50-ათასიან ტურნირში (დიდები) მივიღებ მონაწილეობას. ვეცდები, იქ უკეთ ვიასპარეზო.

– მისაბაძი სპორტსმენი?

– მარია შარაპოვა, ძალიან მომწონს როგორც ქალი და როგორც ჩოგბურთელი.

– ოცნება?

– გავხდე მსოფლიოს ნომერ პირველი ჩოგანი და მოვიგო „როლან გაროსი“.

ჟურნალისტების აქცია ბათუმში

„ცესკო, ჩვენ ვეღარ ავსახავთ რეალობას”, „ნუ დატოვებთ ხალხს ინფორმაციის გარეშე”, „no picture no democracy” – ბათუმში, დღეს, 25 სექტემბერს, უსკოს შენობასთან ჟურნალისტებმა ცენტრალური საარჩევნო კომისიის გადაწყვეტილება გააპროტესტეს, რომლის თანახმადაც მედიას არჩევნების გაშუქებისას გარკვეული შეზღუდვები დაუწესდა.

ცესკოს გადაწყვეტილებას ბათუმში გაზეთ „ბათუმელების”, „ტვ 25″-ის, „ტვ 9″- ს, აჭარის ტელევიზის, „ინფო 9″-ს, „პირველი არხის”, „გურია ნიუსის”, „ინტერპრესნიუსის” ჟურნალისტები და არასამთავრობო ორგანიზაციების წარმომადგენლები აპროტესტებდნენ.

ჟურნალისტების აქცია გამართა დღეს თბილისშიც. ცენტრალური საარჩევნო კომისია დღეს, 7 საათამდე იმჯელებს 24 სექტემბერს მიღებული იმ დადგენილების გაუქმების შესახებ, რომლის მიხედვითაც, ჟურნალისტებს არჩევნების დღეს ფოტო–ვიდეოგადაღება მნიშვნელოვნად ეზღუდება.

იმ შემთხვევაში თუ ეს დადგენილება არ გაუქმდება, ჟურნალისტები გადაწყვეტილებას ხვალ სასამართლოში გაასაჩივრებენ.

ავარია „ნაციონალების” საზეიმო მსვლელობისას [ფოტო]

ბათუმში, რუსთაველს ქუჩაზე, „ნაციონალური” მოძრაობის საზეიმო მსვლელობისას, ორი მანქანა, რომელსაც „ნაციონალები” მართავდნენ, ერთმანეთს დაეჯახა. ავარიის შედეგად არავინ დაშავებულა.

რამდენიმე დღეა ბათუმის ქუჩებში გადაადგილდება მანქანების კოლონა გაბმული სიგნალით, „ნაციონალური მოძრაობის” ხუთი ნომრითა და დროშებით.

კონფლიქტი BTM-ში

ხელვაჩაურში, „BTM ტექსტილში“ ინცინდენტი მოხდა. როგორც ფაბრიკის თანამშრომელი ნაზი ვარშანიძე აცხადებს, მას წარმოების მენეჯერმა, ხასან იბიშმა სიტყვიერი შეურაცხყოფა მიაყენა, რის შემდეგაც ის ცუდად გახდა. „ვთხოვდი სამუშაო მასალა მოეწოდებინა, მან კი მაგიდაზე ხელი დამიბრახუნა და ყველაფერი მომაყარა. ხელმძღვანელობისთვის უნდა მეთქვა მისი საქციელის შესახებ, მაგრამ კადრებში ჩასვლა ვეღარ მოვასწარი, რადგან ცუდად გავხდი“.

როგორც ფაბრიკის თანამშრომლები აცხადებენ, ხასან იბიში არაერთხელ არის შემჩნეული თანამშრომლებთან უხეშ დამოკიდებულებაში.

„საკმაოდ კონფლიქტური ადამიანია და სხვა ოპერატორებთანაც არაერთხელ ჰქონია პრობლემა. რამდენიმე შემთხვევა იყო, როცა მუშებმა პატრული გამოიძახეს. ერთხელ ვუთხარი, ცხრა საათამდე სამუშაოდ ვერ დავრჩები მეთქი და მითხრა, ვირივით დარჩები და იმუშავებო. მსგავს შეურაცხმყოფ სიტყვებს სხვებთან მიმართებაშიც იყენებდა. ჩემი შეურაცხყოფა სხვა თანამშრომლებმა იუკადრისეს და ჩემი დაცვა სცადეს“. – ამბობს ნაზი ვარშანიძე.

როგორც „ტექსტილის“ იურისტი დავით ჩავლეიშვილი აცხადებს, ინცინდენტის მონაწილე პირები, რომლებსაც შეურაცხყოფა მიაყენა ხასან იბიშმა, პოლიციაში იმყოფებიან და იძლევიან ჩვენებას. „მე ვერ გეტყვით, რა ფიზიკური შეურაცხყოფა მიაყენა ხასან იბიში ნაზი ვარშანიძეს. ფაქტზე გამოძიება მიმდინარეობს, მაგრამ დაზუსტებით შემიძლია გითხრათ, რომ მასთან შრომითი ხელშეკრულება მოშლილია და ის დღეს ჩვენთან აღარ მუშაობს. ამგვარ ფაქტებს ჩვენ ვგმობთ“ – აცხადებს იურისტი.

ფაბრიკა თურქულ კორპორაცია ATK-ის ეკუთვნის, რომლის შვილობილ კომპანიას საქართველოში BTM Textile წარმოადგენს.

ჟურანლისტების საპროტესტო აქცია ცესკოსთან

ჟურნალისტები თბილისსა და ქვეყნის რეგიონებში, დღეს 15:00 საათზე საპროტესტო აქციას გამართავენ. ჟურნალისტები ცესოკოს მიერ 24 სექტემბერს მიღებულ დადგენილებას გააპროტესტებენ. ამ დადგენილებით ჟურნალისტებს მნიშვნელოვნად შეეზღუდათ არჩევნების დღეს საარჩევნო უბნებზე მუშაობის შესაძლებლობა.

ცესკოს დადგენილებას გუშინ მხარი დაუჭირეს ქრისტიან-დემოკრატიული მოძრაობის წარმომადგენლებმა. ამ პარტიის ერთ-ერთი ლიდერი, ლევან ვეფხვაძე „გურია ნიუსთან“ აცხადებს, რომ ის ცესკოს მიღებული გადაწყვეტილებით კმაყოფილია.

ნიაზ ზოსიძე: „მე მგონია, რომ ინგა გრიგოლია გადაწყვეტილებას შეცვლის“

„ის ვარიანტი, რა ვარიანტიც მიიღეს, არ არის კარგი, მაგრამ ბევრად სჯობს იმას, რაც წარმოადგინა ნაციონალურმა მოძრაობამ. ვადასტურებ. რომ არ არის იდეალური, ადრე კომისიის თავჯდომარეს უფლება ჰქონდა ჟურნალისტი გაეძევებინა უბნიდან და ახლა ეს უფლება აღარ აქვს.“

„ბათუმელების” შეკითხვაზე – თქვენ, როგორც ყოფილი ჟურნალისტი, როგორ ფიქრობთ, ხელს შეუშლის თუ არა მედიას რეალობის ასახვაში ის გარემოება, რომ ჟურნალისტი ინტერვიუს, რეგულაციის თანახმად, გარეთ ჩაწერის შემთხვევაში, ვეღარ შებრუნდება უბანზე? – ნიაზ ზოსიძე ამბობს: „კიდევ ერთხელ ვიმეორებ, ეს ბევრად ჯობს, წინა რეგულაციების პროექტს, მაგრამ სადაც არ უნდა იყოს, ჟურნალისტების შეზღუდვას არ მივესალმები, ეს იყოს თუ გინდა ცესკოში, გინდა მის გარეთ.”

ნიაზ ზოსიძე აჭარის უმაღლესი საბჭოს არჩევნებისთვის ქდმ -ს მაჟორიტარი დეპუტატობის კანდიდატია. იგი განმარტავს, რომ „ქდმ“-ს მხარი რომ არ დაეჭირა ამ ვარიანტისთვის, მაშინ „ნაციონალური მოძრაობა“ უფრო მკაცრ რეგულაციებს დაუწესებდა მედიას.

ნიაზ ზოსიძე აცხადებს, რომ მათი გუშინდელი გადაწყვეტილება პარტიის რეიტინგზე არ იმოქმედებს და არც იმის შესახებ სმენია, რომ ქდმ-ს ხელისუფლების სატელიტად მოიაზრებენ: „ეს არის ხელისუფლების შემოგდებული, რაღაც უნდა დააბრალო შენს მოწინააღმდეგეს და სხვა ვერაფერს აბრალებენ გიორგი თარგამაძეს. ის არც ნარკომანია და არ არც კრიმინალი“ – აცხადებს ნიაზ ზოსიძე.

ქდმ – მცესკოში გუშინ ხმა მისცა ამ დადგენილების სასარგებლოდ, რომელსაც მედია და არასამთავრობო სექტორი აპროტესტებს.

„ბათუმმა“ ისევ წაგო

ირაკლი დარცმელიძე

შაბათს საქართველოს ეროვნული სარაგბო ჩემპიონატის მორიგ ტურში ბათუმის „ბათუმმა“ ანგისის სტადიონზე მცხეთის „არმაზს“ უმასპინძლა და 13:18 დამარცხდა. ამ ეტაპზე სატურნირო ცხრილში „ბათუმი“ მერვე ადგილზე იმყოფება.

„ბათუმი ლეიდის ოფენ“ დასრულდა

მიუხედავად იმისა, რომ სოფო ქვაცაბაია და ეკატერინე გორგოძე ფავორიტებად მოიაზრებოდნენ, მათი სვლა ჩემპიონობისკენ მეოთხედფინალში დასრულდა. გორგოძე რუს იულია კალაბინას ვერ გაუმკლავდა, ქვაცაბაია კი უკრაინელ ანა შკუდუნთან დამარცხდა.

რაც შეეხება წყვილთა თანრიგს, ქართველებმა ვერც აქ ივარგეს. ტურნირის გამარჯვებული წყვილთა შორის, რუსთა დუეტი (კალაბინა-პაშკოვა) გახდა, რომელმაც ფინალში ალიონა ფომინასა და ანა შკუდუნის უკრაინულ ტანდემს 7:6; 6:2 მოუგო.

ერთეულთა თანრიგში ერთმანეთს სომხეთის წარმომადგენელი ანი ამირხანიანი და უკრაინელი ანა შკუდუნი დაუპირისპირდნენ. მატჩი და წვიმა თითქმის ერთდროულად დაიწყო, ამიტომ ფინალისტებმა სასტუმრო კომპლექს „მარინას“ დახურულ საჩოგბურთო კორტზე გადაინაცვლეს. სომეხმა სპორტსმენმა ყოველგვარი დაძაბულობის გარეშე, ორ სეტში 6:1 / 6:3 დაამარცხა შკუდუნი და ტურნირის გამარჯვებულიც გახდა.

წყვილთა შორის გამარჯვებულებმა საპრიზო ფონდიდან 955 აშშ დოლარი მიიღეს, ერთეულთა შორის ჩემპიონმა კი ჯიბე 2 352 დოლარით შეივსო.

„მაჩანჩალებში ყოფნას არ შევეგუებით“ – ინტერვიუ გია გურულთან

– ბატონო გია, ოფიციალურად ჩატარებული შვიდი შეხვედრიდან „დინამომ“ მხოლოდ ერთხელ შეძლო გამარჯვება. როგორ ფიქრობთ, რა შეიძლება იყოს გუნდის წარუმატებლობის მიზეზი?

– პირველ რიგში მინდა აღვნიშნო, რომ ამ შვიდი შეხვედრიდან მხოლოდ ერთი გავმართეთ საკუთარ მოედანზე და ისიც გამარჯვებით დავასრულეთ. ეს კი იმაზე მეტყველებს, რომ საკუთარი მოედნის ფაქტორი ძალიან მნიშვნელოვანია არა მარტო ჩვენთვის, არამედ ნებისმიერი გუნდისთვის. არის მეორე ფაქტორიც, წელს გადავედით უმაღლეს ლიგაში, ახალგაზრდული გუნდია და ჯერ შესაბამისი შეთამაშება სჭირდება. აქვე იმასაც გეტყვით, რომ როდესაც გუნდი ბიუჯეტიდან ფინანსდება, ძნელია ამ შემთხვევაში იფიქრო დამატებით, გუნდისთვის საჭირო გამოცდილი ფეხბურთელების შეძენაზე, რომლებიც ნამდვილად გვჭირდება და გაგვაძლიერებს.

– გათამაშების ცხრილში „დინამო“ ბოლოდან მეორე ადგილზე იმყოფება. ხუთი შეხვედრიდან გუნდმა მხოლოდ ორი ფრე ითამაშა და სამჯერ დამარცხდა. მიმდინარე სეზონში მოპოვებულმა პირველმა გამარჯვებამ როგორ იმოქმედა გუნდზე?

– ამ გამარჯვებამ ბიჭებს საკუთარი თავის რწმენა დაუბრუნა. თამაში ყველასთან შეიძლება. კარგად მოგეხსენებათ, რომ ბათუმის „დინამო“ ყოველთვის ლიდერებში მოიაზრებოდა, ამბიციური გუნდი გახლდათ და ასე ვთქვათ, მაჩანჩალებში ყოფნას არ შევეგუებით.

– „კარპატიდან“ გყავთ დამატებული რამდენიმე ფეხბურთელი, მათზე რას გვეტყვით?

– დიახ, მეკარე ივან პიცანი და ფორვარდი ალექსანდრე ტიმჩიშინი. ორივე ძალიან კარგი ფეხბურთელია და დარწმუნებული ვარ, გუნდს გამოადგებიან. პიცანი სტაბილური მეკარეა, ტიმჩიშინს კი სწრაფი და ტექნიკური ფეხბურთელია. რაც შეეხება იმას, თუ როგორ მოხვდნენ ჩვენთან, გეტყვით, რომ „კარპატის“ ხელმძღვანელობასთან ახლო, ასე ვთქვათ მეგობრული ურთიერთობა გვაკავშირებს, ჩვენი თხოვნა გაითვალისწინეს და მეგობრული ხელი გამოგვიწოდეს. ისინი „დინამოში“ განათხოვრების წესით არიან ჩამოსულები.

– გუნდის მიზანი წლევანდელ სეზონში რა იქნება?

– უმაღლეს ლიგას წელს დავუბრუნდით და კლუბის ხელმძღვანელობას ნამდვილად არ მოუთხოვია ჩვენგან საპრიზო ადგილებზე გასვლა ან თუნდაც საუკეთესო ექვსეულში შესვლა. ვეცდებით, უმაღლეს ლიგაში ადგილი შევინარჩუნოთ, თან ამ პერიოდს გუნდის შეთამაშებისთვის გამოვიყენებთ. მომავალი წლიდან კი აუცილებლად გავძლიერდებით და უფრო მაღალი მიზნებისთვის ვიბრძოლებთ.

მორიგი მარცხი განიცადა ბათუმის “დინამომ”. ქუთაისი “ტორპედოსთან” სტუმრად გამართულ შეხვედრაში ბათუმელებმა ხუთი გოლი გაუშვეს და მხოლოდ ერთის გატანა შეძლეს, მე-17 წუთზე თავი ჯორბენაძემ გამოიჩინა. “დინამო” ცხრილის ბოლო საფეხურზე იმყოფება.

ბათუმის შოთა რუსთაველის უნივერსიტეტის წინ საპროტესტო აქციები შეწყდა

ქეთი ლაბაძე

ბათუმელმა სტუდენტებმა საპროტესტო აქცია – „არა ძალადობას”, „არ აწამო” – ბარბარეს ეკლესიასთან წირვა-ლოცვით დაასრულეს.

აქციის ორგანიზატორები აცხადებენ, რომ აქციებს წყვეტენ , რადგან არ სურთ პროვოკაციას აყვნენ და მათთვის მთავარია პირველ ოქტომბრამდე სიმშვიდის შენარჩუნება.

ანრი ბეჟანიძე, სტუდენტი: “საინიციატივო ჯგუფის ერთობლივი გადაწყვეტილებით აქციები უნდა შეწყდეს, რადგან მოახლოებულ არჩევნებს ხელი არ შევუშალოთ, ძალიან დიდი პროვოკაციები იგეგმება, ამიტომ ვწყვეტთ აქციებს არჩევნებამდე, მაგრამ თუ ისეთი რამ მოხდება, რომ აუცილებელი იქნება ჩვენი გამოსვლა, აუცილებლად დავაფიქსირებთ ჩვენს პროტესტს, იმედია ეს არ დაგვჭირდება.“

აჭარაში „ქართული ოცნების” სასარგებლოს კანდიდატურა კიდევ ერთმა ლეიბორისტმა მოხსნა

ნათია ზოიძე

აჭარაში „ლეიბორისტური პარტიის“ მაჟორიტარობის კანდიდატმა რუსლან მალაყმაძემ კანდიდატურა მოხსნა. საპარლამენტო არჩევნებზე იგი ხელვაჩაურში იყრიდა კენჭს.

რუსლან მალაყმაძემ კანდიდატურა კოალიცია „ქართული ოცნების“ კანდიდატის, როსტომ ბოლქვაძის სასარგებლოდ მოხსნა. კითხვაზე, რატომ დატოვა „ლეიბორისტური პარტია“, იგი ამბობს, რომ „იქ საინტერესო არაფერი ხდებოდა“. იცის თუ არა ლეიბორისტული პარტიის აჭარის კოორდინატორმა დავით რობაქიძემ მისი გადაწყვეტილების შესახებ? ამ კითხვას რუსლან მალაყმაძე ასე პასუხობს: „თქვენ ხომ იტყვით და გაიგებს“.

დაახლოებით ერთი კვირის წინ „ლეიბორისტური პარტიის“ რიგები კიდევ ორმა წევრმა დატოვა. ლეიბორისტური პარტიიდან მაჟორიტარობის ორმა კანდიდატმა, ბიძინა დუმბაძემ და თამაზ დევიძემ „ქართული ოცნების“ კანდიდატების, მურმან დუმბაძის და თემურ კახიძის სასარგებლოდ მოხსნეს კანდიდატურა.

ბიძინა დუმბაძე ხელვაჩაურში იყრიდა კენჭს, თამაზ დევაძე კი ბათუმში.

ბათუმის მერიამ მურმან დუმბაძის ბანერი ჩამოხსნა

ბათუმის მერიის ზედამხედველობის სამსახურმა გოგებაშვილის ქუჩაზე მდებარე სახლიდან „ქართული ოცნების” ბათუმის მაჟორიტარი კანდიდატის, მურმან დუმბაძის საარჩევნო ბანერი ჩამოხსნა, რასაც „ქართული ოცნების“ პროტესტი მოჰყვა.

ბანერის ჩამოხსნა მერიის ზედამხედველობის სამსახურმა საკრებულოს გადაწყვეტილებით ახსნა, რომლის თანახმადაც შენობებზე სარეკლამო ბანერების გაკვრა არ შეიძლება და „ქართული ოცნება” 50 ლარით დააჯარიმა.

„ქართული ოცნება” ამ მოტივს არ ეთანხმება, ამბობენ რომ ეს კერძო სახლია და ადმინისტრაციული კოდექსით კერძო საკუთრებაზე დასაშვებია ნებისმიერი რეკლამის განთავსება, მათ შორის, პოლიტკური რეკლამის.

„ქართული ოცნება” ზედამხეველობის სამსახურის გადაწყვეტილებას სასამართლოში ასაჩივრებს.

გლეხების აქცია ფინანსთა სამინისტროსთან

„2007 წელს საპრეზიდენტო არჩევნებამდე, როდესაც ხელვაჩაურში დაიწყო მუშაობა საკუთრების აღიარების კომისიამ, მივმართეთ კომისიას, წარვადგინეთ საჭირო დოკუმენტები და ნაკვეთები გაგვიფორმეს. არჩევნების ჩატარებიდან სამი თვის შემდეგ კი გვითხრეს – თქვენი დოკუმენტი ყალბიაო. ანუ გამოვიდა, რომ თავად კომისიამ მოგვცა ყალბი დოკუმენტი“, – ამბობს „ბათუმლებთან“ აქციის ერთ-ერთი მონაწილე.

სოფელ მირვეთის მკვიდრის, ზურაბ ჭელიძის თქმით კი, მას საჯარო რეესტრში მისცეს ამონაწერი, რომლის მიხედვითაც ნაკვეთის ერთი ნაწილი, რომელსაც ის წლებია ამუშავებს, აჭარის მთავრობამ თურქულ კომპანიას გადაუფორმა. ზურაბ ჭელიძე ამ მიწის ნაკვეთის დაკანონებას გასულ წელსაც ცდილობდა, რისთვისაც მან ხელვაჩაურის საკუთრების აღიარების კომისიას საჭირო დოკუმენტებით მიმართა და დადებითი პასუხიც მიიღო, მაგრამ 218 ლარის გადახდა, რომელიც მას საკუთრების აღიარების საფასურად დაუანგარიშეს ვერ შეძლო“. „ამის შემდეგ დოკუმენტები შევინახე და ნაკვეთის დარეგისტრირება დროებით გადავდე. ახლა კი გავიგე, რომ მიწა მთავრობამ გამიყიდა“.

სამინისტროსთან შეკრებილები მინისტრთან შეხვედრას ითხოვდნენ. მინისტრის მოვალეობის შემსრულებლის, სულხან ჯორთმენაძის ნაცვლად, მათთან შესახვედრად სამინისტროს ქონების მართვისა და ლიცენზირების სამსახურის ხელმძღვანელი ზურაბ ჭურკვეიძე გამოვიდა. მან გლეხებს განუცხადა, რომ სამინისტროს მათი ნაკვეთები არ გაუყიდია. ჭურკვეიძეს მოქალაქეებმა საჯარო რეესტრიდან ამონაწერი წარუდგინეს, რაზეც სამინისტროს წარმომადგენელმა მათ უპასუხა, რომ დოკუმენტში ტექნიკური ხარვეზი იყო დაშვებული.

იქვე, მედიასთან საუბარში ჭურკვეიძემ საპირისპირო რამ დაადასტურა, მან თქვა, რომ მოსახლეობის ნაკვეთები გასხვისებულია. ზურაბ ჭურკვეიძის ინფორმაციით, ეკონომიკის სამინისტრო ინვესტორთან აწარმოებს მოლაპარაკებას, რომ უკვე გასხვისებული ნაკვეთების მფლობელებს, ინვესტორმა კომპენსაცია მისცეს.

„აჭარ ენერჯი 2007“-ის წარმომადგენლის ინფორმაციით კი, რომელიც მან „ბათუმელებს“ გასულ კვირას მიაწოდა, „ინვესტორი იმ ნაკვეთებში, რაც უკვე კეთილსინდისიერად შეიძინა სახელმწიფოსგან, დამატებით თანხის დახარჯვას არ აპირებს“.

„ბათუმელების“ კითხვას, უკვე გაცემული საკუთრების დოკუმენტის გაუქმება იმ არგუმენტით, რომ ის ყალბია, ნიშნავს თუ არა იმას, რომ „მიწის კომისიამ“ უკანონო დოკუმენტები გასცა? – ზურაბ ჭურკვეიძემ უპასუხა, რომ საქმეს ასე დეტალურად არ იცნობს. – „ვაპირებ დავინტერესდე, შევისწავლი ამ საქმეს, რომ დავეხმარო ამ ადამიანებს“.