ნათია ზოიძე
ქდმ -ს აჭარის რეგიონული ორგანიზაციის თავმჯდომარე ნიაზ ზოსიძე „ბათუმელებთან“ საუბარში აცხადებს, რომ ინგა გრიგოლიამ ინფორმაცია კანდიდატურის მოხსნის შესახებ მხოლოდ ფეისბუქის გვერდზე დაწერა: „მე დარწმუნებული ვარ, რომ ის დეტალებს არ იცნობს კარგად და მისი გაცნობის შემდეგ, მე მგონია, რომ ის გადაწყვეტილებას შეცვლის“. – ამბობს ნიაზ ზოსიძე.
„ის ვარიანტი, რა ვარიანტიც მიიღეს, არ არის კარგი, მაგრამ ბევრად სჯობს იმას, რაც წარმოადგინა ნაციონალურმა მოძრაობამ. ვადასტურებ. რომ არ არის იდეალური, ადრე კომისიის თავჯდომარეს უფლება ჰქონდა ჟურნალისტი გაეძევებინა უბნიდან და ახლა ეს უფლება აღარ აქვს.“
„ბათუმელების” შეკითხვაზე – თქვენ, როგორც ყოფილი ჟურნალისტი, როგორ ფიქრობთ, ხელს შეუშლის თუ არა მედიას რეალობის ასახვაში ის გარემოება, რომ ჟურნალისტი ინტერვიუს, რეგულაციის თანახმად, გარეთ ჩაწერის შემთხვევაში, ვეღარ შებრუნდება უბანზე? – ნიაზ ზოსიძე ამბობს: „კიდევ ერთხელ ვიმეორებ, ეს ბევრად ჯობს, წინა რეგულაციების პროექტს, მაგრამ სადაც არ უნდა იყოს, ჟურნალისტების შეზღუდვას არ მივესალმები, ეს იყოს თუ გინდა ცესკოში, გინდა მის გარეთ.”
ნიაზ ზოსიძე აჭარის უმაღლესი საბჭოს არჩევნებისთვის ქდმ -ს მაჟორიტარი დეპუტატობის კანდიდატია. იგი განმარტავს, რომ „ქდმ“-ს მხარი რომ არ დაეჭირა ამ ვარიანტისთვის, მაშინ „ნაციონალური მოძრაობა“ უფრო მკაცრ რეგულაციებს დაუწესებდა მედიას.
ნიაზ ზოსიძე აცხადებს, რომ მათი გუშინდელი გადაწყვეტილება პარტიის რეიტინგზე არ იმოქმედებს და არც იმის შესახებ სმენია, რომ ქდმ-ს ხელისუფლების სატელიტად მოიაზრებენ: „ეს არის ხელისუფლების შემოგდებული, რაღაც უნდა დააბრალო შენს მოწინააღმდეგეს და სხვა ვერაფერს აბრალებენ გიორგი თარგამაძეს. ის არც ნარკომანია და არ არც კრიმინალი“ – აცხადებს ნიაზ ზოსიძე.
ქდმ – მცესკოში გუშინ ხმა მისცა ამ დადგენილების სასარგებლოდ, რომელსაც მედია და არასამთავრობო სექტორი აპროტესტებს.
