არის თუ არა სახანძრო უსაფრთხოების წესები დაცული ბათუმის დიდ სასტუმროებში? – „ბათუმელებს“ ყველა სასტუმროში უთხრეს, რომ დაცულია. სასტუმროების უმრავლესობამ ვერ გვიპასუხა კითხვებზე: რა სახით არის დაცული უსაფრთხოება და რომელმა უწყებამ შეამოწმა უსაფრთხოების ნორმები?

„დაცულია უსაფრთხოება,“ – გვითხრეს სასტუმრო „რედისონის“ მისაღებში. აქ უარი გვითხრეს უსაფრთხოების მენეჯერთან გასაუბრებაზე. „უსაფრთხოების მენეჯერმა იცის კონკრეტულად, რა და როგორ არის. მის ნომერს ვერ მოგცემთ, შაბათ-კვირას არ მუშაობს,“- დაამატეს მისაღებში.

ორშაბათამდე უსაფრთხოების კუთხით ინფორმაციის მოწოდებაზე უარი თქვა სასტუმრო „შერატონმაც“: „უსაფრთხოება დაცულია, ამას ამოწმებენ. რომელი სამსახური ამოწმებს არ ვიცი. უსაფრთხოების მენეჯერს შემიძლია ორშაბათს გაგასაუბროთ“.

სასტუმრო „ეიფორიაში“ დაცვის სამსახურის უფროსს დაგავლაპარაკეს: „ჩვენთან დაცულია უსაფრთხოების ნორმები, არსებობს ცალკე კიბე, რომელსაც შენობის უკანა მხარეს გაყავხარ… რომელი უწყება ამოწმებს, მაგდენი მე არ ვიცი, დაცვის თანამშრომელი ვარ“.

„ტურიზმის დეპარტამენტი ამოწმებს სახანძრო უსაფრთხოებას,“ – აღნიშნეს სასტუმრო „დივანის“ მისაღებში. აჭარის ტურიზმის დეპარტამენტი ხარისხის  ნიშანს „რეკომენდებულია“ აძლევს სასტუმროს, სადაც უსაფრთხოების ნორმებიც უნდა იყოს დაცული. ხარისხის ეს ნიშანი სასტუმრო „ლეოგრანდსაც“ ჰქონდა მინიჭებული 2015 წელს.

სასტუმრო „დივანში“  ვერ დაგვიკონკრეტეს, შეამოწმა თუ არა უსაფრთხოების ნორმები საგანგებო სიტუაციების მართვის სააგენტომ. ამ უწყებას აქვს სასტუმროების შემოწმების და რეაგირების უფლება სახანძრო უსაფრთხოების კუთხით.

სასტუმრო „აისში“ გვითხრეს, რომ აქვთ ცალკე გასასვლელი, ასევე საევაკუაციო გეგმა, ფოსფორის განათება იმ შემთხვევისთვის, თუკი შუქი გაითიშება. სასტუმროში აღნიშეს, რომ სახანძრო უსაფრთხოება საგანგეობო სიტუაციების მართვის სააგენტომ შეამოწმა.

სასტუმრო „ლეოგრანდში“ ხანძარი გუშინ 24 ნოემბერს მოხდა, რის შედეგადაც 11 ადამიანი დაიღუპა, 21 კი დაშავდა.

დღეს, 25 ნოემბერს, სასტუმრო „ლეოგრანდში“ აჭარის მთავრობის თავმჯდომარემ ზურაბ პატარაძემ გუშინ მომხდარ ხანძართან დაკავშირებით კომენტარი გააკეთა. „თითოეული ჩვენგანისთვის ძალიან მძიმე დროა, ყველა ძალიან ვღელავთ, მძიმე წუთებია ჩვენი ქვეყნისთვის, რეგიონისთვის, ჩვენი ქალაქელებისთვის და მინდა ყველას მივუსამძიმრო, მართლაც დიდი ტრაგედია.

გამოძიება დაწყებულია, ახლახანს დავასრულე საუბაში შს სამინისტროს და სხვადასხვა სამსახურის წარმომადგენლებთან, გავმართეთ სამუშაო შეხვედრა. არის ძალიან ბევრი კითხვის ნიშანი, რომელსაც პასუხს გასცემს გამოძიება უახლოეს პერიოდში.

თუმცა მე მინდა განვმეორდე და კიდევ ერთხელ ხამამაღლა ვთქვა, რომ კანონის სრული სიმკაცრით დაისჯერა ყველა ის ადამიანი, არა აქვს მნიშვნელობა სახელმწიფო დაწესებულების თანამშრომლები იქნებიან, თუ კერძო კომპანიის წარმომადგენლები. იქნება მაქსიმალური რეაგირება, მაქსიმალური ჩართულობა ხელისუფლების და ძალიან მალე გვეცოდონება დეტალები“, – განაცხადა ზურაბ პატარაძემ.

დღეს სასტუმრო „ლეოგრანდში“ საქართელოს პატრიარქი ილია მეორე იმყოფებოდა, მან დაღუპული სულების მოსახსენებელი პანაშვიდი გადაიხადა. სასტუმროს ტერიტორიაზე იმყოფებოდნენ აჭარის მთავრობის წევრები და ქალაქის მერი.

„ბათუმელების“ კითხვაზე უნდა გამკაცრდეს თუ არა კანონი უსაფრთხოების ნორმების დაცვასთან დაკავშირებით, ზურაბ პატარაძე ამბობს, რომ დამატებით კომენტარებს ის გამოძიების დასრულების შემდეგ გააკეთებს.

დღეს, 25 ნოემბერს, ბათუმში საქართველოს მართლმადიდებელი ეკლესიის პატრიარქი, ილია მეორე ჩამოვიდა. მან სასტიმრო „ლეოგრანდთან“, სადაც გუშინ ხანძრის შედეგად 11 ადამიანი დაიღუპა, დაღუპულთა სულების მოსახსენიებელი პანაშვიდი ჩაატარა.

24 ნოემბერს, სასტუმრო ლეოგრანდში გაჩენილი ხანძრის შედეგად 10 – საქართველოს და 1 ირანის მოქალაქე დაიღუპა.

ხანძარი სასტუმროში საღამოს რვა საათზე გაჩნდა. სამაშველო სამსახურები მთელი ღამის მანძილზე მუშაობდნენ. ხანძრის შედეგად დაშავებულები ამ დრომდე საავადმყოფოში იმყოფებიან.

„24 ნოემბერს ქალაქ ბათუმში სასტუმრო „ლეოგრანდში“ განვითარებულ ხანძარს ხულოს მუნიციპალიტეტის მკვიდრის 4 სიცოცხლით სავსე ახალგაზრდის ზაურ აბულაძის, დათო ქამადაძის, მარად შანთაძის და როინ ჯოყილაძის სიცოცხლე შეეწირა.ხულოს მუნიციპალიტეტის საკრებულო უსამძიმრებს დაღუპულთა ოჯახებს, ახლობლებს, მუნიციპალიტეტს და სრულიად საქართველოს. ეს ტრაგედია უსაზღვრო და უმძიმესია თითოეული ჩვენთაგანისათვის“ – ამ განცხადებას, თანდართულ ფოტოებთან ერთად ხულოს მუნიციპალიტეტის საკრებულო აქვეყნებს.

24 ნოემბერს, სასტუმრო ლეოგრანდში გაჩენილი ხანძრის შედეგად 11 ადამიანი დაიღუპა, 10 – საქართველოს და 1 ირანის მოქალაქე.

ხანძარი სასტუმროში საღამოს რვა საათზე გაჩნდა. სამაშველო სამსახურები მთელი ღამის მანძილზე მუშაობდნენ. ხანძრის შედეგად დაშავებულები ამ დრომდე საავადმყოფოში იმყოფებიან.

ბათუმისა და ლაზეთის მიტროპოლიტის მდივნის, თამარ ჩხაიძის ინფორმაციით, საქართველოს პატრიარქი ილია მეორე, თბილისიდან „წუთი-წუთზე უნდა გამოფრინდეს“. მისი ინფორმაციით, თვითმფრინავი 12 საათისთვის უნდა გამოფრენილიყო ბათუმში, თუმცა უამინდობის გამო, შესაძლოა დააგვიანოს.

„როგორც ჩემთვის ცნობილია, პატრიარქი  პირველიდან ორის ნახევრამდე უნდა ჩამოფრინდეს ბათუმში და პირდაპირ  „ლეო-გრანდში“ მიბრძანდება“-ამბობს თამარ ჩხაიძე.

სასტუმრო „ლეოგრანდში“ ხანძარი გუშინ 24 ნოემბერს მოხდა, რის შედეგადაც 11 ადამიანი დაიღუპა, 21 კი დაშავდა.

11 ადამიანი გარდაიცვალა და 21 დაშავდა გუშინ, 25 ნოემბერს  სასტუმრო „ლეოგრანდში“ მომხდარი ხანძრის შედეგად. ათი გარდაცვლილი საქართველოს მოქალაქეა, ერთი კი ირანის. ბათუმის ვიცე-მერის, თენგიზ პეტრიძის თქმით, სასტუმროში მყოფი პირები ქალაქის სხვადასხვა სასტუმროებშია გადანაწილებული.

ოფიციალური ინფორმაციით, ხანძრის შედეგად 21 ადამიანი გადაიყვანეს საავადმყოფოში, აქედან 13 პირი უკვე გაწერილია, რვა კი საავადმყოფოში რჩება.  „ლეოგრანდში“ იმყოფება ბათუმის ვიცე-მერი თენგიზ პეტრიძე, რომელიც ამბობს, რომ სასტუმროს არაერთხელ მიეცა შენიშვნები და დაჯარიმდა კიდეც.

„არის თუ არა სასტუმროში სახანძრო უსაფრთხოების ნორმები დაცული, ამის თაბაზე შემიძლია გითხრათ, რომ სახანძრო უსაფრთოებაზე სასტუმრო შემოწმებულია და დაჯარიმებულიც კი იყო, თუმცა, დადასტურებით მაინც არ შემიძლია ამის თქმა, რადგან დოკუმენტურად ამ საკითხებს არ გავცნობივარ. ჩემთვის გადმოცემით არის ეს ინფორმაცია ცნობილი.

ხოლო, დაცული იყო თუ არა სახანძრო უსაფრთხოება და არსებობდა თუ არა საევაკუაციო გეგმა, რამ გამოიწვია ეს ტრაგედია, ეს გამოძიების შემდეგ დადგინდება“-ამბობს პეტრიძე.

სასტუმრო „ლეოგრანდში“ ამ დრომდე მუშაობენ ექსპერტ-კრიმინალისტები, ადგილზეა სამაშველო და საპატრულო პოლიციის ეკიპაჟები.

სასტუმროები და სხვა შენობა-ნაგებობებს ექსპლუატაციაში ქალაქის მუნიციპალიტეტის მერია იღებს. თენგიზ პეტრიძე ვერ აზუსტებს, სასტუმროს ექსპლუატაციაში მიღების დროს შემოწმდა თუ არა ის სახანძრო უსაფრთხოებაზე. „ექსპლუატაციაში მიღებისთვის რა დოკუმენტებიც არის საჭირო, „ლეოგრანდს“ ყველაფერი გაკეთებული აქვს, მაგრამ უსაფრთხოების ნორმები ჰქონდა თუ არა დარღვეული ან მართებულად მოხდა თუ არა შენობის ექსპლუატაციაში მიღება, საგამოძიებო სამუშაოების შემდეგ დადგინდება“- ამბობს პეტრიძე.

სასტუმროს ტერიტორიაზე სასულიერო პირებიც იმყოფებიან. ისინი საქართველოს პატრიარქს ელოდებიან, რომელიც ხანძრის შედეგად დაღუპული ადამიანებისთვის პანაშვიდს გადაიხდის.

ამავე თემაზე: 

ხანძრის შედეგად კლინიკებს ჯამში 21-მა პაციენტმა მიმართა. 13-მა მათგანმა სამედეცინო დაწესებულება უკვე დატოვა.

ოფიციალური ინფორმაციით, გუშინ ხანძრის შედეგად დაღუპული 11 ადამიანიდან 10 საქართველოს, ერთი კი ირანის რესპუბლიკის მოქალაქეა.

დაშავებულთა უმეტესობამ დაზიანება კვამლის შედეგად მიიღო. აღსანიშნავია, რომ აჭარის რეგიონში მოქმედ სამედიცინო კლინიკებში ძლიერი დამწვრობის მკურნალობის სერვისი არ მოქმედებს. კლინიკებში მხოლოდ პირველადი და გადაუდებელი სამედიცინო დახმარების აღმოჩენაა შესაძლებელი. რეგიონში არც დამწვრობის სპეციალისტია. ხანძრით ძლიერი დამწვრობის შემთხვევაში, აჭარიდან პაიენტების გადაყვანა, თბილისის დამწვრობის ეროვნულ ცენტრში ხდება საჭირო.

ამავე თემაზე:

პრემიერი ლეოგრანდის ხანძართან დაკავშირებით: ამას მოჰყვება უმკაცრესი რეაგირება

სამაშველო სამსახურის ინფორმაციით, სასტუმრო ლეოგრანდში ხანძარი ლიკვიდირებულია და ყველა სასტუმრო ნომერი შემოწმებულია. „მაინც კიდევ დამატებით ვამოწმებთ“, – უთხრეს „ბათუმელებს“ სამაშველო სამსახურში.

როგორც სამაშველო სამსახურში აცხადებენ, 3 მეხანძრე-მაშველი გადაყვანილია საავადმყოფოში. ისინი თავს კარგად გრძნობენ.

ხანძრის ჩასაქრობად მობილიზებული იყო  15 სახანძრო სამაშველო ავტოსისტემა და ოთხი სამაშველო კიბე. მუშაობდა დამატებითი ჯგუფები იმერეთიდან, გურიიდან და სამეგრელოდან.

ხანძრის ჩასაქრობად სულ 120 მაშველი იყო მობილიზებული.

24 ოქტომბერს გაჩენილი ხანძრის შედეგად სასტუმრო ლეოგრანდში 12 ადამიანი დაიღუპა.

აჭარის ჯანდაცვის სამინისტროს ინფორმაციით, სასტუმრო ლეოგრანდში მომხდარი ხანძრის შედეგად საავადმყოფოებში გადაყვანილია 10 ადამიანი. მათგან ორი მოტეხილობით, სხვებს დაკვამლიანებისგან ინტოკსიკაცია აღენიშნებათ.

სასტუმრო ლეოგრანდთან მობილიზებულია სასწრაფო სამედიცინო სამსახურის ბრიგადები. ჯერჯერობით სასტუმროში კვლავ რჩებიან ადამიანები, რომელთა გამოყვანაზეც მუშაობენ სამაშველო სამსახურის ჯგუფები.

სასტუმრო ლეოგრანდში ხანძრის შედეგად დღეს ოთხი ადამიანი დაიღუპა. ხანძრის გამომწვევი მიზეზები ჯერჯერობით უცნობია. თვითმხილველების თქმით ხანძარი სასტუმროს სამზარეულოს ბლოკში გაჩნდა.

ლეოგრანდი ერთ-ერთი ყველაზე დიდი სასტუმრო ბათუმში.

ბათუმის სასწრაფო სამედიცინო დახმარების სამსახურის ინფორმაციით, ამ დროისთვის ხანძრის ზონიდან, ანუ სასტუმრო ლეოგრანდიდან საავადმყოფოში გადაყვანილია სამი პირი.

„დაკვამლიანებაა ჯერჯერობით, დამწვრობით არა“, – უთხრა „ბათუმელებს“ ბათუმის სასწრაფო სამედიცინო დახმარების სამსახურის წარმომადგენელმა, რომელიც თავადაც სასტუმროს მიმდებარედ იმყოფება.

თვითმხილველების თქმით, სასტუმრო ლეოგრანდში ხანძარი სამზარეულოდან გაჩნდა.

ბათუმის აბონენტების გაზმომარაგებაში მთელი დღის განმავლობაში შეფერხებები იყო. აბონენტების ნაწილს ბუნებრივი აირი ამ წუთებშიც არ მიეწოდება. მიმწოდებელ კომპანიაში მიზეზად მილსადენზე დაზიანება დაასახელეს, რომლის აღდგენაც მათივე ინფორმაციით, ხვალ, 25 ნოემბერს დაიწყება.

„სოკარ ჯორჯია გაზში“ აცხადებენ, რომ „წნევის ვარდნის გამო დაზიანდა მილსადენი, რის გამოც აბონენტების ნაწილს შეუწყდა გაზის მიწოდება. სამუშაოები ხვალ დილიდან დაიწყება. პარალელურად, ხვალიდან დაიწყება ბუნებრივი აირის მიწოდებაც და დღის ბოლომდე სრულად აღდგება“.

360 ათას ლარად ახალი სერიალისა და ფილმების შეძენას საზოგადოებრივი მაუწყებლის „აჭარის ტელევიზია“ აპირებს. შესყიდვა ტელევიზიამ დღეს, 24 ნოემბერს გამოაცხადა. სერიალის გარდა „აჭარის ტელევიზია“ რამდენიმე მხატვრულ, დოკუმენტურ და ანიმაციურ ფილმს შეიძენს.

სერიალის მიმართ მოთხოვნების კატეგორიაში „აჭარის ტელევიზია“ აღნიშნავს, რომ სერიალი აშშ-ში, დიდ ბრიტანეთში, იტალიაში, ესპანეთში ან უკრაინაში უნდა იყოს დამზადებული.  ტელევიზია ჯამში 120 სერიის შესყიდვას აპირებს და იგი მომავალ წელს გავა ეთერში. სერიალი 2000-დან 2017 წლამდე პერიოდში უნდა იყოს გადაღებული.

მხატვრულ ფილმებზე „აჭარის ტელევიზიის“ მოთხოვნა აქვს, რომ იმ ფილმებს შეისყიდის, „რომლის შექმნაში მონაწილეობა მიიღო კინემატოგრაფიაში მოღვაწე ცნობილმა ადამიანმა“, ასევე ფილმებს, „რომლებსაც აღებული აქვთ ცნობილი ფესტივალის ჯილდოები“. ტელევიზია სულ 56 მხატვრული ფილმის შეძენას აპირებს.

„აჭარის ტელევიზია“, სავარაუდოდ, 360 ათასი ლარით ასევე შეიძენს შემეცნებითი ჟანრის 40 დოკუმენტურ და ანიმაციურ ფილმს [56 საათი].

ციტრუსის მოსავლის რა ნაწილი დააზიანა სეტყვამ? – აჭარის სოფლის მეურნეობის სამინისტროში განმარტავენ, რომ ზუსტი მონაცემები ჯერ არ აქვთ. სამინისტრო მეციტრუსეებს მოუწოდებს, დროულად დარეკონ ცხელ ხაზზე, თუკი მოსავალი დაზღვეულია.

„მანდარინის სპეციფიკა ვიცით, სეტყვის დროს არ ეტყობა და ნაყოფს ემჩნევა სადღაც 7-8 დღის შემდეგ. ამ პერიოდში მოხდება ბაღების დათვალიერება და შემდეგ დავითვლით ზარალს. მეციტრუსეებს ვაძლევთ რეკომენდაციას, რომ გამოდარების შემდეგ აიღონ მოსავალი და 6-7 ძირი მანდარინი დატოვონ იმისთვის, რომ სპეციალისტებმა შეფასება გააკეთონ. თუკი მოსავალი დაზღვეულია, დროულად უნდა დარეკონ მეციტრუსეებმა ცხელ ხაზზე – 15 01,“ – ამბობს მამუკა თურმანიძე, აჭარის სოფლის მეურნეობის სამინისტროს აგრარული განვითარების დეპარტამენტის უფროსი.

წელს აჭარაში 2500 სადაზღვევო პოლისია გაცემული. სამინისტროს ინფორმაციით, დაახლოებით 1500 ჰექტარზე მეტი ციტრუსის ბაღია დაზღვეული. მამუკა თურმანიძის თქმით, დაზღვევის ანაზღაურება გასული წლის მსგავსად მოხდება და მეციტრუსეს კილოგრამ მანდარინში 50 თეთრს გადაუხდიან.

აჭარის სოფლის მეურნეობის სამინისტროში მიიჩნევენ, რომ ზარალი დიდი ოდენობის არ იქნება. „ინტენსიური სეტყვა არ ყოფილა“, – ამბობს ციტრუსის შტაბის ხელმძღვანელი, გიორგი სირაბიძე. „ციტრუსმა წელს გვიან დაიწყო დამწიფება, ქერქი არის მაგარი და ვფიქრობთ, რომ დაზიანების მაჩვენებელი შეიძლება არ იყოს დიდი,“ – აღნიშნავს მამუკა თურმანიძე.

აჭარაში წელს ციტრუსის მოსავლის საპროგნოზო მაჩვენებელი 55 ათასი ტონაა. ციტრუსის შტაბის მონაცემებით, 23 ნოემბრის მდგომარეობით, ექსპორტზე გასულია მხოლოდ 1304 ტონა მანდარინი, აქედან რუსეთში 867 ტონა, სომხეთში – 257, უკრაინაში- 169 და ყაზახეთში – 12 ტონა.

ციტრუსის შტაბის ხელმძღვანელის, გიორგი სირაბიძის ინფორმაციით, არასტანდარტული მანდარინის მიმღები საწარმოები 27 ნოემბერს გაიხსნება. შტაბში არ აქვთ მონაცემები, რა ოდენობის სტანდარტული მანდარინი ჩაიბარეს ციტრუსის საწარმოებმა.

„ჯერ აქტიურად არ დაწყებულა ჩაბარება, ძალიან მცირე ოდენობით არის ჩაბარებული,“ – დასძენს გიორგი სირაბიძე.

აჭარის უმაღლესი საბჭოს აპარატში ანაზღაურებად სტაჟირებას ვეღარ გაივლიან. შესაბამისი დადგენილება, რომელიც ანაზღაურებად სტაჟირებას ითვალისწინებდა, უმაღლესმა საბჭომ 16 ნოემბერს გააუქმა.

უმაღლესი საბჭოს ინფორმაციით, ამ დროისთვის საბჭოს აპარატში ანაზღაურებად სტაჟირებას არავინ გადის.  მხოლოდ ერთი სტაჟიორია იურიდიულ კომისიაში, რომელიც ანაზღაურებას არ იღებს. უმაღლეს საბჭოში აცხადებენ, რომ არაანაზღაურებადი სტაჟირება აპარატში შესაძლებელი იქნება.

აჭარის ავტონომიური რესპუბლიკის უმაღლესი საბჭოს აპარატში ანაზღაურებადი სტაჟირების გავლის შესახებ დადგენილება უმაღლესმა საბჭომ 2014 წლის სექტემბერში მიიღო და ის 2015 წლის პირველი იანვრიდან ამოქმედდა.

ამ დადგენილებით, აჭარის უმაღლესი საბჭოს აპარატის სტრუქტურულ ერთეულებში საჯარო კონკურსის გზით შერჩეულ სტაჟიორთა რაოდენობა განისაზღვრა არაუმეტეს თითო სტაჟიორით; ამასთან, კონკურსის გზით შერჩეულ პირებს უმაღლესი საბჭოს აპარატში სტაჟირების გავლა საბჭოს საგაზაფხულო ან/და საშემოდგომო სესიების პერიოდში შეეძლოთ; თითოეული სტაჟიორის შრომის ანაზღაურება სტაჟირების პერიოდში ყოველთვიურად 125 ლარით იყო განსაზღვრული.

საჯარო რეესტრის ეროვნული სააგენტო ეროვნული სანავიგაციო სისტემის დამუშავებას იწყებს. სააგენტო ციფრული კარტოგრაფირების სისტემური, ტექნიკური აპარატის გამოყენებას რამდენიმე დღეში დაიწყებს. საველე წესით შეგროვებულ გეოგრაფიულ მონაცემებს საჯარო რეესტრი საერთაშორისო სტანდარტების გათვალისწინებით დაამუშავებს და გეომონაცემებს საერთაშორისო სანავიგაციო კომპანია TomTom – ს მიაწვდის. ეს კომაპანია მონაცემებს ელექტრონული რუკების ინტერნეტ და მობილურ აპლიკაციებში, ასევე  ავტომობილების ბორტკომპიუტერებსა და სხვა სანავიგაციო სისტემებში ასახავს.

ციფრული კარტოგრაფირების აპარატი სააგენტომ 335 000 ლარად  შეისყიდა. იგი ჯიპიეს სისტემითაა აღჭურვილი და სივრცეში ადგილმდებარეობის განსაზღვრა შეუძლია. ხუთკამერიანი აპარატი ავტომობილის თავზე თავსდება და 360 გრადუსით მონაცემებს ციფრული სახით აფიქსირებს.

„ავტომობილმა, რომელზეც აპარატი განთავსდება, გადაღებისას საათში 40-50 კილომეტრი უნდა იმოძრაოს. ერთი გავლით აპარატურა გადაიღებს შენობა-ნაგებობების  ფასადურ მდგომარეობას, გზისა და საგზაო ინფრასტრუქტურას, ელექტრობოძებს, მწვანე ნარგავებს… აპარატი აღიქვამს 20-30 მეტრის მანძილზე ყველაფერს, მაგრამ აქ  გასათვალისწინებელია დაფარულობისა და მხედველობის დონე. თუ ხშირი მწვანე ნარგავებითაა დაფარული კონკრეტული მონაკვეთი, მის უკან მხედველობა არ იქნება, შესაბამისად, შესაძლებელია ქუჩის ორივე მხარის გადაღება. სპეციალისტები, რომლებმაც უნდა უზრუნველყონ გადაღება, გადამზადდებიან და ამის შემდეგ დავიწყებთ გადაღების პროცესს. გადაღებული მასალა კი მოგვცემს ღირებულ მასალას გზათა ქსელის, საგზაო ნიშების ციფრული კატალოგის შესაქმნელად, რაც საშუალებას გვაძლევს, ადგილმდებარეობა დავათვალიეროთ კომპიუტერიდან,“ – ამბობს საჯარო რეესტრის სანავიგაციო სისტემის პროექტის კოორდინატორი, გიორგი პეტრიაშვილი.

პროექტის კოორდინატორის ინფორმაციით, საჯარო რეესტრის ეროვნული სააგენტო პირველ ეტაპზე ცენტრალური საავტომობილო მაგისტრალების მონაცემებს დაამუშავებს, რომლის ბაზაზე საგზაო ნიშნების ციფრული კატალოგი შეიქმნება.

„პირველ ეტაპზე ცენტრალური მაგისტრალების ზუსტი აღწერა განხორციელდება. ჩვენ კომპანია „ტომტომს“ უნდა მივაწოდოთ ის ინფორმაცია, რაც ტრანზიტს უზრუნველყოფს. ქვეყანაში შემოსულმა ტურისტებმა თავისუფლად უნდა შეძლონ გადაადგილება, შემდეგ ეტაპობრივად მოხდება გადაღებები სხვადასხვა მიმართულებით, შეიძლება გადავიღოთ ძველი თბილისი, პარალელურად გავაკეთოთ მუზეუმების მონაცემები, ამ კუთხით სამუშაო ბევრია… მნიშვნელოვანია ისიც, რომ მონაცემები ქალაქის მერიამ შეიძლება გამოიყენოს ურბანული განვითარებისთვის, დაგეგმარებისთვის, ელექტროკომპანიებმა კი – ელექტროხაზებისთვის,“ – ამბობს გიორგი პეტრიაშვილი.

ეროვნული სანავიგაციო სისტემის პროექტის ფარგლებში დამუშავებული მონაცემების გამოყენებას სხვადასხვა უწყება შეძლებს. პირველ ეტაპზე დამუშავებული მასალა პერიოდულად განახლდება.

რატომ არჩია მერიაში მუშაობა ჯანდაცვის სამინისტროში მუშაობას, როგორია მისი ხედვები მუნიციპალიტეტის ბიუჯეტზე და პროგრამებზე, – ბათუმის მერის ახალი მოადგილე ლელა სურმანიძე „ბათუმელების“ კითხვებს პასუხობს.

ქალბატონო ლელა, თქვენ ჯანდაცვის სამინისტროში მინისტრის მოადგილე იყავით, მერიაშიც მერის მოადგილედ დაინიშნეთ. რა უპირატესობა აქვს თვითმმართველ ორგანოში მუშაობას? 

უპირატესობა აქვს იმ მოსაზრებით, რომ ჩემთვის უფრო მეტი სამუშაო იქნება, რადგან დამემატა სხვა სფეროებიც გარდა ჯანდაცვისა. გარდა ამისა, ლაშა კომახიძისგან წამოვიდა წინადადება – მითხრა, რომ ჯანდაცვაში კარგად ვართმევდი თავს ამ სფეროს და იქნებ ქალაქშიც იმუშაოო. მეც დავთანხმდი.

თქვენი საკურატორო სფერო ძირითადად იქნება ჯანდაცვა. როგორია თქვენი დამოკიდებულება – უნდა შეიცვალოს რაიმე პროგრამებში თუ არა? 

ჩემი საკურატორო სფერო, გარდა ჯანდაცვისა და სოციალურისა, იქნება განათლება, კულტურა და სპორტიც. თუმცა, რა უნდა შეიცვალოს, ამ ეტაპზე ჩემგან ამაზე საუბარი არასწორი იქნება, – ორი დღეა, რაც შევუდექი მუშაობას და ჯერ უნდა ჩავიხედო კარგად ამ საქმეებში. ერთია, როცა გვერდიდან უყურებ, რაღაც მოგწონს, რაღაც არა, მეორეა, როცა უფრო ახლოდან ეცნობი. ამის შემდეგ შეიძლება ამ თემებზე საუბარი. ალბათ გამოჩნდება რაღაცები, რაც შესაცვლელია.

მერიის პროგრამებს ჯანდაცვის მიმართულებით რამდენად კარგად იცნობთ?

საკმაოდ კარგად ვიცნობ, შესაძლებელია გაიზარდოს სამომავლოდ მედიკამენტებით დახმარების პროგრამის ბიუჯეტი და დაემატოს ქრონიკული დაავადებების სამკურნალო პრეპარატები. თუმცა ამ ყველაფერსაც სჭირდება კარგად გათვალა და ჩახედვა. სტატისტიკას უნდა ნახვა, რა ოდენობის ადამიანებს დასჭირდება მომსახურება და ა.შ.

შინმოვლის პროგრამა აქვს მერიას. როგორც ვიცი, ამ პროგრამაზე საკმაოდ მაღალია მოთხოვნა. თქვენი აზრით, რა კომპონენტი შეიძლება დაემატოს პროგრამას?

ვიცი, რომ პროგრამაზე მოთხოვნა არის და შესაძლებელია დამატებითი კომპონენტების შეტანაც. მაგალითად, ფსიქოლოგის მომსახურება, რადგან ფიზიკურის გარდა ვიზრუნოთ ამ ადამიანების ფსიქოლოგიური მდგომარეობის გაუმჯობესებაზეც. შესაძლებელია სოციალური მუშაკის ჩართვაც  იყოს მიზანშეწონილი. ამიტომ, ამაზე ფიქრია საჭირო და მომავალში ამაზეც ვიმუშავებთ აუცილებლად.

მერიას მოხუცთა სახლის პროექტი აქვს, რომლის განხორციელება 2 მილიონამდე ლარი ჯდება. თუმცა 2018 წლის ბიუჯეტში მშენებლობის თანხა გათვალისწინებული არ არის. თქვენ თუ დაინტერესდებით ამ საკითხით და ბიუჯეტის განხილვის დროს თუ დააყენებთ ამ საკითხს?

ჯერ დაიდოს ბიუჯეტის საბოლოო პარამეტრები და თუ ამ მიმართულებით იქნება საშუალება, რომ რაღაც ნაწილი თანხა მაინც გამოიყოს 2018 წელს, ამაზე ვიზრუნებ. თუმცა, ჯერ კარგად უნდა ჩავიხედო ბიუეჯეტში.

ბიუჯეტის პროექტს თუ იცნობთ და შენიშვნა თუ გაქვთ რაიმე?

ხვალ, 24 ნოემბერს ვაპირებთ ბიუჯეტზე მსჯელობას და განვიხილავთ ყველანი ერთად და ამის შემდეგ მეცოდინება.

რადგან ხვალ მსჯელობთ, ალბათ გაეცნობოდით პროექტს?

რა თქმა უნდა, გადავხედე, მაგრამ ჯერ განვიხილავთ და მერე უფრო მეცოდინება. ერთი გადახედვით, შესაძლებელია არასწორი დასკვნები გავაკეთო, ამიტომ ჯერ მოვისმენ არგუმენეტს და ამის შემდეგ შემეძლება დეტალური მსჯელობა.

ქალბატონო ლელა, თქვენ როგორც გვითხარით, განათლებისა და კულტურის მიმართულებითაც იმუშავებთ. როგორ ფიქრობთ, უნდა დააფინანსოს თუ არა მერიამ  სილამაზის კონკურსები, მოდის კვირეულები და ამ ტიპის ღონისძიებები. თქვენ პირადად თუ დაუჭერთ მხარს ამ ტიპის ღონისძიებების დაფინანსებას?

უმჯობესია, ახალგაზრდულ პროგრამებსა და ინიციატივებს დავუჭიროთ მხარი. ის, რაც კომერციული პროექტია და მისი ავტორებისთვის არის მომგებიანი, აქ ნაკლებად უნდა ჩაერთოს მერია. დავაფინანსებთ ალბათ უფრო ახალგაზრდებს, დამწყებ ხელოვანებს და ვისაც  რეალურად სჭირდება დახმარება პროექტების განსახორციელებლად. შემდეგ გადავხედავთ უფრო დეტალურად და კულტურის სამსახურთან ერთად შევჯერდებით ასეთ საკითხებზე. ასევე, ახალგაზრდობის მხარდაჭერა უნდა გაძლიერდეს საგანმანათლებლო პროგრამების სახით.

„ბათუმის ავტოტრანსპორტი“ საქალაქო ავტობუსებისთვის მინებს, სარკეებსა და მგზავრის სავარძლებს შეიძენს, რისთვისაც 201 640 ლარი აქვს გამოყოფილი.

„ბათუმის ავტოტრანსპორტი“ ზონდას მარკის ავტობუსისთვის 240 ერთეულ მინასა და სარკეს მაქსიმუმ 114 440 ლარად, ხოლო მგზავრის 800 სავარძელს [Zonda BUS და FAW CA6100D248-2 მარკის საქალაქო ავტობუსებისთვის] – 87 200 ლარად შეისყიდის. „ავტოტრანსპორტმა“ შესაბამისი ტენდერები უკვე გამოაცხადა.

ტენდერებში გამარჯვებულ[ებ]მა საქონლის მიწოდება უნდა განახორციელონ ხელშეკრულების გაფორმებიდან არაუგვიანეს 2 თვის ვადაში.

ბათუმის ავტოპარკში ამ დროისთვის 140 ავტობუსია. მოქალაქეები „ბათუმელებს“ ავტობუსებში დამტვრეული სკამების ფოტოებს ხშირად უგზავნიან. „ბათუმის ავტოტრანსპორტში“ ორი კვირის წინ გვითხრეს, რომ პრობლემის შესახებ იციან, მაგრამ ქსელში არის დაახლოებით 15 ავტობუსი, რომლებსაც ახლი ავტობუსების შეძენის შემდეგ ჩამოწერენ.

ახალი ავტობუსების შეძენაზე კი ტენდერი „ბათუმის ავტოტრანსპორტს“ დღემდე არ გამოუცხადებია.

ახალი ავტობუსების შეძენას ბათუმის მერია ევროპის რეკონსტრუქციისა და განვითარების ბანკის [EBRD] სესხით აპირებს.