Batumelebi

სანიჩბოსნო სპორტის განვითარებისთვის ბათუმის ტურისტული ობიექტების მართვის სააგენტო ექვს ერთადგილიან და ორ ორადგილიან კაიაკს/ბაიდარსა და სპორტულ კანოეს [3  – ერთადგილიანი და 1  – ორადგილიანი] ყიდულობს. სააგენტომ მათ ბაზაზე არსებული 7-8 ძველი ნავებიც შეაკეთა, ახალ ნავებს კი ორ თვეში მიიღებენ. ჯამში ბათუმის ცენტრალურ პარკში 12 ახალ ნავთან ერთად ოცამდე ნავი იქნება.

„მათგან ორი ნავი გათვლილია პარაოლიმპიელებისთვის (შშმ სპორტსმენებისთვის, რომლებიც ვარჯიშობენ და ემზადებიან შეჯიბრებებისთვის), დანარჩენი ნავები იქნება იმისთვის, რომ გაზაფხულიდან მოსწავლეების მიღება დაიწყოს ელინგმა,“ – ამბობს ბათუმის ტურისტული ობიექტების მართვის სააგენტოს ხელმძღვანელი, ალექსანდრე თევზაძე.

სასპორტო ნავების, ნიჩბებისა და სხვა ინვენტარის შესანახად და შესაკეთებლად აგებული ხის ელინგი ზოოპარკის ადმინისტრაციის შენობის მოპირდაპირედ განთავსდა. სააგენტოს ხელმძღვანელის, ალექსანდრე თევზაძის თქმით, ელინგში საშხაპეები და გასახდელებიც მზადაა. ვარჯიშები კი ბათუმის ცენტრალურ პარკში გაზაფხულიდან დაიწყება.

„ძველი ნავებიდან, რაც აღვადგინეთ, ზოგს სამუზეუმო ექსპონატის დანიშნულება ექნება. იმიტომ, რომ ეს ჩვენი ტრადიცია იყო. ამ სპორტის კულტურა რომ გაგვაჩნია ბათუმში, ესეც გვინდა ჩანდეს. სანიჩბოსნო სპორტი ჩვენს ტბაზე იყო დიდი ხნის განმავლობაში, ძალიან კარგი სპორტსმენები გაიზარდნენ აქ და ეს ტრადიცია, 30-წლიანი ჩავარდნის შემდეგ, აუცილებლად გასაგრძელებელია,” – ამბობს ალექსანდრე თევზაძე.

მისივე თქმით, ნავები სხვადასხვა ასაკის ადამიანებისთვის იქნება განკუთვნილი.

ჯერ არ არის ცნობილი, ფასიანი იქნება თუ არა  სანიჩბოსნო სპორტი ბათუმის ცენტრალურ პარკში:

„ეს ორი თვე გვაქვს, ახლა მიდის მსჯელობა იმის თაობაზე, რომ მაქსიმალურად შევეცადოთ დავაფინანსოთ ეს სპორტი და შევეცადოთ, უარი ვთქვათ მოსწავლეებისგან თანხის აღებაზე, რამდენად გამოგვივა, შევხედავთ. მსჯელობაში ჩართულია განათლების მინისტრი და ქალაქის მერიც,” – ამბობს ალექსანდრე თევზაძე.

ამავე თემაზე:

ბათუმის მერია ორ ნიჩბიან ნავს ყიდულობს

ნურიგელის ტბისთვის 30 ათას ლარად სპორტულ კანოეს და კაიაკებს შეიძენენ

ბათუმის შემოვლითი გზის მშენებლობა მიმდინარე წლის აპრილში დაიწყება; რაც შეეხება ქობულეთის შემოვლით გზას [ოჩხამურიდან ჩაქვის გვირაბამდე მონაკვეთი], მისი გახსნა ივნისის თვეშია დაგეგმილი – ეს ინფორმაცია საქართველოს საავტომობილო გზების დეპარტამენტმა მოგვაწოდა.

„ქობულეთის შემოვლითი გზა ივნისის თვეში უნდა გაიხსნას, თუმცა გახსნის ზუსტი თარიღი ამ დროისთვის უცნობია. ბათუმის შემოვლითი გზის მშენებლობის დაწყებისთვის კი მიმდინარეობს მოსამზადებელი სამუშაოები და მშენებლობა მარტის ბოლოს ან აპრილის პირველ რიცხვებში დაიწყება“, – აცხადებენ დეპარტამენტში.

ბათუმის შემოვლითი გზის მშენებლობა 2020 წელში უნდა დასრულდეს. ამ პროექტის ფარგლებში უნდა აშენდეს ჩქაროსნული მაგისტრალი მახინჯაურის გვირაბიდან ფრიდონ ხალვაშის გამზირამდე. ახალი გზა გაივლის: მახინჯაურს, განთიადს, კაპრეშუმს, სალიბაურს, ფერიას, მახვილაურსა და ხელვაჩაურს.

ბათუმის შემოვლითი გზის მშენებლობის გამო კომპენსაციების გაცემა დასრულებულია. „ბათუმელების“ ინფორმაციით, დარჩენილია 3 ოჯახი, რომლებსაც მემკვიდრეობასთან დაკავშირებული დოკუმენტაციის პრობლემა აქვთ.

რაც შეეხება ხელვაჩაურიდან სარფამდე მონაკვეთს, თუ სად გაივლის ავტობანი, გადაწყვეტილი კვლავ არ არის. „ვმუშაობთ. წარმოდგენილი იქნება რამდენიმე ვარიანტი, შეირჩევა მარშრუტი და დავაპროექტებთ გზას“, – გვითხრეს საავტომობილო გზების დეპარტამენტში.

ქობულეთის შემოვლითი გზის მშენებლობა კი ორ ეტაპად [ლოტად] მიმდინარეობდა. პირველი ეტაპი, 13,7 კმ გზის მშენებლობა, 2014 წელს დასრულდა და მასზე ავტომანქანები უკვე მოძრაობენ [გვარა-შეკვეთილის მონაკვეთი], ხოლო მეორე ეტაპის სამუშაოები [გვარადან მახინჯაურის გვირაბამდე მონაკვეთი] ახლაც მიმდინარეობს. ამ მონაკვეთის სიგრძე 18,9 კმ-ია და მისი გახსნის თარიღი რამდენჯერმე გადაიდო.

ამ მონაკვეთის გახსნის შემდეგ, ბოლო ინფორმაციით, 2018 წლის ივნისიდან, ავტომანქანით გადაადგილება მახინჯაურის გვირაბიდან ოზურგეთის სოფელ შეკვეთილამდე [და პირიქით] ისე იქნება შესაძლებელი, რომ მანქანა არ გაივლის ჩაქვს, ქობულეთსა და ჩოლოქს.

გესმის აჭარული დიალექტი? შეავსე ტესტი და გაიგე, რომელი სიტყვა იცი და რომელი არა, შეიძლება ბევრი სიტყვა არ იცოდე ზუსტად, მაგრამ ჟღერადობამ მნიშვნელობა გამოგაცნობინოს, დაიწყე! 

აჭარაში, სადაც ათობით ხე ამოთხარეს, ამ დროისთვის მხოლოდ ხუთ ადგილზეა შეთანხმებული პროექტი, რომლითაც ციხისძირში ამ ადგილების რეკულტივაცია უნდა განხორციელდეს. ზღვისპირა ტერიტორიებიდან შეკვეთილში, ბიძინა ივანიშვილის ბაღში, ხეების გადატანა ორი წლის წინ დაიწყო. აჭარაში ხეების ამოთხრა-გადატანის პროცესი ისევ გრძელდება.

აჭარიდან მრავალწლოვანი ხეების ამოთხრისა და შეკვეთილში მათი გადატანის დამკვეთი შპს „ურეკი რეზიდენსია“. ეს კომპანია ბიძინა ივანიშვილმა 2016 წლის ივლისში დააფუძნა. გასული წლის იანვარში კი, კომპანიის წილის 100% თავის შვილს, ბერა ივანიშვილს საკუთრებაში 4 მილიონ ლარად გადასცა. „ურეკი რეზიდენსის“ საკუთრებაშია დღეს ის ნაკვეთები ოზურგეთის მუნიციპალიტეტის სოფელ შეკვეთილში, სადაც მილიარდერი და ყოფილი პრემიერ-მინისტრი ე.წ. დენდროლოგიურ პარკს აშენებს.

„ურეკი რეზიდენსს“ აჭარიდან ხის გადატანაზე რამდენიმე კომპანიასთან აქვს ხელშეკრულება გაფორმებული. „ბათუმელების“ ინფორმაციით, ამ ხელშეკრულებებით კომპანიებს ევალებათ „ტერიტორიის აღდგენის სამუშაოს შესრულებაც“.

სპეციალისტების თქმით,  ტერიტორიებს, საიდანაც მრავალწლოვანი ხეები ამოთხარეს, აუცილებლად სჭირდება რეკულტივაცია, ვინაიდან ნიადაგის ნაყოფიერი ფენა [ჰუმუსი] აქ მოჭრილია – ნაწილი მიყვება ხეს, ნაწილი კი სამუშაოების დროს ნადგურდება.

ერთ-ერთ კომპანიაში, რომელსაც ხეები გადააქვს, „ბათუმელებს“ უთხრეს, რომ არსებობს რეკულტივაციის გეგმა, რომელიც შეთანხმებულია საქართველოს გარემოს დაცვის სამინისტროსთან და ამ გეგმის მიხედვით უნდა შესრულდეს სამუშაოები. კომპანიაში ასევე ამბობენ, რომ ასეთი გეგმა არსებობს ზოგიერთ ტერიტორიასთან დაკავშირებით და არა ყველა იმ ადგილთან მიმართებაში, სადაც გიგანტური ხეები ამოთხარეს.

ბევრი ადგილი აჭარის ზღვისპირა ტერიტორიაზე, საიდანაც ხეები ამოთხარეს, თუ თხრიან, აჭარისა და საქართველოს მთავრობებმა გადასცეს კერძო კომპანიებს [მათ შორის ბიძინა ივანიშვილის კომპანიასაც] – ინვესტიციების განხორციელების პირობით.

„სადაც სასტუმრო, თუ აპარტოტელი უნდა აშენდეს, იმ ადგილზე ხეები ამოვთხარეთ, მაგრამ რეკულტივაცია არ იგეგმება. მაგ ადგილების აღდგენას აზრი არ აქვს. პირიქით, ხის ამოთხრით, გარკვეული სამუშაოც კი შესრულდა შენობის საძირკვლის მომზადებისთვის“, – გვითხრეს ერთ-ერთ კომპანიაში, რომელსაც ხეები გადააქვს. – „რაც შეეხება აღდგენას, ხდება ორმოების ამოვსება, მოსწორება, მოეწყობა მწვანე საფარი, ხე-მცენარეები დაირგვება, ასევე გზების, ზოგან გარე განათების მოწყობა“.

რა რეკულტივაციის გეგმის შესახებ საუბრობენ კომპანიები? – ამ კითხვით „ბათუმელები“ საქართველოს გარემოს დაცვისა და სოფლის მეურნეობის სამინისტროს დაუკავშირდა.

„კომპანიებს, რომელთაც ქობულეთის მუნიციპალიტეტში, სოფელ ციხისძირში განახორციელეს სამუშაოები, ვალდებულება აქვთ, ამ ტერიტორიაზე ჩაატარონ რეკულტივაცია. რეკულტივაცია მოიცავს ორ ეტაპს: ტექნიკურსა და ბიოლოგიურს. სხვადასხვა კონტრაქტორ კომპანიას ხუთ უბანზე ​უკვე აქვს შეთანხმებული სამინისტროსთან რეკულტივაციის პროექტი, ამ უბნებზე ტექნიკური რეკულტივაცია უნდა დასრულდეს მიმდინარე წლის აპრილამდე, რის შემდგომაც დაიწყება ბიოლოგიური რეკულტივაციის ეტაპი. ასევე, კომპანიებს აქვთ აღებული ვალდებულება, რეკულტივაციის სრული ციკლისა და მომდევნო ორი წლის მანძილზე განახორციელონ მონიტორინგი“, – მოგვწერეს გარემოს დაცვისა და სოფლის მეურნეობის სამინისტროდან.

საქართველოს კანონმდებლობით, რეკულტივაცია მიწების ნაყოფიერებისა და სასოფლო-სამეურნეო თვისებების აღდგენის კომპლექსურ სამუშაოებს გულისხმობს, შესაბამისი კვლევებითა და დასკვნებით და არა მხოლოდ ორმოს ამოვსებას თუ იქ ახალი მცენარის დარგვას. თუ ნიადაგის ნაყოფიერი ფენა მოხსნილია, მისი აღდგენის გარეშე იქ ნერგის დარგვას აზრი არ აქვს – მცენარე არ გაიხარებს.

„ნიადაგის ნაყოფიერი ფენის მოხსნის, შენახვის, გამოყენებისა და რეკულტივაციის შესახებ“ ტექნიკური რეგლამენტის მიხედვით, „ფიზიკურ და იურიდიულ პირთა საკუთრებაში არსებულ მიწებზე ნიადაგის ნაყოფიერების შენარჩუნება-ამაღლების ღონისძიებები შემუშავდება და ხორციელდება მათივე სახსრებითა და ინიციატივით“.

„ამ რეგლამენტის მიხედვით, კერძო ფიზიკური და იურიდიული პირების შემთხვევაში, აღვადგენ თუ არა ნიადაგს, ჩემი, მესაკუთრის კეთილი ნებაა. ეს ჩანაწერი მთლიანად აზრს უკარგავს ამ კანონს, თუკი ის ვრცელდება კერძო ტერიტორიებზე. რაც შეეხება სახელმწიფოს საკუთრებაში არსებულ ტერიტორიებს, ასეთ შემთხვევაში, თუ არ ხდება რეკულტივაცია, შეიძლება ვისაუბროთ კანონის დარღვევაზეც“, – ამბობს „ბათუმელებთან“ რეზო გეთიაშვილი, „კავკასიის გარემოსდაცვითი არასამთავრობო ორგანიზაციების ქსელის“ [CENN] გარემოსდაცვითი პროგრამების კოორდინატორი.

აჭარის მთავრობამ კერძო კომპანიას ივანიშვილს დენდროპარკისთვის რამდენიმე ხე მიჰყიდა. მყიდველთან ხელშეკრულება რეკულტივაციაზე არ გაუფორმებია. იგივე გააკეთა საქართველოს მთავრობამაც, როცა ხეები აუქციონზე გაყიდა, მაგრამ მყიდველს ხის ამოთხრის ადგილის რეკულტივაციის ვალდებულება პირობებში არ ჩაუდო.

აჭარის მთავრობის თავმჯდომარე, ზურაბ პატარაძე ამბობს, რომ ხის ამოღების ადგილები აღდგება. თუმცა, აჭარის მთავრობაში აცხადებენ, რომ მათთან არ არის დაცული დოკუმენტაცია ფიზიკური და იურიდიული პირების ჩამონათვალის შესახებ, რომლებსაც გადააქვთ [ან უკვე გადაიტანეს] ხეები; აჭარის მთავრობაში არ აქვთ ასევე ხეების ამოთხრასთან დაკავშირებული ნებართვები და ხელშეკრულებები.

ციხისძირში, პირველი ტიტას ხე კომპანია „ზიმომ“ ამოთხარა და გადაიტანა შეკვეთილში. კომპანიაში გვითხრეს, რომ მათ აქვთ ხის ამოღების ადგილის აღდგენის ვალდებულება და მუშაობენ ამ მიმართულებით.

„მაგალითად, პირველი ხის გადატანა როცა მოხდა, იქ იყო ხელშეკრულებაში – ერთი კეთილი ნების გამოხატვა და მეორე, იმ ადგილს, სადაც ხე ამოვიღეთ, უნდა დავუბრუნოთ პირვანდელი სახე – მწვანე საფარი უნდა მოვაწყოთ და ხეები უნდა დავრგათ. რელიეფიც აღდგება ისე, როგორც იყო. ამასთან, მაგ ადგილის მიმდებარედ სკვერი მოეწყო, სკამებით, ბილიკებით, რა გზაც გავიარეთ ხის გადატანისთვის, მოვაასფალტეთ… საპატრიარქოს წინ [ყოფილი სამთავრობო რეზიდენცია ბობოყვათში-ავტ.] 100-მდე ხე დაირგო. იტალიიდან ჩამოტანილი ნერგები, ზოგი მოერგო აქაურ ჰავას, ზოგი არა და იმათ ვცვლით ადგილობრივი ხეებით“, – გვითხრეს კომპანია „ზიმოში“.

ტიტას ამოღების ადგილის მიმდებარედ, დღეს, 2 მარტს, ხის ნერგები დარგეს ქობულეთის საკრებულოს წევრებმა და უმაღლესი საბჭოს დეპუტატებმა „ერთიანი ნაციონალური მოძრაობიდან“.

ოზურგეთის სოფელ შეკვეთილში, იმ პარკში, რომელსაც ბიძინა ივანიშვილი აშენებს, მრავალწლოვანი ტიტას ხე, რომელიც პირველად გაიტანეს, გახმა და მოჭრეს. ამ ინფორმაციას არავინ ადასტურებს, თუმცა 2017 წლის აპრილში, შეკვეთილში „ბათუმელებს“ ტიტას ხე იმ ადგილზე აღარ დახვდა, სადაც ის 2016 წელს დარგეს.

ბიძინა ივანიშვილის ე.წ. დენდროლოგიურ პარკში აჭარიდან ათობით ძირი მრავალწლოვანი ხე გაიტანეს და გააქვთ: ქობულეთიდან, ცეცხლაურიდან, კვირიკედან, ზენითიდან, ხუცუბნიდან, გელაურადან, გვარადან, ბობოყვათიდან [ყოფილი სამთავრობო რეზიდენცია], ციხისძირიდან [აქ ხეები ამოთხარეს 10 ადგილზე], ბუკნარიდან, ჩაქვიდან, მწვანე კონცხიდან, მახინჯაურიდან, ბათუმიდან.

ხეები მილიარდერის პარკში გადააქვთ სხვა რეგიონებიდანაც.

მთავარი ფოტო: ტიტას ხე შეკვეთილთან. ფოტო „ბათუმელების“ არქივიდან.

ბათუმის ცენტრალურ პარკში, ტბასთან, წავი დააფიქსირეს. ფოტო და ვიდეომასალას ტურისტული ობიექტების მართვის სააგენტოს ხელმძღვანელი, ალექსანდრე თევზაძე ავრცელებს. მისივე თქმით, ეს ქვესახეობა ნურის ტბაში  გასული საუკუნის 30-იან წლების შემდეგ არავის უნახავს.

სპეციალისტების შეფასებით, ეს ევრაზიული წავია. “Lutra lutra meridionalis (Ognev, 1931) – Lutra lutra Linnaeus, 1758, ძალზე საინტერესო და საგულისხმო ფაქტია, მით უმეტეს იმის გათვალისიწნებით, რომ ეს სახეობა გადაშენების საფრთხის ქვეშაა და შეტანილია საქართველოს წითელ ნუსხაში. აუცილებელია შემდგომში დაკვირვება და რაც მთავარია, დაცვა” – წერს გარემოს ეროვნული სააგენტოს მეთევზეობისა და შავი ზღვის მონიტორინგის დეპარტამენტის ხელმძღვანელი, იხტიოლოგი არჩილ გუჩმანიძე.

ბათუმში, თბილისის მოედანზე, უკვე დგას შლაგბაუმი. „ბათუმის ავტოტრანსპორტში“ თქვეს, რომ საკრებულოს გადაწყვეტილებას ელიან და ამის შემდეგ გაირკვევა, იქნება თუ არა ფასიანი პარკირება თბილისის მოედანზე. „ავტოტრანსპორტში“ ამ გადაწყვეტილებას მოედანზე ინფრასტრუქტურისა და მოძრაობის მოწესრიგების აუცილებლობით ხსნიან:

„მოედანზე პარკირების სისტემა უნდა მოწესრიგდეს, მანქანები გვერდს ვერ უვლიდნენ ამ ადგილას ერთმანეთს, ჩახერგილი იყო ტროტუარიც.

ველოდებით საკრებულოს გადაწყვეტილებას და გადაწყდება, როგორი პარკირება მოეწყობა, გადახდის ბარათით იქნება თუ როგორ.

გადაწყვეტილების მიღებამდე მოედანზე უშვებენ მხოლოდ მსუბუქ მანქანებს. არ უშვებენ თბილისში მიმავალ მიკროავტობუსებს, ისინი აქ თვითნებურად იდგნენ და ვალდებულნი არიან, დაიწყონ მოძრაობა ავტოსადგურებისკენ,“ – განაცხადა „ბათუმელებთან“ შპს „ბათუმის ავტოტრანსპორტის“ მარკეტინგის განყოფილების უფროსმა, ბესიკ დათიაშვილმა.

ბათუმის ინფექციური პათოლოგიის, შიდსისა და ტუბერკულოზის რეგიონული ცენტრის ხელმძღვანელად პირველ მარტს ციური აბულაძე დაინიშნა. ახალი დირექტორი საქართველოს პარლამენტის წევრის,  ხელვაჩაურის მაჟორიტარი დეპუტატის, ილია ნაკაშიძის მეუღლეა.

ციური აბულაძე პროფესიით ექიმია, ის 1992 წლიდან დღემდე მუშაობდა ქ. ბათუმის იოსებ ჩარკვიანის სახელობის სამშობიარო სახლში ექიმ-ანესთეზიოლოგად. უმაღლესი განათლება მიიღო რუსეთის ფედერაციაში, სამედიცინო ინსტიტუტი 1987 წელს დაასრულა. კრასნოიარსკის მხარეში გაიარა ინტერნატურა, მუშაობდა ადგილობრივ ინფექციურ საავადმყოფოში ექიმ იფექციონისტად. მოგვიანებით გაიარა კვალიფიკაცია ანესთეზიოლოგიის მიმართულებით და კრასნოიარსკის მხარეში 4 წლის განმავლობაში მუშაობდა ექიმ-ანესთეზიოლოგად.

ქალბატონო ციური, თქვენი გამოცდილების შესახებ რომ გვითხრათ,  აქამდე თუ გიმუშავიათ მენეჯერულ პოზიციებზე?

მენეჯერული გამოცდილება მქონდა მხოლოდ რუსეთში, როდესაც ვმუშაობდი ინფექციურ განყოფილებაში, განყოფილების გამგე ვიყავი.  მეტი მენეჯერული გამოცდილება, როგორც ასეთი, არ მქონია, მაგრამ ძალიან დიდი შეხება მქონდა. როდესაც შემომთავაზეს ეს თანამდებობა, ერთი-ორი თვე გავიდა მას შემდეგ, ძალიან დიდ ხანს ვამბობდი უარს და მერე იმიტომ დავთანხმდი, რომ თუკი რამე სარგებელი შემიძლია მოვუტანო სახელმწიფოს, კოლეგებს, პაციენტებს, ალბათ უნდა დავთანხმებულიყავი და ამიტომ გავაკეთე ასე.

ვისი რეკომენდაციით წარგადგინეს ახალ თანამდებობაზე, შემოთავაზება ვისგან მიიღეთ?

შემომთავაზა აჭარის ჯანდაცვის მინისტრმა, მთავრობის თავმჯდომარემ, ეს იყო ერთობლივი შემოთავაზება.

თქვენი ქმარი, ილია ნაკაშიძე, პარლამენტის წევრია, ამიტომ ჩნდება კითხვა, ხომ არ არის თქვენი დირექტორად დანიშვნა მის სტატუსთან დაკავშირებული, რას იტყვით ამაზე?

ამასთან დაკავშირებით გეტყვით იმას, რომ თუ ოჯახში ვინმე არის თანამდებობის პირი, ამან არ უნდა გამოიწვიოს დისკრიმინაცია ოჯახის სხვა წევრის… მე, მაგალითად, მივიჩნევ, რომ ამის მიხედვით თუ ვიმსჯელებთ, დისკრიმინაციაა. სხვათა შორის, როდესაც მე უარს ვამბობდი აქ წამოსვლაზე და დირექტორობაზე, ჩემი მეუღლე პირიქით მეუბნებოდა. ვინც ილია ნაკაშიძეს იცნობს… მგონი თანამდებობა იმ დღიდან აქვს, როდესაც ის გახდა ექიმი და ექიმზე დიდი თანამდებობა ჩემს მეუღლეს არასოდეს ჰქონია, მე ასე ვიტყოდი.

თქვენი ქმრის 2017 წლის დეკლარაციაში თქვენი შემოსავლები არ არის ასახული, მუშაობდით ამ პერიოდში?

მე ვმუშაობდი ბათუმის სამშობიარო სახლში ექიმ-ანესთეზიოლოგად, როდესაც ჩამოვედი რუსეთიდან, 1992 წლიდან ვმუშაობ ბათუმის სამშობიარო სახლში…

და რატომ არ არის შეტანილი თქვენი მეუღლის მიერ შევსებულ დეკლარაციაში თქვენი შემოსავლები?

იცით, ამაზე ვერ გიპასუხებთ, რატომ არ არის შეყვანილი, უნდა ყოფილიყო იმიტომ, რომ ყოველთვის იყო და 2017 წელს რატომ არ იყო, ვერ გიპასუხებთ.

ილია ნაკაშიძის 2017 წლის ქონებრივ დეკლარაციაში არ არის ასახული მისი მეუღლის შემოსავლები, თუმცა დეკლარაციიდან ჩანს, რომ ციური აბულაძე შპს პარაცელსის 11%-იანი წილის მფლობელია და რომ 2016 წელს ციური აბულაძემ 48 000 ევროს ღირებულების მსუბუქი ავტომანქანა mersedes GLC-250 შეიძინა.

ინფექციური საავადმყოფოს შენობას რეაბილიტაცია ჩაუტარდა, თუმცა ჯერ კიდევ არ  გახსნილა. შენობის ეს ნაწილი როდის გახდება პაციენტებისა და ექიმებისთვის ხელმისაწვდომი? 
მე მოვედი გუშინ, დავათვალიერეთ გარემონტებული შენობა, რაღაც-რაღაცები არის შესათანხმებელი რეგულირების სამსახურთან და არის რაღაც ხარვეზები, ჩემი თვალით დანახული, შეთანხმებული კლინიკურ მენეჯერთან – ის, რაც ინფექციურ საავადმყოფოს არ  შეესაბამება, რა თქმა უნდა, არის გამოსასწორებელი და გასაკეთებელი. ამიტომ გეგმიურად და გლობალურად უახლოეს ერთ-ორ თვეში გადმოვალთ. იმიტომ, რომ ეს ყველაფერი რაც ხარვეზია, უნდა გამოსწორდეს. ისეთი დიდი არაფერია, მაგრამ წვრილმანები შესასწორებელია და ეს უნდა შევასწოროთ.

ხულოს მუნიციპალიტეტის მერიასა და საკრებულოს ადმინისტრაციული შენობის გვერდით მდებარე ეკლესიის ეზოს კეთილმოწყობაზე ხულოს მერია ადგილობრივი ბიუჯეტიდან  550 000 ლარს დახარჯავს.

ხულოს მერის მოადგილე, ლაშა ბოლქვაძე ამბობს, რომ ეკლესიის ეზოს ტერიტორია მუნიციპალიტეტის ბალანსზეა, საპატრიარქოს საკუთრებაში კი მხოლოდ ის ტერიტორიაა, სადაც ეკლესია დგას:

„ეს ტერიტორია მუნიციპალიტეტის საკუთრებაშია. რეალურად, ეკლესიის ეზოს  კეთილმოწყობა  კი არა, ტბელ აბუსერიძის ქუჩის პირველ და მეორე ნომერში არსებული ტერიტორიის კეთილმოწყობაა დაგეგმილი.“

ეკლესიის მოპირდაპირე მხარეს არსებულ შენობასა და ეკლესიას შორის, სადაც ხულოს რესურსცენტრი ფუნქციონირებს, ახლა ფერდობია გაჭრილი.

ლაშა ბოლქვაძე განმარტავს, რომ აღნიშნულ ტერიტორიაზე ფერდობი დამცავი კედლის მოსაწყობად 2017 წელს აბუსერიძის ქუჩის  პირველ და ორ ნომერში არსებული ტერიტორიის კეთილმოწყობაზე ტენდერში გამარჯვებულმა შპს „უნივერსალმა“ გაჭრა, თუმცა კომპანიამ ტენდერით ნაკისრი ვალდებულება არ შეასრულა.

„აღნიშნულ ტერიტორიაზე ფერდობი არ იყო, თუმცა დახრილობიდან გამომდინარე ფილები ვერ დაეგებოდა, შესაბამისად ტერიტორიის განლაგებამ საყრდენი კედლის მოწყობა მოითხოვა, ამისთვის კი ტენდერში გამარჯვებულმა კომპანიამ ფერდობი გაჭრა, ხელშეკრულებით აღებული ვალდებულება არ შეასრულა და კომპანიას ხელშეკრულება შევუწყვიტეთ. ტენდერი ტეროტორიის კეთილმოწყობაზე ისევ გამოვაცხადეთ, გამარჯვებული კომპანიის გამოვლენის ეტაპზე ვართ,“ – აცხადებს ლაშა ბოლქვაძე.

აბუსერიძის ქუჩის პირველ და მეორე ნომერში არსებული შენობებისა თუ ტერიტორიის კეთილმოწყობისთვის ხულოს მერიას ბიუჯეტიდან 550 000 ლარი აქვს გამოყოფილი.

ტენდერში მონაწილე ერთადერთი კომპანია „ბაჩი“, მუნიციპალიტეტს სამუშაოების შესრულებას 484 ათას 770 ლარად სთავაზობს.

„ბათუმის ბულვარი“ არდაგანის ტბიდან აკვაპარკამდე და კობალაძის ქუჩის მიმდებარე ტერიტორიებზე, სასეირნო ბილიკების რეაბილიტაციას იწყებს. ბულვარის ინფორმაციით, 13 100 კვ.მეტრ ბილიკზე ახალი დეკორატიული ფილები დაიგება. უნდა მოეწყოს ბაზალტის ბორდიურებიც.

ბულვარის ინფორმაციით, ბილიკების რეაბილიტაციის დროს შეიცვლება შიდა საკომუნიკაციო სისტემა და დამონტაჟდება სანიაღვრე ჭები.

„ასევე, დაგეგმილია სასტუმრო „კოლიზეუმიდან“ სანაპიროზე ასასვლელი პანდუსებისა და კიბის მოწყობა, რომელიც სრულად იქნება ადაპტირებული შეზღუდული შესაძლებლობების მქონე პირთათვის,“-ამბობენ ბულვარის ადმინისტრაციაში.

აღნიშნული სამუშაოებისთვის 1 162 942 ლარი დაიხარჯება. სამუშაოები ტურისტული სეზონის დაწყებამდე უნდა დასრულდეს.

სამუშაოებს ელექტრონულ ტენდერში გამარჯვებული კომპანია        „ჯორჯიან სტოუნი“ შეასრულებს.

ბულვარის ინფორმაციით, მიმდინარე სამუშაოების გამო არდაგანის ტბიდან აკვაპარკამდე და კობალაძის ქუჩის მიმდებარე ტერიტორიებზე არსებულ პარკირების ზონებში სატრანსპორტო საშუალებებით შესვლა დროებით  შეიზღუდება.

ბათუმში, მანქანათმშენებელი ქარხნის ტერიტორიაზე,  20000 მაყურებელზე გათვლილი სტადიონის სამშენებლო სამუშაოების ტექნიკური ზედამხედველობისთვის აჭარის ბიუჯეტიდან 3 520 474-მდე ლარი დაიხარჯება. სტადიონის მშენებლობა უკვე დაწყებულია. მშენებლობის ტექნიკურ ზედამხედველს კი შპს „სტადიონი“ ტენდერით შეარჩევს.

ზედამხედველის გამოსავლენად გამოცხადებულ ტენდერში წინადადებების მიღება მიმდინარე წლის 20 მარტს დაიწყება და 23 მარტს დასრულდება. მომსახურების შესყიდვა მრავალწლიანია. ტენდერში გამარჯვებულთან ანგარიშსწორება ეტაპობრივად განხორციელდება. მომსახურების გაწევის ვადა კი, ხელშეკრულების გაფორმებიდან 32 თვეა.

ტენდერში გამარჯვებულს ევალება სტადიონის სამშენებლო სამუშაოების მიმდინარეობის ყოველდღიური ზედამხედველობა – სამუშაოების სამშენებლო კანონმდებლობისა და პროექტით გათვალისწინებული მოთხოვნების/ტექნიკური სპეციფიკაციების სრული დაცვით შესრულების უზრუნველყოფა; მომსახურების სრული აღწერა, რაოდენობა და მოცულობა მითითებულია ტექნიკურ დავალებაში.

შპს „სტადიონსა“ და შპს „ანაგს“ შორის ბათუმში, საფეხბურთო სტადიონის მშენებლობაზე, ხელშეკრულება 2017 წლის დეკემბერში გაფორმდა. შპს „ანაგი“ ტენდერში გამარჯვებული კომპანიაა, რომელმაც საფეხბურთო სტადიონი 34 თვეში უნდა ააშენოს.

ხელშეკრულების მიხედვით, სახელშეკრულებო თანხა, დღგ-ს გარეშე, 99 მილიონ 448 ათას 408 ლარია. თუმცა ხელშეკრულებაში აღნიშნულია, რომ საერთო ღირებულება არის 117 მილიონ 349 ათას 122 ლარი დღგ-ს ჩათვლით.

საერთაშორისო სტანდარტების სტადიონის მშენებლობას ბათუმში, მიმდინარე წლის 21 იანვარს, ჩაუყარეს საძირკველი. სტადიონის მშენებლობა 2020 წლის სექტემბერში უნდა დასრულდეს.

ამავე თემაზე:

პირველი მარტიდან საჯარო მოხელეებსა და განათლების სფეროში დასაქმებულ პირებს, მათ შორის მასწავლებლებს ინტერნეტის ტარიფი გაუძვირდათ.

თუკი მასწავლებლებს პირველი კატეგორიის კორპორაციული ნომერზე [ნომერი, რომლითაც თავად პედაგოგი სარგებლობდა, მეორე კატეგორია – როცა ნომრით პედაგოგის ოჯახი სარგებლობდა] შეეძლოთ 4.99 ლარად 16 გბ ინტერნეტი შეეძინათ, ახალი პირობების მიხედვით, მათ ამ სერვისის გამოყენების შესაძლებლობა აღარ ექნებათ.

მასწავლებლები დღემდე „ჯეოსელის“ მომხმარებლები იყვნენ. კომპანიის ცხელი ხაზიდან მიღებული ინფორმაციით, პედაგოგებს, 11.50 ლარად 10 გბ ინტერნეტის შეძენა შეეძლებათ, 35.50 ლარად კი – 30 გბ ინტერნეტის.

„ჯეოსელის“ შეცვლილ პირობებს პედაგოგები სოციალურ ქსელში  გამოეხმაურნენ. ისინი წერენ, რომ უარს იტყვიან „ჯეოსელის“ მომსახურებაზე, თუკი კომპანია ინტერნეტსერვისებზე ფასებს გააძვირებს.

„ბათუმელების“ კითხვაზე, რამ გამოიწვია ტარიფების ცვლილება, „ჯეოსელის“ საზოგადოებასთან ურთიერთობის სამსახურში გვითხრეს, რომ ცვლილება სახელმწიფოს შეთავაზებულმა სატენდერო პირობებმა გამოიწვია: „ჩვენ არ ვდებთ ამ პირობებს, ეს არის სახელმწიფოს მიერ შემოთავაზებული კორპორაციული ტენდერის პირობები და მათ მიერ არის შეცვლილი, შეგიძლიათ ნახოთ რა იყო წინა პირობა და რა არის დღევანდელი.“

გამოიწვევს თუ რა ტარიფების ცვლილება აბონენტების შემცირებას? – „ჯეოსელში“ ამბობენ, რომ – არა, რადგან სტანდარტულ პირობებთან შედარებით ახალი ტარიფები მაინც დაბალია.

„ამ ნომრებს სახელმწიფო დაწესებულებები რთავენ და თუ ვინმე იტყვის, რომ არ უნდა კორპორაციული პირობები, გამორთოს და მიიღებს სტანდარტულ ტარიფს. მაგრამ კორპორაციული ტარიფები ბევრად მისაღებია, ვიდრე სტანდარტული და რატომ უნდა გააკეთონ ასე,“ – გვითხრეს „ჯეოსელში“.

რამ გამოწვია სატელეფონო მომსახურებაზე სატენდერო პირობების შეცვლა? – ჰკითხა „ბათუმელებმა“ სახელმწიფო შესყიდვების სააგენტოსაც. უწყებაში ამ ეტაპზე კომენტარს არ აკეთებენ.

28 თებერვალს  „სარფი“ საბაჟო გამშვებ პუნქტზე, ფინანსთა სამინისტროს შემოსავლების სამსახურის ინფორმაციით, მებაჟე ოფიცრებმა, ეჭვის საფუძველზე, თურქეთის მოქალაქის სკ-ს მართვის ქვეშ არსებული ავტომობილის დათვალიერებისას, ცეცხლსასროლი იარაღი 2 მჭიდით და 19  ვაზნით აღმოაჩინეს.

შემოსავლების სამსახურის ინფორმაციით, საქმის მასალები, შემდგომი რეაგირების მიზნით, საქართველოს შინაგან საქმეთა სამინისტროს აჭარის ავტონომიური რესპუბლიკის ხელვაჩაურის რაიონულ სამმართველოს გადაეცა.

„დიდი მადლობა საზღვაო ტრანსპორტის სააგენტოს თითოეულ თანამშრომელს, საქართველოს ყველა მეზღვაურს და საზღვაო დარგის მესვეურებს 2011 წლიდან დღემდე თანადგომისთვის, ხელშეწყობისთვის და დაფასებისთვის. ჩემი პირადი გადაწყვეტილებით ვუბრუნდები მეზღვაურის პროფესიას შორეული ნაოსნობის კაპიტნის რანგში და ვგეგმავ უკვე კერძო სექტორიდან ვემსახურო ჩემს ქვეყანას,“ – ასე დაემშვიდობა ფეისბუქზე თავის უკვე ყოფილ თანამშრომლებს საზღვაო ტრანსპორტის სააგენტოს თავმჯდომარე, მამუკა ახალაძე.

შორეული ნაოსნობის კაპიტანი, საზღვაო ტრანსპორტის სააგენტოს უკვე ყოფილი თავმჯდომარე, „ბათუმელებთან“ ამბობს, რომ სააგენტოში თავისი როლი ამოწურა და ახლა ზღვას უბრუნდება.

„12 წელზე მეტი სტაჟი მაქვს ზღვაოსნობის. ხუთი წელია საერთოდ არ  ვყოფილვარ ზღვაში და  ჩემი პროფესიით არ მიმუშავია. ხუთი წელი ეს არის მაქსიმალური ვადა, რომ კაპიტნობის სტატუსი შეინარჩუნო და არ დაკარგო ეს პროფესია. სააგენტოდან წასვლის უმთავრესი მიზეზი იყო ის, რომ მე მინდა დავუბრუნდე ჩემს პროფესიას, მეზღვაურობას. გავაგრძელო შორეულ ნაოსნობაში  მუშაობა და შევინარჩუნო ეს პროფესია, რომელსაც მთელი ცხოვრება მივუძღვენი,“ – უთხრა „ბათუმელებს“ მამუკა ახალაძემ.

მამუკა ახალაძე საზღვაო ტრანსპორტის სააგენტოს რვა წელი ხელმძღვანელობდა. როგორც ახალაძე ამბობს, ამ ხნის მანძილზე გუნდთან ერთად სააგენტოში მთელი რიგი სერვისების განვითარება შეძლო. ახალაძე ერთ-ერთ მნიშვნელოვან მიღწევად საქართველოს სახელმწიფო საზღვაო დროშის პარიზის ურთიერთგაგების მემორანდუმის ე.წ. შავი სიიდან ამოღებას მიიჩნევს [2015 წლის პირველ ივლისს საქართველოს საზღვაო დროშამ შავი სიიდან ნაცრისფერ სიაში გადაინაცვლა. ქვეყნის საზღვაო დროშა შავ სიაში 1998 წლიდან იყო მოხვედრილი].

რომელი კომპანიის კუთვნილი გემით იცურებს, მამუკა ახალაძემ ჯერ არ იცის. ამბობს, რომ შესაძლოა მშობლიურ “Columbia Shipmanagement“-ს დაუბრუნდეს.

„ჯერ თავიდან უნდა გავიარო გადამზადების კურსები. ხუთ წელიწადში ერთხელ ამ კურსებს ყველა მეზღვაური გადის. ამ კურსების გავლაზე დამჭირდება ერთი-ორი თვე. შემდეგ სერტიფიკატებს განვაახლებ და დავიწყებ მოძიებას. დასაქმების პრობლემა ნამდვილად არ მექნება ზღვაში, რადგან გამოცდილებაც მაქვს და ცოდნაც,“ –  ამბობს მამუკა ახალაძე.

ჯერჯერობით უცნობია, ვინ შეასრულებს საზღვაო ტრანსპორტის სააგენტოს ხელმძღვანელის მოვალეობას. სავარაუდოდ, ის ყოფილი თავმჯდომარის ერთ-ერთი მოადგილე იქნება.

საქართველოს ეროვნულმა ბანკმა ვალუტის გადამცვლელი პუნქტების რეგისტრაციისა და რეგულირების ახალი წესი დაამტკიცა. შესაბამის ბრძანებას ეროვნული ბანკის პრეზიდენტმა ხელი 28 თებერვალს მოაწერა.

„ახალი წესი ვალუტის გადამცვლელ პუნქტებს პირველი მარტიდან ავალდებულებს ვალუტის გაცვლის ოპერაციის განხორციელებიდან 30 წუთის განმავლობაში, მომხმარებლის მოთხოვნით და ვალუტის გაცვლის დამადასტურებელი ქვითრის წარდგენის საფუძველზე, გააუქმოს აღნიშნული ოპერაცია და დააბრუნოს გაცვლილი თანხა,“ – ნათქვამია საქართველოს ეროვნული ბანკის ოფიციალურ რელიზში.

გარდა ამისა, აღნიშნული წესით მკაცრდება სარეგისტრაციო მოთხოვნები შესაფერისობის კრიტერიუმებისა და საოპერაციო ფართობის მოწყობის კუთხით. კერძოდ, სავალუტო პუნქტი/ფილიალი ვალდებულია სალაროსთან, ქართულად და ინგლისურად  განათავსოს შემდეგი სახის ინფორმაცია მსხვილი [მინიმუმ 28] შრიფტით:

[checklist]

•  „ვიყენებთ საკომისიოს – We are using commision fee“ (არსებობის შემთხვევაში);
• „ვიყენებთ საყურადღებო კურსს – We are using notable exchange rate“ (არსებობის შემთხვევაში);
•  „მოითხოვეთ ქვითარი – Request a receipt!“;
• „ტრანზაქციის გაუქმება შესაძლებელია ქვითრის მიღებიდან 30 წუთის განმავლობაში! – Transaction can be cancelled within 30 minutes after you receive the receipt!“.

[/checklist]

სავალუტო პუნქტი/ფილიალი ასევე ვალდებულია თვალსაჩინო ადგილას განათავსოს ვალუტის ყიდვა-გაყიდვის კურსების ამსახველი ელექტრონული დაფა, რომელზეც ერთნაირი შრიფტით, ზომითა და განათებით ასახული უნდა იყოს შემდეგი ინფორმაცია:

[checklist]

• ვალუტის დასახელება;
• ვალუტის ყიდვის კურსი მეასედის სიზუსტით (მარცხნივ);
• ვალუტის გაყიდვის კურსი მეასედის სიზუსტით (მარჯვნივ);

[/checklist]

ამ წესის გამოქვეყნებამდე რეგისტრირებულ ვალუტის გადამცვლელ პუნქტებს საქმიანობის ახალ მოთხოვნებთან შესაბამისობაში მოსაყვანად ვადა 2019 წლის პირველ იანვრამდე მიეცათ. რაც შეეხება მიმდინარე წლის 28 თებერვლიდან დარეგისტრირებულ გადამცვლელ პუნქტებს, მათ საქმიანობა ახალი წესების სრული დაცვით უნდა განახორციელონ.