Batumelebi

პირველი ივლისიდან საქართველოში ნებისმიერ პაციენტს შეეძლება ექიმთან ვიზიტის შემდეგ ე.წ. დანიშნულების გადამოწმება სამინისტროში შექმნილ ჯგუფთან. ექიმი, რომელმაც პაციენტს შეუსაბამოდ ბევრი წამალი გამოუწერა, შესაძლოა „შავ სიაში“ მოხვდეს.

როგორ იმუშავებს ახალი მექანიზმი? საქართველოს ჯანდაცვის სამინისტროში განმარტავენ, რომ პაციენტმა რეცეპტი გადასამოწმებლად სამინისტროში შექმნილ სამუშაო ჯგუფს ელექტრონულად უნდა მიაწოდოს ან სოციალური მომსახურების სააგენტოში უნდა მიიტანოს ბეჭდური რეცეპტი. მიღებული ინფორმაციის დასამუშავებლად სამედიცინო რეგულირების სააგენტოში ფარმაკოლოგებითა და ტექნიკური სპეციალისტებით შემდგარი ჯგუფი შეიქმნება, რომელიც მიღებულ ინფორმაციას დაამუშავებს.

თუკი დადგინდება, რომ დანიშნულება გადამოწმებას საჭიროებს, პაციენტი ხელახლა მივა ექიმთან. ექიმმა უნდა დაასაბუთოს, რატომ არ სჭირდება შეცვლა მის მიერ ხელმოწერილ დანიშნულებას.

თუ ექიმის დასაბუთება პაციენტს დამაჯერებლად არ მოეჩვენება, მას შეუძლია ხელახლა მიმართოს ჯანდაცვის სამინისტროს. ამ შემთხვევაში პოლიფარმაციის ჯგუფი დარგობრივ ექსპერტებს მოიწვევს და ექიმმა უკვე ამ ჯგუფს უნდა წარუდგინოს საფუძვლიანი არგუმენტაცია, რატომ არ შეუცვალა პაციენტს დანიშნულება. თუკი ექიმი არც ამ ჯგუფის დასკვნას არ გაითვალისწინებს, ექიმის სახელი და გვარი სამინისტროს ელექტრონულ გვერდზე არსებულ რეესტრში, ე.წ. „შავ სიაში“ მოხვდება.

სამინისტროში ამბობენ, ჯგუფი, რომელიც რეცეპტების მიღებასა და დამუშავებაზე იმუშავებს, სამედიცინო რეგულირების სააგენტოში შეიქმნება. ჯერჯერობით არ არის ცნობილი, რამდენი შტატი იქნება დაშვებული სამუშაო ჯგუფისთვის. აქ ამბობენ, რომ თუ სამინისტროს მექანიზმზე დიდი მოთხოვნა იქნება, ჯგუფს გაზრდიან.

ჯანდაცვის სპეციალისტები „ბათუმელებთან“ სამინისტროს ინიციატივას დადებითად აფასებენ, თუმცა შენიშვნებიც აქვთ. მათი თქმით, ამ გზის გავლა პაციენტს არ დასჭირდებოდა, ქვეყანაში  ელექტრონული ჯანდაცვის სისტემა სრულად და გამართულად რომ მუშაობდეს.

„თუ ელექტრონული ჯანდაცვის სისტემა გამართულად იმუშავებს მთელს ქვეყანაში, ყველა მედიკამენტი, რასაც, მაგალითად, ოჯახის ექიმი გამოწერს, აისახება ელექტრონულ სისტემაში და შემდეგ კეთდება ანალიზი – თუ თითოეულ შემთხვევაზე რა მედიკამენტი გამოწერა, რამდენი, ხომ არ არის ეს ექიმი შეკრული რომელიმე ფარმაცევტულ კომპანიასთან და ასე შემდეგ. მაგრამ ასეთ ანალიზს სჭირდება გამართული ელექტრონული სისტემა.

ელექტრონულ ჯანდაცვაზე ღონისძიებები სამინისტრომ დაიწყო, მაგრამ ამან ეფექტურად ვერ იმუშავა, რადგან ყველასთვის არ იყო ხელმისაწვდომი, განსაკუთრებით კი პირველადი ჯანდაცვის სისტემისთვის.

როცა რაღაცას ვერ აკეთებ მთელი ქვეყნის მასშტაბით, რაც დიდ თანხებთანაა დაკავშირებული, მაშინ ალტერნატიული მეთოდი უნდა გამოიყენო. ეს შედარებით დაბალხარჯიანი მეთოდია, უფრო ჩვენნაირი, გაჭირვებული ქვეყნებისთვის, მაგრამ აუცილებელია, რაღაც გზით მაინც გაკონტროლდეს ეს სიტუაცია“, – ამბობს მედიცინის აკადემიური დოქტორი, ილიას სახელმწიფო უნივერსიტეტის პროფესორი თენგიზ ვერულავა.

იდეა მოსწონს ჯანდაცვის ექსპერტ ირაკლი სასანიას. თუმცა ეჭვობს, რომ ინფორმაციის დამუშავება რიგ შემთხვევებში შესაძლოა რთული აღმოჩნდეს:

„ყველა კონკრეტული შემთხვევა უნდა იქნეს განხილული, რიგ შემთხვევაში მარტო რეცეპტით განსაზღვრა რთულია, მნიშვნელოვანია პაციენტის სტატუსი. ვფიქრობ, ყველა შემთხვევის განხილვა ერთ ჭრილში რთული იქნება. ასევე, შეიძლება პაციენტმა ჩათვალოს, რომ მას ბევრი წამალი გამოუწერეს და შეიძლება ძალიან დიდი ინფორმაცია მიაწყდეს სამინისიტროს – ამ ინფორმაციის მართვა გაჭირდება.  არ ვიცი, რამდენად ეყოფა ადამიანური და ტექნიკური რესურსი სამინისტროს და ეს რესურსი რამდენად სწორ გადაწყვეტილებას მიიღებს კონკრეტულ შემთხვევებში, რადგან ის ინფორმაცია, რომელიც მიეწოდება სამინისტროს, შესაძლოა საკმარისი არ აღმოჩნდეს“.

ირაკლი სასანია ამბობს, რომ უკეთესი გზა პოლიფარმაციის გასაკონტროლებლად ელექტრონული რეცეპტების ანალიზი იქნებოდა: „უბრალოდ, ეს უნდა იყოს დანერგილი ძალიან ინტენსიურად. ელექტრონული რეცეპტების სისტემის ანალიზით გამოჩნდება საერთო ტენდენცია, რა წამლებს წერენ, რომელი კლინიკები, რომელი ექიმები…  შემდგომ ალბათ უნდა ჩატარდეს საგანმანათლებლო კურსები, ტრენინგები, რომელიც გამოასწორებს ამ მდგომარეობას. ვფიქრობ ეს უფრო ეფექტური გზა იქნება. ასევე, რიგ შემთხვევაში ისევ ხდება ანტიბიოტიკების ურეცეპტოდ გაცემა აფთიაქებში, ისევ დაიწყო ეს მანკიერი წრე, ამიტომ ამაზე კონტროლის გაძლიერება უფრო მნიშვნელოვანია ჩემი აზრით.“

ჯანდაცვის სამინისტროში ახალი მექანიზმის ამუშავების ერთ-ერთი მიზეზი სამინისტროს მიერ ჩატარებული კვლევა გახდა, რომელმაც გამოავლინა შემთხვევები, როცა პაციენტებს ერთი და იგივე მედიკამენტი აქვთ გამოწერილი სხვადასხვა სავაჭრო დასახელებით.

ამავე თემაზე:

გარემოს ეროვნული სააგენტოს აჭარის რეგიონალური ჰიდრომეტეოროლოგიური ობსერვატორიის ინფორმაციით, 15-16 ივნისს ბათუმში მოსალოდნელია ცვალებადი მოღრუბლულობა, ზოგან ელვა-ჭექა და ხანმოკლე წვიმა.

იქროლებს ცვალებადი მიმართულების ქარი 10-15 მეტრი წამში.

სინოპტიკოსების ცნობით, მომდევნო ორ დღეს ზოგან მოსალოდნელია ხანმოკლე წვიმა.

ჰაერის ტემპერატურა სანაპირო რაიონებში იქნება:

• დღისით: 25  – 30  გრადუსი  
• ღამით: 16 – 21 გრადუსი 

მთაში მოსალოდნელია:

• დღისით: 20 – 25  გრადუსი 
• ღამით: 10 – 15 გრადუსი 

ზღვის წყლის ტემპერატურა 23 გრადუსია.

დღეს, 15 ივნისს, რამადან ბაირამის ლოცვა ბათუმში მცხოვრებმა მუსლიმებმა ისევ ღია ცის ქვეშ ჩაატარეს. ბათუმის ძველი მეჩეთი მლოცველებს ვერ იტევს, ახალი მეჩეთის აშენების ნებართვას კი, ხელისუფლება მუსლიმებს ამ დრომდე არ აძლევს.

ბათუმის ძველ მეჩეთში რამადანი დღეს მუსლიმებს აჭარის მთავრობის თავმჯდომარემ მიულოცა. ისე, როგორც გასულ წელს, ზურაბ პატარაძეს”ბათუმელებმა” ჰკითხა, აპირებდა თუ არა ახალ მეჩეთში მისვლას და იქ შეკრებილი მუსლიმებისთვის დღესასწაულის მილოცვას. აჭარის მთავრობის თავმჯდომარემ ჩვენს შეკითხვას ასე უპასუხა:

“ძირითად საკითხზე ჩვენ შეთანხმებული ვართ, რომ უნდა აშენდეს მეჩეთი. ეს გადაწყვეტილება მიღებულია. ახლა არის ტექნიკური დეტალები. ჩვენ სამუფთო სამმართველოსთან ერთად ვმუშაობთ ამ საკითხზე. უახლოეს პერიოდში გვექნება მორიგი შეხვედრა, სადაც შევთანხმდებით საბოლოო მოცულობაზე და ტექნიკურ დეტალებზე, რაც უშუალოდ მეჩეთთან არის დაკავშირებული. სამუფტო სამმართველო უშუალოდ ჩართულია. ჩვენ მზად ვართ, ყველა ჯგუფთან ერთად, არ აქვს მნიშვნელობა საინიციატივო ჯგუფი იქნება თუ ნებისმიერი მრევლი, ყველამ თითო-თითო აგური უნდა დავდოთ იმისათვის, რომ ეს პროექტი იყოს მისაღები ქალაქისთვის, იყოს მისაღები ჩვენი მრევლისთვის, მოსახლეობისთვის, ამიტომ ჩვენ ძალიან მალე ამ კონსესუსს მივაღწევთ”.

“ბათუმელების” კითხვას, თუ როდის იქნება “მალე”, პატარაძემ  ასე უპასუხა:

“როგორც კი შევჯერდებით ტექნიკურ საკითხებზე, ჩვენ მივიღებთ ამ გადაწყვეტილებას. მე დღეს მრევლსაც ვუთხარი ეს. თქვენ ალბათ კითხვას სვამთ, შარშან ამ დროსაც, ბაირამობას იყო საუბარი. წელს ჩვენ საგრძნობლად  წინ წავიწიეთ. ფაქტობრივად, ძირითადი საკითხები გავლილი გვაქვს. გვრჩება რიგი ტექნიკური საკითხები, რომლებსაც ჩვენ დავხვეწავთ მრევლთან, სამუფთოსთან და ყველა იმ ადამიანთან ერთად, ვინც დაინტერესებულია, აშენდეს მეჩეთი”.

ნახეთ რა თქვა ზურაბ პატარაძემ გასულ წელს მეჩეთის მშენებლობასთან დაკავშირებით, როდესაც ის ბაირამის მისალოცად ამავე მეჩეთს ესტუმრა:

ამავე თემაზე:

მუსლიმური სამყარო რამადან ბაირამს – ერთთვიანი მარხვის დასასრულს  ზეიმობს. ბათუმის ორ მეჩეთში დღეს რამადანის ლოცვა ერთდროულად მიმდინარეობდა. ქუთაისის ქუჩაზე მისული მუსლიმების ნაწილი ტრადიციულად ქუჩაში ლოცულობდა, რადგან ძველი მეჩეთი მლოცველებს ვერ იტევს.

ღია ცის ქვეშ ილოცეს მუსლიმებმა გენერალ აბაშიძის ქუჩაზეც. იქ, სადაც მეჩეთის აშენება სურთ, დღემდე მხოლოდ ბრეზენტით გადახურული ხის კონსტრუქციაა. ხელისუფლება მათ მეჩეთის აშენების ნებართვას არ აძლევს.

საქართველოს მუფთმა ბეგლარ ქამაშიძემ მიმართვა გაავრცელა და მუსლიმებს რამადანი მიულოცა.

„ეს დღესასწაული მორწმუნეთათვის რამადნის მთვარის ღირსეული საჩუქარია. დაე, მთელს მსოფლიოში დასრულებულიყოს არეულობა, ძალადობა, სისხლისღვრა, მშობლების წუხილი და ახალგაზრდების ტრაგედიები. დღესასწაული განაწყენებულთა შერიგების, ერთიანობის გაძლიერების და ურყევი ძმობის გამოვლინების საუკეთესო მომენტია“, – ნათქვამია მიმართვაში.

რამადან ბაირამი სამ დღეს გასტანს.

ხელვაჩაურის მუნიციპალიტეტში, სოფელ სარფში მდებარე 1819 კვ/მ ფართობის არასასოფლო-სამეურნეო დანიშნულების მიწის ნაკვეთს სახელმწიფო ქონების ეროვნული სააგენტო აუქციონზე 64 000 ლარად ყიდის. ბიჯი 1 000 ლარია. ანუ, 1კვ/მ სახელმწიფო მიწის საწყისი გასაყიდი ფასი 35 ლარი და 70 თეთრია.

მიწის ნაკვეთი სარფში პირობების გარეშე იყიდება. აუქციონის დოკუმენტების მიხედვით, ნაკვეთი შემაღლებულ ადგილზეა, საიდანაც კარგად მოჩანს ზღვა და კვარიათი-გონიოს დასახლება.

აუქციონის პირობების თანახმად, „მკაცრად რეკომენდებულია საპრივატიზებო საფასურის გადახდა 25 დღის განმავლობაში. მყიდველი ვალდებულია ნასყიდობის ხელშეკრულების გასაფორმებლად მიმართოს სსიპ „იუსტიციის სახლის“  ნებისმიერ ტერიტორიულ სამსახურს [ფილიალს] აუქციონის ჩატარებიდან 45 კალენდარული დღის  ვადაში, წინააღმდეგ შემთხვევაში უქმდება აუქციონის შედეგი. გამარჯვებულის მიერ გადახდილი „ბე“-ს [საგარანტიო] თანხა ითვლება საბოლოო ანგარიშსწორებისას“.

საპრივატიზებო მიწის ნაკვეთზე, სააგენტოს ინფორმაციით, განთავსებული მოძრავი ქონება – ბეტონის არმირებული ფილა, არ წარმოადგენს პრივატიზების საგანს.

გასაყიდი ნაკვეთის მომიჯნავედ არის სახელმწიფო საკუთრებაში არსებული მიწები და ასევე დიმიტრი ტვილდიანის საკუთრებაში არსებული ნაკვეთები, საერთო ფართობით 4309 კვ/მ, საიდანაც 2670კვ მეტრის მოაღნაგე არის შპს „კვარიათი პარადიზი“.

„კვარიათი პარადიზის“ კომპანიის დირექტორია თავად დიმიტრი ტვილდიანი, 100% წილის მფლობელი კი – შპს „დავით ტვილდიანის სამედიცინო უნივერსიტეტი“. ამ კომპანიის 100% წილის მესაკუთრეც და დირექტორიც ასევე არის დიმიტრი ტვილდიანი, რომელიც საქართველოსა და აშშ-ის მოქალაქეა.

დიმიტრი ტვილდიანმა სარფში მიწის  ნაკვეთი, რომელიც მის საკუთრებაშია სახელმწიფო ქონების ეროვნული სააგენტოს მიერ ადრე გამოცხადებულ ელექტრონულ აუქციონზე იყიდა და მშენებლობაც მუნიციპალიტეტის მერიის შესაბამის სამსახურებთან პროექტის შეთანხმების გარეშე დაიწყო. მან სასტუმრო კომპლექსის საფუძვლის ჩაყრის სამუშაოები ისე დაასრულა, რომ ამის შესახებ ზედამხედველობის სამსახურს არაფერი გაუგია. მოგვიანებით კი მხოლოდ 200 ლარით დააჯარიმეს და მშენებლობის ნებართვაც მისცეს.

გამორიცხული არაა, სახელმწიფოს მიერ გასაყიდად ამჯერად გამოტანილი ნაკვეთის ყიდვით, სწორედ დიმიტრი ტვილდიანი იყოს დაინტერესებული. ელექტრონული აუქციონი დაწყებულია და ის 15 ივნისს დასრულდება.

ამ თემაზე:

დღეს, 14 ივნისს, საპარლამენტო უმრავლესობამ პრემიერ-მინისტრის პოსტზე მამუკა ბახტაძის კანდიდატურა დაასახელა. პრემიერ-მინისტრის თანამდებობა ვაკანტური მას შემდეგ გახდა, რაც გუშინ, 13 ივნისს, გიორგი კვირიკაშვილი თანამდებობიდან გადადგა.

პრემიერ-მინისტრობის კანდიდატი 36 წლისაა. მან უმაღლესი განათლება თბილისის სახელმწიფო უნივერსიტეტში და ტექნიკურ უნივერსიტეტში მიიღო. არის ტექნიკურ მეცნიერებათა დოქტორი. მაგისტრის ხარისხი ბახტაძემ მოსკოვში, ლომონოსოვის სახელობის სახელმწიფო უნივერსიტეტში მიიღო. მეორედ კი მაგისტრის ხარისხს ბიზნესის ადმინისტრირების მიმართულებით 2010 წელს საფრანგეთში, ბიზნესის ადმინისტრირების ევროპულ ინსტიტუტში დაეუფლა.

მამუკა ბახტაძე 2005 წლიდან მუშაობს. მისი სამუშაო გამოცდილება “საქართველოს რკინიგზიდან” იწყება, სადაც ერთი წლის მანძილზე პროექტების მენეჯერი იყო. 2007 წლიდან 2008 წლის ჩათვლით ბახტაძე სასტუმროების ქსელის “რჩეული” სამეთვალყურეო საბჭოს წევრი იყო. ასევე მუშაობდა საქართველოს საერთაშორისო ენერგეტიკული კორპორაციის გენერალურ დირექტორად.

მას შემდეგ, რაც ხელისუფლებაში “ქართული ოცნება” მოვიდა, მალევე, 2013 წელს, ბახტაძე “საქართველოს რკინიგზის” გენერალურ დირექტორად დაინიშნა და ამ თანამდებობაზე თითქმის 4 წელი იმუშავა. ამ პოსტზე მას ოთხი წლის განმავლობაში ერთ მილიონზე მეტი ლარი აქვს მიღებული. 

საქართველოში ერთ-ერთი გამორჩეულად მაღალანაზღაურებადი თანამდებობა მან ფინანსთა მინისტრის პოსტის სასარგებლოდ დატოვა. უკვე შვიდი თვეა ბახტაძე ქვეყნის ფინანსთა მინისტრია.

ექიმი და სამედიცინო ბიზნესით დაკავებული დიმიტრი ტვილდიანი, რომელმაც სოფელ სარფში სასტუმროს მშენებლობა უნებართვოდ დაიწყო, მხოლოდ 200 ლარით დააჯარიმეს და მშენებლობის ნებართვაც მისცეს.

„დავაჯარიმეთ ისე, როგორც ამას კანონმდებლობა ითვალისწინებს. მე ჯარიმის გაზრდის უფლება არ მქონდა“, – განმარტა ხელვაჩაურის მერიის ზედამხედველობის სამსახურის უფროსმა, გიორგი ქურიძემ.

ხელვაჩაურის მერიის არქიტექტურის სამსახურის ინფორმაციით კი, უკვე გაცემული ნებართვის თანახმად, დიმიტრი ტვილდიანი სოფელ სარფში, კალენდერეს უბანში, საიდანაც ზღვის ხედით ულამაზესი პეიზაჟი იშლება, მრავალფუნქციურ კომპლექსს აშენებს:

„ ეს იქნება სამსართულიანი შენობა პირველ სართულზე პარკინგით, მეორე სართულის ნაწილს კაფე დაიკავებს, მესამე სართულზე კი სასტუმროს ნომრები განთავსდება.“

დიმიტრი ტვილდიანმა სარფში მიწის  ნაკვეთი  სახელმწიფო ქონების ეროვნული სააგენტოს მიერ გამოცხადებულ ელექტრონულ აუქციონზე იყიდა და მშენებლობაც მუნიციპალიტეტის მერიის შესაბამის სამსახურებთან პროექტის შეთანხმების გარეშე დაიწყო. მან სასტუმრო კომპლექსის საფუძვლის ჩაყრის სამუშაოები ისე დაასრულა, რომ ამის შესახებ ზედამხედველობის სამსახურს არაფერი გაუგია, ვიდრე ადგილობრივმა მოსახლეობამ საკრებულოს ოპოზიციას არ მიმართა.

საჯარო რეესტრის მონაცემების მიხედვით, დიმიტრი ტვილდიანმა სარფში, ხელვაჩაურის მუნიციპალიტეტში, 2670 არასასოფლო-სამეურნეო ნაკვეთი 2017 წლის მარტში დაირეგისტრირა.

დიმიტრი ტვილდიანი პროფესიით ექიმია და ის ამ დრომდე სამედიცინო ბიზნესით იყო დაკავებული. დიმიტრი ტვილდიანი ქართულ-ამერიკული დიაგნოსტიკური ცენტრისა და შპს დავით ტვილდიანის სახელობის სამედიცინო უნივერსიტეტის დამაარსებელი და მფლობელია.

„იუნისეფის“ ახალი კვლევის თანახმად,  საქართველოში ოჯახები ჯანდაცვაზე გაწეული ხარჯების 69 პროცენტს მედიკამენტების შესაძენად ხარჯავენ.

ჯანდაცვის ხარჯები მოიცავს გადაუდებელ სამედიცინო დახმარებას (ტრანსპორტის ხარჯის ჩათვლით), ექიმებთან ვიზიტს, სამედიცინო პროცედურებს, ქირურგიულ ოპერაციებს, ჰოსპიტალურ მომსახურებას, მშობიარობას, მედიკამენტების შეძენას და ა.შ.

ზოგიერთი ოჯახის მიერ სამედიცინო მომსახურებასა და მედიკამენტებზე ჯიბიდან გაწეულ ხარჯებს „იუნისეფი“ კატასტროფულად მაღალს უწოდებს. კვლევაში ვკითხულობთ, რომ  2017 წელს შინამეურნეობების (ოჯახების) დაახლოებით 27-მა პროცენტმა აღნიშნა, რომ მედიკამენტების შეძენა მათთვის უმთავრესი პრობლემა იყო. კვლევაში ასევე აღნიშნულია, რომ 2015 წელთან შედარებით 2017 წელს საქართველოში ოჯახებმა ჯანდაცვაზე 16,4 პროცენტით მეტი დახარჯეს.

„ჯანდაცვაზე გაწეული ხარჯებიდან მედიკამენტებზე დანახარჯი არის კატასტროფულად მაღალი მაჩვენებელი. მსოფლიო გამოცდილება გვეუბნება, რომ ნორმალურ ქვეყანაში ეს არის 15 პროცენტი, ძალიან გაჭირვებულ ქვეყნებში არის 20 პროცენტამდე. ის, რაც ახლა გამოაქვეყნა „იუნისეფმა“, ნამდვილად არის კატასტროფა“, – ამბობს „ბათუმელებთან“ თენგიზ ვერულავა, მედიცინის აკადემიური დოქტორი, ილიას სახელმწიფო უნივერსიტეტის პროფესორი.

მისი შეფასებით, ეს მაჩვენებელი საქართველოს ჯანდაცვის სისტემის „ლაკმუსის ქაღალდია“:

„ეს მეტყველებს იმაზე, რომ ქვეყანაში, ფაქტობრივად, არ არსებობს პირველადი ჯანდაცვის სისტემა. ჯანდაცვის სისტემა არ უნდა იყოს მხოლოდ მკურნალობაზე ორიენტირებული, ჯანდაცვა ნიშნავს პრევენციას და შემდგომ მკურნალობას, მაგრამ ამისათვის უნდა არსებობდეს ძლიერი პირველადი ჯანდაცვა, ოჯახის ექიმის სისტემა. როცა ეს არ არის ქვეყანაში, ცხადია, იქ აქცენტი მკურნალობაზეა და მკურნალობა მოითხოვს მედიკამენტებს. ადამიანი ხშირ შემთხვევაში მიდის პირდაპირ აფთიაქში ან სპეციალისტთან, რომელიც შეკრულია ფარმაცევტულ კომპანიასთან და ეს ზრდის მედიკამენტებზე დანახარჯებს. ეს დიდ ტვირთად აწვება განსაკუთრებით ქრონიკულ ავადმყოფებს და ღარიბებს, რაც ასევე მოქმედებს ჯანდაცვის ფინანსურ ხელმისაწვდომობაზე.

რატომ არის 15 პროცენტი მედიკამენტებზე დანახარჯი განვითარებულ ქვეყნებში? იმიტომ, რომ ასეთ ქვეყნებში კარგად არის განვითარებული პირველადი ჯანდაცვის სისტემა, იქ ადამიანი პირდაპირ კი არ აკითხავს აფთიაქს, არამედ მიდის ოჯახის ექიმთან, რომელიც არის კარგად მომზადებული, მაღალი კვალიფიკაციით და პაციენტი იმყოფება უწყვეტი სამედიცინო მეთვალყურეობის ქვეშ. ცხადია, ეს არის უფრო ხარჯთეფექტური სისტემა და უფრო ნაკლებ მედიკამენტებს მოითხოვს“, – ამბობს თენგიზ ვერულავა.

მედიკამენტებზე დანახარჯის ზრდის პარალელურად საქართველოში წამლის ფასი არ იკლებს და ბევრად მაღალია იგივე მეზობელ თურქეთში მედიკამენტების ფასთან შედარებით.  თენგიზ ვერულავა ამ ფაქტს პარადოქსულს უწოდებს.

„ჩვენთან რომ უფრო ძვირი ღირს მედიკამენტები, ვიდრე თურქეთში, რომელიც საქართველოზე მდიდარი ქვეყანაა, პარადოქსული სიტუაციაა. ამ დროს თითქოს პირიქით უნდა იყოს, მაგრამ ჩვენთან არ რეგულირდება ჯანდაცვის სფერო, არ არის ბერკეტები, იგივე არც კონკურენციის მხრივ, მაინც ეკვრებიან ერთმანეთს საქართველოში ფარმაცევტული კომპანიები და ბაზარზე არ შემოდის არავინ, ვინც ამ ფასს დაწევს“, – ამბობს ის.

„აღნიშნულმა [სამედიცინო მომსახურების] ხარჯებმა მთლიანი ხარჯის 10 პროცენტზე მეტი შეადგინა შინამეურნეობების მთლიანი რაოდენობის 34.2%-ისთვის – რაც 2015 წლის მაჩვენებელს (29.8%) აღემატება. გარდა ამისა, შინამეურნეობების 26.4%-ისთვის, ჯანდაცვის ხარჯებმა არასასურსათო ხარჯის 25%-ზე მეტი შეადგინა, რაც 2015 წლის მონაცემს (25.1%) აღემატება. აღნიშნული ზრდის ერთ-ერთ მიზეზად მედიკამენტების ღირებულება სახელდება,“ – აღნიშნულია „იუნისეფის“ კვლევაში.

საქართველოში მედიკამენტების მაღალი ფასის გამო აჭარიდან არაერთი მოქალაქე თურქეთში გადადის, რომ იაფად შეიძინოს საჭირო წამლები. „ბათუმელები“ ჯერ კიდევ გასულ წელს წერდა ქართულ და თურქულ სააფთიაქო ქსელებში არსებულ ფასთა სხვაობაზე. მაშინ ფასთა ასეთი დიდი სხვაობა ჯანდაცვის ექსპერტთა კლუბის ხელმძღვანელმა, თინათინ ტურძილაძემ, ასე ახსნა: „თურქეთს საქართველოსგან განსხვავებული რეგულირების მოდელი და ხარჯების შეკავების განსხვავებული სახელმწიფო პოლიტიკა აქვს“.

საქართველოში მედიკამენტების მაღალ ფასთან დაკავშირებით საქართველოს ჯანდაცვის მინისტრმა, დავით სერგეენკომ განაცხადა, რომ საქართველოსთან შედარებით, თურქეთში წამლების დაბალ ფასს დიდი ბაზარი და სახელმწიფოს ჩართულობა განაპირობებს. „თურქეთი ძალიან ჭკვიანურად მოიქცა და მძლავრი სახელმწიფო საპირწონეები დატოვა როგორც კლინიკებში, ისე ფარმაწარმოებაში,“ – აღნიშნა მან, თუმცა მინისტრს არ უთქვამს, გეგმავს თუ არა რაიმე სიახლეს მთავრობა ამ მიმართულებით.

თურქეთსა და საქართველოში მედიკამენტების ფასის სხვაობაზე მედიასაშუალებებით გავრცელებულ ინფორმაციას საქართველოს ორი დიდი ფარმაცევტული კომპანია – „ავერსი“ და „PSP” გამოეხმაურა, თუმცა მათ არა ფასის დაწევაზე გააკეთეს აქცენტი, არამედ მომხმარებლებს აცნობეს, რომ საქართველოში სამომხმარებლო ბაზარი გაცილებით პატარაა, ვიდრე თურქეთში და მათ მომხმარებლებს თურქეთიდან წამლების ჩამოტანის სერვისი შესთავაზეს.

ავტორი: ესმა გუმბერიძე

დაზარალებული ზაზა სარალიძის მე თავიდან ბოლომდე მჯერა, როცა ის ამბობს, რომ 6 თვეა, მაღალი თანამდებობის პირებთან ითხოვდა შეხვედრას თავისი შვილის მკვლელობის გამოძიებასთან დაკავშირებით კითხვების დასასმელად, ინფორმაციის მისატანად და არავინ რომ არ მიიღო. უამრავი მაგალითის მოყვანა შემიძლია: რამდენიმე თვის წინ ასევე ჯანდაცვის სამინისტროში, კერძოდ კი რეგულირების სააგენტოში მომიწია მისვლა, დიდუბეში. იქაც ერთი ადამიანი დაჟინებით ითხოვდა მინისტრთან შეხვედრას. ამბობდა, რომ მძიმე ავადმყოფ შვილს ოპერაცია სჭირდება. ეკუთვნის კიდეც დაფინანსება, მაგრამ 3 წელია დადის და ვერც დასაბუთებული უარი მიიღო და ვერც – დაფინანსება. თუმცა ამ ბლოგში დეტალურად ცოტა უფრო სხვა ამბავს აღვწერ, რომელიც, საბედნიეროდ, არავის სიკვდილს არ უკავშირდება, მაგრამ სისტემურ პრობლემაზე მიუთითებს.

საქმე ეხებოდა შეზღუდული შესაძლებლობის მქონე პირთა უფლებების შესახებ საქართველოს კანონის სამუშაო ვერსიას. ამ კანონის ტექსტი შეადგინეს საქართველოში შშმ პირთა უფლებებზე მომუშავე ორგანიზაციამ – „კოალიცია დამოუკიდებელი ცხოვრებისთვის“ და იუსტიციის სამინისტრომ. ეს საქართველოში შშმ პირთა უფლებრივი მდგომარეობის განმსაზღვრელი, ჩარჩო კანონი უნდა იყოს. მასში გაწერილი უნდა იყოს შშმ პირთა მიმართ დასამკვიდრებელი მიდგომები, მათი უფლებების დაცვის პრინციპები, მექანიზმები და მათი უფლებების პატივსაცემად, დასაცავად და უზრუნველსაყოფად სახელმწიფოს მიერ აღებული ძირითადი ვალდებულებები. შესაბამისად, თემისთვის ეს კანონი ერთ-ერთი ყველაზე მნიშვნელოვანია, რაც მის განმარტებით ბარათშიც წერია.

ამის კიდევ ერთხელ ხაზგასასმელად ვიტყვი, რომ დღეს იუსტიციის საბჭოს წინააღმდეგ აღძრული სარჩელის განმხილველ სასამართლო პროცესზე, რომელიც ეხება უსინათლო პირებისთვის სასამართლო სარჩელების ელექტრონული ფორმების არაადაპტირებულობას (ისეთი ფორმატია, რომ გამხმოვანებელი პროგრამა კარგად ვერ კითხულობს და უსინათლო მას დამოუკიდებლად ვერ ავსებს) და რომლის ერთ-ერთი მოსარჩელე მეც ვარ, მოპასუხე მხარის ადვოკატი გვიმეორებდა, რომ მალე ამოქმედდება შშმ პირთა უფლებების შესახებ საქართველოს კანონი და ის მოაწესრიგებს სახელმწიფოს ყველა ვალდებულებას თქვენთან მიმართებაშიო. შშმ პირთა საყოველთაო, თანასწორობაზე დაფუძნებული და თავისუფალი ჩართულობა გადაწყვეტილებათა მიღების პროცესში, რომლებიც უშუალოდ მათს უფლებებს ეხება, გარანტირებულია საქართველოს პარლამენტის მიერ 2014 წელს რატიფიცირებული გაეროს 2006 წლის შეზღუდული შესაძლებლობის მქონე პირთა ადამიანის უფლებების კონვენციით, ასევე ქართული კანონმდებლობით. გადაწყვეტილების მიღების პროცესის გამჭვირვალობის უზრუნველყოფა საქართველოს ევალება ღია მმართველობის პარტნიორობის (OGP) ფარგლებში აღებული ვალდებულებებითაც.

ბუნებრივია, შშმ პირთა, შშმ პირთა ორგანიზაციებისა და მათს უფლებებზე მომუშავე აქტივისტებს გაგვიჩნდა მოლოდინი, რომ იუსტიციის სამინისტრო უზრუნველყოფდა ფართო ჩართულობას ამ კანონის შემუშავებაში (იუსტიციის სამინისტროს ოფიციალურ საიტზე გამოქვეყნდებოდა კანონის სამუშაო ვერსია, რომელიც მასში ცვლილებების შეტანის პარალელურად განახლდებოდა, გამოქვეყნდებოდა კანონთან დაკავშირებული სამუშაო საკონსულტაციო შეხვედრების განრიგი. კონსულტაციები იქნებოდა საჯარო და იქნებოდა შესაძლებელი არამხოლოდ რეკომენდაციები, არამედ მათი განხილვაც დიალოგის რეჟიმში, კანონის შემუშავებაში ჩართულ საჯარო უწყებებთან).

ზემოთხსენებულთაგან არაფერი მომხდარა. მას შემდეგ, რაც მარტის ბოლოს შევიტყვე ამ კანონის ჩაკეტილ კარებს მიღმა შემუშავების შესახებ, ეს ვთქვი ჩემს ხელთ არსებული ყველა საშუალებით, მათ შორის რადიო „თავისუფლების“ გადაცემაშიც. ჩემს შეშფოთებას შშმ პირთა უფლებების მიმართულებით მომუშავე სხვა ავტორიტეტული ორგანიზაციებიც იზიარებდნენ. თავდაპირველად კანონის სამუშაო ვერსიაც კი არ გვქონდა ხელთ, რომ გავცნობოდით. შემდეგ ის კანონის შემუშავებაში ჩართულმა არასამთავრობო ორგანიზაციამ ინდივიდუალურად, დახურულ ჯგუფებში მოგვაწოდა. გვეუბნებოდნენ, რომ ვინც შეხვედრაზე მოვიდოდა, კარებს არავის ჩაუკეტავდნენ, თუმცა შეხვედრის დრო, ადგილი და თარიღი არ იყო იუსტიციის სამინისტროს ვებსაიტზე ოფიციალურად გამოქვეყნებული.

შშმ ქალთა საინიციატივო  ჯგუფმა „პლატფორმა ახალი შესაძლებლობებისთვის“, რომლის თანადამფუძნებელი და თავმჯდომარეც ვარ, ასევე გაავრცელა მაშინ შეშფოთების გამომხატველი საჯარო განცხადება. ამავდროულად აღმოვაჩინე, რომ ჩვენს საჯარო სტრუქტურებს შშმ პირებთან დაკავშირებული საკითხების გადაწყვეტისას შშმ პირთა ჩართულობის უზრუნველყოფა ესმით, როგორც საჯარო სტრუქტურებში სხვადასხვა, მათ შორის ტექნიკურ პოზიციებზე დასაქმებული შშმ პირებისთვის მომავალი კანონის ტექსტის გადაგზავნა. ეს ცუდი არ არის – ყველა შშმ პირმა, რომელიმე დაწესებულებაში ოპერატორად რომც მუშაობდეს და შშმ პირთა უფლებებისგან სრულიად განსხვავებულ საკითხებზე სცემდეს მომხმარებელთა სატელეფონო ზარებს პასუხს, სულ რომ არასდროს ემუშავა შშმ პირთა უფლებების კუთხით (ეს შესაძლებელია) მაინც იცის თავისი საჭიროებები და მათგან გამომდინარე აქვს ამ საჭიროებების გაჟღერებისა და მათზე მორგებული, მათი გამთვალისწინებელი კანონის შემუშავებაში მონაწილეობის უფლება. მაგრამ სახელმწიფო არავითარ შემთხვევაში არ უნდა შემოიფარგლოს მსგავსი კანონის ტექსტის მხოლოდ მათთვის გაცნობით და მათი ჩართულობის უზრუნველყოფით.

ავტორის შესახებ:

ესმა გუმბერიძე არის 23 წლის, აქტივისტი, პლატფორმა „ახალი შესაძლებლობებისთვის“ თანადამფუძნებელი და სახალხო დამცველთან არსებული გაეროს 2006 წლის შშმ პირთა უფლებების კონვენციის პოპულარიზაციის, დაცვისა და იმპლემენტაციის მონიტორინგის საბჭოს მოწვეული წევრი.

ესმა გუმბერიძემ დაამთავრა უსინათლოთა სკოლა, ფლექსის პროგრამით ამერიკის შეერთებულ შტატებში სწავლობდა ერთი წლის განმავლობაში. შემდეგ განათლების მიღება გააგრძელა თავისუფალ უნივერსიტეტსა და თსუ-ში.

ვის გამოუყოფენ ტყეში ხეებს სამასალედ – ამ საკითხზე კონკრეტული პასუხი არ არსებობს. მიზეზი მარტივია – არ არსებობს კრიტერიუმი, რომლითაც კონკრეტულ ოჯახს ტყის სპეციალური ფონდიდან სამასალე ხე-ტყეს გამოუყოფენ. ხულოს მერიის შესაბამის კომისიაში კი გვითხრეს, რომ გადაწყვეტილებას ამ საკითხზე კომისია კი არა, მოსახლეობა იღებს.

სამასალე ხე-ტყის გამოყოფაზე მოთხოვნას მუნიციპალიტეტები პირველ მაისამდე თავად აყენებენ სატყეო სააგენტოში.

„მაგალითად, ქობულეთმა მოითხოვა 1300 კუბური მეტრი, შუახევმა და ხულომ – 2-2 ათასი… შესაძლებელია, სრულად ამ მოთხოვნის დაკმაყოფილება ვერ მოხერხდეს. ჩვენ პირველ სექტემბრამდე ვახდენთ აღწერას და მივაწვდით ინფორმაციას მუნიციპალიტეტებს, სად არის შესაძლებელი სამასალე ხე-ტყის მიღება,“ – ამბობს ჯუმბერ აბულაძე, აჭარის სატყეო სააგენტოს უფროსის მოადგილე.

სამასალე ხე-ტყის გამოყოფის შემდეგ გადაწყვეტილებას მუნიციპალიტეტებში მოქმედი სპეციალური კომისიები განიხილავენ. აქ გვითხრეს, რომ მოთხოვნა ბევრად მეტია, ვიდრე ტყის რესურსი არსებობს. მოთხოვნას მუნიციპალიტეტის კომისიები სატყეო სააგენტოსთან კონსულტაციის შემდეგ აყენებენ.

„მოთხოვნას ვაყენებთ იმდენს, რამდენის რესურსიც არსებობს, რასაც სააგენტო გვეტყვის… მაგალითად, წელს უკვე 1300 განაცხადია სამასალეს მიღებაზე, რაც  6 ათასი კუბური მეტრი გამოდის. ხულოს მოთხოვნა სამასალე ხე-ტყის გამოყოფაზე 2 ათასი კუბური მეტრია,“ – გვიყვება ხულოს მერიის მოსახლეობისთვის პირადი მოთხოვნის მიზნით სამასალე ხე-ტყის გაცემის შემსწავლელი კომისიის ხელმძღვანელი, ზურაბ თავართქილაძე.

რა კრიტერიუმით არჩევს კომისია ოჯახს, ვინც სამასალე ხე-ტყე უნდა მიიღოს? – ზურაბ თავართქილაძე განმარტავს, რომ ამ პროცესს „სოციალური ჭრა“ ჰქვია და პირველ რიგში, სოციალურად დაუცველი მოსახლეობა უნდა დაკმაყოფილდეს. მისივე თქმით, ხე-ტყეს სამასალედ სხვებიც ითხოვენ განცხადებით. დაკმაყოფილებულა მათი მოთხოვნაც.

როგორ იღებს გადაწყვეტილებას კომისია? – „კომისია გადაწყვეტილებას არ იღებს,“ – გვითხრა ზურაბ თავართქილაძემ, -„ჩვენთან შემოდის მოთხოვნები, რასაც ვაძლევთ მერის წარმომადგენელს. წარმომადგენელი მოსახლეობასთან ერთად წყვეტს, ეკუთვნის თუ არა კონკრეტულ ოჯახს სამასალე ხე-ტყე. ადგილზე დაათვალიერებენ და თუ აუცილებელია, ადგილზე გაფორმდება ოქმი,“ – ამბობს ის.

რა ხდება იმ შემთხვევაში, თუკი მოსახლეობა და სოფლის რწმუნებული ჩათვლიან, რომ ყველა ოჯახს ერგება სამასალე ხე-ტყე, ვისაც მოთხოვნა დაწერილი აქვს? – ხულოს კომისიის თავმჯდომარემ ამ კითხვაზე კონკრეტულად ვერ გვიპასუხა.

კომისიაში ვერ გვითხრეს ასევე კონკრეტული მექანიზმის შესახებ შემთხვევაზე, როცა სამასალე ხე-ტყეს მოქალაქე საკუთარი სახლის მშენებლობისთვის არ იყენებს და ყიდის.

„ვამოწმებთ ადგილზე და ვიღებთ ზომებს… ეს არის სოციალური ჭრა და არა ის, რომ კომერციული მიზნებისთვის გამოიყენონ. ამდენს არ ვაძლევთ ჩვენ… არ გვქონია ასეთი შემთხვევა, რომ კომერციული მიზნებისთვის გამოყენება დადასტურებულიყო,“ – აღნიშნა ზურაბ თავართქილაძემ.

ხულოსგან განსხვავებით ქობულეთის მერიაში განაცხადეს, რომ გადაწყვეტილებას შესაბამისი კომისია იღებს. ზუსტი კრიტერიუმი ვერც აქ გვითხრეს, როგორ არჩევს კომისია ოჯახს, ვისაც სამასალე ხე-ტყეს მისცემენ. აქ განმარტავენ, რომ ჯერ ზუსტად უნდა დადგინდეს, რამდენი იქნება ტყის ფონდი.

„კომისია უპირატესობას ანიჭებს ხანძრის, ან სტიქიის შედეგად დაზარალებულებს, სოციალურად დაუცველებს… კომისიაში შედიან ადმინისტრაციული ორგანოს ხელმძღვანელები და შემდეგ ისინი ადგილზე ამოწმებენ, რამდენად მიზნობრივად გამოიყენეს გამოყოფილი სამასალე ხე-ტყე, ისინი აწვდიან კომისიას ინფორმაციას,“ – აღნიშნეს ქობულეთის მერიის პრესსამსახურში. კონკრეტულ კრიტერიუმებზე სასაუბროდ კომისიის წევრებმა ჩვენთან გასაუბრებაზე უარი თქვეს.

სამასალე ხე-ტყის რესურსი გასულ წელთან შედარებით ნაკლები იქნება. აჭარის სატყეო სააგენტოს უფროსის მოადგილის თქმით, გასულ წელს 6749 კუბური მეტრი სამასალე ხე-ტყე გაიცა, წელს კი დაახლოებით 4500 კუბური მეტრი გამოიყოფა. ჯუმბერ აბულაძის თქმით, კონკრეტული მიზეზი არ არსებობს, რის გამოც ეს რაოდენობა შემცირდა. მისი განმარტებით, მეტყევეები აღწერენ, საიდან არის მიზანშეწონილი ხის გამოტანა.

ჯუმბერ აბულაძის თქმით, მოსახლეობას პრობლემა არ შეექმნება საშეშე მასალაზე. მაღალმთიან რაიონებში მცხოვრები ოჯახი 15 კუბურ მეტრ შეშას მიიღებს, დაბლობში – 10-ს. ერთი კუბურ მეტრ საშეშე მასალაზე მოსაკრებელი 5-6 ლარს შეადგენს ხის ჯიშის მიხედვით.

რაც შეეხება სამასალე ხე-ტყის ფასს. ერთი კუბური მეტრი სამასალე ხე-ტყის ფასი 17 ლარია.

აჭარის რეგიონში კომერციული ჭრა დაშვებული არ არის. „ჩვენთან ტყეს ძირითადად ნიადაგდაცვითი ფუნქცია აქვს და მხოლოდ სოციალური ჭრა არის დაშვებული,“ – ამბობს აჭარის სატყეო საგენტოს უფროსის მოადგილე.

მთავარი ფოტო: ბიძინა ივანიშვილის პარკში ხეების გადატანის გამო მოჭრილი ხეები ჩაქვში.

“საქართველო აღიარებულია ლიდერად ევროპული ტრანსფორმაციის პროცესში. ევროკავშირის სივრცეში უვიზო მიმოსვლა, თავისუფალი სავაჭრო ურთიერთობები, თანამშრომლობა განათლების, მეცნიერების, ინოვაციების, კულტურის, ენერგეტიკის, გარემოს, სოფლის მეურნეობის, ტრანსპორტისა და კომუნიკაციების, უსაფრთხოებისა და დემოკრატიული ინსტიტუტების განვითარების და სხვა სფეროებში,  მრავალ მნიშვნელოვან მიმართულებაზე ევროკავშირის დახმარება – ეს ევროინტეგრაციით განპირობებული სიკეთეების მხოლოდ მცირე ჩამონათვალია,” – ამის შესახებ საქართველოს საგარეო საქმეთა მინისტრის მოვალეობის შემრულებელმა, მიხეილ ჯანელიძემ, საერთაშორისო კონფერენციის “საქართველოს ევროპულ გზა” გახსნის ცერემოანიაზე მისასალმებელი სიტყვით გამოსვლისას განაცხადა.

მიხეილ ჯანელიძის თქმით, საქართველო განუხრელად მიუყვება ევროპულ გზას, რომელიც წინაპრებმა საუკუნეების წინ განსაზღვრეს. მისი შეფასებით, საქართველო-ევროკავშირის თანამშრომლობა სრულიად ახალ ეტაპზეა და დღეს საქართველო ისე ახლოსაა ევროპულ ოჯახთან, როგორც არასდროს.

მიხეილ ჯანელიძემ სიტყვით გამოსვლისას მადლობა გადაუხადა ევროკავშირის უმაღლეს წარმომადგენელს საგარეო პოლიტიკისა და უსაფრთხოების საკითხებში ფედერიკა მოგერინის, ევროპარლამენტში გაკეთებული მოხსენებისთვის, რომელიც შეეხებოდა რეზოლუციას სახელწოდებით “საქართველოს ოკუპირებული ტერიტორიები რუსეთის შეჭრიდან 10 წლის შემდეგ”. მინისტრის მოვალეობის შემსრულებლის თქმით, მოხსენებაში მკაფიოდ დაფიქსირდა ევროკომისიის ხედვა კონფლიქტთან და რუსეთის აგრესიასთან დაკავშირებით.

“2008 წლის რუსეთ-საქართველოს ომისა და ცეცხლის შეწყვეტის შეთანხმების გაფორმებიდან 10 წლის შემდეგ რუსეთი კვლავაც განაგრძობს შეთანხმებით აღებული ვალდებულებების შეუსრულებლობას და ჩვენი ქვეყნის განუყოფელი ნაწილების – აფხაზეთისა და ცხინვალის რეგიონების – ანექსიისკენ ნაბიჯების გადადგმას. მიუხედავად აღნიშნულისა, საქართველო განუხრელად აგრძელებს კონფლიქტის მშვიდობიანი მოგვარების პოლიტიკის განხორციელებას საერთაშორისო თანამეგობრობის მკაფიო და ერთსულოვანი მხარდაჭერით. არსებული გამოწვევების ფონზე, უმნიშვნელოვანესია ევროკავშირის როლის ზრდა რეგიონში,” – თქვა მიხეილ ჯანელიძემ.

მინისტრის მოვალეობის შემსრულებელმა საკუთარ გამოსვლაში ასევე ისაუბრა ევრო-ატლანტიკური ინტეგრაციის პროცესის მნიშვნელობაზე და აღნიშნა, რომ ნატოში ინტეგრაციის გზაზე საქართველომ არაერთხელ დაადასტურა, რომ ალიანსის ღირებული და საიმედო პარტნიორია. მისი თქმით, ქვეყნის მოლოდინია, რომ ბოლო წლებში საქართველოს მიერ მიღწეული პროგრესი სანათადოდ იქნება შეფასებული და ასახული ნატო-ს ღია კარის პოლიტიკის კონტექსტში.

ბათუმში საერთაშორისო კონფერენცია “საქართველოს ევროპული გზა” მიმდინარეობს. რიგით მე-15 საერთაშორისო კონფერენცია წელს, პირველად, საგარეო საქმეთა სამინისტროს ორგანიზებით იმართება.

საგარეო საქმეთა მინისტრის მოვალეობის შემსრულებელი მიხეილ ჯანელიძის თქმით, კონფერენციაზე იმსჯელებენ აღმოსავლეთ პარტნიორობის ფორმატსა და პერსპექტივებზე, ასევე ევროკავშირის გაფართოების პოლიტიკაზე.

“აღსანიშნავია ბოლო წლების განმავლობაში ევროინტეგრაციის კუთხით გადადგმული განსაკუთრებული ნაბიჯები. მოგეხსენებათ, რომ გასულ წელს ჩვენ მივიღეთ უვიზო მიმოსვლა ევროკავშირთან, ასევე ჩვენ დავიწყეთ ახალი თანამშრომლობა თავდაცვისა და უსაფრთხოების სფეროში. ევროკავშირთან პირველად შევქმენით უმაღლესი ფორმატი საქართველო-ევროკავშირის ურთიერთობის ისტორიაში. ეს არის სექტორალური თანამშრომლობის ფორმატი ევროკომისიის პრეზიდენტისა და საქართველოს მთავრობის მონაწილეობით”, – განაცხადა საგარეო საქმეთა მინისტრის მოვალეობის შემსრულებელმა.

საერთაშორისო კონფერენცია მისასალმებელი სიტყვით გახსნა საქართველოს საგარეო საქმეთა მინისტრის მოვალეობის შემსრულებელმა მიხეილ ჯანელიძემ და ევროინტეგრაციის კუთხით საქართველოს მიერ მიღწეულ წარმატებაზე ისაუბრა.

კონფერენციის მონაწილეებს ასევე სიტყვით მიმართეს  საქართველოს პრეზიდენტმა გიორგი მარგველაშვილმა,  საქართველოს პარლამენტის თავმჯდომარემ ირაკლი კობახიძემ, ევროკომისიის სამეზობლო პოლიტიკისა და გაფართოების შესახებ მოლაპარაკებათა საკითხებში გენერალურმა დირექტორმა კრისტიან დანიელსონმა  და აჭარის ავტონომიური რესპუბლიკის მთავრობის თავმჯდომარემ ზურაბ პატარაძემ.

ბათუმის კონფერენცია 14-15 ივნისს გაგრძელდება. ღონისძიების თემატური სამუშაო სესიების მონაწილეები იმსჯელებენ ევროპული  დღის წესრიგის მთავარ საკითხებზე. მათ შორის, ევროპის უსაფრთხოების თანამედროვე არქიტექტურაზე, ევროკავშირსა და მის ასოცირებულ პარტნიორ ქვეყნებს შორის თანამშრომლობის ახალ ფორმებზე და საქართველოს როლის მნიშვნელობაზე რეგიონალური სტაბილურობის უზრუნველყოფაში.

ღონისძიებაში მონაწილეობას იღებენ საქართველოს, ევროკავშირის და „აღმოსავლეთ პარტნიორობის“ წევრი ქვეყნების აღმასრულებელი და საკანონმდებლო ხელისუფლების,  ასევე სამოქალაქო საზოგადოების, აკადემიური წრეების, მედიისა და ბიზნესსექტორის წარმომადგენლები.

ამ დროისთვის კონფერენცია უკვე დატოვეს საქართველოს პრეზიდენტმა და იუსტიციის მინისტრმა, ასევე პარლამენტის თავმჯდომარემ.

დღეს, 14 ივნისს, თბილისში უმრავლესობის სხდომა გაიმართება, სადაც, სავარაუდოდ, პრემიერობის კანდიდატს დაასახელებენ.

რამდენიმე დღეა ბათუმის ცენტრალურ პარკში ნურის ტბის გამო მძაფრი, უსიამოვნო სუნი დგას. ორი დღის წინ კი ტბაში დახოცილი თევზები გამოჩნდნენ, რომლებსაც დასუფთავების სამსახური პერიოდულად იღებს წყლიდან, თუმცა მკვდარი თევზები ტბის ზედაპირზე კვლავ ტივტივებენ.

ნურეს ტბის პრობლემას რამდენიმე წელია იკვლევენ, თუმცა დაჭაობების თავიდან აცილების ზუსტი გზები ჯერაც არ არის ცნობილი. ტბის საკითხი ახლა ააიპ ინფრასტრუქტურისა და კეთილმოწყობის სამმართველოს პრეროგატივაა, სადაც განგვიმარტეს, რომ ტბიდან სინჯს ლაბორატორიული კვლევისთვის დღეს აიღებენ, იქამდე კი თევზების დახოცვის სავარაუდო მიზეზებზე ვერ საუბრობენ:

“დღეს, პირველ საათზე, ლაბორატორია აიღებს სინჯებს უკვე შუა ტბიდან, ნავით შევლენ და ამის შემდეგ გვეცოდინება გამომწვევი მიზეზი. ჩვენც შეწუხებული ვართ… წესით, არ უნდა ყოფილიყო ის, რაც ხდება ტბაში. შესაბამისად, სინჯების პასუხების შემდეგ შეგვიძლია ვისაუბროთ გამომწვევ მიზეზებსა და ალტერნატიულ გზებზე, რომ ამ ყველაფერს შევებრძოლოთ,” – გვითხრეს სააგენტოში.

ამერიკული კომპანია LAKE AND WETLAND MANAGEMENT [ტბისა და ჭაობის მართვა], რომელიც გარემოს რესურსების მართვის ჯგუფია 1992 წლიდან, ტბაში თევზების დახოცვის ყველაზე ხშირ მიზეზად ტბაში უჟანგბადობასა და ჟანგბადის ბრუნვის დარღვევას მიიჩნევს.

უსიამოვნო სუნისა და ტბაში მწვანე ნადების მიზეზი ციანობაქტერიაა, რომლის დონე ჯერ კიდევ 2016 წლის ივნისში გაიზარდა.

ტბაში ციანობაქტერიების მატების მთავარ მიზეზად სპეციალისტებმა ტბასა და ზღვას შორის შეწყვეტილი წყლის მიმოქცევა დაასახელეს.

ლაბორატორიული კვლევების  საფუძველზე შემუშავდა ტბის პრობლემის მოგვარების რამდენიმეპუნქტიანი გეგმა, რომლითაც, პირველ რიგში, ტბაში სააერაციო სისტემის მონტაჟი უნდა განხორციელებულიყო. გარდა ამისა, სპეციალისტები შეთანხმდნენ, რომ ტბის გასუფთავების მიზნით, უნდა მოხდეს ტბის დათევზიანება სპეციალური ჯიშით, რომელიც წყალმცენარეებით იკვებება.

2016 წელს ნურიგელის ტბაში აერაციის სისტემა და აერაციის შადრევანი [აერაციის შადრევანი 50 მ სიმაღლის ჭავლს წარმოქმნის და ჟანგბადით ამდიდრებს წყალს] დაამონტაჟეს, რომელთა დანიშნულებაც ტბის წყლის ჟანგბადით გაჯერებით, ამცირებს ტბის ეკოლოგიური დეგრადაციის პროცესს.

აერაციის სისტემის დამონტაჟების შედეგად, გასულ წელს სპეციალისტებმა თქვეს, რომ ჟანგბადის მაჩვენებელი მასში დაახლოებით 5-ჯერ გაიზარდა. “ბათუმელებთან” საუბრისას ტურისტული ობიექტების მართვის სააგენტოს მაშინდელი ხელმძღვანელი ციანობაქტერიების გამრავლებას ისეთივე ინტენსიური ფორმით, როგორც 2016 წელს იყო, აღარ მოელოდა.

ბათუმის ცენტრალური პარკის ტბის სიგრძე 360 მ-ია, სიგანე – 160 მ, მაქსიმალური სიღრმე – 6, 3 მ. ზედაპირის ფართობი –  57 600 კვ.მ, ხოლო წყლის სავარაუდო მოცულობა 230 000 კუბური მეტრია.

ბათუმის თოჯინების თეატრი მემედ აბაშიძის გამზირზე მდებარე კუთვნილი შენობის სარდაფში საბავშვო ატრაქციონს – ელექტრომატარებელს დაამონტაჟებს. თეატრში „ბათუმელებს“ უთხრეს, რომ შენობის სარდაფში დაგეგმილი აქვთ თოჯინების თეატრის მუზეუმის გახსნა, სადაც მოზარდები ელექტრომატარებლით გაისეირნებენ. მუზეუმის გახსნას თეატრი 2018 წლის სექტემბრისთვის გეგმავს.

„თეატრის შენობის სარდაფში მოეწყობა მუზეუმი იმ სპექტაკლების ძველი დეკორაციებით, რომლებიც მოქმედი აღარ არის და ამ დეკორაციებში გაივლის საბავშვო მატარებელი. ეს იქნება ერთგვარი ექსკურსია მუზეუმში ბავშვებისთვის. მუზეუმი ჩვენი ძალებით მოეწყობა – გვაქვს ძველი დეკორაციები, კოსტიუმები და განვალაგებთ“, – გვითხრა ბათუმის თოჯინებისა და მოზარდ მაყურებელთა სახელმწიფო თეატრის დირექტორმა თემურ მახარაძემ.

საბავშვო ატრაქციონის – ელექტრომატარებლის შესაძენად თეატრს 30 600 ლარი აქვს გამოყოფილი. მატარებელს ტენდერით შეიძენენ. მიმწოდებელი ვალდებული იქნება, თავად დაამონტაჟოს ატრაქციონი მითითებულ ადგილზე.

საბავშვო მატარებლის შემადგენლობაში იქნება ერთი ლოკომოტივი [2 ადგილით] და სამი ვაგონი [თითოეულში 4 ადგილი].

თეატრში აცხადებენ, რომ საწყის ეტაპზე მატარებლით გასეირნება პატარებისთვის უფასო იქნება, შემდეგ კი დაითვლება ხარჯები და შესაბამისად, შესაძლოა ფასიანი გახდეს.

დღეს, 13 ივნისს, პრემიერ-მინისტრი გიორგი კვირიკაშვილი გადადგა. შესაბამისად გადამდგარია მთავრობის სრული შემადგენლობა. აღნიშნულის შესახებ ცნობილი გახდა დღეს, 13 ივნისს, მთავრობის კანცელარიაში გამართულ ბრიფინგზე.

გიორგი კვირიკაშვილმა განაცხადა, რომ აზრთა სხვადასხვაობა ხშირად ჰქონია პარტია “ქართული ოცნების”თავმჯდომარესთან და ყოფილ პრემიერ-მინისტრთან ბიძინა ივანიშვილთან და მიიჩნევს, რომ ახლა მას უნდა ჰქონდეს შესაძლებლობა სურვილისამებრ დააკომპლექტოს მთავრობა.

გიორგი კვირიკაშვილმა სანამ თანამდებობის დატოვების შესახებ განცხადებას გააკეთებდა, მანამდე იმ ეკონომიკური პოლიტიკის შესახებ ისაუბრა, რომელსაც მთავრობა ატარებდა. მისი თქმით, ბევრი მტკივნეული, მაგრამ აუცილებელი გადაწყვეტილება მიიღო. კვირიკაშვილმა მადლობა გადაუხადა ყველა ადამიანს, ვინც მასთან ერთად მუშაობდა მისი პრემიერ-მინისტრობის დროს. კვირიკაშვილმა მადლობა გადაუხადა ბიძინა ივანიშვილს იმისთვის, რომ ”მისცა საშუალება საქართველოსთვის ემსახურა”. კვირიკაშვილმა ივანიშვილს წარმატებებიც უსურვა.

ქართული მედიასაშუალებების ნაწილი 12 ივნისს დილიდან ავრცელებდნენ ინფორმაციას, რომ იგეგმებოდა სამთავრობო ცვლილებები. კერძოდ, შესაძლოა, პოსტი დატოვონ პრემიერ-მინისტრმა გიორგი კვირიკაშვილმა და იუსტიციის მინისტრმა თეა წულუკიანმა. გუშინ უმრავლესობის სხდომის დასრულების შემდეგ ეს ინფორმაცია არ დაადასტურეს მმართველი პარტიის ლიდერებმა, თუმცა ზოგიერთმა მათგანმა არ გამორიცხა ცვლილებები.