სკოლის ექსკურსიების უსაფრთხოებაზე პასუხისმგებლობა დირექტორს და სკოლას დაეკისრება


საქართველოს განათლებისა და მეცნიერების მინისტრის გადაწყვეტილებით, სკოლა ვალდებულია პასუხისმგებლობა აიღოს არა მარტო სკოლის მიერ ორგანიზებული ექსკურსიების უსაფრთხოებაზე, არამედ თვითორგანიზებულ ექსკურსიებზეც.

მინისტრის მოადგილე ლია გიგაური „ბათუმელებთან“ საუბარში ამბობს, რომ სკოლა ვალდებულია სატრანსპორტო საშუალება იმ კომპანიისგან იქირაოს, რომელიც პასუხისმგებელი იქნება  როგორც მძღოლის პროფესიონალიზმზე, ასევე მიაწვდის მათ ტექნიკურად გამართულ სატრანსპორტო საშუალებას.

„მნიშვნელოვანია ისიც, რომ როცა ბევრი ბავშვი გადაადგილდება,  ტრანსპორტს ჰქონდეს წარწერა- „ბავშვები“, რაც არა მხოლოდ იმ მძღოლს, რომელიც მართავს ამ სატრანსპორტი საშუალებას, არამედ სხვებსაც გააფრთხილებს, დაიცვან მოძრაობის წესები.

სკოლამ უნდა შეამოწმოს არის თუ არა ტრანსპორტში ზუსტად იმდენი ადგილი, რამდენი ბავშვიც გადაადგილდება, ასევე, ახალი რეგულაციების მიხედვით,  ვითხოვთ, ჯგუფში იყოს ისეთი ადამიანი, რომელსაც გავლილი აქვს პირველადი სამედიცინო დახმარების კურსი და საჭიროების შემთხვევაში  შესაბამის ზომებს მიიღებს,“-ამბობს გიგაური.

მძღოლი ვალდებულია, კარგად იცოდეს ის მარშრუტი, რომელზეც გადაადგილდება. აუცილებლად უნდა დაიცვას ყველა ნიშნული, რომელიც განთავსებულია გზაზე. თუკი მძღოლი არ ემორჩილება საგზაო მოძრაობის წესებს, სკოლის წარმომადგენელი ვალდებულია გააჩეროს სატრანსპორტო საშუალება  და გამოიძახოს  შესაბამისი ორგანოები, ვინც რეაგირებას მოახდენენ,“-ამბობს ლია გიგაური.

მისი თქმით, თითოეული ადამიანი, რომელიც ჩართულია ექსკურსიის ორგანიზების პროცესში,  პასუხისმგებელია ბავშვების უსაფრთხო გადაადგილებაზე.

ლია გიგაურის თქმით, თუკი სკოლის ადმინისტრაცია არ დაიცავს ექსკურსიებთან დადგენილ სტანდარტებს, პასუხისმგებლობა სკოლის ადმინისტრაციას  დაეკისრება, მათ შორის სკოლის დირექტორს და ვალდებულებების არაჯეროვნად შესრულებისთვის ის შესაძლებელია თანამდებობიდან გათავისუფლდეს კიდეც.

ექსკურსიებთან დაკავშირებული კონკრეტული რეგულაციები სკოლებს ადრეც ჰქონდათ სამინისტროსგან მიწოდებული, თუმცა როგორც გიგაური ამბობს, ბოლო დროს  მომხდარმა ტრაგიკულმა შემთხვევებმა  გამოიწვია  რეგულაციების გამკაცრება.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com