მუსლიმური სამყარო რამადან ბაირამს – ერთთვიანი მარხვის დასასრულს ზეიმობს. ბათუმის ორ მეჩეთში დღეს რამადანის ლოცვა ერთდროულად მიმდინარეობდა. ქუთაისის ქუჩაზე მისული მუსლიმების ნაწილი ტრადიციულად ქუჩაში ლოცულობდა, რადგან ძველი მეჩეთი მლოცველებს ვერ იტევს.
ღია ცის ქვეშ ილოცეს მუსლიმებმა გენერალ აბაშიძის ქუჩაზეც. იქ, სადაც მეჩეთის აშენება სურთ, დღემდე მხოლოდ ბრეზენტით გადახურული ხის კონსტრუქციაა. ხელისუფლება მათ მეჩეთის აშენების ნებართვას არ აძლევს.
მუსლიმები რამდენიმე წელია უშედეგოდ ითხოვენ ბათუმში ახალი მეჩეთის აშენებას. ფოტო: მანანა ქველიაშვილი/ბათუმელები
რამადან ბაირამის სადღესასწაულო ლოცვა ღია ცის ქვეშ
ფოტო: მანანა ქველიაშვილი/ბათუმელები
ლოცვის შემდეგ – ორთაჯამე, ბათუმი
ფოტო: მანანა ქველიაშვილი/ბათუმელები
საქართველოს მუფთმა ბეგლარ ქამაშიძემ მიმართვა გაავრცელა და მუსლიმებს რამადანი მიულოცა.
„ეს დღესასწაული მორწმუნეთათვის რამადნის მთვარის ღირსეული საჩუქარია. დაე, მთელს მსოფლიოში დასრულებულიყოს არეულობა, ძალადობა, სისხლისღვრა, მშობლების წუხილი და ახალგაზრდების ტრაგედიები. დღესასწაული განაწყენებულთა შერიგების, ერთიანობის გაძლიერების და ურყევი ძმობის გამოვლინების საუკეთესო მომენტია“, – ნათქვამია მიმართვაში.
რამადან ბაირამი სამ დღეს გასტანს.
