სარფში არადეკლარირებული სიგარეტი ამოიღეს

14 ივნისს  ფინანსთა სამინისტროს შემოსავლების სამსახურის მებაჟე ოფიცრებმა, საბაჟო გამშვებ პუნქტში – „სარფი“, აქციზური მარკით ნიშანდებას დაქვემდებარებული საქონლის ქვეყანაში კანონდარღვევით შემოტანის მცდელობის ორი ფაქტი დააფიქსირეს.

კერძოდ, 1200 ღერი სიგარეტი „პირველი“ (PIRVELI) და 180 ღერი სიგარეტი „ზუმერიტი“ (ZUMERRET) კანონდამრღვევ პირს, კ.მ-ს, სხეულზე ჰქონდა დამაგრებული. ასევე, „სარფში“, მებაჟე ოფიცრებმა ამოიღეს 480 ღერი არადეკლარირებული სიგარეტი „პირველი“ (PIRVELI), რომელიც მოქალაქე ბ.ც-ს სხეულზე  წებოვანათი ჰქონდა დამაგრებული.

საქართველოს საგადასახადო კოდექსის 289-ე მუხლის მ-14 ნაწილის შესაბამისად, კანონდამრღვევ პირებს  სანქციის სახით შეეფარდათ ჯარიმა ათას-ათასი ლარის ოდენობით და საქონლის ჩამორთმევა.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან