ქედაში მერობისთვის ხუთი კანდიდატი იბრძოლებს. მერობის კანდიდატები წარადგინა „ქართულმა ოცნებამ“, „ნაციონალურმა მოძრაობამ“, „ევროპულმა საქართველომ“, „პატრიოტთა ალიანსმა“ და საარჩევნო ბლოკმა – „დიმიტრი ლორთქიფანიძე, კახა კუკავა დემოკრატიული მოძრაობა, თავისუფალი საქართველო“.
ქედაში მერობის კანდიდატი „ოცნებიდან“ პროფესიით ექიმი ლევან გორგილაძეა, აჭარის ჯანდაცვის ყოფილი მინისტრი. მინისტრად დანიშვნამდე იგი სხვადასხვა პერიოდში უბნის ექიმად, აჭარის სასამართლო- სამედიცინო ექსპერტიზის ბიუროს სამედიცინო კრიმინალისტიკური განყოფილების გამგედ, „რესპუბლიკური ნარკოლოგიური ცენტრის“ დირექტორად და სასამართლო ექსპერტიზის ერონული ბიუროს აჭარის რეგიონული ექსპერტიზის სამსახურის უფროსად მუშაობდა.
„ნაციონალურმა მოძრაობამ“ ქედის მერად ქედის ყოფილი გამგებლის და აჭარის უმაღლესი საბჭოს ყოფილი დეპუტატის – ირაკლი ბარამიძის კანდიდატურა წარადგინა.
„პატრიოტთა ალიანსის“ სახელით ქედის მერობისთვის „ოცნების“ გუნდის ყოფილი წევრი, როსტომ შერვაშიძე იბრძოლებს.
როსტომ შერვაშიძეს 2012 წლის 5 ნოემბრიდან 2016 წლის 19 ივლისამდე აჭარის სოფლის მეურნეობის მინისტრის მოადგილის თანამდებობა ეკავა, მინისტრის მოადგილედ დანიშვნამდე კი იგი ბელორუსში ბიზნესსაქმიანობას ეწეოდა.
,,ევროპული საქართველოს“ სახელით ქედაში ბათუმის შოთა რუსთაველის სახელმწიფო უნივერსიტეტის ასოცირებული პროფესორი და ქედის მოქმედი საკრებულოს წევრი თემურ ავალიანი იბრძოლებს.
საარჩევნო ბლოკმა „დიმიტრი ლორთქიფანიძე, კახა კუკავა დემოკრატიული მოძრაობა, თავისუფალი საქართველო“ ქედის მერად ზვიად ფარტენაძის კანდიდატურა დაასახელა.
