ხულოს 8-ე4 ოლქის თავმჯდომარის, ნოდარ მელაძის ინფორმაციით მეორე ტური იქნება ხულოს მუნიციპალიტეტშიც. გამგებლის პოზიციის დასაკავებლად ამ ოლქში „ქართული ოცნების“ კანდიდატი, მოქმედი გამგებელი ბესიკ ბუაჩიძე (49,7%) და „თარხან მოურავი პატრიოტთა ალიანსის“ კანდიდატი ემზარ ბოლქვაძე (31,7%) იბრძოლებენ.
რაც შეეხება ნაციონალური მოძრაობის კანდიდატს ოთარ შაინიძეს ხულოში მან ხმების 10,87% მიიღო.
ხულოს ოლქში „ქართული ოცნების“ 9 მაჟორიტარმა გაიმარჯვეს. „ნაციონალების“ კანდიდატებმა გაიმარჯვეს ორ ოლქში – დაბა ხულოსა და ხიხაძირში; დამოუკიდებელმა კანდიდატმა გაიმარჯვა ორ ოლქში – დეკანაშვილებსა და დიდაჭარაში; ვაშლოვანში გამარჯვება მოიპოვა ნინო ბურჯანაძის კანდიდატმა.
პროპორციული სიით „ქართულმა ოცნებამ“ 58%-ი მიიღო და 9 წევრს შეიყვანს საკრებულოში, ნაციონალურ მოძრაობას 3 მანდატი ექნება, 1 მანდატი – თარხან მოურავის პარტიას, 1 ან 2 წარმომადგენელი კი – ნინო ბურჯანაძეს.
ხულოს ოლქის თავმჯდომარის ინფორმაციით არჩევნებში მონაწილეობა მიიღო 14 152 ამომრჩეველმა; ხულოში სულ 23 915 ამომრჩეველია.
