მთავარი,სიახლეები

ბათუმელი „რესპუბლიკელები“ სამშენებლო რეგულაციებში ცვლილებას ითხოვენ

12.05.2017 • 2075
ბათუმელი „რესპუბლიკელები“ სამშენებლო რეგულაციებში ცვლილებას ითხოვენ

ბათუმის საკრებულოს ფრაქცია „რესპუბლიკელები“ 50-ე დადგენილებაში ცვლილებებს ითხოვენ. ეს დადგენილბა საკრებულომ 2012 წლის 14 სექტემბერს მიიღო და ის ბათუმში სამშენებლო რეგულაციებს ადგენს. ინიციატივა საკრებულოში ფრაქციის ხელმძღვანელმა თემურ ყურაშვილმა უკვე დაარეგისტრირა. მისივე ინფორმაციით, საკითხზე დაწყებულია ადმინისტრაციული წარმოება.

ფრაქცია გამოდის ინიციატივით სამშენებლო ობიექტების მიმართ განისაზღვროს დამატებითი მოთხოვნები:

• ყველა საცხოვრებელი ერთეული (ბინა), 40 კვ. მეტრამდე ფართობის ე.წ. “სტუდიოს” ტიპის ბინის გარდა, უზრუნველყოფილი უნდა იყოს გამჭოლი ან კუთხური განიავებით. “სტუდიოს” ტიპის ბინებისთვის დასაშვებია განიავება ვერტიკალური შახტების საშუალებით.

• მრავალბინიან საცხოვრებელი სახლებში საერთო ფართობის ყოველ 60 კვ. მეტრზე აუცილებელია 3 კვ.მ ფართობის ინდივიდუალური ან კოლექტიური სარგებლობის საშრობების მოწყობა.

• მრავალბინიანი საცხოვრებელი სახლების მიწისპირა ან პირველ სართულებზე ყველა სადარბაზოში გათვალისწინებული უნდა იყოს 30 კვ.მეტრი დამატებითი ფართობი საფოსტო ყუთებისა და სხვადასხვა დანიშნულების მრიცხველების განსათავსებლად, ასევე საბავშვო ეტლებისა და ველოსიპედების დროებითი პარკირებისათვის.

• საზოგადოებრივ სივრცეში შეჭრის შემთხვევაში ერკერებისა და შენობის სხვა ამოშენებული ნაწილების ჯამური ფრონტალური ფართობი არ უნდა აღემატებოდეს საზოგადოებრივ სივრცეზე გამავალი ფასადის საანგარიშო ზედაპირის 15%-ს, ხოლო მაღლივი შენობებისთვის 20%-ს.

• მშენებლობის ნებართვის ვადის გაგრძელება დასაშვებია მხოლოდ 2-ჯერ. შემდეგ უნდა მოხდეს მშენებლობის კონსერვაცია.

• მშენებლობის ნებართვის გაცემის მომენტიდან იმ დრომდე, ვიდრე შენობის ექსპლუატაციაში მიღებიდან არ გავა 30 თვე, აიკრძალოს დამტკიცებულ საპროექტო დოკუმენტაციაში ისეთი ცვლილებების შეტანა, რაც 2%-ზე მეტად გაზრდის შენობის მოცულობას ან ფართობს.

• ტროტუარის ჩაუხერგავი ნაწილის მინიმალური სიგანე განისაზღვროს 150 სანტიმეტრით. ტროტუარის ამ ნაწილით სარგებლობის უფლება აქვთ მხოლოდ ფეხით მოსიარულეებსა და ეტლით მოსარგებლეებს. დაუშვებელია აქ როგორც სტაციონარული (ველო-ბილიკები, ურნები, ბოძკინტები, განათების ბოძები, ტრანსფორმატორები, სხვადასხვა სახის მრიცხველები, საყვავილეები, სარეკლამო სტენდები, წყლის სასმელი შადრევნები, მცირე არქიტექტურული ფორმები, ურბანული დიზაინის სხვა ელემენტები), ასევე დროებითი (პრესის სტენდი, სავაჭრო დახლი, ე.წ. “გარე ვაჭრობა”, მოძრავი რეკლამები და სხვა) ობიექტების განთავსება.

ამავე თემაზე: K-3 – უგულებელყოფილი გამწვანების კოეფიციენტი ბათუმში;

მშენებლობის რეგულაციებზე ბათუმის მერიის ნაცვლად აჭარის მთავრობა მუშაობს

ხელისუფლების მიერ ლობირებული სამშენებლო ბიზნესი

ერია 1 კვადრატულ მეტრ უკანონო მშენებლობას 400 ლარად დააკანონებს – ახალი ინიციატივა

გადაბეჭდვის წესი


ასევე: