ხელვაჩაურის მუნიციპალიტეტის სოფელ სარფში საჯარო სკოლის ახალი შენობა აშენდება. სკოლის არსებული შენობა ორსართულიანია, ახალი კი, პროექტის მიხედვით, სამსართულიანი იქნება. შენობა, მშენებელ კომპანიასთან ხელშეკრულების გაფორმებიდან 15 თვეში უნდა აშენდეს.
სატენდერო პირობის თანახმად, ვადის ცვლილების [გაზრდის] საფუძველს არ წარმოადგენს თოვლი, წვიმა და სხვა მსგავსი მეტეოროლოგიური მოვლენები, ასევე ობიექტის მიმდებარედ მიმდინარე სხვა სამუშაოები [3 თვე ზამთრის პერიოდი იმ 15 თვიან პერიოდში გათვალისწინებულია].
სარფის საჯარო სკოლის მშენებლობის სამუშაოების შესყიდვაზე ტენდერი აჭარის განათლების, კულტურისა და სპორტის სამინისტრომ გამოაცხადა. შესყიდვის სავარაუდო ღირებულება 1 მილიონ 871 ათას 477 ლარია. წინადადებების მიღება მიმდინარე წლის 17 მაისს დაიწყება და 22 მაისს დასრულდება.
პროექტით, შენობას ექნება სპორტდარბაზი, გარე სპორტული მოედანი, დამონტჟდება ლიფტი და კეთილმოეწყობა სკოლის ეზოც.
სარფის საჯარო სკოლის დირექტორის, ირმა მგელაძის ინფორმაციით, დაგეგმილი მშენებლობის გამო სწავლა სკოლაში მაისის ბოლოს შეწყდება, ამიტომ აქ სასწავლო პროცესი შაბათობითაც მიმდინარეობს. რაც შეეხება მშენებლობის პერიოდში სად და როგორ გაგრძელდება სასწავლო პროცესი შემოდგომაზე, ამის შესახებ კონკრეტული გადაწყვეტილება მიღებული ჯერ არ არის.
სარფის საჯარო სკოლაში, დირექტორის ინფორმაციით, ამჟამად 145 მოსწავლე სწავლობს, მათ შორის 31 მოსწავლე გონიოდან და სოფელ კვარიათიდანაა.
სარფის საჯარო სკოლა / ფოტო „ბათუმელების“ არქივიდან
საპროექტო ტერიტორია
სარფის საჯარო სკოლის ახალი შენობის მაკეტი საპროექტო დოკუმენტაციიდან
