შპს „კახური ტრადიციული მეღვინეობის“ ქედის ხილის გადამამუშავებელმა საწარმო „ნენამ“ მუშაობა გახსნიდან მეორე წელს შეაჩერა. საწარმოს მუშაობის შეჩერების მიზეზად კომპანიის აღმასრულებელი დირექტორი, ალექსანდრე დადიანი „ბათუმელებთან“ დასაქმებული თანამშრომლების გათავისუფლებას ასახელებს. დირექტორის განმარტებით, ქედის საწარმოში დასაქმებული ყველა თანამშრომელი მათივე პირადი განცხადებების საფუძველზე გაათავისუფლეს.
„საწარმო არ დახურულა, მხოლოდ დროებით აქტიური ფუნქციონირება შეაჩერა. რაც აუცილებელია საწარმოსთვის ყველა საქმე კეთდება. რაც შეეხება დროებით შეჩერებას, ამის მიზეზი თანამშრომლების გათავსუფლება გახდა, მენეჯმენტში იყო უთანხმოება, 2-3 თვის წინ ყველა თანამშრომელმა გათავისუფლება მოითხოვა, რაც დავაკმაყოფილეთ, პირად განცხადებაში გათავისუფლების მოთხოვნის მიზეზი არ იყო ნახსენები,“ – ამბობს ალექსანდრე დადიანი.
საწარმოში მუშაობის შეჩერებამდე „ნენას“ მენეჯერი გოჩა გათენაძე ქედაში წარმოებული პროდუქციის რეალიზაციის პრობლემაზე საუბრობდა. კითხვაზე რეალიზაციის პრობლემა ხომ არ გახდა თანამშრომლების გათავისუფლების წინაპირობა და დასაქმებულთა შრომის ანაზღაურება იყო თუ არა დამაკმაყოფილებელი? ალექსანდრე დადიანი პასუხობს:
„რეალიზაციის პრობლემა პირველად იყო, შემდეგ ამ კუთხით პრობლემა არ ყოფილა. ქედაში წარმოებული პროდუქციის რეალიზაცია ახლაც მიმდინარეობს, ექსპორტზეც გაგვაქვს ნაწარმი. რაც შეეხება თანამშრომელთა ანაზღაურებას, პირადული საკითხია, თუმცა ამაზე საკუთარი მოსაზრება არავის გამოუხატავს“.
ალექსანდრე დადიანი დასძენს, რომ თანამშრომლების შესარჩევად ვაკანსია ოფიციალურად გამოაცხადებს, ხილის მიღებას კი ქედის საწარმო ხილის შემოსვლისას შეძლებს.
„ნენას“ ქედის საწარმოში 38 ადგილობრივი იყო დასაქმებული, საწამოს მუშაობის შეჩერების მიზეზთან დაკავშირებით ყოფილმა მენეჯერმა გოჩა გათენაძემ კომენტარის გაკეთება არ ისურვა.
„ბათუმელები“ ამ დრომდე საწარმოს ყოფილ თანამშრომლებს ვერ დაუკავშირდა.
ხილის გადამამუშავებელი საწარმო „ნენა“, შპს „კახურმა ტრადიციულმა მეღვინეობამ“ ქედაში 2014 წელს შეღავათიანი აგროკრედიტის ფარგლებში მოაწყო და პირველი პროდუქცია ჯემების, მურაბებისა და საწებლის სახით 2015 წელს გამოუშვა. ქედაში სხვადასხვა ხილისგან წარმოებული სამი სახის პროდუქცია [საწებელი, მურაბა, ჯემი] მწარმოებელმა ექსპორტზეც გაიტანა.
