მთავარი,სიახლეები

„რესპუბლიკური საავადმყოფო“ მალე მუშაობას შეაჩერებს

27.01.2017 • 1868
„რესპუბლიკური საავადმყოფო“ მალე მუშაობას შეაჩერებს

„ისე არ უნდა მოხდეს, როგორც სპორტსკოლის შემთხვევაში. ყველა ექიმს უნდა ავუხსნათ და დაველაპარაკოთ ამის შესახებ“, – დაახლოებით ამ სიტყვებით მიმართა დღეს აჭარის მთავრობის თავმჯდომარე, ზურაბ პატარაძემ მთავრობის სხდომაზე ეკონომიკის მინისტრს. რამაზ ბოლქვაძემ ინფორმაცია სხვადასხვა ინფრასტრუქტურული პროექტების მიმდინარეობის შესახებ წარმოადგინა, მათ შორის, ბათუმის რესპუბლიკურ საავადმყოფოზე. ზურაბ პატარაძეს სხდომაზე არ დაუკონკრეტებია, რა იგულისხმებოდა „ექიმებთან დალაპარაკებაში“.

„ამაში იგულისხმებოდა ის, რომ რესპუბლიკური საავადმყოფო გარკვეულ პერიოდში ფუნქციონირებას შეწყვეტს“, – უთხრა „ბათუმელებს“ რამაზ ბოლქვაძემ სხდომის დასრულების შემდეგ. მინისტრის განმარტებით, ახალი კლინიკის მშენებლობა 2018 წლის 1 აპრილამდე უნდა დასრულდეს. მანამდე კი, დაახლოებით 6 თვე საავადმყოფო ფუნქციონირებას შეწყვეტს.

„უახლოეს დღეებში ჩვენ დავაანონსებთ, როდის შეწყვეტს ფუნქციონირებას საავადმყოფო. ჩვენ გვინდა ყველა ექიმს დაველაპარაკოთ და მოხდეს სრული ინფორმირება, რომ ამ პროცესმა რაღაც გაუგებრობა არ გამოიწვიოს. ამ ეტაპზე მიმდინარეობს მოლაპარაკებები, სად შეიძლება დასაქმდნენ ამ პერიოდში იქ დასაქმებული ექიმები. ჩემი ინფორმაციით, მოთხოვნა სამედიცინო პერსონალზე ისედაც საკმაოდ დიდია და მათი ნაწილი ისედაც მუშაობს სხვადასხვა კლინიკაში“, – გვითხრა რამაზ ბოლქვაძემ, აჭარის ფინანსთა და ეკონომიკის მინისტრმა.

გადაბეჭდვის წესი


ასევე: