ბათუმში, გონიოს ყოფილი სამხედრო პოლიგონის მიმდებარედ ზღვაში 82 ჰექტარს, „ოცნების“ მთავრობამ განსაკუთრებული რეგულირების ტერიტორიის სტატუსი მიანიჭა. 2026 წლის აგვისტოში კი, ეს 82 ჰექტარი ზღვაში სახელმწიფომ არასასოფლო სამეურნეო ნაკვეთად დაარეგისტრირა.
2026 წლის მაისში განსაკუთრებული რეგულირების ტერიტორიის სტატუსი მიენიჭა ყოფილი პოლიგონისა და მიმდებარე მიწის ნაკვეთებს – ჯამში 2,6 მილიონ კვადრატულ მეტრ ფართობს.
ბათუმის გარდა იგივე სტატუსი მიენიჭა თბილისსა და გარდაბანში – „კრწანისის პარკსა“ და მიმდებარე ნაკვეთებსაც. „ოცნების“ მთავრობის განცხადებით, ამ ტერიტორიებზე არაბული ინვესტიცია უნდა განხორციელდეს.
ზღვაში დარეგისტრირებული ტერიტორიაც „არაბულ ინვესტიციას“ უკავშირდება, ვინაიდან აქ „იგლ ჰილსის“ ესკიზის მიხედვით ნავმისადგომი და იახტების შესასვლელი უნდა მოეწყოს.
საქართველოს მთავრობის 2026 წლის 10 ნოემბრის დადგენილებით, რომელსაც ხელს ირაკლი კობახიძე აწერს, ცვლილება შევიდა წინა, 29 მაისის დადგენილებაში, რითაც განსაკუთრებული რეგულირების ტერიტორიის საზღვრებში გაერთიანდა, როგორც ყოფილი პოლიგონის, ასევე ზღვაში რეგისტრირებული ნაკვეთი. შესაბამისად, ამ სტატუსის ქვეშ მოექცა ჯამში 3 662 627 კვადრატული მეტრი ფართობის ტერიტორია [ზღვა, პლაჟი, ყოფილი პოლიგონი].
ეს ცვლილება 12 ნოემბრიდან ამოქმედდა.
განსაკუთრებული რეგულირების ტერიტორია ბათუმში [მასში გაერთიანებულია ყოფილი პოლიგონი, პლაჟი და ზღვაში რეგისტრირებული ნაკვეთი] / წყარო: მთავრობის 10 ნოემბრის დადგენილება
გონიო-კრწანისის დაცვის საორგანიზაციო ჯგუფი აცხადებს, რომ გასაიდუმლოებული ხელშეკრულების საფუძველზე კრწანისსა და გონიოში მიწის დიდი ფართობების არაბულ კომპანია Eagle Hills-ისთვის გადაცემა ფართო საზოგადოებრივი პროტესტის საგანია.
„საქართველოს მოქალაქეების ინტერესი, იცოდეს და შეაფასოს ფასეული სახალხო საკუთრების გასხვისების/სარგებლობაში გადაცემის დეტალები, ბევრად აღემატება კომპანიის კომერციულ ინტერესებს“ – აცხადებენ საორგანიზაციო ჯგუფში.
გონიოს ყოფილი პოლიგონისა და ზღვაში რეგისტრირებული ნაკვეთის ტერიტორია შედის ზურმუხტის ქსელის „ჭოროხის დელტას“ საიტის საზღვრებში და მას ბერნის კონვენცია იცავს.
საქართველოს ასოცირების შეთანხმებითაც აქვს ვალდებულება შექმნას და დაიცვას ზურმუხტის ტერიტორია. საინვესტიციო პროექტის გამო კი მთავრობა, „საჭიროების შემთხვევაში“, ზურმუხტის ქსელის ტერიტორიის საზღვრის კორექტირებასაც განიხილავს.
ამ თემაზე ვრცლად:
რას ცვლიან არაბული ინვესტიციის გამო ჭოროხის დელტაში – ინტერვიუ
