Batumelebi | ინტერვიუ მიწერ-მოწერით საკადრო პოლიტიკის შესახებ პოლიციაში ინტერვიუ მიწერ-მოწერით საკადრო პოლიტიკის შესახებ პოლიციაში – Batumelebi
RU | GE  

ინტერვიუ მიწერ-მოწერით საკადრო პოლიტიკის შესახებ პოლიციაში



შს სამინისტროს პრესცენტრის ხელმძღვანელი, ნინო გიორგობიანი ირწმუნება, რომ აჭარაში პოლიციის სამმართველოს უფროსს მედიასთან ურთიერთობა აკრძალული არ აქვს და ამას ის მოუცლელობის გამო ვერ ახერხებს. სწორედ ამით ახსნა გიორგობიანმა ვალერი თელიასთვის დასასმელი კითხების გადაგზავნა თავის ელფოსტაზე. რედაქცია ბოდიშს უხდის მკითხველს იმის გამო, რომ ზოგიერთ კითხვაზე გაცემული პასუხი არ არის სრულყოფილი. სამწუხაროდ, პრესცენტრის მიერ შემოთავაზებული ფორმა – წერილობითი ინტერვიუ რესპონდენტთან ჩაკითხვის შესაძლებლობას გამორიცხავს. 

პოლიციელები, რომლებიც დაითხოვეთ სამსახურიდან, რის საფუძველზე გაუშვით – პირადი მოსაზრებით, თუ ხელთ გაქვთ მტკიცებულება, რომ მათ ჩაიდინეს გარკვეული სახის გადაცდომა ან დანაშაული?

ყველა თანამშრომელი დათხოვნილია საკუთარი სურვილით, მათ მიერ დაწერილი პატაკის საფუძველზე.

 

თუ გაქვთ ისეთი შემთხვევა, რომ პოლიციელების მიმართ აღიძრა სისხლის სამართლის საქმე?

პოლიციელების მიმართ გამოძიებას იწყებენ და აწარმოებენ პროკურატურის ორგანოები ან შსს გენერალური ინსპექცია, ამიტომ მე არ მაქვს ინფორმაცია.

 

სასამართლო პროცესებიდან ჩემთვის ცნობილია, რომ 21 მაისის აქციის დარბევის ფაქტი გამოიძია მთავარმა სამმართველომ. კონკრეტულად რომელი სამსახური იძიებდა ამ საქმეს და ვინ ხელმძღვანელობდა გამოძიებას. ეს ადამიანი თუ აგრძელებს მუშაობას პოლიციაში?

21 მაისს ტელევიზიასთან მომხდარ ინციდენტის ფაქტს იძიებდა დეტექტივების სამმართველო. გამოძიების ხელმძღვანელობას, ისევე როგორც სხვა ნებისმიერი საქმეს, ახორციელებდა პროკურატურა, კონკრეტულად აჭარის პროკურატურის განყოფილება.

 

21 მაისის აქციის დარბევის შემდეგ, მაგალითად, ოპერატიული მუშაკი გელა ხარჩილავა, მთავარი სამმართველოს უბნის უფროსი ინსპექტორი შოთა გიორგაძე და კიდევ დაახლოებით 45 პოლიციელი სასამართლოში წარდგენ, როგორც მოწმეები. ისინი ამტკიცებდნენ, რომ აქციის მონაწილეებმა პოლიციელები სცემეს… ისინი დაითოხვეთ თუ ისევ აგრძელებენ მუშაობას (21 მაისის აქციის შემდეგ დაპატიმრებულები საქართველოს პარლამენტმა პოლიპატიმრებად ცნო – ავტ.) ?

 

ეს ორი პიროვნება მუშაობს ამჟამადაც, თუმცა ჩემთვის უცნობია, ეს პირები გამოდიოდნენ თუ არა მოწმეებად ამ საქმეზე, ვინაიდან იმ პერიოდისთვის ამ თანამდებობაზე არ ვმუშაობდი. რამდენადაც მაქვს ინფორმაცია, აღნიშნულ საქმეზე გამოძიებას პროკურატურა კურირებდა და საქმე სასამართლოშია გადაგზავნილი.

 

არაერთი ყოფილი პოლიციელი ამბობს, რომ მთავარი სამმართველოს კადრების განყოფილებამ წინა ხელისუფლების პირობებში მათ, როგორც სისტემისთვის „არასანდო“ თანამშრომლებს, აიძულა სამსახურიდან წასვლა. თუ მოგმართეს ამ ადამიანებმა სამსახურში აღდგენის თხოვნით?

 

განცხადება აღნიშნული მიზეზით აღდგენასთან დაკავშირებით არ შემოსულა. ამ ადამიანებმა უნდა მიმართონ სასამართლოს, პროკურატურას ან გენერალურ ინსპექციას, თუ დადასტურდება იძულების ფაქტები. მე გპირდებით, ისინი აღდგენილი იქნებიან სამსახურში, ხოლო – დამნაშავეები დასჯილი.

 

შეეხო თუ არა სამმართველოში გატარებული საკადრო ცვლილება აჭარის მთავარი სამმართველოს კადრების განყოფილებას?

არ შეხებია.

 

არასამთავრობო ორგანიზაცია „დემოკრატიის ინსტიტუტმა“ განაცხადა, რომ ძალოვან უწყების ხელმძღვანელები არ ენდობიან როგორც ადგილობრივ მოსახლეობას, ისე ადგილობრივ პროფესიონალებს, რაც იმაში გამოიხატება, რომ აჭარის ძალოვანი უწყების პირველი პირები, მათ შორის პოლიციაშიც, არადგილობრივი კადრებით კომპლექტდა. რა განმარტებას გააკეთებთა ამ შეფასების თაობაზე?

770 თანამშრომლიდან 6 თანამშრომელია არაადგილობრივი მაცხოვრებელი, დანარჩენი ადგილობრივი კადრია, მათ შორის ხელმძღვანელი პირებიც.

 

ადგილობრივი მესამე სექტორის ცნობით, აჭარის რეგიონის მცხოვრები არც ერთი პროფესიონალი არც ერთ რეგიონში არ არის მიწვეული. თქვენ თუ შეგიძლიათ ამ ინფორმაციის უარყოფა, ანუ არიან პოლიციის რიგებში ისეთი ადამიანები, ვინც აჭარიდან ქვეყნის სხვა რეგიონში გადაყვანილნი არიან, მაგალითად, რომელიმე რეგიონის სამმართველოს პირველ პირად?

აღნიშნულთან დაკავშირებით არ ვფლობ ინფორმაციას, ვინაიდან  ჩემს კონპეტენციაში არ შედის.

 

კითხვები მოამზადა და შს სამინისტროს პრესცენტრს გადაუგზავნა ეთერ თურაძემ

ნეტგაზეთის მასალების სხვა გამოცემებში გადაბეჭდვის წესი
Nana Kvachadze